ب بەهانەیا بجهــ نەئینانا رێکەفتنا دەربارەی رەوشا کەرکووکێ و دانا پارێزگارەکێ کوردێ یێ ئێکەتی ، فراکسیۆنا ئێکەتیێ ئەڤرۆ ۲۸/٥/۲۰۱۹ پشکداری ل کۆمبوونا پەرلەمانێ کوردستانێ نەبوو ، بۆ هەلبژاردنا رێزدار نێچیرڤان بارزانی وەک سەرۆکێ هەرێمێ .
ئێکسەر پشتی کۆمبوون بسەرکەفتیانە بداوی هاتی و سەرۆکێ هەلبژارتیێ هەرێمێ دەنگێن پێتڤی بدەست ئینای ، سەرکردایەتی و سازیێن ڕاگەهاندنا ئێکەتیێ پارتی دیموکراتی کوردستان ، ب بجهـ نەئینانا رێکەفتنا تاوانبار کر ، ب تایبەت دەربارەی کەرکووکێ و ب رۆندکێن تیمساحی چاڤێن خۆ کۆرەکرن و دڤێت خەلکێ کەرکووکێ و کوردستانێ ژی ل دیتن و زانینا ڕاستیا کۆرە بکەت .
وە هزر دکەت هێشتا خەلکێ کوردستانێ د جیهانەکا تاریدا دژیت و راستیا نابینیت ..!
دیارە سەرکردایەتی و راگەهاندنا ئێکەتی نزانیت کۆ ، سەردەم سەردەمێ دیکۆمێنتاریا بەڵگەناما و لبەرچاڤ گرتنا رەفتار و هەڵویستا یە .
ئەگەر ئێکەتی د خەما داگیرکرنا کەرکووکێ و دەڤەرێن کوردستانی یێن دەرڤەی ئیدارا هەرێما کوردستانێ با ، د چەند دەم ژمێرەکا ئێکەتیێ بۆ بەرژەوەندێن بەرتەسکێن حزبی و کەسی و بجهـ ئینانا ئەجندایێن داگیرکارا ، کەرکووکا دلێ کوردستانێ نەدفرۆت و ب خیانەتا نشتیمانی دەسهەڵاتا داگیرکاری لسەر نە دسەپاند .
ئەگەر خەما ئێکەتیێ دانانا پارێزگارەکێ کوردێ نشتیمان پەروەر با ، باشترین کاردێ خۆ یێ وەڵات پارێز و پارێزگارێ کەرکووکێ ( نجم الدین کریم ) لسەر ریفراندۆمچیێ و پارێزەریا کوردستانیبۆنا کەرکووکی دناڤ ڕێزێن خۆ دەرنە دکر و پاشان ب پاڵپشتیا میلشیایێن حزب و للا یێن سەر ب ئیرانێ وەکێ تاوانبار رادەستی حکومەتا عیراقێ نەدکر ..!
ئەگەر خەما ئێکەتی بهێزکرنا هەرێما کوردستانێ و پارستنا ڤێ ئەزمۆنێ و ئاڤاکرنا حکومەتەکا ئێکگرتی با ، زێدەتر هەشت هەیڤایە ، هەر جار ب هندەک مەرج و داخازیان نە دهاتنە دناڤ دانۆستاندنێن پێک ئینانا کابینا نوو دگەل پارتی ..!
یان ژی نەدبۆنە پشکەک ل هێزێن داگیرکاری بۆ ژناڤبرنا قەوارێ هەرێما کوردستانێ ..!
ئەگەر ئێکەتی حزبەکا رێکخستی یا خۆدان سەرکردایەتی با ، بریار و پاشەرۆژا وێ دا د دەستێ مەکتەبا سیاسی یا وێ دا بیت ، نەک د دەستێ هندەک هەرزەکارێن سیاسی پێن بێ پلە و بۆست و داکۆکی کارێن بەرژەوەندێن خۆ یێن تایبەت ..!
ئەگەر ئێکەتی ، ئێکەتی با دا شێت د ئێک رۆژ دا کاندیدێن خۆ ئێک لاکەت بۆ پۆستێن هەرێمێ و حکومەتێ ..!
ئەگەر ئێکەتی ، ئێکەتیا کوردستانی با ، دا خودان پرنسیپێن نەتەوی و نشتیمانیێن کوردستانی بیت ، نەک دیڤەلانکێن ڤی وەڵاتی و وەڵاتێ هەنێ و هەوڵا برسیکرنا خەلکێ کوردستانێ دەت ...!
ئەگەر ئێکەتی ، کەرکووکێ ب کوردستانێ ب بینیت ، هەڤپشک و هەڤپەیمانێن پارێزگارەکێ عەرەبێ سەپاندی لسەر کەرکووکێ نە دبۆ ، بۆ هەوێن بەرفرەهــ یێن بعەرەب کرنا وێ و دەرکرنا کوردێن ڕەسەن لسەر گۆند و باژارێ خۆ ..!
و ......هند
ئەڤ هەمی ڕەفتار و سەرەدەریێن ئێکەتیێ دیار دکەن کۆ ئێکەتی نە ژبۆ بەرژەوەندێن خەلکێ کوردستانێ و گەهشتن ب مافێن خۆ یێن ڕەوا و دابینکرنا ئازادی و دیموکراسیێ و ئێمانیێ و ئاڤەدانیێ کار دکەت .
هەولێن وێ ژبۆی چاندنا تۆڤێ دووبەرەکیێ و نە سەقامیریێ نە ..!
خەلکێ کوردستانێ ژی ڤێ راستیێ دازانیت ، لەوما رۆژ بۆ رۆژێ سەنگا وێ یا جەماوەری بەرەڤ کێمیێ دچیت .
پشت راستم پارتی و سەرۆکێ هەرێمێ ل قۆناغێن داهاتی ، ل تۆلڤەکرنا ئێکەتیێ ناگەرێت و هەمی هەولێن وێ دێ بۆ ئێکرێزیێ و ئێمناهیێ و ئاڤەدانیێ و بهێزکرنا کوردستانێ بن .
سەرۆکێ هەڕێمێ رێزدار نێجیرڤان بارزانی دێ کلیلا ڤەکرنا چەندین دەرگەهێن دیتر بیت ، بۆ خورتکرنا پەیوەندیێن هەرێمێ دگەل جیهانێ و دابینکرنا پشتەڤانیا نیڤ دەولەتی و چەسپاندیا ئاشتەوایا جڤاکی و سەروەریا یاسایێ .
کابینا نوو یا حکومەتا هەرێمێ ژی ب سەرۆکاتیا رێزدار مەسرۆر بارزانی ، دێ کابینا چاکسازیا و ڤەژاندنا ئابۆری و ئێمانیێ و ئاڤەدانیێ بیت . ئەڤەژی مەزنترین دلتەنگیە بۆ داگیرکار و نەیاریێن کوردستانێ و ئێکەتی پشکەکە ل وان .
پیرۆزە سەرکەفتنا پرۆسا هەلبژاردنا سەرۆکێ کاریزما نێچیرڤان بارزانی و پێک ئینانا حکۆمەتێ ژی یا نێزیکە ، کۆ هەردوو تمامکەرێن ئێکن ، بۆ خزمەتا کورد و کوردستانێ لسەر ڕێبازا پیرۆزا بارزانی نەمر ، کۆ ڕێبازا ئاشتی و ئازادی و دیموکراتی و پێکڤە ژیان و دادوەریێ و سەروەریا یاسایێ یە .