د کۆڕ و کۆمبین و سیمینار و سەرەدان و گەنگەشەیێن گرێدای ب کەرتێ پەروەردێ بەردەوام ئەم گۆھداری ھندی َ دبین کە ئەڤ کەرتە بدەست ئاریشەیەکا مەزن دنالینیتن و ئەو ژی ئاڤاھیێن قوتابخانە و دبستان و خواندنگەھێن مەنە کە تێرا قوتابیێن مە ناکەتن. ئەڤ گلەییە ژ لایەنێ ستافێ پەروەردەیی و ڕێڤەبەراتیێن قوتابخانا دھێتەکرن، گازندە ژ نەبوون و کێماسی د ئاڤاھیێن خواندنێ ل کوردستانێ و ئەڤە جھێ حێبەتیبوون و سەرسۆڕمانێ یە.ب دەھان قوتابخانە و دبستان یێن ھەین کۆ قەبارەیەکێ گەلەک مەزن و ھندە جاران دوو ھەتا سێ ھزار میترێن دوو جارەکی و بەلکۆ ژی پترتر یێن ھەین و جھەکێ گەلەک ل باژێڕان داگیر دکەن، بەلێ دھێتە گۆتن جھێ ھەمی قوتابیان ناکەن.ل وەلاتێن ئەوەرۆپی و پێشکەفتی ئاڤاھیێن دبستان و قوتابخانان چەند نھۆمی و چەند قات دھێنە ئاڤاکرن و ئەڤە ژی بۆ نەھێلانا ڤان جۆرە ئاریشەیێن گرێدای ب جھی ڤە. بۆچی ئەم ژی د ڤێ چەندێ دا چاڤ ل وان وەلاتان ناکەین. ئەڤە کارێ ئەندازیاریێن تایبەتە و حکومەتا ھەرێما کوردستانێ د ڕاستایا پەروەردە و فێرکرنێ گەلەک ھاریکار بوویە وەک لایەنەکێ گرنگێ خزمەتگۆزارێی بۆ جڤاکێ و بۆ ڤێ چەندێ ژی بوودجەیێ تایبەت یێ ھاتیە تەرخانکرن.
لەوما ھەکەر لایەنێن پەروەردەیی یێن پەیوەندار ل کوردستانێ ب گشتی ھزرێ د ھندێ دا بکەن ئاڤاھیێن دبستان و قوتابخانەیێن مە ژی وەکی وەلاتێن دیتر چەند نھۆمی بن دی َبنە ژێدەرێ چارەسەرکرنا گەلەک ئاریشەیێن پەروەردەیی و ڕێڤەبەری و کارگێڕی و جڤاکی و سایکۆلۆژی و ئابووری.
ئاڤاھیێ ھندەک دبستان و قوتابخانەیا و ھەروەسا دەرودیوارێن وان ژ ناڤدا و دەرڤە وەسا کەڤن و نەھەژینە و بێ سەروبەرن کۆ تاکێ قوتابی تێدا ھیچ ھەست ب کیانێ خۆ یێ پەروەردەیی و سایکۆلۆژیێ ھەژی ناکەتن و ھندەک جاران ل ئاستەکێ وەسانە دلێ مرۆڤی ژ خواندنێ و دبستان و قوتابخانێ و قوتابیەتیێ و بەلکۆ ژی ژ جیھانێ ژی ڕەش دبیتن.
ژبلی سەدھا گیروگرفتێن دیترێن جڤاکی و سایکۆلۆژی یێن گرێدای بڤێ چەندێ و ڤان قوتابخانان و جۆر و قەبارە و ئاڤاھیێ وان کۆ ھەکەر بھێتن و ھندەک ڤەکۆلینێن زانستی لسەر بھێنەکرن دێ پترتر ئەڤ جۆرێن ئاریشەیا بۆ مە ڕۆھن و ئاشکرا بیتن.
دەیناندنا پلانەکا درێژخایەن د ئاڤاکرنا سەر ژ نوی یا ئاڤاھیێن قوتابخانەیێن کەڤنار ل دەڤەرێ و کوردستانێ ب گشتی ل ئاییندەی و داھاتووی و پشتی سەقامگیر بوون و باشتر بوونا ڕەوشا ئابوورییا ھەرێما کوردستانێ دێ گەلەک یا بمفا بیتن و گەلەک ژ ڤان ئاریشەیان چارەسەر کەتن و ناھێلیتن و دگەلدا ژی ئاستێ زانستیێ قوتابخانە و دەڤەرێ بلندتر کەتن و گەلەک ژ وان گازنە یێن کۆ گرێداینە ب قوتابیانڤە و نەبوونا گێولێ چۆنا دبستان و قوتابخانان لنک زارۆکێن مە دێ ھێنە ژناڤبرن.
*مامۆستایێ ئەکادیمی/بسپۆرێ زانستێن پێداگۆگی و سایکۆلۆژی/زانینگەھا زاخۆ