کێ زیانێ دگەھینتە دەڤەرێن سنوری؟
کارزان فەقێ
داوی ئالۆزیا کو لھەرێما کوردستانێ ب گشتی و ل سنورێ پارێزگەھا دھۆکێ ب تایبەتی چێبووی، ئەو بوو د خوەنیشاندانەکا سنورێ دەڤەرا شێلادزێ ھێرشی سەربازگەھەکا تورکیا ھاتە کرن و ئەو سەر بازگەھـ سۆت، ھەلبەت پرس و گومان ل ڤێرێ ئەوە، ھەتا کو رۆژێن بەری وێ روودانی ژی، ھەموو بەرھەڤی بۆ ھندێ دھاتنە کرن کو خوەنیشاندانەکا مەدەنی بیت و وەکو نەرازیبوون بیت ل دژی وان ھێرشێن کو فرۆکەیێن تورکیا ب بەھانەیا ھەبوونا پەکەکێ دکەتە سەر خەلکێ وێ دەڤەرێ، لێ د راستی دا ژی پرسیار ئەوە بۆچی تورکیا دەڤەرا شێلادزێ بۆدومان دکەت؟ بەرسڤا ڤێ پرسیارێ بخوە دێ بیتە چارەسەر ژ بۆ خەلکێ وێ دەڤەرێ، چونکی تاکە بەھانەیا ل دەستێ تورکیا بۆ بۆردومانکرنا وان دەڤەران ئەوە، کو ھەبوونا پەکەکێ ب شێوەیەکێ ئاشکەرا ل وێ دەڤەرێ ھەیە، لەورا ئەگەر د خەما پەکەکێ دا نەبیت خەلک ل وان دەڤەران بژین یان ژی بۆ ھەڤرکیا پەکەکێ و تورکیا چۆل بکەن، ئەگەر بۆ پەکەکێ خەم نەبیت رۆژانە گەنجێن وێ دەڤەری ب بەر بۆردومانا فرۆکەیان بکەڤن ئیدی بۆچی ژبەر کو پەکەکە کوردە، خاترا وان ژ ئالیێ خەلکێ وێ دەڤەرێ بھێتە گرتن؟ تەماشەی دیرۆکا ھەلوێستێن پەکەکێ بکە ل ھەمبەر ھەرێما کوردستانێ، ھەموو دەما پەکەکە ل گەل ھەموو ئالییەکێ رێکەفتیە و تاکە ئالیێ کو پەکەک ل گەل رێکنەکەفتیە، کوردن، واتە پەکەکە ل گەل ھەر دوژمنەکێ کوردان رێک دکەڤیت لێ ل گەل کوردان ب گشتی و حکومەتا ھەرێما کوردستانێ رێک ناکەڤیتن، ئەڤە بخوە بەسە ژ بۆی کو ئەو بزانین ئەوا پەکەکە دکەت نەژبۆ وێ کوردینیێ یە یاکو ھەموو دەمان ل سەر ئەزمانێ وان دھێتە گۆتن، ل سالا ٢٠١٤ و ھەتا نھا ژی حکومەتا ھەرێما کوردستانێ ب فەرمی ژ پەکەکێ دخوازیت دەڤەرێن ھەرێما کوردستانێ چۆل بکەن و شەرێ خوە ڤەگوھێزنە ناڤا سنورێ تورکیا دا، لێ پەکەکە ئەڤە قەبوول نەکریە، و ب ئێک گوتارا حەیدەر عەبادی، پەکەکە ڤەکێشانا خوە ل شنگالێ راگەھاند، ژ بەر ھندێ رۆھن و دیارە کو نھا پەکەکە ژ ھێلا خوەیا سەرەکی لادایە و بوویە ئامرازەک ژ بۆ بەرژەوەندیێن تورکیا و ئیرانێ. نھا پتری ٥٠٠ گوندێن ھەرێما کوردستانێ ڤالا بووینە و خەلک و جۆتیارێن وان دەڤەران ژ بەر ھەبوونا پەکەکێ و بۆردومانا فرۆکەیێن تورکیا مال و زەڤیێن خوە یێن چاندنێ ب جھـ ھێلاینە، کەواتە گرنگە ئەم بزانین کو فرۆکەیێن تورکیا چەند زیان بۆ سەر مال و ملک و گیانێن خەلکێ ھەرێما کوردستانێ ھەبوویە، دوجاران ھندە و پتر ژی پەکەکە زیان بۆ سەر خەلک و گوند و مال و گیانێ خەلکێ دەڤەرێن سنوری ھەبوویە
