زۆرجار دەگوترێت هەرێمی كوردستان وەك كەشتیەكی گەورە وایە و هەموومانی بەجیاوازی بیروبۆچوونی سیاسیی و نەتەوەیی و ئایینییەوە لەخۆی گرتووە، ئەم كەشتیە ئەگەر بەسەلامەتی بگاتە مەنزڵ هەموومان دەگەیەنێتە ئامانج و ئەگەر خوانەخواستە دووچاری مەترسی بێتەوە، چارەنووسی هەموومان دەكەوێتە مەترسیەوە، بۆیە ئەگەر لەناو كەشتیەكە بیروبۆچوونە جیاوازەكان تارادەیەك هاودەنگ و هاوهەڵوێستیش نەبن ئەوە كارێكی ئاساییە، بەڵام كار گەیشتە سەر ئەوەی كەشتیەكە كەوتە بەر هەڕەشەی دەرەكی یان لەخاڵێكدا پێویستی بەوە بوو لەمەترسی و تەحەدییە دەرەكیەكان دووری بخەینەوە یان بەرگری لێ بكەین، ئەوا لەم كاتەدا پێویستە هەموو بیروبۆچوونە جیاوازەكان لەخاڵێكدا یەكبگرنەوە و لەپێناوی سەلامەتی كەشتیەكەدا یەك دەنگ و یەك هەڵوێست بن، بۆ ئێستای هەرێمی كوردستانیش حاڵەتەكە تەواو هاوشێوەی ئەو كەشتیەیە كە لەناو دەریای گۆڕانكارییەكان و هاوكێشە نێودەوڵەتیەكاندا نەك تەنیا چارەنووسی دانیشتوانی هەرێمی كوردستانی پێوە گرێدراوە، بەڵكو بۆتە ئەو هیوایەی كە هەموو كوردستانییەكان لەبەرچاوی ئومێدەوە لێی دەڕوانن و سەلامەتی و سەقامگیری هەرێمی كوردستان بەسەرەتای هێنانەدی خەونەكان دەبینن، لەم ڕاستەدا و ئەوەی ئومێد بۆ هەموو لایەك دروست دەكات ئەوەیە كە تەواوی لایەنە سیاسیەكان و پێكهاتە ئایینی و نەتەوە جیاوازەكانی كوردستان (بەداخەوە بێجگە لەبزووتنەوەی گۆڕان) هاودەنگ و هاو هەڵوێستن لەگەڵ سەرۆكایەتی هەرێمی كوردستان بۆ ئەوەی بەسەلامەتی و سەرفرازی هەرێمی كوردستان لەناو دەریای ئەم گۆڕانكارییانە بگاتە مەنزڵ و سەرەنجام ئەم كیانە ببێتە جێگەی ئومێدی هەمووان، بەڵام بەداخەوە لەناو تێكڕای لایەنە سیاسیەكان و تەواوی پێكهاتە جیاوازەكانی كوردستان، بزووتنەوەی گۆڕان خۆی لەكوردستانییەكان جیاكردۆتەوە و هەڵوێستێكی جیاوازی هەیە و هەر جارەی بەبیانوویەك بایكۆتی كۆبوونەوە سیاسیە نیشتمانییەكان دەكات و دەیەوێت درزێك بخاتە ناو ئەو یەكڕیزی و یەكهەڵوێستیەی كە ئەمڕۆ هەرێمی كوردستان پێویستی پێیەتی، لەوانەیە هەندێك بەو جۆرە سەیری ئەم پرسە نیشتمانییە بكەن بەوەی ئاساییە لەوڵاتێكی دیموكراتیدا هەڵوێستە سیاسیەكان لەهەمبەر پرسێكی سیاسیی دیاریكراو جیاواز بێت، بەڵام ئەم جیاوازییە هەتا لەسەر پرسە ناوخۆییەكان بێت كارێكی ئاساییە، بەڵام كە گەیشتە پرسە نیشتمانییەكان، هەتا ئەگەر ئەو بۆچوونەی كە بەشی زۆری لایەنە سیاسیەكان پەسەندی دەكەن لەگەڵ بەرژەوەندی لایەنێكی سیاسی دیاریكراو یەكیش نەگرێتەوە، ئەوا دەبێت ئەو لایەنە لەپێناوی بەرژەوەندی گشتی نیشتمانی بەرژەوەندی حزبی خۆی وەلا بنێت و هەوڵبدات سەقامگیری وڵات لەو بارە ناسكە بپارێزێت، نەك بەداخەوە وەك ئێستا لەهەڵوێستی سیاسیی بزوتنەوەی گۆڕان بەئاشكرا دەیبینن و ئۆباڵی هەموو ئەو هەڕەشە و تەحدیانەی لەم قۆناخە ڕووبەڕووی هەرێمی كوردستان دەبێتەوە، گرێی بداتەوە بەوەی ئەوە سەرۆكایەتی هەرێمی كوردستانە كێشەی دەرەكی دروست دەكات بۆ ئەوەی كێشە ناوخۆییەكانی پێ پەردەپۆش بكات، لەوانەیە یەكێك نەزانێت یان خەڵكی كوردستان نەبێت، لەم لێدوانانەی سەرۆكی بزووتنەوەی گۆڕان بەو جۆرە تێبگات، سەرۆكایەتی هەرێمی كوردستان پرۆژەی وزەی ئەتۆمی دەستپێكردووە و خەریكی دروستكردنی بۆمبی ئەتۆمیە و كێشەی بۆ هەرێمی كوردستان دروستكردووە، یان سەرۆكایەتی هەرێمی كوردستان ڕایگەیاندووە دراوسێكانی داگیر دەكات و بەمەش كێشەی دەرەكی بۆ كوردستان دروستكردووە، لەكاتێكدا هەموو چاودێرێك و سیاسەتمەدارێك ئەو ڕاستیە دەزانێت كە شەخسی مسعود بارزانی سەرۆكی هەرێمی كوردستان لەماوەی 10-12 ساڵی ڕابردوو لەگەرمەی ڕووداوەكانی خۆ ئامادەكردن بۆ پرۆسەی ئازادی عێراق چەند شەڕی لابەلای لەیەخەی هەرێمی كوردستان كردۆتەوە، لەمەش زیاتر وێڕای ئەوەی نەیویستووە شەڕ دروست بێت، بەڵام هەرێمی كوردستانی گەیاندۆتە ئەو قۆناخەی كە ئێستا خەریكە شەرعیەتێك بۆ ئەم هەرێمە دروست دەبێت كە بەئەمری واقیع وەك دەوڵەت مامەڵەی لەگەڵ دەكرێت و بۆتە سەرەتایەك كە هەنگاوی گەورەتریش بنرێت.
هەرێمی كوردستان مافی پێشێلكراوەو كێشەو دروست ناكات
ئەو قسە كۆنەی كە دەڵێت:((كێشەی دەرەكی دروست دەكرێت بۆ ئەوەی كێشە ناوخۆییەكانی پێ پەردەپۆش بكرێت))، ئەگەر بۆ سەردەمانی دەسپێكی شەڕی سارد و كێبڕكێی چەك لەنێوان دەوڵەتانی بلۆكی ڕۆژئاواو بلۆكی سۆشیالیستی ڕاست بووبێت، ئەوا بۆ وڵاتێكی وەك ئێستای هەرێمی كوردستان ڕاست نییە، ئەوەشی ئەم ڕستەیە وەك بنێشتە خۆشە لەهەموو بۆنەیەكدا بەكاردێنێتەوە، دەبێت بزانێت ئەم قسەیە بۆ ئەوە نەكراوە لەسەر هەرێمێكی وەك كوردستان پراكتیزە بكرێتەوە، هۆكاری سادەش بۆ ئەم نەگونجانە ئەوەیە كاتێك هیربەرت ماركۆز ئەم دەستەواژەیەی بەكارهێناوە مەبەستی لەو دەوڵەتە پیشەسازییە گەورانەی ڕۆژئاوا بووە كە ڕێگە نادەن مەدی شیوعی بگاتە وڵاتەكەیان و لەژێر پەردەی ئەوەی گوایە وڵاتەكەیان لەبەردەم هەڕەشەی شیوعیدایە هەموو ئیمكانییەتی خۆی بۆ هەڕەشە دەرەكیەكان تەرخانكردووە و لەسەر ئاستی ناوخۆش هەموو ناڕەزاییەكی بێدەنگ كردووە، ئەمەش جۆرێك لەمرۆڤی تاك ڕەهەندی دروستكردووە و ڕێگەنادات هاووڵاتیان هەست بەو ناعەدالەتیە بكەن كە لەو وڵاتانە بوونی هەیە، ئەم قسەیەی ماركۆزە لەساڵی 1989 و لەگەڵ ڕووخانی دیواری بەرلین بووە بڵقی سەر ئاو، لەبەر ئەوەی ئەوە هاووڵاتیانی ئەڵمانیای دیموكراتی سەر بە بلۆكی سۆشیالیستی بوون دەیانویست وەك هاووڵاتیانی ئەڵمانیای فیدرالی سەر بەرۆژئاوا بژین نەك بەپێچەوانەوە، ئەوە هاووڵاتیانی ئێستای كۆریای باكوورە دەیانەوێت وەك هاو خوێنەكانیان لەكۆریای باشوور بژین نەك بەپێچەوانەوە، ئەوە هاووڵاتیانی چیك و سلۆفاكیا و پۆلەندا و هەنگاریا بوون دەیانوویست وەك هاووڵاتیانی ئەوروپای ڕۆژئاوا بژین نەك بەپێچەوانەوە، بۆیە ئەو خەونەی ماركۆز پێی وابوو ڕۆژێك شۆڕش لەوڵاتانی دیموكراتی دروست دەبێت و دەوڵەتانی سەرمایەداری دەگۆڕێن بۆ سۆشیالیستی، بەتەواوەتی پێچەوانە شكایەوە و لەناو دەوڵەتانی سۆشیالیستی شۆڕش دروست بوو گۆڕدران بۆ سەرمایەداری، بێگومان مەبەست لەم باكگراوەندە خێرایە بۆ ئەوەیە بەكارهێنانی ڕستە و دەستەواژەی خوازراو بۆ سەردەمێكی جیاواز و هەوڵدان بۆ پراكتیزە كردنی لەسەر بارودۆخێكی جیاواز و لەسەردەمێكی جیاوازدا، بێجگە لەبازرگانییەكی هەرزان بەمەعریفەوە شتێكی دیكە نییە، مەبەستیش لەبازرگانی هەرزان بەمەعریفەوە ئەوەیە، كە لایەنێكی سیاسی خەڵكی خۆی هێندە بەنەزان بزانێت، مەعریفەی خواستراوی لەبەرگێكی خۆماڵیدا پێ بفرۆشیتەوە، ئەمە هەمان ئەو مەترسیەیە كە یۆرگن هابرماس فەیلەسوفی گەورەی ئەڵمانی سەبارەت بەكۆمپانیاكانی ڕاگەیاندن هەستی پێكردووە و ڕاشكاوانە ئاماژە بەوە دەكات، كە كۆمپانیاكانی ڕاگەیاندن زانیاریان كردۆتە شمەكی بازرگانی و هاووڵاتیانیان كردۆتە موشتەری بۆ ئەوەی زانیاریەكیان وەك شمەك پێ بفرۆشنەوە، لەكاتێكدا كاری سەرەكی ڕاگەیاندن گەیاندنی زانیارییە نەك فرۆشتنی زانیارییەكان، هاووڵاتی موشتەری نییە زانیاری لە بەرگی دیكەدا بكڕێت، بەڵكو هاووڵاتی مافی خۆیەتی زانیاری ڕاستی دەست بكەوێت، ئێستا بەداخەوە ئەو پەتایەی یۆرگن هابرماس لێی دەترسێت لەڕۆژهەڵات و لەوڵاتی خۆشمان حزبە سیاسیەكان بەهاوشێوەی كۆمپانیاكانی ڕاگەیاندنی ڕۆژئاوا زانیارییەكان دەكەنە كەلوپەلی ئایدیۆلۆژی سیاسیی خۆیان و بەرژەوەندی حزبی خۆیان چۆن بخوازیت بەو جۆرە و وەك بازرگانییەكی سیاسیی بەهاووڵاتیانی دەفرۆشنەوە، لەم ڕوانگەیەوە جێگەی خۆیەتی ئەو پرسیارە بكەین، ئایا ئەو كێشە دەرەكیانە چین كە سەرۆكایەتی هەرێمی كوردستان بۆ خەڵكی كوردستانی دروستكردووە و سەرەنجام ئەو كێشانە بوونە هۆكاری ئەوەی كە هەموومان لەشەڕەوە تێوە بگلێن؟ یان ئایا ئەو هەڕەشە دەرەكیانە چین كە سەرۆكایەتی هەرێمی كوردستان دروستی كردوون و ئێستا سەرۆكایەتی هەرێم دەیەوێت لایەنە سیاسیەكان ببنە پاشكۆی؟ وەڵامی ئەم دوو پرسیارە بەچەند خاڵێك دەدەینەوە:
1- لەماوەی ئەو 20 ساڵەی كە هەرێمی كوردستان وەك ئەزموونێك بوونی هەیە و بەدیفاكتۆ وەك دەوڵەت مامەڵەی لەگەڵ كراوە، هەتا ئێستا هەرێمی كوردستان لەگەڵ هیچ كام لەدەوڵەتە دراوسێكانی لەشەڕ تێوە نەگلاوە و هەوڵدراوە بەئاستی دیپلۆماتیەتێكی بەرز و لەچوارچێوەی ئەو هێز و ئیمكانییەتە كەمەی لەبەردەست بووە هەرێمی كوردستان لەشەڕی دەرەكی بپارێزرێت.
2- لەماوەی 20 ساڵی ڕابردوو چەندین جار لەلایەن دەوڵەتانی دراوسێوە سنووری هەرێمی كوردستان بەزێنراوە و چەندین جاریش هەڕەشەی داگیركردن و سڕینەوەی ئەم هەرێمە كراوە، بەڵام ئەم هەرێمە لەژێر سایەی سەركردایەتی بارزانی بۆتە ئەو كیانەی كە هەموو دەوڵەتانی دراوسێ بەهەردوو دەوڵەتی توركیا و ئێرانیشەوە كونسوڵخانەی خۆیان لەهەولێر كردۆتەوە، بەتایبەتیش توركیا كە ئێستا هەموو دەبینن سەرۆك وەزیران و وەزیری دەرەوەی توركیا ئامادەن لەژێر ئاڵای كوردستاندا سەردانی ئەم هەرێمە بكەن و ئاڵای كوردستان هاوتای ئاڵای توركیا دابنرێت.
3- لەپێش ڕووخانی ڕژێمی سەدام حوسێن و لەمیانەی ئامادەباشیەكانی ئۆپۆزسیۆنی عێراقی بۆ قۆناخی دوای ڕژێمی سەدام حوسێن، بەشاهیدی هەموو ئۆپۆزسیۆنی عێراقی ئەوەی ڕیزەكانی ئۆپۆزسیۆنی عێراقی بەیەكگرتوویی هێشتۆتەوە، ڕۆڵی سەركردایەتی سیاسی كوردستان بەگشتی و بەتایبەتیش شەخسی سەرۆك مسعود بارزانی بووە، تەنانەت لەكۆنگرەی ئۆپۆزسیۆنی عێراق ڕۆڵی سەرۆك بارزانی بەو ئاستە بوو كە بۆ ڕۆژی دواتر سەعد بەزاز سەرنووسەری زەمانی لەندەنی وتارێكی نووسیبوو بەناونیشانی (ئەگەر بارزانی نەبوایە) واتە ئەگەر بارزانی لەو كۆبوونەوەیە نەبوایە چۆن ئەو كۆبوونەوەیە كۆتایی دەهات، بێگومان بەئەنجامێكی باش كۆتایی نەدەهات.
4- لەدوای ڕووخانی ڕژێمی سەدام دووبارە بونیادنانەوەی عێراق و لەداڕشتنی یاسای كاتی ئیدارەی دەوڵەت و پاشتریش لەداڕشتنی دەستووری عێراقدا، ڕۆڵی سەركردایەتی سیاسی كوردستان بەگشتی و هەردوو سەرۆك بارزانی و تاڵەبانی بەڕاشكاوی دیارە و هەموو جیهان شاهیدی ئەوەیان بۆ دەدا ئەگەر ڕۆڵی كورد نەبوایە لەپرۆسەی سیاسی عێراقدا، عێراق دەبووە گۆمی خوێن.
سەرۆكی كوردستان داكۆكی لەمافەكانمان دەكات و كێشە بۆ گەلی خۆی دروست ناكات
ئەمە یەكەمجار نییە لەسەر ئاستی ئیقلیمی و نێودەوڵەتی و تەنانەت ناوخۆش، هەڵوێستەكانی بەڕێز مسعود بارزانی لەگەڵ بەرژەوەندی هەندێك دەوڵەت و لایەن و تاقم و گروپ یەكناگرێتەوە، هەربۆیە هەموو كات لەلایەن ئەوانەی بەرژەوەندییەكانیان لەئاكامی هەڵوێستەكانی بارزانی زیانیان پێدەگات، ئەو كات پەنا بۆ هەندێك قسەی دروستكراو دەبەن و دەیانەوێت لەهەمبەر هەڵوێستی بارزانیدا خۆیان نمایش بكەن، ئەم هەڵوێستانەی بارزانی نەك لەدوای ئەوەی بۆتە سەرۆكی هەڵبژێردراوی كوردستان جێگەی هەڵوەستە و تێڕامان بوون، بەڵكو لەو كاتەی هیچ ئومێدێك بەشۆڕش و بەرخودانیش نەمابوو، ئەو كاتە بەڕێز مسعود بارزانی وەك پێشمەرگەیەكی كوردستان لەڕیزی پێشەوەی بەرەكانی جەنگ بووە و داستانی مەزنی خواكوڕكی تۆماركرد، كە لەو داستانە مێژووییەدا پێشبینیەكانی خۆی بەهەموو جیهان ڕاگەیاند كە بارودۆخەكە گۆڕانكاری بەسەردا دێت، لێرەدا گرنگە هەندێكیان بەیاد بێنینەوە:
1- بەڕێز مسعود بارزانی كە لەساڵی 1991 سەرۆكی بەرەی كوردستانی بوو لەناوەوەی وڵات، لەشاری حاجی قادری كۆییەوە بەهەموو گەلی كوردستانی ڕاگەیاند، دەبێت لەكوردستان دەوڵەتی قانوون دابمەزرێت و دەسەڵات بگەڕێتەوە بۆ گەلی كوردستان، لەم پێناوەشدا هەر لەساڵی 1991 دوای هاتنەوەی سوپای عێراق سەركردایەتی شەڕی كۆڕێی كرد و ئامادەبوو لەپێناوی پاراستنی دەسكەوتەكانی ڕاپەڕین وەك پێشمەرگەیەك خۆی فیدای خاكی كوردستان بكات. ئەم مقاوەمەتەی سەرۆك بارزانی لەساڵی 1991 كە دواتر بڕیاری 688ی ئەنجوومەنی ئاسایشی بەدوادا هات، بووە ئەو ئەزموونەی ئێستا هەموو كورد بەچاوی ئومێدەوە لێی دەڕوانن.
2- بەڕێز مسعود بارزانی لەساڵی 2003 و لەمیانەی ئەو وتارەی كە لەرۆژنامەی برایەتی بڵاوی كردەوە بەوەی ڕێگە نادەین جارێكی دیكە كوردستان داگیربكرێتەوە ئامادەین لەبەرامبەر سوپای توركیا ڕابوەستین، هەژانێكی ئەوتۆی دروستكرد، كە كوردستان لەبری توركیا بووە ئەندامی هاوپەیمانی نێودەوڵەتی لەپرۆسەی ئازادكردنی عێراقدا و پێگەی كورد لەسەر ئاستی ناوچەكە و جیهان گۆڕانێكی ئەوتۆی بەسەردا هات كە لەمێژوودا وەرچەرخانی وای بەخۆیەوە نەبینووە.
3- بەڕێز مسعود بارزانی لەشەڕی نووسینەوە و داڕشتنی دەستووری عێراق لەساڵی 2005، مافی كوردستانییەكانی بەتەواوی ئایین و نەتەوە جیاوازەكانەوە لەدەستووری عێراق چەسپاند، ئەوە بارزانی بوو ئامادەبوو هەموو شتێك بكات بەقوربانی مافی كوردستانییەكان بۆ ئەوەی مافی كوردستانییەكان لەدەستووری عێراقدا بچەسپێت.
4- هەموومان ڕاپۆرتی دیراسەتی عێراق ناسراو بەڕاپۆرتی (بیكەر- هاملتۆنمان) لەیادە، هەمووش دەزانین لەو ڕاپۆرتە چۆن باسی چارەسەركردنی كێشەی كەركوك و چارەنووسی ماددەی 140 كراوە، هەمووش هەڵوێستی بارزانیمان لەبەغدا و لەمیانەی كۆبوونەوەی لەگەڵ پەرلەمانتارانی لیستی كوردستانی لەبەغدا بینی كە چۆن دژی ئەو ڕاپۆرتە ڕاوەستایەوە و سەرۆك بۆش بەشەخسی پێوەندی بەسەرۆك بارزانییەوە كرد و پێی ڕاگەیاند، ئەوەی لەو ڕاپۆرتەدا هاتووە ڕاسپاردەن و مولزم نین هەتا ئێمە پێوەی پابەند بین.
5- لەدوای هەڵبژاردنەكانی ساڵی 2010، عێراق بۆ ماوەی نزیكەی 10 مانگ نەیتوانی حكومەت پێكبهێنێت، دوای ئەوەی هەموو لایەك لەسەر ئاستی ئەمریكا و یەكێتی ئەوروپا و دەوڵەتانی ئیقلیمی نەیانتوانیی لایەنە سیاسیەكان پێكبگەیەنن، ئەوە بەڕێز مسعود بارزانی بوو لەهەولێر هەموو لایەنەكانی كۆكردەوە و لەچوارچێوەی ڕێككەوتنی هەولێردا، ئەم حكومەتەی ئێستای عێراق پێكهات.
پەیامەكەی نەورۆزی سەرۆك و
دروست بوونی كێشە لەگەڵ بەغدا
پەیامەكەی بەڕێز مسعود بارزانی كە لەنەورۆزی ئەمساڵدا ڕایگەیاند، ئەگەر بەغدا لەماوەیەكی دیاریكراودا هەوڵنەدات ئەو ڕێككەوتنە جێ بەجێ بكات كە هەموو لایەنەكان ئیمزایان لەسەر كردووە، ئەوا دەگەڕێنەوە بۆ لای گەلی كوردستان بڕیاری خۆی بدات، نەوشیروان مستەفا سەرۆكی بزووتنەوەی گۆڕان لەدیمانەكەیدا لەگەل KNN بەمجۆرە ئاماژەی بەو پەیامە كردووەو دەڵێت: (مەسەلەن ئەمجارە لەپەنای ئەو شەڕە دەرەكیەی كە لەنەورۆزەوە لەگەڵ بەغدا دەستیان پێكردووە، سەیركە چەند شتیان جێبەجێ كردووە...)، ئەم ئاماژەی سەرۆكی بزووتنەوەی گۆڕان بە پەیامەكەی نەورۆزی سەرۆكی هەرێمی كوردستان و پیشاندانی بەهەڵگیرسانی شەڕێكی دەرەكی قسەی زۆر هەڵدەگرێت، بەڵام با بپرسین بۆچی پەیامەكەی نەورۆزی سەرۆك بارزانی هەڵگیرسانی شەڕی دەرەكیە؟ وەڵامی ئەم پرسیارە بەچەند خاڵێك دەدەینەوە:
1- ئایا سەرۆك بارزانی لەپەیامەكەی نەورۆزدا داوای چیكرد، هەتا بەهەڵگیرسانی شەڕی دەرەكی تۆمەتبار بكرێت. ئایا بارزانی داوای كرد پلەو پایەی خۆی بەرز بكرێتەوە، یان دوای كرد حزبەكەی ببێتە حزبی فەرمانڕەوا لەعێراقدا؟ ئەوەی سەرۆك بارزانی لەپەیامەكەی ڕایگەیاند جێبەجێكردنی ئەو وەرەقە 19 خاڵیە بوو كە شەخسی سەرۆك وەزیرانی عێراق ئیمزای لەسەر كردووەو بەپێی ئەو ڕێككەوتنە د.نوری مالیكی بۆتە سەرۆك وەزیران، بەڵام هەموو جیهان شاهیدە، نوری مالیكی خۆی لەجێبەجێ كردنی خاڵەكانی ئەو ڕێككەوتنە دزییەوەو جێەجێی نەكردن، خاڵەكانی نێو ڕێككەوتنی هەولێریش ڕاستە كۆمەڵێك خاڵیان بریتییە لەچارەسەركردنی كێشەكانی نێوان هەرێم و بەغدا، بەڵام خاڵەكانی دیكەی تایبەتن بەڕێكخستنەوەی پرۆسەی سیاسی لەعێراقدا، پێدەچێت بەڕێزانی گۆڕان لەو خاڵەی پەیامەكەی بارزانی نیگەران بن كە ئاماژەی بەوەكرد، ئەگەر ئەو ڕێككەوتنە جێ بەجێ نەكرێت دەگەڕێینەوە بۆ گەلی كوردستان بۆ ئەوەی خۆی بڕیاری چارەنووسی كوردستان بدات، بێگومان هەموو دنیاش دەزانێ ئەگەر گەلی كوردستان خۆی بواری هەبێت بڕیاری چارەنووسی خۆی بدات، دەوڵەت ڕادەگەیەنێت، پرسیاری واقیعی لێرەدا ئەوەیە كێن ئەوانەی گەڕانەوە بۆ گەلی كوردستان بۆ بڕیاردانی مافی چارەنووس بەهەڵگیرسانی شەڕی دەرەكی دەزانن؟ لەمێژووی نزیكدا تەنیا مایكل ڕۆبن بووە كە لەبەردەمی كۆنگرێس ڕایگەیاند، مسعود بارزانی سەركردەیەكی ترسناكە لەبەر ئەوەی دەیەوێت دەوڵەتی كوردستان ڕابگەیەنێت و لەهەولێر نەخشەی كوردستان بەئاشكرا دەفرۆشرێت، ئێستا ئەو ئاڵایە لەهەرێمی كوردستان هەڵكراوە ئاڵای كۆماری كوردستانە لەمهاباد، بەهەرحاڵ بۆ كەسێكی وەك مایكل ڕۆبن كە بەئاشكرا پیاوی ژەنراڵەكانی توركیایە، ئاساییە مسعود بارزانی بەترسناك بزانێت بەوەی دەوڵەتی كوردستان ڕادەگەیەنێت، بەڵام بۆ سەركردەیەكی شۆڕشگێڕی وەك سەرۆكی بزووتنەوەی گۆڕان هەمان هەڵوێستی كەسێكی وەك مایكل ڕۆبنی هەبێت و پەیامەكەی نەورۆزی سەرۆك بارزانی بەترسناك و سەرچاوەی هەڵگیرسانی شەڕێكی دەرەكی لەقەڵەم بدات.
2- سەرۆكی هەرێمی كوردستان لەچەندین بۆنەی جیاوازدا ڕایگەیاندووە تاكە هۆكارێك كە عێراق بەیەكگرتوویی بهێڵێتەوە جێبەجێكردنی دەستووری عێراقە، بێگومان داواكردنی بارزانی بۆ جێبەجێ كردنی ڕێككەوتنی هەولێر و وەرەقە 19 خاڵیەكە، جێبەجێ كردنی دەستووری عێراقە لەبەر ئەوەی لەناو ڕێككەوتنەكەدا هاتووە هەموو خاڵەكانی ڕێككەوتنەكە بەپێی دەستووری عێراق داڕێژراون، پرسیاری سەرەكی لێرەدا ئەوەیە بۆچی داواكردنی جێبەجێ كردنی دەستووری عێراق هەڵگیرسانی شەڕی دەرەكیە، ئایا ئەگەر بارزانی شەڕ لەسەر دەستوور نەكات، عێراق ناگەڕێتەوە بۆ دیكتاتۆریەت و كورد لەسەر خاكی خۆی ئاوارە نابێتەوە؟ پرسیاری دیكە ئەوەیە كێن ئەوانەی داواكردنی جێبەجێ كردنی دەستوور بەخەتی سور و بڤە ئەزانن، بێگومان ئاشكرایە حكومەتی ئێستای عێراق و هەندێك دەوڵەتی ئیقلیمی كە دەیانەوێت عێراق بەرەو دیكتاتۆریەت بگەڕێتەوە، هەر ئەمەش مانای پرسیارەكەی KNNـە كە لێی دەپرسێت: چاوەڕوانی دەوڵەتانی دراوسێ لەهێزێكی وەك گۆڕان چیە؟ لەوەڵامدا نەوشیروان مستەفا دەڵیت:((ئەوە دەبێت لەو دەوڵەتانە بپرسیت))، ئەم وەڵامەی نەوشیروان مستەفا دەقا و دەق ئاماژەیە بۆ ئەو وڵاتەی بەڕێزی بەمدوایە سەردانی كردووە و هەمووشمان دەزانین ئەو دەوڵەتە چ ئامانجێكی بەهێزێكی وەك گۆڕان هەیە، كە بێگومان دژایەتی هەنگاوەكانی بارزانییە.
هێشتا یەكڕیزی لەهەموو شتێك گرنگترە
قسەكردن یان هەڵسەنگاندن لەسەر ئەو بارودۆخەی ئێستا كوردستانی پێدا تێدەپەڕێت، ئەگەر لەڕوانگەی بەرژەوەندی گشتی نیشتمانییەوە سەیری بكەین، لەهەموو بەرژەوەندییەكی دیكەی حزبی گەورەترە، بۆیە كاتێك هەڵسەنگاندن بۆ ڕەوشی ئێستا دەكەین، هێندەی مەبەست كردنەوەو واڵاكردنی دەرگای دیالۆگ و لێكتێگەیشتنە، هێندە خۆ سوركردنەوەو دەربڕینی گوتاری دروشم ئامێز نییە، ئەوەی لەم بارودۆخە وردبێتەوە هەست دەكات كە ئێستا هەرێمی كوردستان ڕووبەڕووی چەند تەحەدی گەورە بۆتەوەو ڕووبەڕووبوونەوەی هەریەك لەو تەحدیانەش پێش هەموو شت پێویستیان بە یەكڕیزی نێو ماڵی كورد و لەبەرچاوگرتنی بەرژەوەندی گشتی كوردستانەوە هەیە، گومانی تێدانییە ئێستا لەنێوان هەولێر و بەغدا، دوو هەڵوێست و تێڕوانینی جیاواز لەسەر ئەم بارودۆخە هەیە و گەلی كوردستان پشتگیری گەلی سوریای هەڵبژاردووە و بەغدا پشتگیری كردن لەڕژێمی ئەسەد، لەم بارودۆخەدا خاڵی گرنگ ئەوەیە كە هەموو هێز و لایەنە سیاسیەكان خۆیان لەو هەڵوێستە ببینەوە كە گەلی كوردستان هەڵیبژاردووە، خۆ دوورخستنەوە لەم هەڵوێستە زیانێكی گەورە بەیەكڕیزی خەڵكی كوردستان دەگەیەنێت، بێگومان ئەوە ڕاستە و كەس ناتوانێت نكۆڵی لێ بكات، كە مەسەلەی ڕووخانی ڕژێمی ئەسەد مەسەلەی كاتە و جارێكی دیكە ئەو ڕژێمە لەدەسەڵات نامێنێتەوە، بەڵام بۆ ئەم قۆناخە گرنگە بۆ كورد بە یەكڕیزی بەرامبەر ئەم گۆڕانكاریانە ڕابوەستێت و هەوڵبدات سوود لەم گۆڕانكارییە وەربگرێت، لەم بارودۆخەشدا وەك هەموو قۆناخەكانی پێشوو چاوەڕێی سەرۆك بارزانین بۆ ئەوەی ئەمجارەش هەم یەكڕیزی دروست بكاتەوە و هەمیش گوێبیستی موژدەی خۆش و گەورەتربین.