لەو رۆژەوەی نەوشیروان مستەفا لە یەکێتی هاتە دەر و بزووتنەوەی گۆڕانی درووست کرد، بە مەبەستی گەیشتن بەو خەونەی لە پێناویدا چەندین جار تووشی خیانەت و خەتای نیشتیمانی بوو، کەوتە ئاژاوەگێڕی و تێکدانی یەکڕیزی ناوماڵی کورد و پێکەوەژیانی سیاسی و ئاشتی کۆمەڵایەتی، بۆ ئەو مەبەستەش چەند هەڵەوەڕ و دەمشڕ و هەرزەکارێکی سیاسی لە خۆی کۆکردنەوە، لەو کاتەوە تا ئێستاشی لەگەڵدابێ ئەو بزووتنەوەیە وەک هەڵگری پەیامی سیاسەتی ئاژاوەگێڕی نەوشیروان مستەفا لە دەرەوەی رەوشتی کوردەواری و هەڵوێستی کوردایەتیدا، بەردەوام خەریکی نانەوەی پشێوی و تەخوین کردنی نەیارەکانی بووە، هەر کاتێکیش دەرفەتیان بۆ رەخسابێ راستەخۆ یان ناراستەوخۆ لەگەڵ دوژمنان و داگیرکارانی کوردستان هاوهەڵوێست بوون و دژی خواست و ئامانجە نەتەوەییەکان وەستاونەوە.
لەگەڵ سەرهەڵدانی ئەو پشێویانەی وڵاتانی عەرەبی بە بەهاری عەرەبیان ناوبرد، نەوشیروان مستەفا لە رێگای هەڵسووڕاوە دەمشڕ و هەڵەوەڕەکانی هەوڵیدا پرسی کورد وەک پرسێکی نەتەوەیی بەرێتە ناو پشێویەکانی وڵاتانی عەرەبی، بۆ ئەو مەبەستەش بەردەرکی سەرای سلێمانیان داگیر کرد و بە درووشمی کوردستان تونس و میسرە و بە زمانی عەرەبی دەیانگوت: ارحل.
دوای ئەوەی رێکخراوی تیرۆریستی داعش، وەک مەترسیدارترین رێکخراوی تیرۆریستی جیهانی مەترسیەکانی لەسەر کوردستان و لەناوبردنی ئەزموونەکەی چڕ کردنەوە، لەو کاتەدا پێشمەرگە و خەمخۆرانی کورد سەرگەرمی پاراستنی کوردستان و بەرگری کردن بوون لە شەرەف و نامووسی کورد، دووبارە نەوشیروان مستەفا لە رێگای منداڵەوردکە و هەڵسووڕاوە هەڵەوەڕەکانی کەوتەوە پەلاماردانی بنکە و بارەگاکانی جەنگی داعش دەجەنگان.
ئێستا کە بەغدا هەرێمی کوردستانی تووشی قەیرانێکی دارایی کردووە و بە چاوساغی و دەستکێشی باڵێکی ناو لایەنێکی دیاریکراو، هەڕەشە لە بوون و ماف و ئازادیە نەتەوەییەکانی کورد دەکات، بزووتنەوەکەی نەوشیروان مستەفا بە کەڵک وەرگرتن لەو کەتوورە ئاژاوەگێڕیەی بۆی جێهێشتوون، وەک پاڵپشتی و هاوسۆزی بۆ دوژمنکاریەکانی بەغدا لە هەوڵی نانەوەی پشێوی و ئاژاوەگێڕیدان.
هەموو ئەو هەوڵە ئاژاوەگێڕیانەی بزووتنەوەی گۆڕان لە کاتێکدا بوون کە دوژمنان سێرەیان لە ئاسایشی نەتەوەیی کورد گرتووە، ئەوەش پێچەوانەی هەڵوێستی هەموو گەلانی دونیایە، هەموو گەلانی دونیا کاتێک مەترسی دەکەوێتە سەر ئاسایشی نەتەوەییان، دەسەڵات و ئۆپۆزسیۆن و هەموو جیاوازیە سیاسی و حزبییەکان بۆ بەرگری کردن و رەواندنەوەی ئەو مەترسییە دەچنەوە پاڵیەک، کەچی بزووتنەوەکەی نەوشیروان مستەفا پێچەوانەی ئەو راستییە هەنگاوی ناوە و هەر کاتێک مەترسییەکانی سەر ئاسایشی نەتەوەیی روو لە هەڵکشان بووبن، ئەوان نەک هەر ئامادەی بەرگری کردن نەبوون، بەڵکو بۆ لاواز کردنی تواناکانی بەرگری کردنی کورد، ئۆپۆزسیۆن بوونیان کردۆتە دوژمنایەتی و بوونەتە بەشێک لە دوژمنان و موزایەدەی خەمخۆری و بەدەنگەوە چوونی خواست و ئامانجەکانی خەڵکیشیان کردووە.