ئەو قۆناغە هەستیارەی ئێستا بزووتنەوەى رزگاریخوازی خەڵکی کوردستانی پێدا تێدەپەڕێ و ئەو دوژمنگەلەی لە چوار دەورەوە هەرشەی لە بوونی کورد دەکەن، لە حزب و لایەنە سیاسیەکانی کوردستان دەخوازێ لە هەموو کۆبوونەوە و گفتوگۆکان بۆ رێککەوتن یەکهەڵوێست بن و لەناو بەرژەوەندیە نەتەوەیی و نیشتیمانیەکاندا بۆ بەرژەوەندی حزبی بگەڕێن, بەڵام حزب و لایەنە سیاسیەکان نەک بەو ئەرکە نەتەوەیی و نیشتیمانیە هەڵنەستاون، بەڵکو بە پێچەوانەیانەوە بەرژەوەندیە نەتەوەیی و نیشتیمانیەکانیان لەناو بەرژەوەندیە حزبیەکاندا ون کردوون, ئەگەر بە راشکاوی و دوور لە هەر رق و سۆزێک باس لە هەڵوێستی حزبخوازی حزبەکان بکەین، یەکێتی ئەوەندە حزبخوازانە هەنگاو دەنێ حزبەکانی تریشی ناچار کردوون کە حزبخوازانە هەنگاو بنێن.
لەوەش خراپتر ئەوەیە لەناو حزبێکیشدا بەرپرسەکان بەرژەوەندی تاکە کەسی خۆیان بخەنە سەرووی بەرژەوەندی حزبەکەیان، یەکێتی بەو دەردەش گرفتار بووە و بۆتە چەند باڵێک و هەر باڵە و بە پێی بەرژەوەندی باڵەکەی خۆی بڕیار دەدات، بەوەش کێشەی ناو باڵەکانیان گواستۆتەوە ناو ماڵی کورد، جا بۆ رازی کردنی باڵەکان و درووست کردنی بەرژەوەندی بۆ کاراکتەرەکانیان کێشەیان بۆ پێکهێنانی حکومەتی هەرێمی کوردستانیش درووست کردووە.
ئێستا یەکێتی بە (٢١) کورسی داوای پۆستی سەرۆکی پەرلەمان و جێگری سەرۆکی هەرێم و جێگری سەرۆکی حکومەت و وەزارەتی ناوخۆ و وەزارەتی سامانە سروشتیەکان و وەزارەتی پلاندانان و وەزارەتی شاروانی و فەرمانگەی پەیوەندیەکانی دەرەوە و چەندین پۆستی تر دەکات, ئەوەش ئەو نوکتەیەی خوارەوەم بیر دەخاتەوە.
دەگێڕنەوە کابرایەک خەریکی نان خواردن دەبێ و پشیلەیەک بەرامبەری هەڵدەتوتەکێ دەست دەکات بە میاوەمیاو، هەر جارێک پشیلەکە دەمیاوێنێ کابرا کوتە گۆشتێکی بۆ هەڵدەدات، تا وای لێدێ کابرا بێزار دەبێ و قاپە گۆشتەکە دەباتە پێش پشیلەکە و دەڵێ: ئەتۆ فەرموو ئەمن میاو, یەکێتیش لە هەر کۆبوونەوەیەکی لەگەڵ پارتی سەقفی داواکاریەکانی بەرز دەکاتەوە، بەو هۆیەوە پارتی بە دەردی کابرا گرفتار بووە و ئەوەی بۆ ماوەتەوە هەموو پۆستە وەزاریەکان لە پێش یەکێتی دابنێ و بڵێ: ئەتۆ فەرموو ئەمن میاو.