كارزان فه‌قى
ل شه‌ڤا 18ى شوباتێ مه‌كته‌با سیاسى یا ئێكه‌تێ به‌یاننامه‌یه‌ك ل دۆر روونشتنا په‌رله‌مانێ كوردستانێ به‌لاڤكر و ئه‌و بریارا روونشتنا په‌رله‌مانێ كوردستانێ ب بریاره‌كا نه‌ به‌رپرسانه‌ ب ناڤكر، ل هه‌مبه‌ردا راگه‌هاندبوو كو ئێكه‌تى رژده‌ ل سه‌ر دانانا پارێزگه‌ره‌كێ ئێكه‌تێ بۆ كه‌ركووكێ، و ب ئێك پاكێجیا حكومه‌تا نوو و به‌غدا و كه‌ركووك نه‌بیت، ئه‌و رازى نابن، كه‌واته‌ دڤێت ئه‌م بزانین كیژان پێنگاڤ نه‌به‌رپرسانه‌یه‌، روونشتنا یاساییا په‌رله‌مانێ كوردستانێ یان 16 ئكتۆبه‌رێ و ژ ده‌ست دانا كه‌ركووكێ؟ كورد ل پارێزگه‌هه‌كێ ده‌ستهه‌لاتدار و خوه‌دان مال بن، پاشان ب رێكه‌فتنه‌كێ وی پارێزگه‌هێ ب حه‌سه‌ن پلاس و ئه‌بۆ عزرائیل بفرۆشن؛ بریاره‌كا نه‌ به‌رپرسانه‌یه‌ یان رۆنشتنا په‌رله‌مانێ كوردستانێ كو پترى 4 مه‌هانه‌ خه‌لكێ هه‌رێما كوردستانێ ده‌نگ بۆ داى و هێشتا به‌رهه‌مێ ده‌نگێ خوه‌ نه‌دیتی، له‌ورا خه‌لك به‌رهه‌مى ڤان هه‌ردوو بریاران باش دبینیت و دزانیت ل 16ى ئكتۆبه‌را 2017 چ چێبوو و ل 18ى شوباتا 2019 چ روودا؟ كه‌واته‌ ئه‌گه‌ر ئالۆزكرنا ره‌وشا هه‌رێما كوردستانێ ل ده‌ستـێ ئێكه‌تیێ دا كارته‌ك‌ بیت بۆ نه‌چاركرنا پارتى بۆ ب جهئێنانا داخوازیێن وان، بێ دوو دلى پارتى دێ بژارده‌یه‌كا دى هه‌بیت، چونكى قوناغا نها یا هه‌رێما كوردستانێ و ئیراقێ ب گشتى وه‌كو یا سالێن نۆتان نینه‌ جاردن هزر د دوو ئیداره‌ و دوو حكومه‌تیێ بهێته‌ كرن، ئێكه‌تى پتر ژ پارتى ڤێ یه‌كێ دزانیت، چونكى نه‌ به‌غدا سه‌ره‌ده‌ریێ ل گه‌ل ئیداره‌یا سلێمانێ دكه‌ت، و نه‌ژى د ده‌ستورێ ئیراقێ دا رێك ب هندێ هاتیه‌ دان. ئه‌ڤه‌ ل سه‌ر ئاستێ ناڤخوه‌، هه‌روه‌سا ل سه‌ر ئاستێ ده‌رڤه‌ ژى هه‌رێما كوردستانێ خوه‌دى پێگه‌هـ و ناڤ و ده‌نگیا خوه‌یه‌ و بۆ وه‌لاتێن جیهانێ؛ ئارامى و ئێك رێزیا هه‌رێمێ گرنگه‌، له‌ورا ئێكه‌تى خوه‌ نائێخیته‌ ناڤا وێ گێلۆشۆكێ دا. نها و پشتى روونشتنا په‌رله‌مانێ كوردستانێ و هه‌لبژارتنا ده‌سته‌یا سه‌رۆكاتیا په‌رله‌مانى، گهۆرینه‌ك ب سه‌ر هه‌لوێستێ ئالیێن سیاسى دا هاتیه‌، ب وى ره‌نگى كو ئێكه‌تێ به‌ربژار ژ بۆ پۆستێ سه‌رۆكێ هه‌رێمێ ده‌ست نیشان كریه‌، دده‌مه‌كى پارتى پێشتر نێچیرڤان بارزانى ژ بۆ پۆستێ سه‌رۆكێ هه‌رێمێ ده‌ست نیشان كربوو، بۆ ڤێ هه‌لبژارتنا سه‌رۆكێ هه‌رێمێ دوو بژارده‌ ل به‌رده‌ست هه‌نه‌، یان ل سه‌رۆكێ هه‌رێمێ ل په‌رله‌مانى بهێته‌ هه‌لبژارتن، یان خه‌لك ب رێكا سندۆقێن ده‌نگدانێ سه‌رۆكى هه‌لبژێرن، ئێكه‌تى ڤان هه‌ردوو رێكان ژى ره‌ت دكه‌ت و دزانیت كاندیدێ وى نكاریت ركابه‌ریێ ل گه‌سه‌كى بكه‌ت و كو پێشتر رۆله‌كێ مه‌زن بنیاتنان و ئاڤه‌دانیا هه‌رێما كوردستانێ دا هه‌بوویه‌، د هه‌مان ده‌م دا ل ده‌ف خه‌لكى ژى رۆهن و ئاشكه‌را بوویه‌ كو پێنگاڤا ته‌سلیم كرنا كه‌ركووكێ نه‌به‌رپرسانه‌ بوویه‌ و یا كو ژئالیێن نێچیرڤان بارزانى پشتى خیانه‌تا 16ى ئكتۆبه‌رێ هاتیه‌ كرن، ئه‌و ئه‌ركێ درست یێ به‌رپرسان بوویه‌ كو ملله‌ت ب ته‌نێ نه‌هێلاى و خوه‌ دایه‌ به‌ر شكاندنا وان دۆرپێچ و قه‌یرانان و هه‌تا كو ره‌وش ئاسایى كریه‌ڤه‌