ماف هەرگیز نافەوتێت
نه‌زهه‌ت حالی
هه‌رچه‌نده له‌و خه‌باته‌دا قوربانی زۆریش دراوە به‌ڵام بێ به‌رهه‌م نه‌بووه، له‌م دوایه‌شدا ڕیفراندۆمی گه‌لی كوردستان خه‌باتێكی سیاسی مۆدێرنی مه‌ده‌نی و دیموكراسی بوو، ئه‌و خه‌باته‌ش بێ قوربانی نه‌بوو به‌ڵام بێ به‌رهه‌میش نابێت.
سه‌ربه‌خۆیخوازی نه‌ك ویست و داواكارییه‌كی نوێی گه‌لی كوردستان و هاووڵاتیانی ئێستا و سه‌رۆك بارزانی بێت و گه‌ر دوژمنان و نه‌یاران وا بیر بكه‌نه‌وه كه نابێت ئه‌و سه‌ربه‌خۆییه بینین، ده‌بێت ئه‌وه بزانن ئه‌و ماف و داخوازییه هه‌ر ده‌مێنێت وهه‌ر ده‌هێته دی.
ئێمه له سه‌ر حه‌قین ئەگه‌ر له‌و دونیایه كه‌سیشمان له‌گه‌ڵ نه‌بێت ته‌نیا گه‌ر له‌گه‌ڵ یه‌كتر و بۆ پرسی نه‌ته‌وه‌یی خۆمان له‌گه‌ڵ یه‌ك ڕو ڕاست بین دڵنیام خوامان له‌گه‌ڵه و هه‌ر سه‌رده‌كه‌وین، هه‌ر ده‌وڵه‌ت و كه‌سێكیش كه غه‌در له گه‌لی ئێمه بكات نه‌ك ته‌نیا له خزمه‌تی به‌رژه‌وه‌ندی ئاسایش و به‌رژه‌وه‌ندییه نیشتمانییه‌كانی دانابێت، باجه‌كه‌ی هه‌رده‌دات ئایه‌نده‌یه‌كی باشی نابێت و هه‌ر ڕوبه‌ڕوی تۆڵەی پەروەردگاریش ده‌بێته‌وه، له‌به‌ر ئه‌وه‌ی ئێمه هه‌ڕه‌شه نین بۆ سه‌ر هیچ وڵات و نه‌ته‌وه‌یه‌ك و مافمان خوراوه و مافی كه‌سمان نه‌خواردووه، مافیش هه‌رگیز نافه‌وتێت.
به‌ڵام ئه‌وه‌ی گرنگه با زیاتر به یه‌كتر شكاندن و له جیاتی نه‌یاران بیانوو هێنانه‌وه خۆمان لاواز و كه‌م نرخ نه‌كه‌ین ، بینیمان چۆن سه‌رباز و حه‌شده‌كانی شه‌عبی ئاڵای پیرۆزی كوردستانیان له كه‌ركوك له ژێر پۆستالی خۆیان دانابوو، چۆن دوێنێ له كه‌ركوك نه‌یان هێشت فه‌رمانده‌یه‌كی پۆلیس له كۆنگره‌ی ڕۆژنامه‌وانی به كوردی قسه بكات ، گه‌ر ئه‌وان بتوانن كه‌له‌ی سه‌ری هه‌ر كوردێك ده‌خه‌نه ژێر پۆستالیان و ڕێگه ناده‌ن تا دونیا هەیە كه‌س به كوردی بدوێت...
ئه‌وه‌ی گرنگه نابێت بێ هیوا بین و ئیراده‌مان لاواز بێت ، چونكه شه‌ڕی ئازادی و سه‌ربه‌خۆیی به‌ر له هه‌موو شتێك شه‌ڕی ئیراده‌یه، به‌ڵام پێداچونه‌وه به كاری سیاسی هه‌م له ڕوی تیوری و هه‌م له ڕوی كرداره‌وه له هه‌رێمی كوردستان پێویستیه‌كه كه ڕۆشه‌نبیران و سیاسه‌تكاران ده‌بێت كاری له‌سه‌ر بكه‌ن و ئه‌و زانست و پیشه‌یه ده‌بێت بۆ خزمه‌تی گه‌ل و نیشتمان بێت نه‌ك به خراب به‌كار بهێندرێت، پێویسته سیاسه‌تمه‌داران و سیاسه‌ت بازان له‌یه‌كتر جیا بكرێنه‌وه.
جێگای داخه له كوردستان وزه و هێزێكی زۆری عه‌قڵی و نوسین و قسه كردن له جیاتی خزمه‌تكردن به ئامانجی نیشتمانی و بۆ پاراستنی ئاسایشی نیشتمانی و پته‌وه كردنی یه‌كرگرتوویی نێو خۆیی، به زانا بوون یان نه‌زانی له خزمه‌تی نه‌یاران و دوژمنانماندایه. هه‌ر ئه‌و هه‌ڵوێسته نێو خۆییه ده‌ژه‌كانی خۆمان بوو كه زیاترین زیانی له‌و ماوه‌یه‌دا وه‌كو هه‌میشه به ئێمه گه‌یاند و نه‌یاران و دوژمنانی بێباك كرد.
