کورد دەڵێ مانگەشەو سەر لە ئێوارە دیارە، ئەوەی ئێستا لە کەرکوک و ناوچە کوردستانیەکانی تری دەرەوەی ئیدارەی حکومەتی هەرێم رووی داوە، زۆر دەمێک بەر لە روودانی نیشانەکانی زۆر بە زەقی دەرکەوتوون، بۆ راستیش لە خوارەوە ئاماژە بە بەشێک لەو نیشانانە دەکەم.
١ــ لە سەرەتای ئەم خولەی پەرلەمانی عێراق، فراکسیۆنی گۆڕان و کۆمەڵ و بەشێک لە فراکسۆنی یەکێتی توندتر لە فراکسیۆنی دەوڵەتی یاسا و عەرەبە شۆڤێنیەکان دژی کورد و حکومەتی هەرێمی کوردستان هەڵوێستیان وەردەگرت.
٢ــ لە کێشەکانی نێوان هەولێر و بەغدا ئەو فراکسیۆنانە وەک پارێزەی حکومەتی بەغدا دەردەکەوتن و پاکانەیان بۆ ئەستۆ پاکی و ستەم لێکراوی بەغدا دەکرد، بەرگی تاوان و ستەمکاریشیان بە باڵای کورد و حکومەتی هەرێمی کوردستان دەبڕی.
٣ــ خواستی سەربەخۆیی کوردستانیان بە پیلانگێڕی دژ بە یەکپارچەیی خاکی عێراق ناوزەد دەکرد و وەک ئەوەی کورد خاکی عەرەبی داگیر کردبێ، کوردایەتی و داوا کردنی مافی کوردیشیان بە ناسۆنالیزمی شەڕانی دەناساند.
٤ــ کێشە سیاسی و ململانێ حزبیەکانی کوردستانیان دەگوازتەوە بەغدا و زۆر جارانیش داوای هاوکاری و دەستوەردانی حکومەتە شیعەگەراییەکی بەغدایان دەکرد.
٥ــ بە هاوکاری دەوڵەتی یاسا و بە رێنامایی نوری مالیکی کەوتنە پاکتاو کردنی پارتی لە بەغدا و هەر رۆژەو بەزم و گۆنگەڵێکیان بۆ پارتی ساز دەکرد.
٦ــ نەوشیروان مستەفا دەیگوت: سیستەمێکی هاوشێوەی (بەغا)مان دەوێ، عەلی باپیریش دەیگوت: حکومەتی عێراق لە حکومەتی هەرێم دیموکراتی ترە، واتا سیستەمی فتوا و دیموکراتی بە هێزی شمشێری ژەنگنی عرووبە و ئەقڵیەتی بیابانی.
٧ــ ئاڵا تاڵەبانیش رەچەڵەک و مەزهەبی تاڵەبانیەکانی دەبردەوە سەر رەچەڵکی عەشیرەتی بەنی ئەسەد و مەزهەبی دوازدە ئیمامی شیعە.
٨ــ رۆژێک بەر لە ریفراندۆم و لە رۆژی ٢٤ی ئەیلول بە مەبەستی تێکدانی ریفراندۆم لە کەرکوک ئاژاوەیەک ساز کرا.
٩ــ راگەیاندنەکانی گۆڕان و کۆمەڵ و یەکێتی دژ بە ریفرادۆم و خواستی سەربەخۆیی کوردستان سیاسەتی دەوڵەتی یاسا و عەرەبە شۆڤێنیەکانیان وەردەگێڕایە سەر زمانی کوردی و بەغدایان دەکردە قیبلەگای سیاسی کورد.
١٠ــ بۆ کورد کوژی و داگیر کردنەوەی کوردستان فراکسیۆنەکانی گۆڕان و کۆمەڵ و بەشێک لە فراکسیۆنی یەکێتی بە شانازییەوە ملیشیای حەشدی شەعبییان بە یاسایی کرد و وەک دەستکەوت بە پرۆسەی سیاسی عێراق و کوردستانیان دەفرۆشتەوە.
١١ــ گۆڕان و کۆمەڵ و بەشێکی یەکێتی لە راگەیاندنەکان و لەناو خەڵکدا دژ بە پارتی کەوتنە ئیرهابی فکری و شەڕی لاواز کردنی ئیرادەی نەتەوەیی.
ئەمانە و زۆر نیشانەی تریش ئاماژەی روون بوون بۆ هاوپەمانێتی ئەو حزبانە لەگەڵ حکومەتی عێراق و ساز کردنی ئەو پیلانەی کە رووداوی داگیر کردنەوەی کەرکوک و ناوچەکانی تری لێکەوتەوە، بەڵام ئەوەی جێگای پرسیارە پارتی جارێک لە ئاسمانی نەڕوانی تا هەست بە بوونی مانگەشەو بکات.