ل رێکەفتی ٣-١٢-٢٠١٨ و لکومبینا سەرکردایەتیا پارتی دیموکراتی کوردستان بەرێز مەسرور بارزانی وەک بەربژێرێ پارتی بو پێکئینانا کابینا نوی یاحکومەتا ھەرێمێ ھاتیە دەست نیشانکرن و بەرێز نێچیرڤان بارزانی بو سەروکاتیا ھەرێمێ ھاتیە بەربژارکرن و ھەر لوێ روژێ تا ئەڤرو زور پرس و بابەت ھاتینە تێکەلکرن و زور داخازی ھاتینە کرن کو دڤێت حکومەتا داھاتی یاھەرێمێ لسەر راوستیت و کار لسەر بکەت !! ئەڤجا ئەف چەندا ھە ببەرنامە دئێتەکرن بو پتر گرانکرنا بارێ کابینا داھاتی و حازرکرنا جادێ بو رویبریبونا وێ !! یان ژی بو وان ھیڤی و ئومێدێت بو خەلکی دروست بوین کو بارێ ئەمنی یێ ھەرێمێ و ساقمگیریا وێ کو بەرێز مەسرور بارزانی بەرپرسێ ئێمناھیێ بو رەنگڤەدانا خو ھەبیت لسەر حکومەتا و بابەتێ خزمەتگوزاریا و چارەکرنا کێشا !! لەورا ئەف فشارێت ھە د بارێ حکومەتێ زور گرانتر لێکەت و توشی بەرپسیارەتیەکا مازنتر بیت.
شک تێدا نوینە کو دکابینن حکومەتێ ین بەری نوکە و تایبەت ل چوار سالن دەربازبوی کو بەرێز نیچیرڤان بارزانی سەروکێ حکومەتێ بو کارێن مازن ھاتینە ئەنجامدان و بریارێن گرنگ ھاتینە دەرکرن و سەرەرایی وان ھەمی فشار و قەیران و شەرا و بارگرانیا ئاوارا و قەیرانا دارایی و فشارێن بەغدا حکومەتا ھەرێمێ شیا زورەک ژ وان قەیرانا چارەکەت و زورەک ژ وان بەربەستا و فشارا ژناف ببەت و خوراگر بیت بەرامبەر ھەمی کیشا و فشارا تایبەت پشتی سەروکێ ھەرێمێ رێزدار مەسعود بارزانی دەست ژ پوستێ خو بەردایی لدوماھیا سالا ٢٠١٧ و ئەو بارگرانیە ژی ھەر بو حکومەتا ھەرێمێ ما لەورا ئەو کاودانن سەخت و دژوار و قەیرانن مازن ین بەروکێ ھەرێمێ گرتین تایبەت پشتی خیانەتا ١٦ ئوکتوبەرێ و خوراگرتنا حکومەتا و دەربازکرنا وان کاودانا و شکاندنا ئابلوقا د بارێ کابینا داھاتی گران کەت کو ھەرێمێ ژ ڤێ قوناغێ بەرەف قوناغەکا باشتر ببەت.
ئەگەر د بەرنامێ حکومەتا داھاتی دا بریار ئەو بیت ژمارا وەزارەتان بێتە کێمکرن و جڤاتێن پارێزگەھا بێنە ھەلوەشاندن و جڤاتێن باژێرڤانیا بێنە خورتکرن و ببەرنامە و یاسا کار لسەر نەھێلانا گەندەلیێ بێتەکرن و بدروستی چاکسازی بچنە دبوارێ جێبەجێکرنێدا لوی دەمی پێتڤیە چەندین یاسا بێنە راستڤەکرن و ھەلوەشاندن برێیا پەرلەمانی و ئەڤێ چەندێ ژی پێتڤی خاندن و تێگەھشتنن نوی ھەیە و رێکەفتنن نوی دناڤبەرا لایەنن سیاسی و ئەڤە ژی د دەمەکێ زور پێ چیت تا دبنە یاسا و دەردکەڤن و دئێنە جێبەجێ کرن و د ڤان یاسا و گھورینا رەنگڤەدانا خو ھەبیت لسەر یەکێن ئیداری لپارێزگەھا و دەستھەلاتن پارێزگەھا .
لەورا گرنگە بزانین کو حکومەتا داھاتی د بو ماوەکی د لسەر ھەمان ریچکە و بەرنامێ حکومەتا بەری نوکە چیت تاکو بابەتێ سەروکاتیا ھەرێمێ ئێک لا دبیت و کێشێن دنافبەرا ھەرێمێ و بەغدا د چارچوڤێ رێکەفتنەکێ دکەڤنە سەر رێیا چارەسەریێ کو سەروک بارزانی د سەرەدانا خودا بو بەغدا ئەف چەندە ئێکلا کریە !! ئەڤە زێدەباری کێشێن مازن ین دەڤەرێ و فشارێن لسەر ئیرانێ و کێشێن مازن ئەوێن لپارێزگەھا سلێمانیێ ھەین و چارەنڤیسێ پارێزگەھا کەرکوکێ و ناوچێن مادێ ١٤٠ ژ دەستوری و ئاوارا کو ڤان کێشا ھەمیا کارەکێ مازن و ماوەکێ درێژ دڤێت تا چارەسەر دبن . بەرامبەر ڤێ چەندێ خەلکێ ھەرێمێ تەحمولا ھەر تشتەکی کریە د ڤان سالێن دەربازبویدا و سەرەرایی ھەمی قەیران و شەر و فشارا خوراگر بویە و بەرەڤانی کریە لەورا بەرامبەر ڤێ چەندێ چاڤێ وی لکابینا داھاتیە کو قەرەبویا ڤێ چەندێ بکەت و بارێ وان یێ ئابوری باشتر لێبکەت و خزمەتگوزاریێن پێتڤی دابینکەت و و دادپەروەریا کومەلایەتی دروست ببیت و راستە ئەڤە مافێن رەوا ین خەلکینە لێ بارگرانیەکا ئێک جارا مازنە بو حکومەتێ د ڤێ قوناغا ھەستیاردا.
لێ بدیتنا من بارێ ھەرە مازن و گران یێ حکومەتا ھەرێمێ و سەروکاتیا ھەرێمێ بو چوار سالێن داھاتی د ئەنجامێن ریفراندومێ بن کو بزانن ئایا بەغدا د یاپێگیر بیت ب دەستوری و چارەکرنا کێشا یان نە !! و ئەڤ بابەتە ببیتە پرسەکا نیف دەولەتی تایبەت پشتی ھەمی ھەولا دگەل بەغدا شکەستن ئینای و دەستن ھەرێمی و نیف دەولەتی دیاربوین و بارودوخ گەھاندیە ڤی ئاستێ مەترسیدار !! و ئێدی ئەف چوار سالێن داھاتی د سالێن ئێکلاکەر بن و د بریارێن مازن و گرنگ تێدا ئێنە دان . ئەڤە ئەگەر ئەم بزانین کو دەڤەر ھەمی یادقوناغەکا زورا ھەستیار و مەترسیداردا دەرباز دبیت و ھەر چرکەیەکێ چاڤەرێ شەرێن مازن دئێتە کرن کو رویبدەن!!! و بارگرانیا ھەرا مازن ئەوە کو ھەرێم یاپاراستی بیت و نە کەڤیتە بەرێ چ لایەنا بوان شەرێ د ئێنە چاڤەرێ کرن دەڤەرێدا.