ماسیمیلیانۆ ترەنتین لە زانكۆی بۆلۆنیا لە ئیتالیا بۆ گوڵان:

ماسیمیلیانۆ ترەنتین پڕۆفسیۆری زانستە سیاسییەكانە لە بەشی زانستە سیاسی و كۆمەڵایەتییەكانی زانكۆی بۆلۆگنا لە ئیتاڵیا. توێژەری بواری ڕۆژهەڵاتی ناوەڕاست و مێژووی پێوەندییە نێودەوڵەتییەكان و مێژووی ئابوورییە. پێشتر ئەندامی یەكەی توێژینەوەی زانكۆی كافۆسكاری لە ڤیەننا بووە. گوڵان بۆ زانینی تێڕوانینەكانی لەبارەی ڕەوشی ئێستای ڕۆژهەڵاتی ناوەڕاست و ئەگەرەكانی ئایندە و پرسی بڕیاردانی چارەنووس و چۆنیەتی چارەسەركردنی كێشە ئاڵۆزەكانی ناوچەكەوە، پرسیارێكی ئاڕاستەكرد، ئەویش بەم شێوەیە وەڵامی پرسیارەكانی داینەوە.

* چۆن سەرجەم بارودۆخەكە لە ناوچەكەدا لێكدەدەیتەوە و لە دەرەوەی ڕۆژهەڵاتی ناوەڕاستەوە، توندوتیژی و نالەبارییەكانی ناوچەكە چۆن دەبینی؟
- بە بۆچوونی من، ئەو ناسەقامگیری و توندوتیژیەی كە لە ڕۆژهەڵاتی ناوەڕاستدا هەیە، لە ئەنجامی ئەو لێكترازان و ناسازانە هاتووەتە ئاراوە كە دروست بووە لە نێوان پرۆسەی گەشەی كۆمەڵگەكان لە جیهانی عەرەبی و سەرجەم ڕۆژهەڵاتی ناوەڕاست و دامەزراوە سیاسی و ئابوورییەكانی كە تا ئێستا كۆمەڵگەكانیان بەڕێوە بردووە. ئەم لێكترازانە، یان ڕێكنەكەوتنە بووەتە هۆی شۆڕش و ڕاپەڕین و چەندین شێوەی جیاوازی وەرگرتووە و ناسەقامگیری لە ناوچەكەدا دروستكردووە. لای من ئەولەوییەت لە ناوچەكەدا پرسی كۆمەڵایەتییە. پاشانیش دەستێوەردانی بیانی زۆرجار نەبووەتە هۆی هێوركردنەوەی ئەم پرسە سەرەكی و سەرەتاییانە.
* ئەو شۆڕش و ڕاپەڕینانەی كە لە ناوچەكەدا هەیە بە مەبەستی گۆڕینی ڕژێمەكان بووە، بەڵام سەرئەنجام بێ هیوایی و وەهم و ڕەشبینی هێناوەتەئاراوە، ئەو فاكتەرانە چین كە بووەتە هۆی ئەم بارودۆخە نالەبارە؟
- ئەو ڕاستییەی بووەتە هۆی ئەو ڕاپەڕینانە و بەرپەرچدانەوەی ڕاپەڕینەكان و بەردەوامی وەهمەكان سەرەتا لە ناو لێكترازانی ئەو هێزە كۆمەڵایەتی و سیاسییانەدا دەبینرێت كە بە لانی كەمەوە سی ساڵە لە ناوچەكەدا هەن، پێشبینی ئەوەش كرابوو كە ئەو بزووتنەوە كۆمەڵایەتییانەی كە ڕاپەڕینی عەرەبییان پێكهێنابوو، ئەم دۆخە دروست بكات. بۆیە لە ماوەی دوو ساڵدا ناحەزان سەركەوتنیان بەدەستهێنا، ئەمیش لەبەر ئەوەی باشتر لە بزووتنەوە كۆمەڵایەتییەكان و هێزە كۆمەڵایەتییەكانی شۆڕش و ڕاپەڕینەكان ڕێكخرابوون، هەروەها پاڵپشتییەكی بەهێزیان هەبوو لە هێزە بەرپەرچدەرەكانەوە، یان هێزە موحافیزكارەكانی ناوچەكە، كە یان لە ناوچەی كەنداودا بوون، یان لە گۆشەكانی دیكەی جیهانی سیاسەتەوە سەرچاوەیان گرتبوو. بۆیە بە داخەوە هاوسەنگی هێز زیاتر بەلای هێزەكانی دەوڵەتەوە، یان دژەشۆڕش و دژە ریفۆرمەكانەوە بوو. ئەمەش تەواو جێگەی داخ بوو، چونكە هێزە سیاسی و كۆمەڵایەتییەكان كە بۆیەكەم جار دەسەڵاتیان هەبوو، یان قسەیەكیان هەبوو لە شێوەی حكومەتدا و هەوڵیاندا كە شێوەیەكی نوێ لە پێوەندیی كۆمەڵایەتی و حكومەت ئەزموون بكەن، هەر زوو بەرەو نەمان چوون. كێشەكە ئەوەیە كە تەنانەت هێزەكانی ئیسلامی سیاسی، بەتایبەتی ئەو هێزانەی كە دەسەڵاتیان لە ڕێی هەڵبژاردنەكانەوە لە تونس و میسر وەرگرت و ئەوانەشی كە لە سووریا هەوڵیان داوە و هەوڵ دەدەن دەسەڵات وەرگرن، نەیاتوانیوە نموونەیەكی باشی حوكمڕانی پێشكەش بكەن، بەو مانایەی لە زۆربەی حاڵەتەكاندا چالاك بوون و بە شێوەیەك مامەڵەیان كردووە كە زۆر هاوشێوەی مونافیسەكانی پێشووتریانە كە لە نێوان ساڵانی ٢٠١٠ و ٢٠١١دا لە دەسەڵات دوور خرانەوە، بە مانایەك كە حوكمیان بەسەر دەسەڵاتی دادوەریدا دەدا و تەنها مامەڵەیان لەگەڵ زۆرینەدا دەكرد، لەبەر ئەوەی زۆرینەیان لە هەڵبژاردنەكاندا بەدەست هێنابوو، بۆیە ئێستا هەر بایەخ بە زۆرینە دەدەن، لە كاتێكدا بەپێی لێكدانەوەكانی من، لە ڕۆژهەڵاتی ناوەڕاست و وڵاتانی سەر دەریای ناوەڕاستدا ئەزموونی قۆناغی دەستووری دەكەین بۆ ئەوەی وا لەو هێزانە بكەین ڕەواتر بن و زیاتر جێی خۆیان لە كۆمەڵگەدا بكەنەوە و زۆربەی كاراكتەرە سیاسی و كۆمەڵایەتییەكان بگرێتەوە، تەنانەت ئەگەر زۆر درێژ و زبریش دەربكەوێت بۆ گفتوگۆ و سازانەكان. لە حاڵەتی تونسدا هەرچەندە زۆر قورسیش بوو، بەڵام سەركەوتوو بوو. بۆیە ئەوە جێگەی داخە ئەو هێزانەی لە دەسەڵاتدان نەتوانن ئەو دەرفەتە مێژوییەی هەیانە بیگێڕن بە شێوەیەك كە ڕێگری لێ بكرێ لەلایەن هێزە كۆنەپارێزەكانی پێشوو، یان هێزە سیاسییە دامەزراوە لەمێژینەكان، ئەمەش جێگەی داخە نەك هەر بۆ خەڵكی ناوچەكە، بەڵكو بۆ ئەوروپاش كە دراوسێی ڕۆژهەڵاتی ناوەڕاست و باكووری ئەفریقایە، بە مانەیەك ئەو وەهمە تەنانەت ئاڕاستە دەكرێت بۆ ڕێكنەكەوتن لە نێوان گوتار و ڕەفتاری دەسەڵاتدارانی ئەوروپا، هەروەها وڵاتانی دیكە كە بڵێن باشە پاڵپشتی ریفۆرم و گۆڕان و دیموكراسی دەكەین، بەڵام لەهەمان كاتدا ئەو پاڵپشتییە دابین نەكەن و سیاسەتی خۆیان نەگۆڕن لە بارەی ئابووری و وەگەڕخستنی سەرمایە و دەستێوەردانی بازاڕ كە بەڕاستی شتێكی بنەڕەتییە بۆ دابینكردنی جۆرێك لە دەرفەت بۆ ئەو وڵاتانە بۆ دروستكردنی گۆڕانكاری لە كۆمەڵگەكانیاندا.
* لە ساڵی 2014 لە مانگی شەشدا داعش خەلافەتی ئیسلامی ڕاگەیاند، سەرئەنجامیش هاوپەیمانی نێودەڵەتی هێرشە ئاسمانییەكانی بۆ سەر داعش دەستپێكرد و پاڵپشتی هێزی پێشمەرگەی كوردستانیان كرد، بەڵام سەرەڕای ئەمەش تیرۆریستانی داعش ناوچەی زیاتریان گرتووە و بەهێزتر بوون، كەواتە ستراتیژی ڕۆژئاواییەكان چییە بۆ تێكشكان و لاوازكردنی داعش؟
- لە ڕاستیدا من هیچ ستراتیژێكی ڕوون نابینم لەلایەن ڕۆژئاواوە بۆ ئەوەی بەرپەرچی مەترسییە ڕاستیەكانی ڕێكخراوەكانی دەوڵەتی ئیسلامی بداتەوە، ئەمە كێشەیەكی ئاڵۆزە و لایەنی سەربازی بەشە ئاسانەكەیەتی، بەمانایەك لە گۆشەنیگای زۆر لە شارەزایانی سەربازییەوە زۆر ناخایەنێت كە شارەزایان و سەرباز بڵاوبكەنەوە بۆ تێكشكانی داعش، هەر لە سەرەتاوە یەك شت زۆر ڕوونە، ئەویش ئەوەیە هەر كاتێك داعش ڕووبەڕووی هێزێكی ڕێكخراوتر و پڕچەكتر بووبێتەوە لە كوردەكان و عەرەبەكان، ئەوا تێكشكاوە و نەیانتوانیوە سەركەوتن بەدەست بهێنن، بۆیە ئەمە زۆر گرنگە، ئەمەشمان لە كۆبانێ لەلایەن هێزە كوردییەكان و هەروەها لە هەرێمی كوردستان و تەنانەت لە نزیك بەغدایش بینی، بۆیە ئەمە ئەزموونێكی زۆر گرنگە كە دەتواندرێت پشتی پێ ببەسترێت. بۆردوومانی ئاسمانی تەنیا لایەنی لۆجیستی و قاچاخچێتی نەوت و سەرچاوەكانی تری داعش تێكدەشكێنێ، بەڵام بەس نییە بۆ تێكشكانی هێزە زەمینییەكانی داعش و بۆ ئەمە پێویستمان بە هێزی زەمینی هەیە و ڕۆژئاواش لەم ڕووەوە هێزی زۆری نییە. كوردەكان سەرەڕای ئەوەی هەندێك گرفتیان هەبوو لە سەرەتادا، سەلماندیان كە هێزێكی بەتوانای زەمینین، هەمان شت لە سووریاش ڕوویدا، لە دواییشدا نەك هەر وڵاتە یەكگرتووەكان بەڵكو هێزەكانی ناتۆ و پاشانیش رووسیا دەوریان لە سەر شانۆی سووریا گێڕا. رووسیا لەم هەفتەیەدا بۆردومانی ئاسمانی دابین دەكات بۆ یارمەتیدانی هێزی زەمینیی دەوڵەتی سووری بەشار ئەسەد لەگەڵ هاوپەیمانی ئێرانی و لوبناندا. بۆیە لە گۆشەنیگای سەربازییەوە داعش دەتوانرێت زۆر بەئاسانی تێكبشكێندرێت، ئەمەش پشت دەبەستێت بە جۆری ئەو هێزانەی هەیە لە سەر زەمین. مەسەلەیەكی دیكەش هەیە كە وەك ئەمە گرنگە، ئەویش لایەنی سیاسییە، بە مانایەك داعش دەتوانێت لە هەموو ئەو ناوچانەی كە دەوڵەت و دەسەڵاتی خەڵك، هەروەها كۆمەڵگەی مەدەنی داڕماوە، سەربكەوێت، وەك لە هەندێك ناوچەی عێراق و سووریا.
* سەبارەت بەو كێشە هەڵپەسێردراوانەی كە لەمێژە لەناوچەكەدا هەن وەك ئەوەی هەندێك نەتەوە هەن بەبێ دەوڵەتن و رۆژهەڵاتی ناوەڕاست بە دەست بە بنبەست گەیشتنی مەسەلەی سووریاوە دەناڵێنێ، هەروەها چەند كێشەیەكی چارەسەرنەكراو هەن كە ئاسۆكانی بەدیهێنانی حوكمێكی باش و دامەزراندنی دەوڵەتێك كە پێویستییەكانی خەڵك دابین بكات و ماف بداتە خەڵكەكەی نەهێشتووە، وەك مەسەلەی كورد كە بە سەركەوتووانە مامەڵەی لەگەڵدا نەكراوە، بەتایبەتی لە هەرێمی كوردستان لە عێراق و ئەمەش وایكردووە كە شوێن سەربەخۆییان بكەون، سەرەڕای ئەوەی كە بوونەتە مۆدێلێك بۆ ڕووبەڕووبوونەوەی تیرۆریستان و دیموكراسی و ئازادی لەناوچەكەدا. پرسیارەكە ئەوەیە چۆن پرسی نەتەوەی بێ دەوڵەت لەم ناوچەیەدا چارەسە دەكرێت؟ هەڵوێست و بۆچوونی ڕۆژئاوا و یەكێتی ئەوروپا سەبارەت بەم مەسەلانە چۆنن؟
- با بگەڕێمەوە بۆ هەڵسەنگاندنەكانی یەكەم جارم. یەكێك لە كێشە بنەڕەتییەكان نەسازانە لە نێوان خەڵك و ناوچەكان و دامەزراوەكانی حكومەتدا و لێرەدا دەرفەتێكی مێژوویی هاتووەتە ئاراوە كە تیایدا دەوڵەتی بەهێزی ناوەندی كە حوكمی كۆمەڵگە جیاواز و فرەییەكان بكات، چیتر ناتوانێت بەردەوام بێت بە شێوەیەكی گونجاو و ڕێكوپێك بۆ ئەوەی ئاواتەكانی خەڵكی خۆی بەدی بهێنێت. بۆیە یەكێك لە چارەسەرە دەستوورییەكان لە ناوچەكەدا دامەزراندنی دەوڵەتێكی لامەركەزییە، بە مانایەك كە كۆمەڵگە لۆكاڵییەكان ئۆتۆنۆمییان پێ بدرێت و خۆیان خۆبەڕێوە ببەن لە ناو ئەو سنوورانەی كە لە ناوچەكەدا هەیە. لەبەرئەوەی ئەگەر پرسی سنوورەكان بێتە ئاراوە، ئەوا زۆر بە گرفتە و دەبێتە هۆی شەڕێكی ناكۆتا، بەڵام چەندین بژاردەی دی هەن، تەنانەت لە ڕووی حوكمداری و بەشداری دیموكراسییەوە. بۆیە سەرەتا خەڵكی كوردستان لە عێراق و پاشان لە سووریا و هەروەها هیوادارم تەنانەت لە توركیاش چەندین نموونە بخەنە بەردەست كە چۆن دیموكراسی ببەسترێتەوە بە مافی چارەنووسەوە، نەك وەك جیابوونەوە، بەڵكو وەك ئۆتۆنۆمییەك لە چوارچێوەی دەوڵەتە جیاوازەكاندا. پێموایە ئەگەر دەسەڵاتدارانی ناوچەكە ڕازی كران كە ئۆتۆنۆمی ناوخۆیی وەك فیدڕاڵیزم و كۆنفیدڕاڵیزم و بژاردەكانی دی هەن، مانای جیابوونەوە ناگەیەنێت، ئەوا لەو كاتەدا دەرفەتی نوێ بۆ دیموكراسی و خۆبەڕێوەبردن و خۆ ڕێكخستن لەسەر ئاستی ناوخۆیی و ناوچەیی دەبێتە مەرجی سەرەكی ئاشتی لە داهاتووی ناوچەكەدا، ئەمەش هەر تەنیا نابێتە هۆی پێشكەوتنی كورد، بەڵكو پێشكەوتنی خەڵك لە هەموو ناوچەكەدا، ئەمەش بە تەنیا پرسی خەڵكی كوردستان نییە، بەڵكو پرسی خەڵكی هەموو ناوچەكەیە.
* خەڵكی كوردستان مافەكانیان لێ زەوت كراوە لە چوارچێوەی سنووری ئەو دەوڵەتانەدا كە كوردستانی بە سەردا دابەشكراوە، وەك عێراق و ئێڕان و توركیا و سووریا. مافی چارەنووسی ناوخۆیان لێ زەوت كراوە و لەلایەن ڕژێمەكانی ئەو دەوڵەتانەوە چەوسێندراونەتەوە و ستەمیان لێكراوە، بۆیە پێیانوایە چارەسەر مافی چارەنووسە، لەم بارەیەوە راتان چییە؟
- سەر تا پای مێژووی گەلی كورد بەتایبەتی لە دوای جەنگی جیهانی یەكەمەوە چەوساندنەوە و سەركوت كردن بووە، بەڵام دەبێت ئەوەش روون بێت كە دابەشبوونەكان لە ناو كۆمەڵگەی كوردی و سیاسییەكانی كوردا سەبارەت بە خۆشگوزەرانی خەڵك و نەتەوەی كورد دەوری هەبووە، بۆیە چەندین فاكتەر كاریگەرییان هەبووە، هەم فاكتەری ناوخۆیی لەناو كۆمەڵگەی كوردیدا و هەم فاكتەری دەرەكیش، بەڵام بەدڵنیایەوە خەڵك دواڕایان هەیە لە بارەی داهاتوویانەوە، ئەمەش چەمكێكی بنەڕەتییە و مافی چارەنووس زۆر گرنگە بۆ خەڵك، بەڵام كێشەكە ئەوەیە چۆن ئەم مافە ڕەوایە بەدی دەهێنیت. لە دەیەكانی ڕابردووشدا بینیمان چۆن داواكردن بۆ بەدیهێنانی مافی چارەنووس، بەمانای دروستكردنی دەوڵەتی نوێ، بووە هۆی نەهامەتی و ئازار بۆ گەلی كورد، لەبەر ئەوەی حكومەتە ناوەندییەكان هەمیشە هەموو ئەگەرەكانی نەك هەر جیابوونەوە، بەڵكو ئۆتۆنۆمیش ئینكار دەكەن. بۆیە لە لایەكەوە مافێكی ڕەوای خۆتانە داواكردنی مافی چارەنووس، تەنانەت لە فۆڕمی سەربەخۆیشدا، بەڵام لەلایەكی ترەوە بژاردەی دیكە هەن كە دەتواندرێت بدۆزرێتەوە، وەك ئەزموونی سەركەوتووی كوردستانی عێراق كە سەلماندیان سەرەڕای هەموو ناڕەحەتییەكان و كەموكورتی و كێشەكان، بژاردەی دی هەن كە لە ئێستادا باشترین بژاردە ئامادەییە، بەدڵنیایەوە لەوانەیە سازان كردن بێت لەگەڵ حكومەتی ناوەندی، بەڵام بە ڕای من ناكۆكی سیاسی باشترە لە شەڕ وەك ئەوەی ئێستا حكومەتی ناوەندی توركیا دەیكات، جێگەی داخە سەرەتا بۆ هەموو توركیا و هەروەها بۆ خەڵكی تورك و كورد. بۆچونی من ئەوەیە كە چیتر حكومەتی ناوەندی ناتوانێت ناوەندییانە حوكم بكات بەسەر كۆمەڵگەكانیدا لەبەر ئەوەی كۆمەڵگە زۆر گەورەترە لە دەوڵەت و هێزەكانی كۆمەڵگە بەهێزترن لە دەوڵەت. بۆیە دەبێت حكومەتەكان بگەن بەو قەناعەتەی كە بە لامەركەزی كردنی دەسەڵات مانای جیابوونەوە ناگەیەنێت و دەستوورێكی نوێ پێویستە بۆ خۆشگوزەرانی هەموو خەڵك. خەڵكی كوردستانیش لە پێشەوەی ئەم پرسەدان و لە هەموو كێشەیەكدا بژاردەی نوێ هەن كە دەتوانرێت سەركەوتووانە بدۆزرێنەوە لە ناوچەكەدا، ئەمەش باشترین كاری كوردە لە توركیا و عێراق و سووریا و ئێراندا، ئەوەش نەك تەنیا بۆ ئێستا، بەڵكو بۆ داهاتووش.
* سەبارەت بە دەستێوەردانە ئاسمانییەكانی رووسیا لە سووریا بە بۆردوومانكردنی داعش و هەموو ئەوانەی دژی دەوڵەتی سووریان و پاڵپشتیكردنی رووسیا بۆ ئەسەد، چۆن ئەم جەمسەربەندییە لە ناوچەكەدا دەبینی؟
- پێموایە دەستێوەردانی رووسیا لە سووریا دژی گۆڕانكارییە و بەو مانایەی كە ناكۆكییەكە دەخاتە بەردەم ئامانج و ستراتیژێكی ڕوون لە بەر ئەوەی پێیانوایە باشترین چارەسەر لە دژی داعش دووبارە هێنانەوە و چەسپاندنی دامەزراوەكانی دەوڵەتە لە هەموو ناوچەكاندا و بە ناوەندی كردن و بەلامەركەزی كردن دەتوانرێت گفتوگۆی لەسەر بكرێت. واتە لە ئێستادا پێیانوایە كە تەنیا دەسەڵات لە سووریا دەبێت دەسەڵاتی سەربازی سووریا بێت كە لەلایەن بەشار ئەسەدەوە سەركردایەتی دەكرێت، لەئێستادا بەڵام بە پێویست نازانرێ لە ساڵانی داهاتوودا. بۆیە بۆ ئەوەی دەوڵەت بەهێز بكەن، پاڵپشتی لە سوپای سووریا دەكەن و گرنگترین هۆكاریش داعش نییە، بەڵكو هێزە شۆڕشگێڕەكانن كە ڕووبەڕووی سوپای سووریا بوونەتەوە لە باكوور لە ناویاندا جیهادییەكان و هێزەكانی دیكە، بۆیە رووسیا بۆردومانی ئاسمانی دابین دەكات بۆ سوپای سووریا تا هێرش بكات بە یارمەتی هاوپەیمانە هەرێمایەتییەكانی بۆ دەستبەسەردا گرتنەوەی ناوچە ستراتیژییەكان و ئاسانكردنەوەی نەخشەی سیاسیی سووریا، بە مانایەك ئەگەر سەر بكەون، ئەوا نەخشەی سیاسیی سووریا سادەتر دەبێتەوە و تەنیا سوپای سووریا و هێزە ڕادیكاڵەكانی وەك داعش و هەروەها كوردەكان لە باكوورەوە دەمێننەوە، بۆیە ئامانجیان سادەكردنەوەی نەخشەی سیاسییە. كاتێك نەخشەی سیاسیش سادە بووەوە، ئەوا داوا لە وڵاتانی ڕۆژئاوا و ناتۆ و وڵاتانی كەنداو و توركیا دەكەن، كە ئێستا دەتوانن بێن و داعش بە دەقەیەك دەر بكەن، بەڵام لە هەمان كاتدا ئێستا وڵاتان ناتوانن هیچ شتێك بكەن، بۆ بەرگرتن لە رووسیا ئەگەر هێزی زەمینییان نەبێت، بۆیە ئێستا ڕۆژئاوا كراوەتە گۆشەیەكەوە، ئەمەش ستراتیژێكی تەواو ئاشكرای رووسیا و بەشار ئەسەد و هاوپەیمانەكانیانە لە ئێران. لێرەشدا تەنها چەند هێزێكی كەم ماون كە بتوانن دژیان بوەستنەوە، مەگەر جۆرێك لە وەی ئەفغانستان بێتە ئاراوە بۆ لێكترازانی هێزە چەسپاوەكان لە سووریا، ئەمەش شەڕی سووریا درێژ دەكاتەوە كە شایەنی خەڵكی سوریا نییە.
* چ پەیامێكت بۆ خەڵكی كوردستان لە عێراق هەیە؟
دڵنیام كە خەڵكی كوردستان زۆر زیرەكترن لەوەی كە پێیان بوترێت چی بكەن و بڕیار لەسەر داهاتوویان بدرێت، بە لەبەرچاوگرتنی هەموو ئەو گرفتانەی لە ئێستادا هەیانە. هیوادارم لەسەر ئەم شێوەیە لە دیموكراسی و بەهێزكردنی كۆمەڵگەیان بەردەوام بن، لەبەر ئەوەی ئەوە باشترین لایەنی هەر دەوڵەتێكە كە خەڵكەكەی خۆی بەهێز بكات لە رووی ڕۆشنبیری و دەرفەتەوە و پاشان وزە و نەوت و شتەكانی دیكە دێت، بۆیە بەڕاستی هیوادارم خەڵكی كوردستان بەردەوام بن لە بەهێزبوون.