"جبران خەلیل جبران" لە بارەی ڕەشبینیەوە دەڵێت: (ڕەشبین لەو ژیانەدا هیچ نابینێ، جگە لە سێبەری خۆی).
جا ئەم گوتراوەجوانەی جبران بۆ ئەمرۆی بەشێک لە دونیایی ڕۆشنبیریی و بەشیک لە هێزە ساسییەکان و کەناڵەکانی میدیا لە کوردستان دروستە، تۆ تەنها ٢٤ کاتژمێر لە ژینگەی میدیایی و بەرهەمی بەشێک لە نووسەرانی شەونامەنووسی دۆزەخ خولقێنەکان وردببەرەو و ڕابمێنە، ئەوکات دەزانی لەم کۆمەڵگایەدا چی بەمیدیا دەکرێت!چی وەزیفەیەکی شەڕەنگێز و کوشندە بە میدیا سپێردراوە، چۆن بەشێک لە تۆڕە کۆمەڵایەتیەکان کاروەتە شوێنی پروپاگەندە و واتەوات، بڵاوکردنەوەی هەواڵی ناڕاست و پێچەوانە بە بەرژەوەندی گشتی،بەشێک لە نووسەرانی ڕەشبین و چاودێرانێکی سیاسیی چۆن بە حوکمە پێشوەختەکانیان دامان دەخورپێنن، تۆبڵێ: (لە گوزارە و پەیڤەکانیاندا هەواو هەوەسی تایبەتی دەخەنەکار، بەرژەوەندییە کەسی و حیزبیەکانیان دەگشتێنن) دەزگا گەلێک کاردەکەن بۆ ئەوەی لە بنەوەڕا وەسەوەسە و خەیاڵاتی بەد لە کۆمەڵگادا بچێنن، کۆمەڵگا بەگشتی و جیلو نەوەی نوێ بەتایبەت کراوەتا ئامانج، کەرەستە و میکانیزم و گوتاریی ئەوان لەسەر بنەمایەکی ساویکانە ڕۆنراوە، لەسەر یاریکردن و ختوکەدانی خەیاڵی خەڵکی سەرجادە ئیشیکردەو و دەکات، ئەوان باوەڕیان وایە ئێمە بە مێژوویەکی لێوان لێو لە دۆڕان و شکستا هاتووین بۆ ئێرە، ئەوان دەڵێن ئێمە لەدەرەوەی مێژووەوە دەچین بۆ دەرەوەی مێژوو، ئێمە خۆمان بەرپرسیاری یەکەم و کۆتایی نەهامەتیەکانین، زۆرجار و لە زۆر بەرهەمیاندا دوژمنان و دیکتاتۆرەکان دەبەخشن لەوەی هەڵەیەکیانکردبێت، بەبۆچوونی کەچبینانەی ئەوان، ئەوە کورد خۆیەتی هۆکاری کیمیاباران و ئەنفال و ڕەشەکوژکردنی خۆیەتی، ئەوان دەیانەوێت مێژوو ئاوەژوو بکەن، مێژوو بە جۆرێک بنووسنەوە کە قورابانیەکان بکەنە جەلاد و جەلادەکان وەک قوربانی نیشانبدەن یان لانیکەم بیانبەخشن لە تاوانە قێزونەکانیان، بەخشین لەو هەموو تاوانە گەورانەی ئەوان بکەر و ئەنجامدەرین، بەخشینی دیکتاتۆرەکانی جەنگ و خوێن، خولقێنەرانی ئانفال و کیمیاباران و جینۆساید.
ئەوان هیچ وێنەیەکی ئیجابی و بزوێن لە کۆمەڵگای کوردستاندا نابینن، بەدبینن بە کۆی کایەکانی ژیانکردن لە کۆمەڵگای کوردستاندا، لە دید و ڕوانینی ساختەی ئەواندا لەم هەرێمەدا کەئەوان بەجەنگەڵستان ناوی دەهێنن هیچ شتێک نابریسکێتەوە تا سەرەنجی مرۆڤ ڕابکێشیت، تا هیواو ئومێدی لەسەر هەڵبچنین، بەناوی لاگیریی لە کرانەوە و بە مەدەنیکردنەوە، کۆمەڵگا دۆڵپێچی تاریکستان دەکەن، لەژێر دێری نووسینەکانیاندا، لە ژێر بینیە ژێروانکێکانیاندا حوکمی ڕەهاو پێشوەخت دەدەن، لە پشتی هاناسەکانیاندا، پێماندەڵێن کە ئەوان لە جیاتی کۆمەڵگای کوردستان و لە پێناو چاکەی گشتییدا دەجەنگن! بەناوی مرۆڤدۆستیەوە تۆوی مەرگدۆستی دەچێنن. جگەلە کۆمەڵگای مەرگ و زوڵمەت ئەوان وێنەیەکیتر و گۆشەیەکیتر نابینن.
بەکارهێنانی تەواوی کەناڵەکانی مێدیا و ژانەرە رۆژنامەوانی و ئەدەبینەکان بۆ بێهیواکردن و ڕووخاندنی متمانەی جەماوەر، یەکێکیتر لە ئامرازە کوشندەکانی نائومێدی بەخشینەوە ژانەرە ئەدەبیکانە، ئەمەش لە ڕێگای قوتابخانە ئەدەبیەکانی پوچگەری (ئەپسێرت)، بەکولتوورکردن و مۆبیلەزەکردنی ئەدەبی بێهیوایی، بۆ ئەوەی خوێنەرانی ئێمە کە بەپێی پێکهاتی کۆمەڵگای کوردستان، زیاتر خوێنەرانمان خوێنەری بابەتە ئەدەبیەکانە، لە ڕێگەی چیرۆک و ڕۆمان و نۆڤڵێت و شیعر و ژانەرە ئەدەبیەکانیترەوە غەرقی زوڵمەت بکەن.
پراسی بێمتمانەکردن و شلوێ کردنی فەزای گشتی کۆمەڵگاو پەرتکردنی کۆدەنگی لەسەر پرسە نیشتمانیە چارەنووسسازەکان، گرتنەبەری هەموو ڕێگایەکی پۆخڵ بۆ ئەوەی ئەو گروپ و باندانە بگەنە ئامانجە کەسی و نادروستەکانیان، دەهێنێت گرنگی و بایەخی زیاتر بدین بە ڕۆڵی تاریکپەرستانەی ئەوتاقم و گروپانەی کار بۆ بە دۆزەخکردنی کۆمەڵگادەکەن لە پێناو مەرامە پۆخڵاکانیاندا. باشترین دەروازە و دەریچەش بەردەومیدانە بە گفتوگۆی عەقڵانییانە، تا ئەوەی لە ڕێگای هێزی لۆژیکەوە کۆمەڵگای کوردستان بەرەو کەناری ئارامی بچێت.