ئه‌مریكا، ئه‌و وه‌لاتێ ب سه‌ردارێ جیهانێ دهێته نیاسین، پشتى سه‌رهلدانا گه‌لێ كورد ل بهارا 1991 و تاكو نها خوه‌دان په‌یوه‌ندیێن ب هێز بوویه ل گه‌ل هه‌رێما كوردستانێ، ئه‌ڤ په‌یوه‌ندى هیبچ ده‌مه‌كى وه‌كو گۆما ئاڤێ نه‌راوه‌ستیایه، به‌لكو هه‌موو ده‌ما د گهۆرین و پێشڤه چوونێ دا بوینه، ب تایبه‌تى ل 15 سالێن بۆرى یێن سه‌رده‌مێ حكومرانیا نێچیرڤان بارزانى سه‌رۆكێ حكومه‌تا هه‌رێما كوردستانێ، ئه‌ڤ په‌یوه‌ندیه وه‌رچه‌رخانه‌كا مه‌زن بخوه ڤه دیتن، چونكى رۆژ بۆ رۆژێ پشته‌ڤانی و هاریكاریا ئه‌مریكا بۆ هه‌رێما كوردستانێ پتر دبن و هه‌ر ئه‌ڤه ژى وه‌كریه كو ئێمناهیا هه‌رێما كوردستانێ ل ده‌ف ئه‌مركیا ببیته هێلاه‌كا سۆر و سنوره‌ك بۆ ده‌ستدرێژى و هێرشێن وه‌لاتێن ده‌وروبه‌رێن هه‌رێمێ بهێته دانان. ژ روویێ ئابوری ڤه نێچیرڤان بارزانى سه‌رۆكێ حكومه‌تا هه‌رێمێ شیا باوه‌ریه‌كا وه‌ها ل ده‌ڤ وه‌لاتێن بیانى ب گشتى و ئه‌مریكا ب تایبه‌تى دروست بكه‌ت كو نها ب ده‌هان كۆمپانیێن وان یێن بازرگانى و وه‌به‌ر‌هێنان و ده‌رخستنا په‌ترۆلێ ل هه‌رێمێ كاردكه‌ن، ئیدى ب وێ كاركرنێ د كێلگه‌هێن په‌ترۆلا هه‌رێمێ، هه‌رێم بوویه خوه‌دان داهاته‌ك كو ل ده‌مێ قوتكرنا به‌شه بۆدجه‌یا هه‌رێمێ ژ لایێ به‌غدایێ ڤه ژى، حكومه‌تا هه‌رێمێ هه‌ر شیا بۆ ده‌مه‌كى خوه رابگریت و به‌شه‌كێ موچه‌ى دابین بكه‌ت. هه‌روه‌سا نها ئه‌مریكا مژوولى ئاڤاكرنا مه‌زنترین ئاڤاهیا كونسلخانا خوه یه ل سه‌ر ئاستێ جیهانێ ل هه‌ولێرێ، ب وى ره‌نگى ل هیچ وه‌لاته‌كێ دنیایێ كۆنسلخانه و بالیۆزخانا ئه‌مریكا وه‌ها مه‌زن نینه، ئیدى ئه‌ڤه هه‌موو به‌لگه‌یێ گرنگى و دوستاتیا ناڤبه‌را هه‌ولێرێ و واشنتۆنێ نیشان دده‌ت. شه‌رێ داعشێ و هێزێن هه‌ڤپه‌یمان1ژى ب سه‌رۆكاتیا ئه‌مریكا نابیت بهێته ژبیركرن، چونكى ئه‌و بوونه ئه‌گه‌ره‌كێ بهێز ل پشت سه‌ركه‌فتنێن پێشمه‌رگه‌ى ب سه‌ر داعشێ و ب فرۆكه و چه‌كێن خوه و تیمێن راهێنانێ یێن سه‌ربازى به‌رده‌وام ل پشت پێشمه‌رگه‌یێن كوردستانێ راوه‌ستیان، هه‌تا گه‌هشته وى رادى، وه‌زاره‌تا به‌رگریا ئه‌مریكا د پشكا هاریكاریێن وه‌لاتان دا، بۆ ده‌ما دو سالانه به‌شه بۆدجه‌كێ بۆ هێزێن پێشمه‌رگه‌ى ته‌رخان دكه‌ت. ئه‌ڤه هه‌مى ل سه‌ر ده‌مێ نێچیرڤان بارزانى سه‌رۆك وه‌زیرێ هه‌رێما كوردستانێ روودان، كه‌واته داوى په‌یوه‌ندیا جێگرێ سه‌رۆكێ ئه‌مریكا مایك پێنس ل گه‌ل نێچیرڤان بارزانى سه‌رۆكێ حكومه‌تا هه‌رێمێ ژى، هه‌ر بۆ بهێزكرنا وێ په‌یوه‌ندییێ بوویه كو پێشتر نێچیرڤان بارزانى د كابینه‌یێن ئێك ل دووڤ ئێكێ خوه دا به‌رێ بنیاتیێ بۆداناى. چونكى جیۆسیاسیا هه‌رێما كوردستانێ بۆ ئه‌مریكا گه‌له‌ك گرنگیا خوه هه‌یه، هه‌رێما كوردستانێ دكه‌ڤیته جهه‌كى كو ئه‌مریكا په‌یوه‌ندیا ئالۆز و نه‌لبار ل ده‌وروبه‌رێ وێ هه‌یه
کارزان فەقێ
