هیچ کونج و کەلەبەرێکی ئەم دنیا پان و بەرینە نییە کە رۆژانە کوشتن و رووداوی تەقە کردنی تێدا روو نەدات، ئەوەتا لە وڵاتێکی پێشکەوتووی وەک ئەمەریکا کە لە رووی ئابووری و سیاسی و سەربازی و تەکنۆلۆژیاوە گەیشتۆتە لوتکە، کەچی لە ماوەی (١٠) مانگدا (٣٦٣) رووداوی تەقە کردن روویان داوە و بەو هۆیەوە (٤١٩) هاوڵاتی کوژراون، ئەوەی جێگای پرسیارە پێچەوانەی کوردستان دەسەڵات و ئۆپۆزیسۆن لە وڵاتان ئەو کێشانە بە هی خۆیان دەزانن و بۆ چارەسەر و بنبڕ کردنیشیان دەچنەوە پاڵ یەک، بەڵام لە کوردستان ئەگەر رووداوێکی تەقە کردن رووبدا و کەسێک بە هۆیەوە بکوژرێ، حزبەکانی سلێمانی وەک ئەوەی نۆ هەنگیان لە دارێکدا دۆزیبێتەوە، بە خۆشحاڵێێەوە دەیکەنە مەزەی سیاسی و پێکی تیرۆری فکری بەدوادا هەڵدەدەن، ئەوە لەکاتێکدایە ئەمەریکا و وڵاتانی تر سەربەخۆ و خاوەن سیادەن و کوردستان داگیر کراوە و لە هەر چوار لاوە بە دوژمن دەورە دراوە و لە ناوخۆش ئاسانکاری بۆ کاری ئاژاوەگێڕی و نانەوەی پشێوی و ئاشووب دەکرێ، لەگەڵ بوونی هەموو ئەو راستیانەی سەرەوەش هەولێر بە پێنجەمین پایتەختی ئارامی دێتەوە لە دنیادا.
خاڵێکیتر کە دەمەوێ ئاماژەی بۆ بکەم، ئەگەر رووداوەکە لە هەولێر بێ هەموو حزبەکان بە یەکێتی نیشتیمانی کوردستانیشەوە ئۆباڵەکەی دەخەنە ئەستۆی پارتی و داوای راپەڕین و نانەوەی ئاشووب و ئاژاوەگێڕی دەکەن، خۆ ئەگەر لە سلێمانی بێ، ئەوا یەکێتی خۆی بێدەنگ دەکا و حزبەکانی تر وەک سووک کردنی باری یەکێتی و پارتی کردنە شەریک ئۆباڵەکەی دەخەنە ئەستۆی دەسەڵات، واتا پارتی و یەکێتی.
ئەو هەڵوێستەی حزبەکانی سلێمانی ئەو راستییەمان پێدەڵێ: کەرتبوونیان مەسەلە ئازادی و جیاوازی بیروڕا نییە و بۆ دژایەتی و پاراستنی باڵانسی هێزە لەگەڵ پارتی، رێککەوتن و یەکگرتنەوەشیان لە پەرۆشی بۆ دۆزی کورد و رێکخستنی ناو ماڵی کورد نییە، لەوەشدا هەر مەبەستیان دژایەتی کردنی (پارتی)یە، بە واتایەکی تر کاتێ لە کەرتبووندا شکست دەخۆن رێکدەکەون و یەکدەگرنەوە، کاتێکیش لە رێککەوتن و یەکگرتنەوەدا شکست دەخۆن، جارێکیتر پەنا بۆ کەرتبوونێکی تر دەبەن.