یەکێتی بۆ کات بەڕێکرن و ئیدارەدانی کێشەی ناو باڵەکانی هەر رۆژە و بیانوویەک بە لایەنەکان و پرۆسەی سیاسی دەگرێ, بە پشتیوانی فراکسیۆنەکانی شیعە توانی پۆستی سەرۆک کۆمار وەربگرێ و بەرهەم ساڵح ئاشت بکاتەوە، بەوەش جیا لەوەی کۆمەڵێک سەرکردەی خۆی زویر کردن و لە ناویشیاندا مەلا بەخیتیار، یەکڕیزی لایەنەکانیشی لەباربرد و خۆشی پەراوێز خۆست، لە ١٦ی ئۆکتۆبەر ئەوەندە بە پەلەپرۆزێ کەرکوکی فرشت پێگە و مەکانەی خۆشی پێ نەپارێزرا و وەک دەبینین ژمارەی پاسەوانەکانی مەڵبەندیش دەبێ حەشدی شەعبی بۆی دیاری بکات، بەوەش کورد و کەرکوکیەکانی بەو نەهامەتیە برد کە پۆستی پارێزگاریشیان پێ وەرناگیرێتەوە و بۆ وەرگرنتەوەی سەر بە ماڵی پارتیدا دەکات.
کەرکوک کە لای پارتی دڵی کوردستانە و بە هیچ شێوەیەک دەستبەرداری نابێ و کوردستانی بوونی کەرکوکیش لە پۆست و پۆستکاریدا نابینێ، بۆیە هەرگیز ئامادە نییە کوردێک سەر بە هەر لایەنێک بێ زەلیلی بکاو بیکاتە کۆیلە و ئالەتی بەردەستی حەشدی شەعبی.
یەکێتی دوای ئەوەی دڵنیا بوو کە پارتی لە پێناو وەرگرتنی پۆستی پارێزگار ئامادە نییە بەرپرسێکی یەکێتی بکاتە کۆیلەی عەرەب و تورکمان بایکۆتی پرۆسەی سیاسی کرد، لەگەڵ ئەوەشدا یەکێتی بە هەڵەکانی خۆیدا ناچێتەوە و دەیەوێ هەڵە بە هەڵە چارەسەر بکات، ئەوەتا ئێستا لە شوێنی پۆستی سەرۆکی پەرلەمان داوای پۆستی سەرۆکی هەرێم دەکات.
گریمان پارتی بەو داوایەی یەکێتی رازی بوو، ئەوجار کێشەکە دەکەوێتە ناو باڵەکانی یەکێتی، کاندیدی پۆستی سەرۆکی هەرێم کێ بێ و سەر بە کام باڵە بێ؟ گریمان بە ناوبژی دۆستەکانیان لە تاران و بەغدا ئەوەشیان یەکلا کردەوە، دوای ئەوە کێشەیەکی تر سەرهەڵدەدا، سەرۆکی هەرێم دەبێ یان لەناو پەرلەمان هەڵبژێردرێ یان لەناو خەڵک و لەو دوو حاڵەتە بەدەر نییە، لە هەردوو حاڵەتەکەشدا یەکێتی دەدۆڕی و ناتوانێ ئەو پۆستە وەربگرێ، کەواتە باشترین رێگاچارە بۆ یەکێتی گەڕانەوەیەتی بۆ ناوماڵی کورد و کوردایەتی کردن و دەستبەردار بوونیەتی لە سیاسەتی عێراقچێتی.