هەموو ئەو هەڕەشانەی بەغدا و تاران و ئەنكارا لە هەرێمی كوردستانی دەكەن، بۆ ئەوەیە بمانگێڕنەوە پێش 25 ی ئەیلوول، چونكە بۆ رێگریكردن لە ریفڕاندۆم هەوڵی زۆریان دا، پێیان وابوو گوشاری كۆمەڵگەی نێودەوڵەتی یارمەتیدەرە، بۆ ئەوەی گوشارەكانی خۆیانی پێ بەهێز بكەن، ئەو سێ پایتەختە گرەویان لەسەر پێكدادانی پێكهاتەكان دەكرد بەتایبەتیش لە كەركووك، ئەوانیش دەزانن كە دۆخی كەركووك بەو شێوەیە، بەڵام هەوڵیان دەدا كۆمەڵگەی نێودەوڵەتی بێننە سەر ئەو باوەڕە كە ریفڕاندۆم شەڕی لێدەكەوێتەوە، لە راستیدا ئەو سێ پایتەختە سەرچاوەی فیتنەن، چی لە دەستیان هات بۆ ئەوەی شەڕ رووبدات كردیان، تەنانەت ئێران هەڕەشەی هەڵگیرساندنی شەڕی ناوخۆی لێكردین، بەڵام ئەوەی نەیان دەویست رووبدات روویدا.


هەرسێ دەوڵەت لەسەر سنووری هەرێمی كوردستان مانۆڕی سەربازی دەكەن، هاوكات لە ناوخۆشماندا ماشێنی میدیا بۆ بنكۆڵكردنی ئیرادەی خەڵك كەوتۆتە گەڕ، هەموو ئەو هەوڵ و توانا خستنەگەڕە، بۆ ئەوەیە پاشەكشەمان پێبكەن، بەرنامەكەش ئەوەیە بەغدا بێ هەڵوەشاندنەوەی ریفڕاندۆم گفتوگۆمان لەگەڵ نەكات، گوشاری هەرسێ پایتەخت و هەندێ میدیای ناوخۆش، بۆ ئەوەیە زەمینە بۆ ئەو رووداوانە خۆش بكەن كە زەمینەی روودانیان نییە وەك پێكدادانی پێكهاتەكان، چونكە ئەوەی جیهان چاوەڕێی دەكرد كە ریفڕاندۆم مەترسییە و شەڕی لێدەكەوێتەوە نەهاتەدی، بۆیە كۆمەڵگەی نێودەوڵەتی جەخت لە گفتوگۆ دەكاتەوە، ئەمەش هەمان ئەو رێگەیەیە كە هەرێمی كوردستان داوای دەكرد و ئێستاش بە تاكە رێگەی دادەنێت.


عێراق و ئێران و توركیا كە پێشتر نەیانتوانی دۆزی ئێمە بە عێراقی بكەنەوە، تازە ئەوەیان بۆ نایەتەدی، چونكە گەلی كوردستان لە 25 ی ئەیلوولی 2017 بڕیاری خۆی دا، ئەو بڕیارەش بە هەڕەشە و گەمارۆدان و بە چەند حزب و چەند كەسێك هەڵناوەشێتەوە، بەلای ئێمەوە 25 ی ئەیلوول دەستپێكی قۆناغێكی نوێیە، پێویستە لایەنە سیاسییەكانیش لەو رۆژەوە بچنە قۆناغێكی نوێوە و نەگەڕێنەوە پێش 25 ی ئەیلوول، چونكە بڕیاری گەل زەمینەی پێكەوە كاركردنی خۆشكردووە، هیچ گرێكوێرەیەك نییە، هەموو ئەو بابەتانەی حزبەكان بازاڕیان پێ گەرم دەكرد، لەبەردەم رووداوی گەورەی 25 ی ئەیلوولدا بچووك بوونەتەوە، كەواتە چارەسەرییان ئاسانە.

ئێستا پێمان هاویشتۆتە قۆناغێكی نوێ، بەرە بەرە كۆمەڵگەی نێودەوڵەتی دێتە سەر خەت و لەگەڵ قۆناغەكەدا هەڵ دەكەن، سەرەتاكەشی لە لایەن چەند كۆنگرێسمانێكی ئەمەریكا و لە پاریسیشەوە دەستی پێكردووە، بەڵام كەفوكوڵی بەغدا و تاران و ئەنكارا هێشتا نەنیشتۆتەوە، بۆیان بچێتەسەر بەردەوام دەبن، گرنگ ئەوەیە هەست بە كارتە بەهێزەكەمان بكەین كە گەلی كوردستانە، چۆن لە 19/5/1992 بە یەكەم هەڵبژاردن، قۆناغێكی نوێی هێنا كایە، رۆژی 25/9/2017 ش بناغەی قۆناغێكی نوێی دانا، كەواتە دەستپێكی لێرە بەدواوەمان 25 ی ئەیلوولە.