كاتێك فرانسۆ هۆلاند سەرۆكی فەرەنسای ئەندامی هەمیشەیی ئەنجوومەنی ئاسایش لە كاتی هاتنەخوارەوەی لە فرۆكەخانەی نیودەوڵەتی هەولێر، تەوقەی پرتۆكۆلی نێوان سەرۆكەكان دەگۆرێت بۆ لە ئامێزگرتنی سۆز و خۆشەویستی بۆ سەرۆكی كوردستان، هەروەها هاوشانی بارزانی لە مەراسیمی پاسەوانی شەرەفی سوپای پێشمەرگەدا سڵاو بۆ ئاڵای كوردستان دەكات، ئەمە مانای ئەوەیە ئەو سەردەمە بەسەرچوو فەرەنسای خاوەن ڤیتۆی ئەنجوومەنی ئاسایشی نیودەوڵەتی لەچوارچێوەی یەك سیاسەت ویەكپارچەیی خاكدا، مامەڵە لەگەڵ كوردستان و عێراق بكات.
فرانسۆ هۆلاند بە هاتنی لە 12ی ئەیلوولی 2014 بۆ هەولێر ، كەمتر لە تەنها چل رۆژ بوو مسعود بارزانی وەك پێشمەرگە و فەرماندەی هێزە چەكدارەكانی كوردستان ، بریاری شەڕی مان و نەمانی دژی تیرۆریستانی داعش دابوو، ئیرادەی پێشمەرگە یەكەم موژدەی تێكشكانی تیرۆریستانی بە جیهان راگەیاندبوو، هەر بۆیە هۆلاند لەسەردانەكەی ئەیلولی 2014 ئەو پەیامەی ئاراستەی جیهان كرد كە سەرەتای راگرتنی هێرشەكانی داعش و بەتاڵكردنەوەی ئەفسانەی داعش لە هەولێرەوە دەستی پێكردووە و هەر لێرەشەوە كۆتایی دێت، بۆیە لە هەولێرەوە پلانی سەربازی بۆ تیكشكاندنی دادەرێژرێت نەك واشنتۆن و پاریس و لەندەن و پایتەختەكانی دیكە، هەروەها و لە ئیرادەی پێشمەرگەوە جیهان فێر دەبێت چۆن سەنگەری تیرۆریستان تیكدەشكێنرێت و هەروەها هەر لەئیرادەی پێشمەرگەوە فێردەبین چۆن ژینگەی لەبار بۆ گەشەكردنی تیرۆریستان(homegrown terrorism) لەریشەوە هەڵدەكێشرێت و گیانی خۆشەویستی و پێكەوەژیان لە نێوان نەتەوە و ئایینە جیاوازەكان پێكدەهێنرێت.
بەڵام سەردانی فرانسۆ هۆلاند لەگەڵ دەسپێكی ساڵی نوێ بۆ كوردستان، پەیامێكی دیكەی ئاراستەی جیهان كرد و پێی گووتن : هەولێری پایتەختی كوردستان .. بەغدای پایتەختی عێراق نیە ، هەروەها هەولێر تەنها پایتەختە لەبەرەكانی شەرەوە كۆتایی هاتنی داعشی لەكوردستان راگەیاندووە ،لەمەش زیاتر بە جیهانی راگەیاند كوردستان تەنها دەوڵەتە لە جیهاندا ، لەگەڵ ئەوەی لە هەندێك شوێن تەنها چەند كیلۆمەترێك لە تیرۆریستانی داعش دوورە ، بەڵام خەڵكەكەی بەتەواوی ئایین و نەتەوە جیاوازەكانەوە بەدڵنیایی ئاهەنگەكانی سەری ساڵیان بەریكردووە، هۆلاند بەجیهانی راگەیاند ئەو فرەكلتورییەی (multiculturalism) ئێستا لەفەرەنسا و تەواوی دەوڵەتانی یەكێتی ئەورپا و ئەمریكا بۆتە سەرچاوەی ترس و تۆقاندن و مەترسی لەبەر یەكهەڵوەشانی بەها بەرزەكانی لیبرال دیموكراتی، ئێستا لە كوردستانەكەی بارزانی فرەكلتوریی بۆتە سەرچاوەی هێز و خۆشەویستی و پێكەوەژیانی ئاشتیانەی نێوان كەلتور و نەتەوەو ئایینە جیاوازەكان و دووبارە زیندوو كردنەوەی بەها بەرزەكانی مرۆڤایەتی و لیبرال دیموكراتی لە جیهاندا.
ئەم پەیامانەی هۆلاند كە لەمیانەی سەردانەكانی بۆ هەولێر و لەمیانەی پشكنینی پاسەوانی شەرەفی پێشمەرگە لەگەڵ مارشی ئەی رەقیب و سڵاوكردنی بۆ ئاڵای كورستان ئاراستەی جیهانی دەكات ، راشكاوانە ئەوە بە هەموو جیهان بە گشتی و نەتەوە یەكگرتووەكان و ئەنجوومەنی ئاسایشی نیودەوڵەتی دەڵێت: پێناسەی دەوڵەتی هاوچەرخ ئەو دەوڵەتەیە بتوانێت لەسەر زەوی تیرۆریستان تیكبكشكێنێت، لە سەر ئاستی سیاسیش دەوڵەتی هاوچەرخ ئەو دەوڵەتەیە بتوانێت لەچوارچێوەی رێزگرتن و پاراستنی بەها بەرزەكانی مرۆڤایەتی ، فرە كلتوری و فرە نەتەوەیی و ئاینیی بگۆرێت بۆ سەرچاوەی هێز و پێكەوە ژیانی ئاشتیانە، لە ئێستا كوردستان ئەمەی سەلماندووە بۆیە پێویستە هەموو دەوڵەتانی جیهانی ئازاد ببنە بەشێك لە پرۆسەی بونیادنانی دەوڵەتی كوردستان وەك دەوڵەتێكی هاوچەرخ بۆ سەدەی بیست ویەك ، دەبێت دەنگی ئەندامانی نەتەوەیەكگرتووەكان بۆ پێشوازی لەدەوڵەتی كوردستان بێت و ڤیتۆی ئەندامانی هەمیشەی ئەنجوومەنی ئاسایش دژی ئەو دەوڵەتانە بەكاربهێنرێت كە چاویان بە لەدایكبوون و سەربەخۆیی كوردستان هەڵنایەت