یەكڕیزی نێو ماڵی كورد لە پرۆسەی بونیادنانەوەی نەتەوەدا

«دەكرێت لە هەموو كاتێكدا پشت بە ئەمریكا ببەسترێت، بۆ ئەوەی هەنگاوی راست هەڵبگرێت، بەڵام پاش ئەوەی هەموو بژاردە خراپەكان تاقی دەكاتەوە»
وینستۆن چەرچڵ


ستراتیژە تازەكەی ئۆباما بۆ پێكهێنانی هاوپەیمانییەكی نێودەوڵەتی دژی تیرۆریستانی داعش لە سووریا و عێراق، تەنها ستراتیژییەكە لە ئاسمانەوە چالاكییەكانی تیرۆریستان سنووردار دەكات، بۆیە ئەم ستراتیژییە بۆ لە ریشە هەڵكێشان و نەهێشتنی تیرۆریستانی داعش، پشت بە فاكتەرێكی گرنگتر لە هێزی ئاسمانی دەبەستێت، كە ئەویش هێزی پێشمەرگەی كوردستانە، یان وەك پسپۆرانی دیراساتی ئاسایش و بەرگری لەسەر ئاستی ناوەندەكانی توێژینەوە ئاماژەی پێدەكەن، ئەو هێزانەی وەك هێزی پێشمەرگەی كوردستان توانایان هەیە رووبەڕووی تیرۆریستان ببنەوە، پێویسیتان بە هاریكاری سەربازی و لوجیستی و مەشق و راهێنان هەیە.
ئەوەی هەتا ئێستا سەبارەت بەم لایەنە گوێبیستی بووین، لەگەڵ ئەوەی هەندێك لە توێژەران باس لە مەشق و راهێنان بە ئۆپۆزسێۆنی سووریا (سوپای سووریای ئازاد)، یان ئاماژە بە دووبارە چەكداركردنی هۆزە عەرەبەكانی سوننەی عێراق دەكەن لەسەر شێوازی سەحوەكەی ژەنراڵ پەتریۆس، بەڵام بێجگە لە پشتبەستن بە هێزی پێشمەرگەی كوردستان، ئەوانی دیكە بە گومانەوە سەیر دەكرێن، یان لە باشترین حاڵەتەتدا بەوجۆرە باس دەكرێت، بەوەی لەوانەیە پشتگیری كردنی ئۆپۆزسیۆنی سووریا و چەكداركردنی خێڵەكانی سوننەی عەرەب، مەترسی دیكە بە دوای خۆیاندا بهێنن و لە بری ئەوەی شەڕی تیرۆر كۆتایی بێت، جۆرێكی دیكە لە ناسەقامگیری لەسەرتاسەری ناوچەكە بێتەئاراوە، بۆیە لەم حاڵەتەدا و هەتا ئێستاش تەواوی ئەندامانی هاوپەیمانی نێودەوڵەتی (بێجگە لە وڵاتانی عەرەبی)، هێزی سەرەكی كە لەسەر ئەرزی واقیع و گۆڕەپانی شەڕی دژی تیرۆریستانی داعش، وەك تاكە هێزی كاریگەر سەیری بكەن، هێزی پێشمەرگەی كوردستانە.
توێژەران و پسپۆرانی ئاسایش و بەرگری لەو راستییە دەكەن و دڵنیان بەرەی تیرۆریستان تەنها بەرەیەكی شەڕ نییە كە بتوانرێت بە هێرشی سەربازی كۆتایی پێبهێنرێت، لەبەر ئەوەی تیرۆریستان وەك ئایدیۆلۆژییەكی توندڕەو بەردەوام توانای خۆبەرهەمهێنانەوە و خۆنوێكردنەوەیان هەیە، لەمەش زیاتر توانای جووڵەیەكی دینامیكی فراوانیان هەیە كە دەتوانێت دەستیان بگاتە زۆر شوێن لە ناو دڵی رۆژئاوادا، ئەم دەستڕاگەیشتنەش بە ناوەندەكانی رۆژئاوا و دەست نەپاراستن لە شوێنە گشتییەكان و خەڵكی سڤیل و هەوڵدان بۆ بڵاوكردنەوەی ترس و تۆقاندن لەنێو هاووڵاتیانی رۆژئاوا، پێویستی بەوە هەیە كە لەو ناوچانەی دەبنە سەرچاوەی بەرهەمهێنانی تیرۆر پێگەیەك هەبێت و ئەم پێگە جوگرافییە توانای ئەوەی هەبێت رێگە نەدات تیرۆریستان نەوای ئارامیان بۆ دروست بێت، یان ببێتە پردی ترانزێت بۆ پەڕینەوەی تیرۆریستان.
سەبارەت بەم لایەنەش وەك لێكۆڵینەوەكان دەریانخستووە، ژینگەیەك بوار نەدات ئاسانكاری لەسەر ئاستی میللی و پاشان حكوومی بۆ تیرۆریستان دروست بكرێت، تەنیا ئاستی میللی و حكوومیی هەرێمی كوردستانە، هەر بۆیە نەبوونی هاوسۆزی لەگەڵ تیرۆریستان و بڕوانەبوونی كورد وەك نەتەوە بە كردەوەو كەلتووری توندوتیژی لە نێو یەكڕیزی گەلی كوردستاندا رەنگی داوەتەوە، وێڕای ئەوەش لە هەرێمی كوردستاندا فرەیی و ئازادی بیروڕای سیاسی لەو پەڕیدایە و سەرەڕای جیاوازییەكی زۆریش كە لە نێوان پارتە سیاسییەكان و تەواوی پێكهاتەكانی گەلی كوردستان هەیە، بەڵام هەموویان لەو خاڵەدا یەكانگیردەبنەوە كە ئەویش دژایەتیكردنی تیرۆر و توندوتیژی سیاسیە.
ئەم لایەنە درەوشاوەیە زەمینەیەكی لەباری دروستكردووە، بۆ ئەوەی جیهان بە ستراتیژییەكی نوێ بیر لە شەڕی تیرۆریستان بكاتەوە، ئەگەر هێزی پێشمەرگەی كوردستان لە بەرامبەر تیرۆریستان رانەوەستایە، ئەوا جارێكی دیكە جیهان نەیدەتوانی بیر لە دروستكردنی هاوپەیمانییەكی نێودەوڵەتی لەبەرامبەر تیرۆریستان بكاتەوە، ئەوەشی ئەم راستییە بە تەواوەتی پشتڕاست بكاتەوە، هەڵوێستی ئەمریكا و دەوڵەتانی ناتۆیە لە ئەفغانستان، كە راشكاوانە ئەو راستییانە بەرجەستە دەكاتەوە كە تیرۆریستان چۆن جەستەی رۆژئاوایان لە رۆژهەڵات و رۆژهەڵاتی ناوەڕاست شەكەت كردووە، لەنیو ئەم پێگە جوگرافییە فراوانەشدا بەوانەشی كە خۆیان دەبنە قوربانی دەستی تیرۆریستان، بەڵام نابنە هاوپەیمانێكی راستەقینە لەگەڵ ئەمریكا و رۆژئاوا بۆ رووبەڕووبونەوەی تیرۆریستان، لەم چوارچێوەیەشدا لە رۆژهەڵاتی ناوەڕاستەوە تا دەگاتە ئاسیای ناوەڕاست بێجگە لە گەلی كوردستان و هەرێمی كوردستان هاوپەیمانێكی راستەقینەی شەڕی دژی تیرۆریستان لە چوارچێوەی هاوپەیمانی نێودەوڵەتی دژی تیرۆریستانی قاعیدە و داعش بوونی نییە.
پێناسەی سەركەوتن لە ستراتیژیەتی
هاوپەیمانی نێودەوڵەتی لە شەڕی دژە تیرۆردا
باراك ئۆباما لە ستراتیژە نوێیەكەیدا دژی تیرۆریستانی داعش، ئەوانی وەك «سەرەتان و ڤایرۆس» ناو برد، ئەمەش مانای ئەوەیە وەرەمی سەرەتانی پێویستی بە لە ریشەهەڵكێشان هەیە و رێگرتن لە بڵاوبوونەوەی ڤایرۆسیش پێویستی بە ئامێری بەرگری هەیە، هەروەك چۆن جەستەی مرۆڤ ئامێری بەرگری هەیە، بۆیە لە هەردوو حاڵەتەكەدا ئەگەر تیرۆریستان وەك سەرەتان پێناسە بكەین، یان ڤایرۆس، ئەوا مانای ئەوەیە شێوازی مامەڵەكردن لەگەڵ ئەو سەرەتان و ڤایرۆسە پێناسەی سەركەوتن دیاری دەكات، هەروەك چۆن لە پرۆسەی نەشتەرگەری و چارەسەری نەخۆشیدا، پێناسەی سەركەوتنی نەشتەرگەرییەكە پەیوەستە بە ئاستی رزگابوون لە نەخۆشییەكە، نەك قورسی و سادەیی نەشتەرگەرییەكە. لەمەش گرنگتر ئەوەیە ئەم ستراتیژییە نوێیە بۆ ئەنجامدانی ئۆپەراسیۆنی سەربازی دژی تیرۆریستان لەلایەن سەرۆكیكی ئەمریكاوە دانراوە، كە بە دژایەتیكردنی بۆ شەڕی عێراق و كشانەوەی سەربازانی ئەمریكا لە عێراق و ئەفغانستان دووجار لەسەر یەك دەرگای كۆشكی سپی بۆ كراوەتەوە، هەروەها سەرۆكێك ئەم بڕیارەی داوە كە گومانی گەورەی لەسەر پێناسەی سەركەوتن لە ستراتیژیەتی سەرۆكی پێش خۆی هەبووە، كە ئەویش جۆرج دەبلیو بوش بووە.
لەمەش زیاتر رەخنەی سەرەكی لە سەر ستراتیژیەتی ئیدارەی جورج دەبلیو بوش لە هەر دوو شەڕی ئەفغانستان و عێراق، ئەوە بوو كە سەرۆك بوش توانی جەنگەكە بەرێتەوە، بەڵام شەڕەكەی دۆڕاند، مەبەستیش لە بردنەوەی جەنگ و دۆڕاندنی شەڕەكە ئەوەیە: راستە ئیدارەی بوش توانی ئیمارەتی تاڵیبان لە ئەفغانستان و رژێمی سەدام حوسێن لە عێراق بڕووخێنێت، بەڵام دوای جەنگەكە بەرنامەیەكی بۆ بونیادنانەوەی عێراق و ئەفغانستان نەبوو بۆ ئەوەی وەك دەوڵەتێكی هاوچەرخ بتوانن بڕوایان بە دیموكراتی و پێكەوەژیانی نێوان پێكهاتە جیاوازەكانی هەردوو وڵات هەبێت.
بۆیە ئەوەی لەم ستراتیژە تازەی سەرۆك ئۆباما بۆ پێناسەی سەركەوتن بەرجەستە دەبێتەوە، ئەوەیە كە مانای سەركەوتن لەم ستراتیژە تازەیەدا چۆنیەتی رێكخستنەوەی سیستمی دەوڵەتدارییە لە رۆژهەڵاتی ناوەڕاست بەگشتی و لە سووریا و عێراق بەتایبەتی، لەم چوارچێوەیەشدا ئەگەر وردتر سەرنج بدەین، بە راشكاوی ئەوە دەردەكەوێت، كە هەنگاوەكانی سەرۆك ئۆباما پێش راگەیاندنی ستراتیژە نوێیەكەی وەك مەرجی پێشوەختە گرێدرابووەوە بە پێكهێنانی حكومەتی نوێی عێراق، لەمەش زیاتر شێوازی حكومەتە نوێییەكەی عێراقیش دیاری كراوە بەوەی دەبێت حكومەتێكی بنكەفراوانی نیشتمانی بێت و هەموو پێكهاتەكان بەشداری تێدا بكەن و رەنگدانەوەی ئیرادەی پێكهاتە جیاوازەكانی عێراق بێت بۆ ئەوەی لەسەر ئەرز هاوپەیمانییەكی نیشتمانی لە چوارچێوەی عێراقدا بۆ رووبەڕووبوونەوەی تیرۆریستان دروست بێت.
ئەگەر لێرەوە جارێكی دیكە ئەو مەرجە پێشوەختەیەی ستراتیژی تازەی ئەمریكا بەرامبەر بە عێراق و حكومەتە تازەكەی عەبادی هەڵبسەنگێنینەوە، ئەوا هەست دەكەین حكومەتی تازەی عێراق دەبێت ئەو مانایە لە خۆی بگرێت كە عێراق وەك دەوڵەتێكی فیدڕاڵی پێناسە بكاتەوە و ئەم دەوڵەتە فیدڕاڵییە بە ئاستێك تایبەتمەندیی پێكهاتە جیاوازەكانی لەبەر چاو بگرێت كە بتوانرێت لەسەر ئەرزی واقیع پێكهاتەكان پێكەوە بە بێ ترس و زۆرەملێ كۆبكاتەوە. ئامانج لەم هەنگاوانە لە عێراقدا زەمینە خۆشكردنە بۆ دۆزینەوەی رێگەچارەیەك بۆ ئەوەی ببێتە كلیلێك و گرفتی پرۆسەی سووریاشی پێبكرێتەوە، هۆكاری ئەمەش لەبەر ئەوەیە، پێكهاتەكانی سووریاش (بە عەلەوی و سوننە و كوردەوە) جارێكی دیكە لەنێو سیستمی حوكمڕانیی كۆنی سووریا ناتوانن پێكەوە هەڵبكەن و هەروەها ناشتوانن بەبێ لەبەر چاوگرتنی تەواوی تایبەتمەندی عەلەوی و سوننە و كورد، گەرەنتی ئەوە هەبێت سووریا وەك دەوڵەتێك بوونی بمێنێتەوە.
كەواتە ئەم بارودۆخە مانایەكی تازە بۆ پێناسەی سەركەوتن لەم ستراتیژە تازەیە دروست دەكات، لە هەمانكاتیشدا پرسیاری ئەوە دروست دەكات: بە چ میكانیزمێك ئەو دەسكەوتانە بەدەست دەهێنرێن و چۆن دەپارێزرێن؟ هەر بۆ نموونە: ئەگەر ئامانج لەم ستراتیژە تازەیەی ئۆباما بریتی بێت لە:
1- لە ریشە هەڵكێشان و تێكشكانی تیرۆریستانی داعش و كۆتایی هێنان بە دەوڵەتی ئیسلامی داعش.
2- مانەوەی سووریا و عێراق وەك دوو دەوڵەت بەم نەخشە سیاسیەی ئێستا.
ئەوا ئەم دوو ئامانجە بەدەستهێنان و پاراستنی پێویستی بە میكانیزمی تازەی مامەڵەكردن هەیە لەگەڵ بارودۆخی سیاسیی ئێستای سووریا و عێراق و لە بەرچاو نەگرتنی ئەو واقیعە سیاسییەش دووبارە پێناسەی سەركەوتن بێ مانا دەكاتەوە.
بونیادنانەوەی دەوڵەت و شەڕی داعش
پڕۆفیسۆر كینس پۆلاك سەرۆكی سەنتەری سابان لە ئامۆژگای برۆكینگز، لە دوایین وتاریدا سەبارەت بە چۆنیەتی سەركەوتن لە شەڕی تیرۆریستان، راشكاوانە پەنجەی خستۆتە سەر كرۆكی كێشەكە و جەخت لەوە دەكاتەوە، پرۆسەی سەركەوتن لە شەڕی دژی تیرۆریستانی داعش، لە پرۆسەی بونیادنانەوەی عێراق و سووریا جیا ناكرێتەوە، دیارە مەبەستیشی لە بونیادنانەوە، بونیادنانەوەی هەردوو دەوڵەتی عێراق و سووریایە وەك دوو دەوڵەتی هاوچەرخ كە تیایدا پێكهاتە جیاوازەكانی هەردوو وڵاتەكە بتوانن بە ئاشتی پێكەوە بژین.
پۆلاك سەبارەت بە عێراق رایوایە ئیدارەی ئۆباما لە میانەی داكۆكیكردنی لەسەر پێكهێنانی حكومەتی تازەی عێراق بە سەرۆكایەتی د.حەیدەر عەبادی وەك حكومەتێكی بنكەفراوانی نیشتمانی هەنگاوێكی راستی هەڵگرتووە، بۆیە گرنگە بۆ سووریاش بیر لە هەمان هەنگاو بكرێتەوە، ئەمەش بەو مانایەی لە رووی سیاسییەوە چارەسەرێك بۆ كێشەی سووریا بدۆزرێتەوە و سیستمی حوكمڕانی كۆنی ئەسەد بگۆڕێت بۆ سیستمێك كە رەنگدانەوەی پێكهاتە جیاوازەكانی گەلانی سووریا بێت، سەبارەت بەم لایەنە وەزیری دەرەوەی ئێران (محەمەد جەواد زەریف)، لە میانەی سیمینارێكدا كە ئامۆژگای پەیوەندییەكانی دەرەوە لە واشنتۆن بۆیان ریكخستبوو، جەختی لەسەر ئەوە كردەوە، كە كۆماری ئیسلامی ئێران پشتگیری ئەو گۆڕانكارییە سیاسییە دەكات كە گەلی سووریا خۆی بڕیاری لەسەر دەدات، نەك چارەسەرێكیان بەسەردا بسەپێنرێت.
سەبارەت بە حكومەتی تازەی عێراقیش بۆ ئەوەی لەو ئاستەدا بتوانێت عێراق وەك دەوڵەتێك رزگار بكات، پڕۆفیسۆر مارك سیفەرز توێژەری باڵا لە ئامۆژگای واشنتۆن بۆ دیراساتی رۆژهەڵاتی، لە وتارێكدا بە ناونیشانی « پەند وەرگرتن لە هەڵەكانی مالیكی» نووسیوویەتی: حكومەتی عەبادی سەركەوتوو دەبێت، ئەگەر هەڵەكانی مالیكی دووبارە نەكاتەوە، هەروەها ئەمریكاش سوود لە هەڵەكانی مالیكی وەربگرێت و رێگە نەدات ئەمجارە دووبارە بێتەوە». ئەو هەڵانەی وەك پڕۆفیسۆر مارك ئاماژەی پێكردووە، بووە هۆكاری ئەوەی عەرەبی سوننە پەراوێز بخرێت و كوردیش وەك مانەوە لەگەڵ عێراق وەك هەرێمێكی فیدڕاڵی لە چوارچێوەی عێراقدا نائومێد بێت و ناچار بێت بڕیاری سەربەخۆیی بدات.
ئەگەر لەم خاڵەی پڕۆفیسۆر مارك سیفەرز ئاماژەی پێكردووە، شرۆڤە بكەین، هەست دەكەین بە راشكاوی دەستی خستۆتە سەر كرۆكی كێشەكە و ئەوەمان بیر دێنێتەوە كە چۆن سەرۆكی هەرێمی كوردستان دوای ئەوەی نائومێد بوو لە حكومەتەكەی مالیكی كە پابەندی هیچ كام لە بەڵێنەكانی نەبوو، ناچار بوو بە جیهانی رابگەیەنێت، ئەگەر مالیكی پابەندی بەڵێن و ئیمزاكانی خۆی نەبێت، ئەوا سەرۆكی كوردستان ناچار دەبێت ئەم پرسە رووبەڕووی گەلی كوردستان بكاتەوە و گەلی كوردستان خۆی بڕیاری خۆی بدات.
ئەوەی لەم هۆشدارە تازانەی لە میانەی وتار و لێكۆڵینەوەكانی ئێستا دەردەكەون، ئاماژەیە بۆ ئەوەی ئیدارەی ئەمریكا هەستی بەو هەڵانە كردووە كە ئیدارەی یەكەم و نیوەی یەكەمی ئیدارەی دووەمدا لە سیاسەتی بەرامبەر عێراق ئەنجامیداوە، بۆیە ئەگەر سیاسەتی ئیدارەی ئۆباما وەك دوائامانج بۆ عێراق، مانەوەی عێراق بێت بە یەكپارچەیی، دەبێت ئەو هۆكارانە چارەسەر بكات، كە لەسەردەمی حوكمڕانی مالیكی بوونە هۆكاری كۆتایی هاتنی عێراق، چارەسەركردنی ئەو هۆكارانەش بەوە دەكرێت:
1- دەبێت پێكەوەژیانی زۆرەملی و ناچاربوون بۆ مانەوە لە ژێر زوڵم و زۆری حكومەتی ناوەند بگۆرێت بۆ پێكەوە ژیانی ئارەزوومەندانە لە چوارچێوەی حكومەتێكی فیدڕاڵی كە هەموو پێكهاتەكان بە حكومەتی خۆیانی بزانن.
2- گۆڕینی باڵادەستی پێكهاتەیەك بەسەر پێكهاتەیەكی دیكەدا بۆ هاوسەنگیی نێوان پێكهاتەكان و پیادەكردنی ڤیتۆكراتی لە بری زۆرینەی سیاسی كە دەبێتە سەرەتایەك بۆ دەركەوتی دیكتاتۆریەتی زۆرینە.
3- ئەم جۆرە حكومەتە فیدڕاڵییە لەسەر دوو بنەمای گرنگ سەركەتوو دەبێت، یەكەمیان: دابەشكردنی دەسەڵاتەكان و دووەمیان: دابەشكردنی داهاتە، لەمەش گرنگتر ئەوەیە ناكرێت سەرچاوەی داهات بكرێتە كارتێك بۆ گوشاری سیاسی كە حكومەت دژ بە هەرێمەكان بەكاری بهێنێت، وەك ئەوەی حكومەتی ناوەندی بەغدا دژ بە هەرێمی كوردستان پیادەی كردووە.
4- شێوازی دابەشكردنی دەسەڵات دەبێت لە چوارچێوەی دەستووری عێراق بێت و دەسەڵاتی حكومەتی فیدڕاڵی سنووردار بێت و دەسەڵاتی هەرێمەكان فراوان بێت، ئەم دەسەڵاتە فراوانە بەپێی ئەو واقیعە تازەی هاتۆتە ئاراوە، دەبێت بێجگە لە هێزی ئاسایش و پۆلیس وەك هێزی ناوخۆ، هێزی پاسەوانی هەرێمەكانیش بگرێتەوە لە چوارچێوەی سیستمی بەرگریی عێراق بۆ ئەوەی هەر هەرێمێك بتوانێت لە پاراستنی هەرێم، یان ناوچەكەی خۆیدا رۆڵی هەبێت.
بەهاری كوردستان و پاییزی تیرۆریستان
لەسەر ئەرزی واقیعی بەرەكانی شەڕی نێوان هێزی پێشمەرگە و تیرۆریستانی داعش، ئێستا هاوكێشەكە بەو جۆرەیە تیرۆریستان لە پێشڕەوی وەستێنراون و لە پاشەكشەدان و پێشمەرگە بە ورەی بەرزەوە لە پێشڕەویدایە و ئەو ناوچانە ئازاد دەكاتەوە كە پێشتر تیرۆریستانی داعش داگیریان كردوون، ئەم هاوكێشەیە لە گۆڕەپانی شەڕەكە ئاماژەیە بۆ ئەوەی تیرۆریستانی داعش رۆژ لە دوای رۆژ زیاتر گەمارۆ دەدرێن و هێزی پێشمەرگەی كوردستانیش رۆژ لەدوای رۆژە بەهێزتر و شارەزاتر دەبێت.
لایەنێكی دیكەی وەرچەرخان لەسەر ئەرزی گۆڕەپانی شەڕ ئەوەیە، جیهان گەیشتە ئەو قەناعەتەی پێویستە هێزی پێشمەرگەی كوردستان ببێتە خاوەنی چەكی قورس و مەشق و راهێنانی پێویست، دووبارە بونیادنانەوەی هەیكەلی هێزی پێشمەرگە و لەمەش زیاتر ناساندنی لەلایەن حكومەتی عێراقەوە وەك بەشێك لە سیستمی بەرگریی عێراق، ئەم دانپێدانانە جیهانییە لەسەر ئاستی نێودەوڵەتی و دانپێدانانی حكومەتی عێراق لەسەر ئاستی لۆكاڵ، ئاماژەیە بۆ ئەوەی ئەو زەمەنە كۆتایی هات، پێناسەی سیستمی فیدڕاڵی عێراق پێناسەیەكی لاستیكی بێت و ناوەند بە پێی بەرژەوەندییەكانی خۆی تەفسیری بۆ بكات، راشكاوانەتر پێناسەی فیدڕاڵیزم بەرەو ئەوە هەنگاو هەڵدەگرێت لە چوارچێوەی عێراقدا چ میكانزمێك پیادە بكرێت، دەبێتە هۆكاری ئەوەی كورد بتوانێت ئارەزوومەندانە بە مانەوە لە چوارچێوەی عێراق رازی بێت؟ ئەمە ئەگەر هەنگاوی یەكەم و زەمینە رەخساندن بێت بۆ چارەسەری فراوانتری كێشەی كورد لەسەر ئاستی ناوچەكە، ئەوا بە سەركەوتنی كورد لە باشووری كوردستان بارودۆخەكە بەو جۆرە دەگۆڕێت كە چارەسەری هاوشێوەی باشوور بۆ بەشەكانی دیكەش بدۆزرێتەوە، ئەم پرۆسەیە كە لەگەڵ شكانی تیرۆریستانی داعش پاییزی تەمەنیان رۆژ لە دوای رۆژ نزیك دەبێتەوە، لە هەمانكاتدا بەهاری هەموو كوردستانیش پێكەوە دەگرێتەوە.