سەرهەڵدانی تیرۆریستانی دەوڵەتی ئیسلامی لە عێراق و شام، كە بە داعش ناسراون، نەك هەر لە سووریا و عێراق هۆكاری خوێنڕشتن و كۆمەڵكوژی و تاوانەكانی جەنگ بوون، بگرە لە باشووری كوردستان شەڕی داسەپاویان سنووری هەموو تاوانەكانی بەزاندووە و ئەو دڕندەیی و وەحشیگەرییەشیان بە كۆمەڵكوژیی كوردانی ئێزیدی لە شەنگال و بە سبایەكردنی پاكیزەكانی ئەو دەڤەرە دەستی پێكرد. چەكدارانی مێشك پووچەڵی ئەو بەناو دەوڵەتە دەیانەوێ جیهان بخەنە ژێر ركێفی خەونە نەزۆكەكانی خۆیان و لە ژێر ناوی پیرۆزی ئیسلامدا هەزاران مرۆڤی كاڵفام و سادەیان هەڵخەڵەتاندووە و لە هەر چی بەهای ئەخلاقی و ئایینی و ئینسانییە دایانتەكاندوون. بەڵام ئەو بەرزەفڕی و لووتبەرزییەیان بە فەرمانێكی سەرۆكی پێشمەرگە و گیانبازی و ئازایەتی پێشمەرگە خۆنەویست و وڵاتپارێزەكانی كوردستان تێكشكێندرا و هەتا هەنووكەش رۆژانە لە دوای هەر هێرشێكی پێشمەرگە، خاكی كوردستان لە كەلاكی ئەو داگیركەرانە پاك دەكرێتەوە. لە بەرامبەر ئەو سەرفرازی و سەركەوتنانەشدا ژمارەیەكی زۆری رۆڵەی كورد گیانیان، یان بەشێكی ئەندامیان بە كوردستانەكەیان بەخشیوە. یەكێك لەو پێشمەرگانە كە هەزاران بۆمبی چێنراوی داعشییەكانی پووچەڵ كردووەتەوە، لە دوا گیانبازی خۆیدا لە سنووری خۆرئاوای كەركووك، دەستێكی لە دەست دا و هاوسەرەكەشی كە جلی پێشمەرگەری پۆشیوە، خاوەن پەیامێكی مێژووییە و لە ئاخافتنێكیدا بۆ گۆڤاری گوڵان باسی سەربەستیی وڵات و ئامانجەكانی خۆی و هاوسەرەكەی دەكات.
لەگەڵ پۆلێك لە هاوسەنگەرانی لە نەخۆشخانەی فریاكەوتنی رۆژئاوای هەولێر دێنە دەرێ. ئەگریجەی خاوی لە پشتەسەریەوە بە توندی لوول داوە و بەستوویەتی. جلی پێشمەرگەی لە بەر كردووە، ئەو جلوبەرگە پیرۆزەی كە رەگەزی نێر و مێ ناناسێ. ئەو بەرگە رەنگ پڵنگییەی كە وەحشەكانی داعشی هەراسان كردووە و لە دەیان نەبەردیی خوێناویدا تەنگی پێ هەڵچنیون. كورد گوتەنی: - شێر لە لانك هاتەدەر، چ مێ چ نێر- لە رووخساریدا هەیبەتێك لە ژنی كورد دەدرەوشێتەوە. سەرەڕای برینی قووڵ و خەمی زۆری بۆ هاوسەرەكەی بە بزەیەكی شۆڕشگێڕانەوە وەڵامی پرسیارەكانی گوڵان دەداتەوە.
زوهرە زاهیر وەك خۆی باسیكرد، تەمەنی 24 ساڵە و ماوەی پێنج ساڵە لەگەڵ پێشمەرگەیەكی رۆژهەڵاتی كوردستان هاوسەرگیری كردووە. نزیكەی ساڵێكیشە شانبەشانی هاوسەرەكەی لە قەڵای بەرگریی رۆژهەڵات و لە سنووری رۆژئاوای كەركووك لە هێڵی پێشەوەی بەرەكانی شەڕی دژ بە داعش، خاكی كوردستان لە تیرۆریستان و بۆمبە چێنراوەكانیان پاك دەكەنەوە.
ئەو ئافرەتە شێردڵە، هەم ژنە پێشمەرگەیە و هەم پێشمەرگەیەكی ژن، بۆیە هاوكات لەگەڵ برینداربوونی هاوسەرەكەی كە باڵێكی لە كاتی پووچەڵكردنەوەی مینەكانی داعشدا لەدەست داوە و تازە نەشتەرگەری بۆ كراوە، بە نەفەسێكی نیشتمانپەروەرانەوە دەڵێت: سەربەرزم بە غیرەتی هاوسەرەكەم، بەشێك لە لەشی خۆی لەدەست دا، نیوەگیان و شەڵالی خوێن بوو، كەچی هەر هەواڵی هەڤاڵەكانی دەپرسی. خولی بینیبوو، زۆر شارەزا و چاونەترس بوو. هاوسەرەكەم رۆژانە سەدان بۆمبی تیرۆریستانی ترسنۆكی پووچەڵ دەكردەوە، ئەگەر پێشمەرگەی وامان نەبێ، رۆژانە سەدان پێشمەرگە شەهید دەبن.
زوهرە لە درێژەی ئاخافتنەكەیدا بۆ گوڵان جەختی لەوە كردەوە كە پێشمەرگە سونبولی فیداكاری و گیانبازییە و وتیشی: سوپای زەبەلاح و پڕچەكی عێراق لە بەرامبەر داعشەكاندا بەرگە ناگرن، خاك و شاریان بە سەربازخانە و جبەخانەكانەوە تەسلیم دەكەن، كەچی هەر ئەو تیرۆریستە وەحشییانەی داعش سەدان جار لە بەرامبەر هێزەكانی پێشمەرگەدا بە چۆكدا هاتوون.
ئەو ژنە پێشمەرگەیە ئاماژە بە هێما نەتەوەییەكانی كورد دەكات و دواتر دەڵێت: ئاڵای كوردستان تەنیا بۆ یەك پارچەی كوردستان نییە، دوێنێ ئەو ئاڵایە لە مەهابادی رۆژهەڵاتی كوردستان هەڵكرا، ئێستاش ئەوەتا لە باشوور و رۆژئاوای وڵات دەشەكێتەوە، بۆیە ژن و پیاوی كورد لە هەر گۆشەیەكی جیهان بن، وەك یەك بەرامبەر بەو دەستكەوتە نەتەوەییانە بەرپرسیارن. گوتیشی: دڵنیام ئەگەر هەندێ لایەنی كورد نەكەونە داوی پیلانەكانی دەرەكییەوە، ئەوا سەربەخۆیی كوردستان نزیكە و سەرۆك بارزانی كە یادگاری كۆماری كوردستانە، بە پشتیوانی خوای گەورە و پێشمەرگە ئەو كۆمارە زیندوو دەكاتەوە. بۆیە وەك ژنە پێشمەرگەیەك داوا لە هەموو حزب و لایەنەكانی كوردستان دەكەم، لە پێناوی بەرژەوەندیی نەتەوەیی یەكبگرن و هەمووان پێكەوە سەنگەرەكانی پێشمەرگە بۆ پاراستنی خاكی وڵاتەكەمان پتەوتر بكەن، چونكە كورد هەمیشە لە كاتی پەرتەوازەبوون تووشی شكست هاتووە. هیچ كوردێكی دڵسۆز و نیشتمانپەروەریش رێگە بە دووبارەبوونەوەی ئەو شكستانە نادات.
زوهرە لە وەڵامی ئەو پرسیارەدا كە چۆن دەتوانێت منداڵەكانی بە جێ بهێڵێ و بەردەوام لە بەرەكانی شەڕدا بێت، گوتی: لەگەڵ هاوسەرەكەم رێككەوتووین كە رزگاریی كورد لە بندەستی، ئامانجی سەرەكیمان بێت، بۆیە خۆمان لە چێژی منداڵ و پەروەردەكردنی بێبەش كردووە و تا ئێستا نەبووین بە دایك و باوك.
ئەو ژنە پێشمەرگەیە هەڵگری چەندین پەیام بوو. ئەوەشی دووپات كردەوە كە داعشییەكان ئینتەرنێت و مزگەوتەكان بەكار دەهێنن و لە ژێر ناوی قورئان و ئایینی پیرۆزی ئیسلامدا مەبەستە چەپەڵەكانیان دەشارنەوە، بۆیە پێویستە كورد هەموو رێگەیەك بۆ دزەكردنی ئەو وەحشیگەرییە بۆ ناو كوردستان دابخات.
بێگومان گەشەی تەكنەلۆژی سوپایەكی شاراوەی تیرۆریستی لە ناواخنی ئازادیی رەهای رایەڵی و تۆڕە كۆمەڵایەتییەكانی ئینتەرنێت دروستكردووە، وەحشە مێشك بەتاڵەكانی توندڕەویش دەیان هەزار مێشكی مرۆڤی كاڵفامیان بە ئاراستەی تاریكیپەرستی و دڕندەیی ژاراوی كردووە، بۆیە چركەساتێكی یەك رۆژی ساڵێك، بە سەدان ساڵ جیهانی بۆ پاش گەڕاندەوە. رووداوەكەی 11ی سێپتەمبەر هاوكێشەكانی زەمەنی گۆڕی و ناوەندەكانی سیاسەتكردنی تووشی شۆك كرد، لە دایكبوونی دەوڵەتی ئیسلامی(داعش)یش هەموو هاوكێشەكانی دەوڵەتداری و پاراستنی سنوورەكانی شێواند، كار گەیشتە ئەوەی چەكدارانی (ئەبووبەكر بەغدادی) سەروەریی سنووری وڵاتان بشكێنن و لە پێناوی وەرگرتنی (بەیعەت) بۆ خەلیفەی تیرۆریستپەروەر دەست بدەنە كۆمەڵكوژی و لە هیچ تاوانێكی دژی مرۆڤایەتی سڵ نەكەنەوە. بەشێك لە جبەخانەكانی ئەرتەشی بەزیوی (بەشار ئەسەد)ی حوكمڕانی دیكتاتۆری سووریا و هەموو كەرەستەی مۆدێڕنی سەربازی كە لە سوپای ئەمریكا بۆ سوپای بێ بونیادی عێراقی بە میرات مابووەوە، لە شاری مووسڵ كەوتە دەست داعشییەكان و بەوە پتر لەخۆبایی بوون و ویستیان یەك شەوە رێگەی هەزار ساڵە ببڕن و دەوڵەتی ئیسلامی لە عێراق و شام دابمەزرێنن، بە خەیاڵێكی خاو، دەرگەی كەسیان لە كوردی بێ دەوڵەت كورتتر نەدی، بۆیە بە پەلە بایان داوە و لە سنوورێكی بەرفراواندا پەلاماری باشووری كوردستانیان دا. پلاندانەرانی داعش وایاندەزانی ئاسەوارەكانی دوو ئیدارەیی و یەكنەخستنی هێزی پێشمەرگە لە لەشكرێكی رێكخراوی مەشق پێكراوی پڕچەكدا، خاكی كوردانی كردۆتە پاروویەكی چەور و بە ئاسانی دەتوانن هەڵمەقورتی بكەن، تا رادەیەكیش لەو چاوچنۆكییەدا سەركەوتوو بوون، بۆیە بە ئاسانی بەشێك لە خاكی باشووری كوردستانیان داگیركرد و ئێزیدییەكانیش لە قوربانی بووندا پشكی گەورەیان بەر كەوت و تەنانەت پاكیزەكانیان وەك دەستكەوتی شەڕ برانە هەڕاج بازاڕ و داعش كڕین و فرۆشتنیانی پیرۆز كرد! بەڵام رۆڵەكانی لە بەرەی شەڕی تیرۆریستاندا ئیرادهی خۆیان یەكخست و بەر لە هاتنی چەكی قورس و هاریكاریی نێودەوڵەتی پێشمەرگە توانی تەلیسمی داعش تێكبشكێنێ. سەرجەم خاكی ناوچەكانی دەرەوەی هەرێمیش كۆنتڕۆڵ بكاتەوە.
زوهرەی پێشمەرگە لە دوا پەیامی خۆیدا جەخت لەوە دەكاتەوە كە لە شەڕی راماڵینی داعشییەكاندا ناكرێ رۆڵی پێشمەرگەی رۆژهەڵاتی كوردستان لە بەرچاو نەگرین. بەتایبەتی ئەو هێزەی بە ناوی (قەڵای خۆڕاگری رۆژهەڵات) و دوور لە حزبایەتی بەرتەسك و بە نوێنەرایەتی رۆژهەڵاتی كوردستان تا هەنووكەش لە تێكشكاندنی هێرشە غافڵكارییەكانی داعش لە سنووری كەركووك بەردەوامە و لە راوەدوونانی دڕندەكانی داعش خوێن و ئارەقەیان تێكەڵ بووە و چەندین قوربانییان داوە.