کورد لە هیچ کات و قۆناغێکدا وەک ئێستا پێویستی بە کۆدەنگی و یەکهەڵوێستی و گوتاری نەتەوەیی نەبووە، دەرفەتی وەک ئێستاشی بۆ نەڕەخساوە و ناوەندی بڕیاری دوژمنەکەشی لە ئێستادا هەم بێ بڕیارە و هەم فرە بڕیاریشە، لەگەڵ ئەوەشدا سادەترین ماف کە بڕیاردانە لە مافی چارەنووس بە تاوان دەزانن و چەندین جار لەسەر مێزی پیلانگێڕی کۆی کردوونەوە، تورک و فارس و عەرەب تا ئەو شوێنە کوردیان قبوڵە کە بە یاسای داگیرکاری و بریاری شۆڤێنی ئەوان رازی بێت، هەرکاتیکیش لە یاسای داگیرکاری و بڕیاری شۆڤێنی ئەوان دەرچێت، ئەوا دەیجولەکێنن و بە دامەزراندنی دەوڵەتێک لەسەر خاکی خۆی و بۆ بەرگری کردن لە بوون و مانەوەی خۆی وەک نەتەوەیەک بە ئیسرائیلی دووەمی دەچوێنن، مێژووش پڕیەتی لە بەڵگەی پیلانگێری ئەوان، خۆ ئەگەر نەشگەڕێینەوە بۆ مێژووی دوور و نزیک و تەنها هەڵوێستی دوژمنکارانەی ئێستایان لەبەر چاو بگرین، ئەو راستییە بەرجەستە دەبێ کە ئەقڵیان نەگۆڕاوە و هەمان ئەقڵە کە کوردیان پێ ئەنفال و ژەهرباران کردووە، ئەوەش لە کورد دەخوازێ لە بەرامبەر ئەو هەڵوێست و رەفتارە دوژمنکاریەیان یەکدەنگ و یەکهەڵوێست و یەکگوتار بێت، جا لێرەدا ئەو پرسیارە درووست دەبێت کە کورد چۆن دەنگ و رەنگە جیاوازەکان بکاتە دەنگ و رەنگی نەتەوەیی؟

کاتێک باس لە کۆدەنگی و یەکهەڵوێستی و گوتاری نەتەوەیی دەکرێ، لێبوردەیی و هەڵوێستە نەتەوەییەکانی بارزانی نەمر و مێژووی سیاسی و شۆڕشگێڕی و کوردپەروەری ئەو گەورە پیاوە بەبەر چاوماندا گوزەر دەکات، بۆیە کورد ئەگەر بیەوێ لە کات و ساتی خۆیدا و وەک پێویست وەڵامی سیاسەتی داگیرخوازی دوژمنان و داگیرکارانی کوردستان بداتەوە، پێویستە و دەبێ بگەڕێتەوە بۆ رێبازی بارزانی نەمر، چونکە تەنها لەناو رێبازی بارزانی نەمردا دەتوانین دەنگ و رەنگە جیاوازەکان بکەینە دەنگ و رەنگی نەتەوەیی، تەنها بە لێبوردەیی و هەوێتە نەتەوەییەکانی ئەو دەتوانین ناو ماڵی خۆمان رێکبخەین و جیاوازیە سیاسی و حزبییەکان بە یەکەوە بگونجێنین، بەڵگە مێژووییەکانیش ئەوە دەسەلمێنن کە چەپ و راست، ئیسلامی و مارکسی، جوتیار و دەرەبەگ، موسڵمان و مەسیحی و تەواوی چین و توێژەکان بە درێژایی شۆرشی ئەیلول لە یەک سەنگەردا جەنگاون و هەمووشیان شۆڕشی ئەیلولیان بە شۆڕشی خۆیان زانیوە.
هەم مێژووی بزووتنەوەى رزگاریخوازی کورد هاوار دەکا و هەم دوا هەڵوێستی دوژمنکارانەی داگیرکارانی کوردستان زەنگی مەترسییە و پێمان دەڵێ: بۆ تێپەڕاندنی ئەو قۆناغە و دەستەبەر کردنی مافەکانمان پێویستە هەموو لایەنەکان بە ئەرکی نەتەوەیی خۆیان هەستن و بگەڕێنەوە بۆ رێبازی بارزانی نەمر، ئەوەش بەوە دەکرێ پارتی بە خۆیدا بچێتەوە و چیتر بارزانی نەمر نەکات بە موڵکی خۆی، چونکە بارزانی نەمر لە حزب گەورەترە، لایەنەکانی تریش بە سیاسەتی یاخی بوونی خۆیاندا بچنەوە و چیتر لە رێبازی بارزانی نەمر یاخی نەبن، چونکە بە یاخی بوونیان لە رێبازی بارزانی نەمر بچوکتر دەبنەوە و متمانەی نەتەوەییش لە دەست دەدەن.