ناڕه‌زایی خه‌ڵك، یا ململانێ حزب؟
سازان وهاب
هیچ لایه‌نێك، یا حكومه‌تی هه‌رێم، نكۆڵی له‌وه ناكات، قه‌یرانه‌كان و دۆخی ئابوری هاووڵاتیانی كوردستان مایه‌ی نیگه‌رانی نه‌بێت، به‌ڵكو هه‌مووان له‌سه‌ر یه‌ك خاڵ كۆكین كه دۆخێكی له‌م جۆره سه‌ختی ژیانی هاووڵاتیانی گه‌یاندۆ‌ته ئاستی نیگه‌رانی و ناڕه‌زاییه‌تی، بۆ ئه‌م مه‌به‌سته‌ش خۆنیشاندان مافێكی ته‌واو سروشتیه و هه‌موو یاسا و رێكارێكی یاسایی و مافی هاووڵاتیان رێگه ده‌دات چین و توێژه‌كان بۆ به‌رزكردنه‌وه‌ی نیگه‌رانی و ناڕه‌زاییه‌كانیان په‌نا بۆ خۆنیشاندان ببه‌ن و لایه‌نی په‌یوه‌ندار كه حكوومه‌تی هه‌رێمه بخه‌نه ژێر فشارێكی مه‌ده‌نی، تا هه‌وڵه‌كانی له‌پێناو چاره‌سه‌ری چڕتر و خێراتر بكات، تائێره هه‌موو لایه‌ك له روئیایاندا دیاره، پێداگیرن و به مافێكی سروشتی و شه‌رعی ده‌زانن.
به‌ڵام هیچ كاتێك داواكاركردنی ماف و فشاری مه‌ده‌نی نابێ بگاته ئاستی توندوتیژی، یاخود په‌لاماردانی باره‌گا و دامه‌زراوه‌كانی حكومه‌تی هه‌رێم، ئه‌وانه موڵكی گشتین و به‌پێی یاسا ده‌بێ پارێزراو بن و به‌شێكه له دامه‌زراوه خزمه‌تگوزاری و ناوه‌نده‌ی به‌ڕێوه‌بردنی یه‌كه‌ی ئیداری، كه راسته‌وخۆ په‌یوه‌سته به ژیانی هاووڵاتیان، ئه‌گه‌ر ئه‌و شوێنانه بسوتێندرێ و وێران بكرێن به‌ناوی خۆنیشاندان، بێگومان كارێكی هه‌ڵه‌یه چوونكه دواتر ئه‌م دامه‌زراوانه به‌هه‌مان ئه‌و پارانه چاك ده‌كرێنه‌وه كه حكومه‌تی هه‌رێم بۆ راپه‌ڕاندنی كاری رۆژانه‌ی خه‌ڵكی كوردستان دایمه‌زراندوه.
هه‌ندێك لایه‌ن به‌بێ گوێدانه لێكه‌وته‌كانی خوڵقاندنی ئاڵۆزی و پشێوی و توندوتیژی، حه‌ماسه‌تی هاووڵاتیان و دروشم و جوڵه‌یانی به‌كارهێناوه بۆ ده‌ستبه‌ركردنی بچووكترین ده‌سكه‌وتی سیاسی و ململانێی حزبیانه.
هه‌روه‌ك چۆن ئه‌و لایه‌نانه ره‌چاوی دۆخی مه‌ترسیداری هه‌رێمی كوردستانیان نه‌كرد و هیچ گوێیان به‌وه نه‌داوه كه دوژمن و داگیركه‌ری كوردستان ده‌بنه ئاگره خۆشكه‌ری ناڕه‌زاییه‌كان، ده‌بوو ئه‌وه‌یان نادیده نه‌گرتایه كه به‌كارهێنانی منداڵ و ئاڕاسته‌كردنی به‌ره‌و توندوتیژی و رك و كینه لێكه‌وته‌ی خراپتری به‌دوادا دێ و رۆژگارێك ئه‌م رك و كینه ده‌بێته به‌شێك له كه‌سایه‌تی و په‌روه‌رده‌یی و ئه‌و گه‌نجانه‌ی له‌ئاینده به‌شێك له جومگه گرنگه‌كانی وڵاتیان به‌رده‌ست ده‌كه‌وێ، به‌هه‌مانشێوه‌ی رووبه‌ڕووی واقیعی تاڵی توندوتیژیانه ده‌بنه‌وه و كاره‌كته‌ری سه‌ركه‌وتوو نابن بۆ به‌ڕێوبردنی دامه‌زراوه‌كان و خزمه‌تكردنی وڵاته‌كه‌یان.
لێره گرنگه داواكاری گشتی، به ئه‌ركی بنه‌ڕه‌تی خۆی هه‌ڵبستێ، ته‌واوی ئه‌و پێشێلكارییانه تۆمار بكات و به‌پێی رێكاری یاسایی مامه‌ڵه له‌گه‌ڵ ئه‌و لایه‌نانه بكات كه هۆكاری به‌رهه‌مهێنانی توندوتیژین" ئه‌مه‌ش له‌پێناو سه‌روه‌ری یاسا، مافی منداڵ، مافی خۆنیشاندان، مافی پاراستنی دامه‌زراوه حكومیه‌كان، ئه‌منی نه‌ته‌وه‌یی و سه‌قامگیری و پاراستنی ماڵ و ژیانی هاووڵاتیان.
