کاتێ بەرهەم ساڵح سەردانی شاری موسڵی کرد، پەیج و سایت و میدیاکانی یەکێتی چاوەڕوانی ئاکامی سەردەنەکە و گەڕانەوەی بەرهەم ساڵحیان نەکرد و وەک نۆ هەنگیان لە دارێکدا دۆزیبێتەوە کەوتنە هەرای شانازی کردن بەو پێشوازیەی گوایە لە بەرهەم ساڵح کراوە, هەرای میدیاکانی یەکیتی بە شێوەیەک بوو وەک ئەوەی جێبەجێ کردنی ماددەی ١٤٠ی دەستووری جێبەجێ کردبێ و کەرکوک و ناوچە دابڕێنراوەکانی تری گێڕابنەوە سەر هەرێمی کوردستان، یان دەستکەوتێکی مێژوویی بۆ کورد دەستەبەر کردبێ.
دوای ئەوەی خەڵکی موسڵ ئەو سووکایەتیەیان بە بەىرهەم ساڵح کرد و وەک بینیمان جنێوبارانیان کرد و بە پەلەپروزێ رزگاریان کرد, هەمان ئەو پەیج و سایت و میدیایانەی یەکێتی گلەیی لە هەندێ پەیج و سایتی پارتی دەکەن گوایە سووکایەتی پێکردنی بەرهەم ساڵح لەوە گەورەتر دەکەن کە هەبووە.
لەسەرەتاوە من لەگەڵ پیاهەڵدانی پەیج و سایت و میدیاکانی یەکێتی نەبووم کە ئەو سەردانەی بەرهەم ساڵح بۆ موسڵ یان هەر شارێکی تری عێراق بە دەستکەوتێکی ئەوەندە گەورەی لێک بدەنەوە، چونکە ئەو بەناو سەرۆک کۆماری عێراقە و ئاساییە سەردانی موسڵ یان سەردانی هەر شار و شارۆچکەیەکی تری عەرەب نشینی عێراق بکات و پەیج سایت و میدیاکانی یەکێتی بۆ کورد بە دەستکەوتی بزانن و وەک موزایەدەی سیاسی بە لایەنێکی تری کوردی بفرۆشنەوە، بە هەمان شێوە لەگەڵ هیچ پەیج و سایتێکی پارتی یان هەر حزب و لایەنێکی تری کوردی نیم بەو سوکایەتی و جنێوبارانەی بەرهەم ساڵح خۆشحاڵ ببن، لەبەر هیچ نا، لەبەر ئەوەی بەرهەم ساڵح ئەگەر هەستی کوردایەتیشی نەمابێ، ئەوا زمانی کوردی دەزانێ و بە هۆی ئەوەی کوردی دەزانێ سووکایەتی پێکردنی لە ناخەوە ئازارم دەدا.