ھەمی جاران ھندەک نەجوامێر ڤەناندینە دا د دەلیڤەیەکی دا بگەھنە ئارمانجێن خۆ یێن تایبەت، و بۆ ڤێ چەندێ ھەر ڕێکەکێ دجەڕبینن، ھەتاکۆ ئەگەر دووڕوویی ( منافقی) و ماستاڤگرتنێ (تملق) بسانەھیترین ڕێک ببینن بۆ وێ مەرەمێ.
یا ژ ھەمیا کمباختر ئەوە ھەکەر ئەو جە، دامەزراوەیەک بیتن چارەنڤیسا مەلیۆنان کەسان پێڤەگرێدای بت. پەرلەمانێ مە، ئەو جھێ ھەستیارە لڤێ قۆناغێ دێ مێھڤانێ نڤێسینا دەستوورەکێ ھەمیشەیی و سەدان سالێن دیتر بیتن بۆ چەندین نەتەوە و ئایین و لایەنان، ئەوێن د سەرئێخستنا ڕیفراندۆما سەربخۆییا کوردستانێ پشکدار.
لێ دبیتن وەکی ھندەک ژ وان کەسێن ئەڤە چەند سالە، گەلەک گازندە ژێ دھاتەکرن، یێ دناڤ ڕێزێن ڕێکخراوەک تیرۆریستی ھاتیە پەروەردەکرن و لناڤ سیستەمەکێ ھەستیارێ یاسایی ل کوردستانێ دا ھەبن، ھەبن کەسانەک ژ ھەمان تۆخم وەکی وی پەروەردەی لایەنەک تیرۆریستی یان دەمارگیر بیتن و نۆکە ژی ھەمان کار و بزاڤێ بکەتن.
ئەڤ جۆرێن کەسێن بن سیبەرا پەروەردەیەکا دەمارگیرییا ئایینی ھاتبنە پێگەھاندن و د ڕابردوویەکێ نەگەلەک دویر دناڤ وان جۆرێن پارتێن دەمارگیر ل کوردستانێ بزاڤ و کار کربیتن، ب پشتەڤانیا کەسانێن ھەلپەرست و دەستچۆیی و ژپێخەمەت ھەبوونا بەرژەوەندییەکا تایبەت یان خزماتیێ بڤێـن بچنە دناڤ پەرلەمانی دا، کۆ چارەنڤیسا ڤان ھەمی ئایین و نەتەوان بکەڤیتە بن گەفێن دەمارگیرییا ھزری و ئایینی یا وان، گەفەک نە بچویکە بھێتە پاشگۆە ھاڤێتن.
لەوما بفەر دھێتە زانین ژ بلی گرنگییا ھشیارییا خەلکێ ل دەنگدانێ، فەرە لایەنێن پەیوەندار وان کەسان دەستنیشان بکەن، و نەھێلن ماندیبوونا چەند سەد سالی و سەرکەفتنا ڕیفراندۆما کوردستانیان و ناڤێ ئاشتیخوازی و میانەرۆییا مە ھەمیان، ب مێنتالیتەیا دەمارگیرانەیا تژی دووڕوویی و پیسا وان تۆخمە نەیارێن ڤەشارتی، ئەوێن " خۆ د کەڤلێ مھێ " دا ڤەشارتی، خراب و ڕەش ببیتن. ئەڤان کەسان بۆ گەھشتن ب مەرەمێن خۆ چەندین سالان خۆ د ڤی کەڤلی دا ڤەشارتی و ب دیپلۆماسیەتا ڕەفتاری و شێوازێن ماستاوگرتنێ خۆ نەپەنی کری، و نیشانددەن یا خۆ گھۆڕی بەلێ د ڕاستیدا کراس و فیستان و پیلاڤ مرۆڤی ناگھۆڕن، بەلکۆ گھۆڕین یا د مێنتالیتە ( عەقلی ) دا. ھەکەر ئەو ھات گھۆڕین واتە مرۆڤ ھات گۆھۆڕین. بەلێ ! ئەو کەس دبیتن ل دۆرماندۆری ھەر ئێک ژ مە بن.
ھەڵوێستێ ڤێ جارێ یێ زانینگەھا ئەزھەر و پاراستنا بەرژەوەندیێن عەربیزما شۆڤینی-دەمارگیر بناڤێ ئایینی ھێدی گەھاندە ھندێ ئەم ل ھەر کەسەکی ل ڤێ جیھانێ ب گۆمان بکەڤین، و نەخاسمە یێن بڤێن بناڤێ ئایینی ژ دەرگەھی َدژاتیکرنا کوردستانێ بێن ژۆرڤە، و دبیتن کەسانەک ل کوردستانێ ژ نەزانی یان ب ھەر ئەگەرەکێ پشتەڤانیێ ل ڤان نەیارێن دەمارگیر بکەن، ئەوێن بەری نۆکە خزمەتەکا تووندڕەویێ کری و خەلکێ ژبیرکری، بەلێ بیردانکا مێژوویێ ژبیر ناکەتن، چونکی ھش و بیرێن مرۆڤان لاوازن بەلێ یێن دیرۆکێ بھێز.ھشیار بن!!ھشیار بن!!
*پرۆفیسۆرێ ە. بسپۆرێ زانستێن دەروونناسییا پەروەردەیی/فاکۆلتییا پەروەردە/ زانینگەھا زاخۆ