كوردستانی رۆژئاوا پێویستی بەیەكڕیزیی و پێكەوە كاركردن هەیە
September 26, 2013
راپۆرتەکان
كوردستانی رۆژئاوا پێویستی بەیەكڕیزیی و پێكەوە كاركردن هەیە
ئەو بارودۆخەی ئێستا بۆ كوردستانی رۆژئاوا هاتۆتە ئاراوە بەرپرسیاریەتییەكی مێژوویی خستۆتە سەرشانی هەموو گەلی كورستان بەگشتی و حزب و لایەنە سیاسیەكانی كوردستانی رۆژئاوا بەتایبەتی، بۆ ئەوەی سوود لەم هەلە مێژووییە وەربگیرێت و كۆتایی بەو رەوشە نالەبارەی كوردی رۆژئاوا بێت كە ماوەی دەیان ساڵە نەك هەر نكۆڵی لە مافەكانیان دەكرێت، بەڵكو نكۆڵی لەمافی هاووڵاتیبوونیان دەكرێت وەك هاووڵاتییەكی كۆماری سوریا، مافی بەخشینی رەگەزنامەی سورییان پێ رەوا نابینرێت، لەمەش زیاتر كە جێگەی نیگەرانییە، هەتا ئێستا ئۆپۆزسیۆنی سوریا راشكاوانە دانی بە مافە نەتەوەییەكانی كورد نەناوە و ئامادە نییە ئەو مافانە بسەلمێنێت، بۆیە ئەوەی كە دەمێنێتەوە لەم هاوكێشە ئاڵۆزەدا، ئەوە ئیرادەی كورد یەكڕیزی و یەكگرتوو بێت بۆ ئەوەی ئەو توانایەی بۆ دروست رووبەڕووی ئەو تەحەدی گەلە ببێتەوە كە لەم قۆناخە هەستیارە رووبەڕووی دەبێتەوە، بۆ سوود وەگرتن لەم هەلە مێژووییە هەر زوو بەڕێز مسعود بارزانی سەرۆكی هەرێمی كوردستان هەوڵیدا لایەنە سیاسیەكان رۆژئاوا لە ژێرچەتری ئەنجوومەنێكی نیشتمانی كۆبكاتەوە بۆ ئەوەی لانی كەم بۆ تێپەڕاندنی ئەم قۆناخە هەموو لایەنە سیاسیەكان لەسەر ئەو هێڵە گشتیانە كۆك بن كە بۆ ئەم قۆناخە دەبێتە چوارچێوەیەك بۆ دابینكردنی مافەكانی كورد لە كوردستانی سوریا، بۆ ئەمەش لەژێر چاودێری بەڕێز مسعود بارزانی سەرۆكی هەرێمی كوردستان رێككەوتنامەیەك بەناوی رێككەوتنی هەولێر ئیمزا كرا، بۆ ئەوەی تێكڕای لایەنە كوردستانیەكانی كوردستانی رۆژئاوا پێوەی پابەند بن و ئیدارەی ئەو ناوچانانە بدەن كە ئێستا لەژێر دەستی كوردانی سوریادایە.
بەداخەوە ئەو ئومێدەی كە بەم هەلە مێژووییە هەبوو كە بۆ كوردانی سوریا هاتۆتە ئاراوە، تاكڕەویی لایەنێكی سیاسی وەك پەیەدە ئەم ئومێدەی تەڵخكردووە و هەست دەكرێت بەردەوامبوونی لایەنێك بەتاكڕەویی كۆی پرۆسەی سیاسی دەخاتە مەترسیەوە و ترسی ئەوە هەیە ئەم هەلە مێژووییە لەدەست كوردانی سوریا بچێت كە دەیان ساڵە خەونی پێوە دەبینین.
كوردانی سوریا
لەنێوان بەرداشی رژێم و ئۆپۆزسیۆندا
رووخانی رژیمی بەعسی ئەسەد بۆ كوردی سوریا لە باشترین حاڵەتدا وەك رووخانی رژیمی بەعسی سەدام وایە بۆ كوردی عێراق، ئەمەش زۆر بەراشكاوی مانای ئەوەیە بە تەنیا بەرووخانی رژێمی بەعسی بەشار ئەسەد كێشەی كوردی سوریا چارەسەر ناكات، هەروەك چۆن رووخانی رژێمە یەك لەدوایەكەكانی عێراق كێشەی كوردیان چارەسەر نەكرد، بۆیە لەم روانگەیەوە ئەگەر بگەڕێینەوە بۆ ئەزموونی بزاڤی رزگاریخوازی كوردستان لە باشوری كوردستان، ئەوا هەست دەكەین لەهەموو سەردەمێكدا چەند بارودۆخ سەخت بووبێت یان بارودۆخە لەبار بووبێت، ئەوا تەنیا رێگە كە بۆتە زامنی بەدیهێنانی مافەكانی كورد لەهەر چوارپارچەكە تەنیا یەكڕیزیی و یەكتری قبوڵكردنی نێوان هێزە سیاسیەكانی كوردستان بووە، هەر ئەم یەكڕیزیی و یەك گوتاری و یەكتری قبوڵكردنە لەبارودۆخە زۆر سەختەكاندا دەرگای ئومێد و ئاواتی لەرۆژە زۆر سەختەكاندا كردۆتەوە، بە پێچەوانەشەوە هەتا ئەگەر بارودۆخەكە زۆر لەبار بووبێت، ئەوا ئەگەر لایەنە سیاسییە كوردستانییەكان یەكڕیزی نەبووبن و یەكتریان قبوڵ نەكردبێت، ئەوا ئەو بارودۆخە لەبارە كەوتۆتە مەترسیەوە و شەڕی ناوخۆیی لەنێوان لایەنە سیاسیەكاندا بەرپا بووە و سەرەنجامیش كورد زەرەری كردووە، سەبارەت بە گرنگی یەكڕیزیی نێوان لایەنە سیاسیەكانی كوردستانی رۆژئاوا كە ئێستا بەهۆی تاكڕەویی پەیەدەوە خەریكە درزی تێدەكەوێت، عەبدولحەكیم بەشار سكرتێری پارتی دیموكراتی كورد لە لێدوانێكی تایبەت بە گوڵان رایگەیاند، ئێستا لە رۆژئاوا حزب و لایەنە سیاسیەكانی دیكە كەوتوونە ژێر گوشارێكی گەورەی پەیەدە، لەمبارەوە وتی: (بە‌شێوەیە‌كی گشتی گوشارێكی زۆری سەركوتكاری و راونان لەسەر كادیرانی حزبمان و گەلی كورد هەیە لە لایەن پەیەدەوە، بە تایبەتیش ئاوارەكردن و دەركردن بۆ سەر ئەندامانی ئێمە، ئەو گوشارانەی پەیەدە بۆ سەر گەلی كوردمان لە سوریا كاریگەریی كردۆتەسەر رەوشی ئاساییش و تێكدانی شیرازەی گوزەران و ژیانی رۆژانەی خەڵكەكە، ژمارەی ئەوانەی لەم رۆژانەدا لە سوریا لەسەر جێ و ڕێی خۆیان ئاوارەكراون و روویان لە ناوچەكانی دەوروبەر كردووە خۆی لە 50 هەزار هاووڵاتی كورد دەدات، لە راستیدا ئەو سیاسەتەی پەیڕەو دەكرێت بریتییە لە سیاسەتی چۆڵكردنی ناوچە كوردنشینەكان و پیادەكردنی سەركوتكاری و تۆقاندن و جێگە پێ لەقكردنی ئەو خەڵكە سڤیلەیە كە دەیەوێت لەسەر خاكی باب و باپیرانی بەردەوامیی بە ژیان بدات، ئەوەی پەیەدە كردوویەتی بڕوا ناكەم رژێمی سوریا بەم شێوەیە بەرامبەر بەو خەڵكە كردوویەتی. هۆكار و هاندان بۆ ئەم رە‌فتارانە‌ی پەیەدە دەگە‌ڕێتە‌وە بۆ ئەوەی كە حزب و لایەنە سیاسیەكانی دیكە‌ی رۆژئاوا نایانە‌وێت دووچاری شەڕی ناوخۆیی نێوان كورد و كورد بینە‌وە، بۆیە پەیەدە ئەم دەرفەتەی قۆستۆتەوەو دەستی كردووە بە بەكارهێنانی هەموو هۆیەكانی تۆقاندن و كوشتن و دەركردنی خەڵكەكە،هەروەها پەیەدە ئامادە نییە گفتوگۆو دیالۆگ بكات و بەشداربێت لە بڕیاری چارەنووس و ئاییندەی گەلەكەمان، دەیەوێت خۆی فەرماندەر بێت و هێزەكانی دیكە گوێڕایەڵ بن)).
ئەوەی عەبدولحەكیم بەشار بۆ گوڵان ئاماژەی پێكرد ئەو مە‌ترسیە‌یە كە ئەقڵیەتی تاكڕەویی پەیەدە بەرامبەر لایەنەكانی دیكە دەیكات، بەڵام پرسیاری گرنگ لێرە‌دا ئەوەیە ئایا حزب و لایەنە سیاسیەكانی دیكە‌ی رۆژئاوا، تاچە‌ند یەكڕیزی و یەكتری قبوڵكردن بە گرنگ دەزانن ؟ ئەم پرسیارە‌مان رووبەڕووی بەڕێز تاهیر سافۆك سكرتێری حزبی نیشتمانی دیموكراتی سوریا كرد و ئەویش بە‌مجۆرە وەڵامی پرسیارە‌كە‌ی داینە‌وە وتی: ((ئێمە وەك بزووتنەوەی كورد دوژمنمان زۆرە، ئەگەر دۆستیشمان هەبێت دوورن و هەمیشە بەرژەوەندیی خۆیان دەخەنە پێش بەرژەوەندیی ئێمە، هەر لەبەر ئەوەیە كە لەسەر هەموو لایەنەكانی ناو بزووتنەوەی كورد پێویستە بەرژەوەندیی یەكلایەنەو تەسكی حزبایەتی بخەنە لاوە، جا ئەمە لە هەر پارچەیەكی كوردستان بێت، با بێن بیر لە ئاییندەی ئەم میللەتە بكەنەوەو هەوڵ بدەن بە شێوەیەكی رێكوپێك مامەڵە لەگەڵ دۆست و دوژمنان بكەن.. تا ئێستا هەروەكو هەموو لایەك دەزانن، چ رژێمی سوریا و چ ئۆپۆزسیۆن هیچ لایەكیان دان بە مافەكانی كورد دانانێن، بۆیە پێویستە بزاڤی كوردی هەردەم بیر لەوە بكاتەوە كە بتوانێت لایەنە ئیقلیمی و نێودەوڵەتییەكان بۆ خۆی رابكێشێت تاكو بتوانێت ئەو مافانەی داوای دەكەن بە ئەوانی بناسێنێت و بە یەك گوتار ئەوەی مەبەستیان بێت بیخەنە بەردەمیان چونكە زۆر ئەستەمە كورد لەو شوێنە بەبێ پشتیوانی نێودەوڵەتی و هێزی خێرخوازی ئیقلیمی بەو ئاواتانەی بگات و ئاییندەیەكی رۆشن بۆ خۆی مسۆگەر بكات. لەمەش گرنگتر یەكڕیزی بەر لە هەموو شتێك دێت لە پەیوەندی بە بزووتنەوەی رزگاریخوازیی كوردەوە لە هەر چوار پارچەی كوردستاندا، بۆ ئێستای رۆژئاواش ئێمە بە ئاواتی ئەوەین رێكەوتنی هەولێر جێبەجێ بكرێت، ئەگەر بەندەكانی ئەو رێكەوتنە یان نیوەی جێبەجێ بكرابایە ئەوا دەمانتوانی یەكڕیزیی كوردمان بپاراستبایە،بۆیە بەداخەوە بەرپرسیارێتیی یەكەمی ئەم جێبەجێ نەكردنە برادەرانی پەیەدە بوون. هەروەك سەرۆك مسعود بارزانی دووپاتی دەكاتەوە بۆ ئێمە لە هەردوو ئەنجومەن ئەوە پێویستە كە یەكڕیزی بپارێزین و هاوكاری یەكدی بكەین ئەگەرنا هیچ لایەنێكمان لە توانایدا نییە بە تەنیا سەركەوتن بێنێتەدی. لە‌لایە‌كی دیكە‌ش وەك دەبینین هە‌وڵە‌كان بۆ یەك گوتاری كورد لە هەر چوار پارچە بە‌ردەوامە و ئەوەی مایەی هیواو خۆشحاڵی ئێمەی كوردە لە هەر چوار پارچەكە ئەوەیە، كە ئەو كۆنگرە نەتەوەییەی دەبەسترێت ببێتە فاكتەرێك بۆ دروستبوونی یەكڕیزی و یەك گوتاریی كورد بە گشتی، هاوكات بتوانرێت ئەنجامی بە سوود لە بەرژەوەندیی هەموو كوردی لێبكەوێتەوە، ئەمە وێڕای ئەوەی كە ئەو كۆنگرەیە لە خەمی گرفت و كێشەكانی سەرجەم كورددا بێت بە شێوەیەك لە هەر بەشێك كێشەیەك هەبێت چارەسەری بۆ بدۆزنەوە)).
تاكڕەویی پەیەدە
زیان لە بە‌رژەوەندییە‌كانی كورد دەدا
حزب و لایەنە سیاسییە‌كان رۆژئاوا رە‌فتارە تاكڕە‌وییە‌كانی پەیەدە بە‌دژی بە‌رژەوەندی كورد و بۆ بە‌رژەوەندی دوژمنان دەخوێننە‌وە، ئەمەش مانای ئەوەیە لە قۆناخی وەرچە‌رخان یان قۆناخی لاواز بوون یان رووخانی رژێمە دیكتاتۆرییە‌كان وەك پرۆفیسۆر جین شارب لە توێژینە‌وەیە‌كدا بە ناونیشانی ( لە دیكتاتۆریە‌تە‌وە بۆ دیموكراتی ) ئاماژەی پێكردووە كە بە شكستهێنانی رژێمە دیكتاتۆرە‌كان هەموو كیشە‌كان كۆتایی نایە‌ت، لەبەر ئەوەی میراتی رژیمە دیكتاتۆرە‌كان بریتیە لە برسیتی و تاوان و شێواندن، بۆیە كاتێك رژێمە دیكتاتۆرە‌كان شكست دەهێنن هەست دەكەین دووبارە زە‌مینە بۆ ئەو حزبە تاكڕە‌وانە دروست دەبێتەوە كە دیكتاتۆریە‌تێكی دیكە بەینە‌وە ئاراوە، ئەم دیاردەیە‌ش لەو حزبانە‌وە سە‌رهەڵدەدات كە سە‌ركردایە‌تیە‌كە‌یان بریتین لە دەستە‌یە‌كی دەستەبژێر كە هە‌وڵدەدەن لەچوارچێوەی ئایدلۆژیە‌تێكی دیاریكراودا ئیرادەی خۆیان بە‌سە‌ر لایەنەكانی دیكە فە‌رز بكەن و هیچ مانایە‌ك بۆ پێكەوە ژیان و یەكتری قبوڵكردن نە‌مێنێتە‌وە، لەم حاڵە‌تە‌شدا كە ئامانجی ئەو گروپ و دەستە‌یە تە‌نها دەبێتە خۆسە‌پاندن و خۆفە‌رز كردن، ئەوا مافەكانی مرۆڤ پێشێل دەكرێت و باردۆخە‌كە‌ش دەگۆڕێت بۆ ئاژاوە و سە‌رگە‌ردانبوونی هاووڵاتیان، ئەم باردۆخە‌ی جین شارب ئاماژەی پێكردووە لە رۆژئاوای كوردستان و لە‌ئاكامی رە‌فتارە‌كانی پەیەدە هە‌ستی پێدەكرێت و حزب و لایەنە سیاسیەكانی دیكە‌ش هەست بەم راستیە دەكەن و جە‌خت لەسەر ئەوە دەكە‌نە‌وە ئەو زیانە‌ی لە ئاكامی رەفتاری پەیەدە لەم قۆناخە بەر بزاڤی رزگاریخوازی كوردستان دەكە‌وێت، زۆر لەو زیانانە زیاترە كە رژێمی ئەسەد لە بزاڤی رزگاریخوازی كوردستانی داوە، لەمبارەوە لە درێژەی لێدوانە‌كە‌یدا بۆ گوڵان عەبدولحەكیم بەشار بە‌مجۆرە هە‌ڵوەستە‌ی كرد و وتی: (جاران سیاسەتی پەكەكە لە ساڵانی نەوەدەكان ئەوە بوو كە بە قسەی ئەوان كورد لە سوریا نییە بەڵكو كۆچەرن و لە شوێنی دیكە هاتوون و پێویستە بگەڕێنرێنەوە جێگەی جارانیان، ئێستاش سیاسەتەكەی پەیەدە بەم شێوەیەیە كە دەبێ هەموو ناوچە كوردنشینەكان لە دانیشتوانەكانیان چۆڵ بكرێن، جا بۆ هەر وڵاتێك دەچن چ بۆ عیراق یان بۆ توركیا یان شوێنی دیكە، كەواتە ئێستا ئەم سیاسەتە پەیڕەو دەكرێت، ئەمەش هاوشێوەی سیاسەتی بەعسی شۆڤێنییە. ئەمەش بەشێكە لە ئەجێندای رژێمی سوریا، چونكە ئەو رژێمە كاریگەریی بۆ سەر رەفتاری پەیەدە هەیە، ئەو دەیەوێت ململانێ لە نێوان تایفەو ئایینزاو نەتەوەكاندا بكات، لە نێوان سوننەو عەلەوییەكان، هەروەها ململانێی بیروباوەڕ لە نێوان تاقمە توندڕۆ ئیسلامییەكان، هەوەها نێوان عەرەب و كورد، دواجار لە نێوان خودی پێكهاتە كوردییەكان، بەڵام لە هەموو حاڵەتێكدا كاریگەر و ئەنجامەكانی ئەم كێشەیە دەكەوێتە ئەستۆی خۆمان كە ناتوانین چارەسەرێكی گونجاوی بۆ بدۆزینەوە. چارەسەرەكەش لەوەدایە (پەیەدە) كەئێستا پەیوەندی و هەماهەنگی بەهێزی لەگەڵ رژێمی سوریادا هەیە، دەبێت وازی لێ بێنێت، یان لە چوارچێوەی ئەجندای كوردی كاربكات، بەشداریی كاریگەریانە بكات لە بزووتنەوەی رزگاریخوازیی كورد لە سوریا، بەڵام بژاردەكانی دیكە رەنگە زۆر قورس بن. هەروەها لە‌لایە‌كی دیكە‌شەوە ئێستا دەبینین كە بەڕێز مسعود بارزانی سەرۆكی هەرێمی كوردستان هەوڵ دەدات هەموو لایەنەكان لەیەكدی نزیك بكاتەوە، تاكو لەرووی سیاسی و سەربازییەوە گوتارێك و هێزێكی یەكگرتووی كوردی بێتەئاراوە، بەڵام خەڵكانێك هەن دژی ئەم هەنگاوە هەڵسوكەوت دەكەن، ئەوانە دەیانەوێت ریزەكانی كورد تێك بدەن و جوداكاریی بخەنە نێوان هەموو بەشەكانەوە لە پێناو بەرژەوەندیی تەسكی حزبایەتی.))
ئەوەی سیاسە‌تمە‌دارانی كوردی رۆژئاوا بە‌مە‌ترسی بۆ سەر دۆزی رۆژئاوا ئاماژەی پێدەكە‌ن رە‌فتارە تاكڕە‌وییە‌كانی پەیە‌دەیە، بۆیە ئێستا هە‌وڵی هەموو لایەك بۆ ئەوەیە كە گوشارێكی سیاسی دروست بكەن بۆ ئەوەی پەیەدە دەستبە‌رداری ئەو تاكڕە‌وییە بێت و بڕوای بە یەكتری قبوڵكردن و پێكەوە كاركردن هەبێت، لەمبارەوە بەڕێز شە‌لال كە‌دۆ ئە‌ندامی مە‌كتە‌بی سیاسی حزبی چەپی دیموكراتی لە سوریا لە لێدوانێكی تایبەتی بۆ گوڵان جەختی لەسەر ئەوە كردەوە كە نابێت پەیەدە لەسەر رە‌فتارە‌كانی بە‌ردەوام بێت و لەمبارەوە وتی: (ئێستا مەترسییەكی زۆر هەیە لە سەر كورد بە گشتی و لەسەر رۆژئاوای كوردستان بە شێوەیەكی تایبەتی، هاوكات رۆشنایی زۆر لەسەر دۆزی كوردە لەم ناوچەیەدا بۆیە یەكڕیزیی كورد لەم قۆناغەدا لە هەموو شتێك لەپێشترە، هەروەها ناكۆكی و جیاوازیی نێوان لایەنە كوردییەكان لە هەر پارچەیەكی كوردستان بۆ بەرژەوندیی دوژمنانە، سەبارەت بە یەكگرتن ئەوە هیوایەكە بۆ ئێمە چونكە بۆ نموونە دەبینین دەیان دەوڵەت لە كیشوەری ئەوروپا لەچوارچێوەی یەكێتیی ئەوروپادا بەیەكەوە كاردەكەن، بۆچی ئێمەی كورد لە هەر چوار پارچەی كوردستاندا نەتوانین وەكو یەك میللەت یەكێتیی خۆمان بپارێزین. بۆیە لە پێناو بە‌رژەوەندی كورد نابێ پەیەدە یان هەر حزبێكی دیكە لە كوردستان خۆی بە سەر لایەنەكانی دیكە بسەپێنێت، هەر حزبە دەتوانێت بەپێی كێش و تواناو بیروهزری خۆی مامەڵە لەگەڵ بارودۆخەكە بكات، ناكرێ حزبێك خۆی بەگەورەتر لەوی دیكە دابنێ، چونكە هەموو لایەنەكان كار بۆ خزمەتكردنی گەلی كورد دەكەن لەم وڵاتەدا، چ ئەنجومەنی نیشتمانی یان ئەنجومەنی گەلی رۆژئاوای كورد لە سوریا.بۆیە ئەگەر بە تەنیاو تاكڕەویانە كاربكەین لە كۆتاییدا زیان بە میللەتەكەمان دەگەیەنین. رەنگە ئەنجومەنی ئێمە لەگەڵ پەیەدە لە هەندێ شتدا جیاواز بێت، بەڵام دەبێت ئەوە لەبەر چاو بگرین دەبێت هەموو بۆ بە‌رژەوەندی كورد كاربكەین، بۆ ئەمەش دیالۆگ لە نێوان هەردوو ئەنجومەن دەبێتە هۆی چارەسەركردنی جیاوازییەكانمان، ناكۆكی و ململانێی نێوان كورد - كورد لە سوریا كارەساتە بۆ میللەتەكەمان لە سوریا بە گشتی.. هەر بۆیە یەكڕیزیی كورد لە كوردستان و لە دەرەوەی كوردستان شتێكی گەلێك گرنگە، بۆیە ئێمە چاوەڕوانی ئەوەمان دەكرد كۆنگرەی نەتەوەیی كورد لەم قۆناغەدا دەستی بەكارەكانی بكردایە چونكە بۆ هەموو كورد دەستكەوتێكی گرنگ بوو، لەبەر ئەوە زیاتر رۆشنایی دەخستە سەر كێشەی ئێمە لە رۆژئاوای كوردستان، بەڵام دواخستنی بەستنی ئەم كۆنگرەیە بۆ دوو مانگی دیكە راستە زۆر كاریگەری نییە بەڵام گرنگە زوو ببەسترێت، تاكو هەموو وڵاتانی جیهان ئاگاداربن كە میللەتی كورد وەكو گشت میللەتان مافی خۆیانە بە شێوەیەكی دیموكراتی و ئاشتییانە ژیان بەسەربەرن. هەروەها رێكەوتنی هەولێر زۆر گرنگە بۆ قۆناغی ئێستای كورد لە رۆژئاوای كوردستان، چونكە ئەم رێكەوتنە چارەنووسسازەو ستراتیژییە و بە چاودێریی سەرۆك مسعود بارزانی لە پایتەختی هەرێمی كوردستان ئیمزا كراوەو پێویستە هەموو لایەك رێزی بگرێت،چونكە ئەگەر ئەو رێكەوتنەی هەولێر نەبوایە ئێمەی كورد نەمان دەتوانی درێژە بە كاری خۆمان لە رۆژئاوای كوردستان بدەین هەر لەبەر ئەوەیە ئێمە وەكو ئەنجومەنی نیشتمانی و حزبی چەپی دیموكرات لە سوریا داوا لە هەموو كوردێك دەكەین پابەندبێت بەو رێكەوتنەو جێبەجێی بكات.))
كوردستانی رۆژئاواو
سوودوەرگرتن لە دەرفەتێكی زێڕین
چۆن لە‌ساڵی 1991 دەرفەتێكی زێڕین بۆ بە‌شێكی كوردستانی باشوور هە‌ڵكە‌وت و توانرا ئەو ئە‌زموونە دیموكراتیە‌ی لێ بە‌رهەم بێت كە ئێستا جیهان بە شانازییە‌وە باسی لێوە دەكات، ئەوا بە‌هە‌مان شێوە ئەو دەرفەتەی بۆ كوردستانی رۆژئاوا هاتۆتە پێشە‌وە دەكرێت بۆ بە‌رژەوەندی كوردستانی رۆژئاوا سوودی گەورەی لێوەربگیرێت و نموونە‌یە‌كی دیكە‌ی جوانی خۆبە‌ڕێوەبردنی كورد پیشانی جیهان بدرێت، بەڵام ئەمە چۆن دروست دەبێت؟ بێگومان دەبێت هەموو حزب و لایەنە سیاسیەكانی كوردستانی رۆژئاوا بگە‌نە ئەو قەناعە‌تە‌ی كە تاكڕەویی و خۆسە‌پاندن جگە لە‌وەی روویە‌كی ناشرین پیشانی جیهان دەدات لە‌هە‌مان كاتدا كوردی رۆژئاواش سە‌رگەردان دەبێت، بۆیە لەم چوارچێوەیە‌دا گە‌ڕانە‌وە بۆ ئە‌قڵ و لۆژیك و خۆ دوورخستنە‌وە لە خۆسە‌پاندن و تاكڕەویی زە‌مینە‌یە‌ك دروست دەكات كە بتوانرێت هە‌نگاوی گرنگ بۆ ئەو ئامانجە هە‌لبگیرێت، سەبارەت بەم لایەنە بەڕێز عە‌لی شە‌ندین ئە‌ندامی ئە‌نجوومە‌نی نیشتمانی سوریا لە لێدوانێكی تایبەت بۆ گوڵان بە‌مجۆرە لەسەر ئەم پرسە هە‌ڵوەستە‌ی كرد و ڕای خۆی بۆ گوڵان دەربڕی: (ئێستا دەرفەتێكی زێڕین هاتۆتە پێش، ئەگەر یەكڕیزیی و یەك گوتاریی بۆ سەرجەم كورد پێویست بێت ئەوا بۆ كوردی سوریا دەیان جار پێویستترە، هەر بۆیە ئەگەر ئێمە بتوانین ئەو یەكڕیزییە دروست بكەین لە رێگای ئەنجامدانی دیالۆگ لەگەڵ هەموو لایەنەكانی كورد و ئەنجومەنی نیشتمانی لە سوریا ئەوا سە‌ركە‌توو دەبین، بە پێچەوانەوەشە‌وە تەمەنی رژێمەكەی ئەسەد درێژ دەبێت و خوێنی رۆڵەكانمان زیاتر بە ناحەق دەڕژێت. بۆیە لەم قۆناخە زۆر گرنگە لەگەڵ ئەوەی ناكۆكیی نێوان لایەنەكانی كورد لە سوریا مێژوویەكی كۆنی هەیە، بەڵام دەكرێ گرفتەكانمان وەلاوەبنێین و كێشەكانمان چارەسەربكەین، بزووتنەوەی كورد لە رۆژئاوا پێویستی زۆری بە پشتگیریی هەیە بەڵام نەك بە دەستتێوەردان. هە‌ربۆیە هەر هەوڵێك بدرێت بۆ یەكڕیزیی كورد زۆر گرنگەو جەنابی سەرۆكی هەرێمی كوردستانیش لەم رووەوە بە سوپاسەوە درێخی نەكردووە، بەڵام هەندێ گرفت لە ئارادایە و هەندێ جاریش ئاستەنگمان بۆ دروست دەكرێت یان دەست تێوەردان دێتەپێش، كە كوردی رۆژئاوا لە نێو هێزەكان دابەش دەكرێن، كە ئەمەش زۆر نەرێنییەو بۆ ئێمە زۆر خراپە چونكە پێویستیمان بە پشتگیریی سەرتاسەرییە بۆ بزووتنەوەی سیاسیی كوردستانی لە بواری سیاسی و ئابووری و راگەیاندن، یان ناساندنی بزاڤەكەمان لەسەر ئاستی نێودەوڵەتی. ئەو رووداوو پێشهاتانەی ئێستای رۆژهەڵاتی ناوەڕاست زیاتر كاریگەرییان هەیە بۆ سەر بزووتنەوەی رزگاریخوازیی كورد تاكو بیر لەوە بكەنەوە كە رێگەیەك و یەكڕیزیی بگرنەبەر بۆ رووبەڕووبوونەوەی هەر پێشهاتێك كە زیان بە كورد بگەیەنێت، ئێستاش دەرفەتێك هاتۆتەپێش بۆ كورد ئەویش بەستنی كۆنگرەی نەتەوەیی كوردە بە سەرپەرشتیی سەرۆك مسعود بارزانی بۆ دەست نیشانكردنی ئاریشەو گرفتەكان و دۆزینەوەی رێگاچارە بۆ هەموو كێشەكان،هەرچەندە دواخرا بەڵام جێگەی ئومێدی ئێمەیە،بۆیە ئێستا دەرفەتێك بۆ كورد هاتۆتە پێش پێویستە بە تەواوی و بە قازانجی میللەتەكەمان بیقۆزینەوە)).
