دگەل گەرمبوونا بابەتێ کرنا رێفراندومێ د رۆژەڤا سیاسی یا ھەرێمێ دا، وەلاتێن دەوروبەر و بەغدا دژاتییا خوە بۆ وێ پرسێ رادگەھاند، لێ سەرەرای ھەموو گەفان سەرکرداتیا کوردی ودگەل مللەتی بریاردا رێفراندوم بھێتە کرن، پشتی سەرکەفتنا وێ پروسەیێ ژی ھەلویستێ چەندین وەلاتان ھاتیە گھورین، تورکیا ئێک ژ وان وەلاتانە کو پتریا بەرژەوەندیێن ئابوری دگەل ھەرێمێ دا ھەنە، تا وی رادەی گەر بریارا سزادانا ئابوری ل سەر ھەرێمێ سەپاند دەرەنجام دێ بەروڤاژی خواستا وێ بن.
حکومەتا ھەرێما کوردستانێ، ل ڤان سالێن داویێ شیایە پەیوەندیێن ئابوری و سیاسی دگەل وەلاتێ تورکیا بگەھینیتە ئاستەکێ ھەرە بلند، حکومەتا ھەرێمێ ب گرێدانا گرێبەستێن ئابوری یێن دوم درێژ، بۆ تورکیا ژ مێژە سەلماندیە کو چ دەمەکی ھەرێم نابیتە گەف بو تورکیا، ئەنقەرە ژی ژ مێژە تێگەھشتیە کو بەرژەوەندا وێ یا ئابوری دگەل ھەرێمێ یە نەک ئیراقێ، د رۆژا پرۆسەیا رێفراندومێ دا سەرۆک وەزیرێن ھەرێما کوردستانێ، نێچێرڤان بارزانی د گوتارەکێ دا ئاماژە دا پەیوەندیێن ھەرێما کوردستانێ دگەل وەلاتێ تورکیا، سەرۆکوەزیران دوپاتی ل بەردەوام بوونا وان پەیوەندیان کر و راگەھاند: ب چ رەنگا رێفراندوم نابیتە گەف ل سەر ئاسایشا نەتەوەیی یا تورکیا و مە زەحمەت بریە تا ئەم شییاین ڤان پەیوەندیان بگەھینیە ڤی ئاستی، ئەم دێ ھەر مینین جیرانێن باش دگەل وی وەلاتی بێی کو دەستی بۆ کاروبارێن ناڤخوە یا وی وەلاتی درێژ بکەین.
د ڤێ پەیاما سەرۆکێ حکومەتا ھەرێما کوردستانێ دا دیار بوو، کو تورکیا باش دزانیت د کاودانێن نھا رۆژھەلاتا ناڤەراست تێدا دەرباز دبیت و ھەبوونا گەفا رێکخراوا تیروری یا داعشێ ل دەڤەرێ، خراب بوونا پەیوەندیێن تورکیا دگەل چەندین وەلاتان ب تایبەت روسیا و ئەلمانیا ، د نھا دا ھەرێمێ باشترین دوستە بو وێ، و بۆ پارستنا بەرژەوەندیێن ئابوری یێن وەلاتێ خوە مەجبوورە پەیوەندیێن خوە و ھەرێمێ تێکنەدەت.
ئیراق و ھەرێما کوردستانێ ب پلەیا دووێ، پشتی ئەلمانیا دھێن بۆ داخلبوونا بەرھەمێن تورکی، د نھا ژی دا پەیوەندیێن ئەلمانیا و تورکیا د خرابترین ئاستێ دۆپلۆماسی دانە، دیسان دگەل ئیراقێ تا رادەیەکی د باش نینن، د ڤی دەمی دا تورکیا، ب تنێ ھەرێما کوردستانێ دمینیت ھەم ژ لایێ ئابوری و ھەم ژ لایێ دۆپلوماسی پەیوەندیێن خوە دگەل دا ب پارێزێت دا کو مەترسی نەکەڤیتە سەر ئاسایشا ناڤخوە یا وی وەلاتی.
د وێ پەیاما سەرۆکوەزیران دا بیرا مە ل گرێبەستەکا پێنجی سالی د وارێ نەفتێ دا ، دیسان یا بیست و پێنج سالی ژی د وارێ گازا سروشتی دا دگەل تورکیا دا دئینیت، کو ئەڤە ئەگەرەکێ سەرەکی یە تورکیا نەشێت چ پێنگاڤەکێ ل دژی ھەرێمێ بھاڤێژیت.
رەوشا ناڤخوە یا تورکیا و نەمانا پیڤاژوویا ئاشتیێ، بەردەوامبوونا شەری ل دژی پەکەکێ و گرتنا لایەنگرێن فەتحولا گویلەنی ژی ئەگەرن، بۆ نە سەپاندنا سزایێن ئابوری ل سەر ھەرێمێ.
ل داوی یا گرنگە بزانین، ھەبوونا وان رێکەفتنێن حکومەتا ھەرێما کوردستانێ دگەل تورکیا د وارێن نەفت و گازێ دا ئیمزا کرین بووینە ئەگەرێ سەرەکی تورکیا نەشێت گەفێن ئابوری و سەربازی ل دژی ھەرێمێ بکەت، گرێبەستا روزنەفت ژی تا رادەیەکێ زوور د بەرژەوەندا تورکیا دا و دگەل ھەرێمێ و روسیا دێ بنە ژێدەرێن سەرەکی بۆ دابینکرنا بەشەکێ زوور ژ گازا سروشتی بۆ یەورۆپا.