یه‌كێتی و گۆڕان گله‌یی له پارتی ده‌كه‌ن
سووره مه‌رگه‌یی
گومانه‌كانی پارتی له‌سه‌ر ئه‌و رێككه‌وتنه له به‌ڵگه مێژووییه‌كانه‌وه سه‌رچاوه‌یان گرتووه، ئه‌گه‌ر كه‌مێكیش بۆ مێژووی كۆن و نوێی كاراكته‌ره زاڵه‌كانی سه‌ر خاڵ و به‌نده‌كانی ئه‌و رێككه‌وتنه بگه‌ڕێینه‌وه كه نه‌وشیروان مسته‌فا و هێرۆ ئیبراهیم ئه‌حمه‌دن، ده‌گه‌ینه ئه‌و راستییه‌ی كه رێككه‌وتنه‌كه دریژكراوه‌ی ئه‌و زنجیره پیلانگێڕی و سیاسه‌ته رقاویه‌یه كه له سه‌ره‌تای هاتنی برایم ئه‌حمه‌د بۆ ناو ریزه‌كانی پارتی له ساڵی 1953 دژ به پارتی ده‌گێڕدرێن، له ئێستاشدا هێرۆ وه‌ك میراتگری شه‌رعی برایم ئه‌حمه‌د و نه‌وشیروان مسته‌فاش وه‌ك میراتگری سیاسی، رابه‌رایه‌تی ئه‌و ره‌وته ئاژاوه‌گێڕیه ده‌كه‌ن كه برایم ئه‌حمه‌دی نه‌گه‌یانده مه‌رامه‌كانی.
نیگه‌رانی پارتی له‌و رێككه‌وتنه له‌وه‌دا نییه كه دوو حزب له دوای كه‌رتبوون یه‌كده‌گرنه‌وه، به‌ڵكو له‌وه‌دایه به دوو له‌تی و یه‌ك له‌تیش به یه‌ك ئاڕاسته‌ی هاوبه‌شدا جووڵاون و ده‌جووڵێن، ئه‌و ئاراسته‌یه‌ش دژایه‌تی كردنی پارتی و كاوێژكردنه‌وه‌ی سیاسه‌تی ناوه‌ڕاستی شه‌سته‌كانی سه‌ده‌ی رابردووه، ئه‌گه‌ر جارێكیتر بۆ رووداوه‌كانی 17ی شوبات و رووداوه‌كانی كۆتایی ساڵی رابردوو بگه‌ڕێینه‌وه، ده‌بینین سه‌ره‌ڕای رقی دوای كه‌رتبوون و ئه‌و فه‌زیحه‌ته سیاسی و كۆمه‌ڵایه‌تیه‌ی به یكتریان كرد، له كوده‌تاكه‌ی 23ی حوزه‌یران و ئاژاوه‌گێڕیه‌كانی سه‌ر شه‌قام و هه‌ڵكوتانه‌سه‌ر و سووتاندنی باره‌گاكانی پارتی سوێندخۆر و هاوپه‌یمانی شاراوه‌ی یه‌كتری بوون، بۆیه ئه‌گه‌ر كه‌رتبوون و رێككه‌وتنی سیاسی دژه پارتیه‌كان بۆ دژایه‌تی كردنی پارتی ره‌وا بێ، ده‌بێ بۆ پارتیش ره‌وا بێ به‌رگری له خۆی بكا و به گومانه‌وه له‌و كه‌رتبوون و یه‌كگرتنانه بڕوانێ.
