قۆناغێن دەستپێكا ژیانێ قۆناغەك ناسك و هەستیارە و وەكی ڕێبازا فرۆیدی ئاماژەی پێددەتن بەرێ شەنگستا ژیانا داهاتوویا مرۆڤی یا لسەر ڤێ قۆناغێ و نەخاسمە ژیێ ( 5 هەتا 6 سالیێ) و بابا و باپیرێن مە ژی ئەڤ تیۆرییە یا د گۆتنەكێ دا كۆرت كری دەمێ دبێژن" یێ گرتی ب شیری بەرنادەتن ب پیری". لڤێ قۆناغێ وەرارا سوپەرئیگۆ (super ego) وەك لایەنێ ویژدانی، وەك فرۆید ئاماژەی پێددەتن گەلەك گرنگە و ئەڤ چەندە بڕێكا شێوازەكێ بناڤێ خۆ ئێككرن ( التقمص یان identification) دهێتە جێبەجێكرن كە پشتەڤانیكرنا سۆزداری یا بەردەوام یا ئەندامێن خێزانێ بۆ زارۆكی و نەخاسمە یێن دەیبابان كارتێكرنەكا مەزن د هەڤسەنگی و وەرارا ئاساییا وێ دكەتن.
ئەڤ چەندە هنگێ دەمێ تاك ب چاڤدێریكرن و چاڤلێكرن و خۆ-ئێككرن دگەل نموونە و سەمپلێن هەژی و جوان و مرۆڤدۆستانە و ئەرێنی دڤێتن رۆلەكێ جڤاكیێ ئەرینی ببینیتن ئاسایی و بەلكۆ ژی گەلەك باشە. لێ كار هنگی خراب و ئالۆز دبیتن كە تاكی دڤێتن ڤان نموونەیا بشێوازەكێ خراب بكەتە جهێ چاڤلێكرنا خۆ و نەخاسمە هەكەر نەگۆنجیتن دگەل رۆلێ وی یێ ئاسایی و ژ ڤێ چەندێ ئاریشە دروست دبن. ئەڤ چەندە لسەر تیرۆریستان جێبەجێ دبیتن دەمێ كۆ ئەم تەماشە دكەین كە ئەڤ تاكە لنك دلێ خۆ دڤێتن كەسانێن وەكی خەلیفەیێن ئیسلامی( س) یان ئەسحابیێن پیامبەری(س) بۆ خۆ بكەنە نموونە و وەكی وان ناڤ و نیشانان ل خۆ دەینن، و هەكەر ئەڤ چەندە راستبایە بخۆ تشتەكێ پیرۆزە، چونكی ئەو كەسە لسەر دەمەكی دژیان هێشتان تێهنا ڕێنمایی و فەرمانێن پیامبەری (س) گەرم بوون و هێشتان مالێ دونیایێ چاڤێن مرۆڤان كۆرە و تاری نەركربوون، بەلێ ئەڤرۆكە و د چاخێ بیست و ئێكێ دا دەمێ داعشەك ناڤێ خۆ دكەتە " ئەمیر" و دڤێتن بڕێكا ڤێ فرت و فێلا دەروونی سەرنجا كەسانەك دیتر بۆ لایێ خۆ و ئایدیۆلۆژیایا هۆڤانەیا خۆ ڕابكێشیتن، ئەو چەند یا ژبیركری یان ژبیرا خۆ بری كە ئەڤ شێوازە جۆرەكێ نەستیێ سڤككرنا گڤاشتنێن دەروونی یێن سەر خۆدێ ڤی تاكینە. ئەو تاكێ كۆ دڤێتن بڕێكا ئێككرنا خۆ دگەل سالۆخەت و ناڤ و نیشانەك پیرۆز، كە دبنەرەتدا وی چ باوەری پێ نەهەی، ژ ڤان گەفە و گڤاشتنێن سایكۆلۆژیك قۆرتال بكەتن و لڤی دەمی و ڤی جۆرێ رەفتارێ بناڤێ ئێككرن تاكی دڤێتن بشێوەیەكێ نەستی هندەك بارێ نەخۆشییا دەروونی لسەر خۆدێ خۆ سڤك بكەتن، لدەمەكی كۆ ئەو باش دزانیتن كە ئەو ناگەهیتە ڕێزا ڤان كەسێن باوەردار و دەست ژ دارێ دونیایێ و هەمی تشتێن وێ شویشتی و ئەڤیندارێن ئارامی و تەناهیی و بەختەوەرییا مرۆڤایەتیێ.
• ئەڤ بابەتە یا ل رۆژناما ( وار ) هاتیە بەلاڤكرن ل ژمارە(1391 ) ڕێكەفتی(18/8 /2015) ل(6).