لەڕۆژانی 17-18 ی ساڵی 2000 كۆنگرەی كورد و گەڕان بەدوای ناسنامەدا (The Kurds: Search for Identity)، لەمەڵبەندی مستەفا بارزانی لەزانكۆی ئەمریكا لەواشنتۆن بەڕێوەچوو، ئەم كۆنفرانسە كە ماوەی دوو ڕۆژی خایاند، یەكەم هەوڵی ئەكادیمی بوو لەسەر ئاستی جیهان بۆئەوەی بایەخ بەناسنامەی كورد بدرێت، وەك نەتەوەیەكی جیاواز لەڕۆژهەڵاتی ناوەڕاستدا، كۆنفرانسەكە بێجگە لەوتاری ڕێزدار نێچیرڤان بارزانی سەرۆكی حكومەتی هەرێمی كوردستان، زۆربەی لایەنەكانی پێوەندار بەناسنامەی كوردی لەخۆ گرتبوو كە گرنگترینان ئەمانەبوونە: (وڵاتانی عەرەبی چۆن سەیری كورد دەكەن، دیپلۆماتیەتی ئەمریكی چۆن مامەڵە لەگەڵ كورد دەكات، بۆچوونی یەكێتی ئەوروپا بۆ كورد، بارودۆخی كورد لەعێراق و توركیا و ئێران، فیدرالیزم وەك شێوازیك بۆ دیموكراتی عێراق، دەوڵەت و كێشەی كورد)، لەم كۆنفرانسەدا نێچیرڤان بارزانی لەوتارەكەیدا بەئامادەبووانی ڕاگەیاند، كوردستان خاوەنی دوو سەرچاوەی سروشتی گەورەیە كە یەكەمیان پەترۆلەو دووەمیان ئاوە، بەڵام جەختی لەسەر ئەوەكردەوە ئێمە وەك كورد پێشتر بەئاگری پەترۆڵەكە سووتاوین و ترسمان هەیە لەئاییندەش بەئاوەكە بخنكێین، مەبەستی ئەو لەئاماژەكردنی بۆ ئەو دوو حاڵەتە ئەوەبوو كە كورد هەتا ئێستا بێ ناسنامەو بێ كیان بووە، ئێستا كورد لەقۆناخی بونیادنانی ئەزموونێكی دیموكراتیە لەڕۆژهەڵاتی ناوەڕاستدا و دەیەوێت وەك نەتەوەیەكی خاوەن ئیرادەیەكی دیموكراتی و ئاشتیخوازانە بەم كلتورەوە لەناو جیهان و كۆمەڵگەی نێودەوڵەتیدا پێگەی خۆی دیاری بكات، كەواتە دامەزراندنی سەنتەری مستەفا بارزانی بۆ ئاشتی لەزانكۆی ئەمریكا، هەوڵێكی سەردەمیانەبوو بۆ وەڵامی ئەو پرسیارەی هنتگتن كە پێیوایە دەبێت هەموو نەتەوەكان لەخۆیان بپرسن: (ئێمە كێین؟)، بێگومان كۆنفرانسەكەی سەنتەری مستەفا بارزانی بۆ وەڵامی ئەم پرسیارە بەدوای ناسنامە دەگەڕێت، كە بێگومان ناسنامەش بەكیانی سیاسی و دەوڵەتی سەربەخۆیی نەتەوەیی دیاری دەكرێت.
بەڵام پرسیاری گرنگ لێرەدا ئەوەیە ئایا گەڕان بەدوای ناسنامە یان پرسیاری ئێمە كێین؟ كە لەخۆمانی دەكەین، ئایا وەڵامەكەی ئاڕاستەی كێ دەكەین؟ بێگومان وەڵامەكەی ئاڕاستەی كۆمەڵگەی نێودەوڵەتی و ئەو دەوڵەتانە دەكرێت كە ئێمە وەك كورد لەگەڵیان دەژین، بۆیە وەك هنتگتن دەڵێت دەبێت پرسیاری ئەوەی (تۆ سەر بەكێیت؟) دەبێت بگۆڕێت بۆ پرسیاری (تۆ كێیت؟) ڕاشكاوانەتر دەبێت وەڵامی ئێمە وەك كوردستانی لەبری ئەوەی بڵێین سەر بەفڵان دەوڵەتین دەبێت ببێتە ئەوەی بڵێین خاوەنی دەوڵەتی خۆمانین، پرسیاری دیكە لێرەدا ئەوەیە ئایا دروستكردنی ناسنامە یان بونیادنانی دەوڵەت بەدیالۆگ و تێگەیشتن لەگەڵ جیهان و ئەو نەتەوانەی لەگەڵیان دەژین، دەكرێت؟ بێگومان كۆنفرانسەكەی سەنتەری مستەفا بارزانی پێمان دەڵێت بەڵی دەكرێت، بەڵام ئەم هەنگاوە پێویستی بەدەستپێشخەری خۆمان هەیە، واتە ئێمە دەبێت پرسیاری ئەوە ڕووبەرووی خۆمان بكەینەوە و دەبێت خۆشمان بەدوای وەڵامەكەی بكەوین، بەجۆرێكی دیكە پێویستە ڕاشكاوانە بەجیهان بڵێین ئەگەر هەتا ئێستا ئێوە بەوجۆرە سەیری بونیادی دەوڵەتی كوردستانتان كردووە، كە دەبێتە هەڕەشە بۆسەر ئاشتی و تەناهی جیهان، ئەوا ئێستا ئێمە ئەو ڕاستیە بەجیهان دەڵێین كە ئێمە هۆكارێكین بۆ ئاشتی و سەقامگیری هەرێمی و جیهان و دەوڵەتانی دراوسێ نەك هەر زیانیان لەو كیانە نەكردووە كە ئێستا لەهەرێمی كوردستان دروست بووە، بەڵكو ئەم هەرێمە بۆتە پێگەیەك بۆ كۆكردنەوەی بەرژەوەندی هاوبەشی بازرگانی و ئابووری دەوڵەتانی دراوسێ و هەروەها دەرگای واڵا كردووە بۆئەوەی پێوەندی بازرگانی و ئابووری و دۆستایەتی لەگەڵ هەموو جیهاندا هەبێت، هەربۆیە ئەگەر ئەم هەرێمە ببێتە دەوڵەتێكی سەربەخۆ، ئەوا ڕۆڵی گرنگتر لەئاسایش و سەقامگیری ناوچەكە دەگێڕێت، لەمەش گرنگتر ئێمە وەك نەتەوەیەكی ئاشتیخواز و دیموكراتیخواز، ڕاشكاوانە پەیامی خۆمان ئاراستەی كۆمەڵگەی نێودەوڵەتی دەكەین و پێیان دەڵێین، ئێمە هاوكاری عێراق بووین بۆئەوەی هەنگاو بەرەو سەقامگیری و دیموكراتی هەڵبگرێت، نەخشەی ڕێگەمان بۆ داڕشتوون بۆئەوەی عێراق وەك دەوڵەتێكی فیدرالی و دیموكراتی بونیاد بنرێتەوە، بەڵام كاتێك حكومەتی بەغدا دەستوور پێشێل دەكات و لەسەر نەخشەی ڕێگە ناڕوات، ئەوا كاتی ئەوە هاتووە لەكورد تێبگەن، كە هەرێمێكی دیموكراتی ناتوانێت لەناو دەوڵەتێكی سەنترالی تاكڕەو بمێنێتەوە، یان ئەوەتا هاوكارمان بن بۆ ئەوەی عێراق بكەینە دەوڵەتێكی فیدرالی و دیموكراتی یان ئەوەتا ناكرێت ڕێگە لەگەلی كوردستان بگرن كاتێك بەدیكتاتۆریەت و تاكڕەوی ڕازی نابێت.
ئەقڵیەتی كۆن
كێشەی پێ چارەسەر ناكرێت
كینس پۆلاك سەرۆكی سەنتەر سابان لەئامۆژگای برۆكینگز مانگیك پێش وادەی كشانەوەی هێزەكانی ئەمریكا لەعێراق، بۆچوونەكانی خۆی بەناونیشانی (سیناریۆ تاریكەكانی عێراق) بەكۆنگرێس ڕاگەیاند، كە سەرۆك وەزیرانی عێراق هەنگاو بەرەو تاكڕەوی و دیكتاتۆری هەڵدەگرێت، هۆشداری پۆلاك لەسەر ئەم پرسە لەچەند ڕوویەكەوە بوو:
1- لەوانەیە هەندێك لەئەمریكیەكان بەو جۆرە بیر بكەنەوە و بڵێن با سەرۆك وەزیرانی عێراق ببێتە دیكتاتۆر ئەی ئەوەنییە ماوەی نزیكەی 30- 40 ساڵە دیكتاتۆرەكانی هاوشێوەی ئەسەد و موبارەك سەقامگیریان ڕاگرتووە.
2- لەوانەیە هەندێكی تر لەئەمریكیەكان پێیانوابێت، بۆئەوەی ڕێگە لەهەڵوەشانەوەی عێراق بگیرێت، ئەوا پێویستە حكومەتی بەغدا حكومەتێكی بەهێز و سەنترالی بێت.
پۆلاك لەپێشبینی بۆ ئەم دوو پرسیارە جەخت لەسەر ئەوە دەكاتەوە كە پێویستە ئەو پرسیارە ڕووبەڕووی خۆمان بكەینەوە، ئایا حكومی دیكتاتۆری سەدام حوسێن چۆن عێراقی ڕاگرتبوو یان سەقامگیری كردبوو؟ لەوەڵامی ئەم پرسیارە دەڵێت، سەدام حوسێن بەسەركوتكاری و دامەزراندنی سوپایەكی یەك ملیۆنی كە لەدژی گەلەكەی خۆی بەكاری دەهێنا، كورد و شیعەی كۆمەڵكوژ دەكرد توانیبووی ئەو بارە ڕابگرێت، بۆیە كۆنگرێس دڵنیا دەكاتەوە، هەتا ئەگەر بۆ سەقامگیری عێراقیش چاو لەدیكتاتۆریەت بپۆشین، ئەوا ئەمجارە دیكتاتۆریەت دەبێتە هۆكاری ئەوەی عێراق ببێتە گۆمی خۆین و شەڕی مەزهەبی و نەتەوەیی، بۆیە پێشنیاری ئەوە دەكات ئەمریكا بەشێوەیەكی دیكە بێتە ناو بارودۆخەكەو هەوڵبدات سیاسەتی ناوخۆی عێراق ڕاستبكاتەوە، لەبەر ئەوەی تەنیا سیاسەتی ناوخۆی عێراق دەتوانێت بەرژەوەندییەكانی ئەمریكا لەعێراقدا بپارێزت، مەبەستیشی لەسیاسەتی ناوخۆی عێراق ئەوەیە كە حكومەتی عێراق لەسەر بنەمای هاوبەشی ڕاستەقینەی پێكهاتە سەرەكیەكان دابمەزرێتەوەو هەموو ئەو كێشانەی لەنێوان هەرێم و بەغدا هەن لەچوارچێوەی دەستووری عێراقدا چارەسەر بكرێت، بەڵام پرسیار لێرەدا ئەوەیە ئایا حكومەتی عێراق بەم بیركردنەوەیەی ئێستا توانای ئەوەی هەیە كێشەكان چارەسەر بكات؟ یان ئامادەباشیی تێدایە كێشەكان چارەسەر بكات؟ ئەم پرسیارەمان ڕووبەڕووی پرۆفیسۆر جۆن تۆربی ئوستادی سیسیۆلۆژی لەزانكۆی نیویۆرك كردەوە، ئەویش بەمجۆرە وەڵامی گوڵانی دایەوە و وتی: (ماوەیەكی زۆرە ئەمریكا و هاوپەیمانەكانی پێشبینیی ئەم ئەنجامەیان بۆ عێراق دەكرد، لەبەرئەوەی گەیشتبوونە ئەو قەناعەتەی كە گرووپ و لایەنە جیاوازەكانی عێراق ناتوانن لەچوارچێوەی عێراقێكی یەكگرتوودا جیاوازییەكانیان چارەسەربكەن).
كەواتە وەك پرۆفیسۆر تۆپی ئاماژەی پێكرد، ئێستا ئەمریكا و هاوپەیمانانیش دەزانن لایەنە عێراقیەكان ناتوانن كێشەكانیان لەچوارچێوەی عێراقدا چارەسەر بكەن، بۆیە لەم لایەنەوە و پرۆفیسۆر تۆربی پێیوایە بۆ كورد دوای ئەو نەهامەتیەی بەسەری هاتووە باشترین ڕێگە ئەوەیە خاوەنی دەوڵەتی سەربەخۆی خۆی بێت، هەروەها ئاماژەش بەوەدەكات، دەوڵەتی سەربەخۆ یەكێكە لەخەونەكانی هەموو نەتەوەیەك، لەمبارەوەو لەدرێژەی لێدوانەكەیدا بەمجۆرە ڕای خۆی بۆ گوڵان خستەڕوو وتی: (هۆشیاربوونەوە و بەرزبوونەوەی هەستی نەتەوایەتی وا لەنەتەوەكان دەكات لەئامانج و خەون و ناسنامەی نەتەوەییان تێبگەن و هاوكات لەوە تێدەگەن كە دامەزراندنی دەوڵەت دەرفەتیان بۆ فەراهەم دەكات ببنە خاوەن پێگە و سەنگ لەجیهان و دەرگایان بۆ دەكرێتەوە بۆئەوەی ببنە ئەندام لەنەتەوە یەكگرتووەكاندا، وەك ئێوەیش ئاماژەتان پێكرد نەتەوەكان خوازیارن گوزارشت لەناسنامەكانیان بكەن لەڕێگەی دامەزراندنی دەوڵەت، هەربۆیە ئەوە خەونی هەموو نەتەوەیەكە كە ببێتە خاوەن دەوڵەتێكی سەربەخۆ، ئەگەر باسی كورد بكەین، ئەوا كورد بەدرێژایی مێژوودا لەسەر دابەشكردنی لەنێوان توركیا و عێراق و سوریا و ئێراندا ناڕەزایی بووە و تاكو ئێستا خاوەن دەوڵەتێكی تایبەت بەخۆیان نین، ئەمە لەگەڵ ئەوەی ماوەیەكی زۆرە پرسی دەوڵەتی كوردستان لەئارادە هەبووە و ڕەتكراوەتەوە هەر لەپێش ڕێككەوتنامەی سیڤەر و دوای ئەویش ئەم پرسە باسكراوە، بەڵام لەبەر ئەوەی نەتوانراوە دەوڵەت بۆ كورد دروست بكرێت، كورد دڵخۆش نییە بەو وڵاتانەی ئێستا تیایدا دەژی، كورد بەدرێژایی دەیان ساڵ مەینەتیی زۆری چەشتووە، بۆیە لەوانەیە گریمانەی ئەوە بكرێت كە واباشتر و ئارامترە بۆ كورد كە ببن بەخاوەن دەوڵەتێكی تایبەت بەخۆیان، من بەئاگام لەبارودۆخی كورد لەتوركیا و پێموایە لەبارودۆخێكی زۆر باشدا نین و ئەگەر دەوڵەتێكی سەربەخۆیان هەبێت لەوانەیە بارودۆخیان باشتر بێت، بەڵام یەكێك لەكێشەكان بریتییە لەتوانای بەردەوامبوونی دەوڵەتی بچووك و هەر لەمڕووەیشەوە بۆنموونە وڵاتی ئەرمینیا كێشەی زۆری لەپێوەندییەكانی هەبوو لەگەڵ وڵاتانی دراوسێ، هەربۆیە مەرج نییە بەم شێوەیە بێت، بەڵام دەتوانم ئەوە بڵێم كە وا باشترە بۆ كورد كە ببنە خاوەن دەوڵەتێكی تایبەت بەخۆیان لەبەرئەوەی لەوانەیە ئەوە بۆ كورد ئارامتر بێت)).
یەكێتی ئارەزومەندانە پێوەلكاندن نییە
هەتا ئێستاش زۆر لەپسپۆران پێیانوایە، كە بەیانی سەربەخۆیی ئەمریكا دەبوو وەك دەستووری ئەمریكا مولیزم بوایە، لەبەر ئەوەی بەیانی سەربەخۆیی ئەمریكا داوا دەكات هەموو ئەمریكیەكان(ژن و پیاو) بێ جیاوازی ڕەنگ و ڕەگەز ئازاد بن، بەڵام پابەند نەبوون بەناوەرۆكی ئەم بەیانە بووە هۆكاری ئەوەی كە شەڕی ناوخۆ بەرپا بێت، ئەگەر لەم چوارچێوەیەدا دەستووری عێراق وەك بەیانی ئازادكردنی عێراقی نوێ بەراورد بكەین، ئەوا هەموو لادانێك یان پێشێلكردنی ئەم دەستوورە دەبێتە هۆكاری ئەوەی لەعێراقدا شەڕی ناوخۆ بەرپا بێت، یان عێراق لەبەریەك هەڵبوەشێت، سەبارەت بەم لایەنە پرسیارمان لەپرۆفیسۆر دینس چارلس سمیس ئوستادی زانستی سیاسەت لەزانكۆی ئیندیانا كردو لەلێدوانیكی تایبەتدا بەمجۆرە وەڵامی گوڵانی دایەوەو وتی: (چارەسەر كردنی كێشەكان بەئاشتی بەهۆی پابەندبوون بەپرانسیپەكان و دادپەروەری دێتەدی، بەهۆی چارەسەركردنی كێشەكانی نێوان پێكهاتە جیاوازەكان، من لەئێوە تێدەگەم، بەڵام من ئاگادارتان دەكەمەوە كە ئەمە هەموو چارەسەرەكە نییە، ڕەنگە لەبری تەركیزكردن لەسەر ئەو پرسە، باشتر بێت تەركیز بكرێتەسەر هێنانەدی عەدالەت و سیستمێكی نوێنەرایەتی بكرێتە ئەولەویەتێكی باڵا، پێموایە لەهەندێ ڕووەوە كەمتر گرنگە بە بەراورد بەڕابردوو، لەبەر ئەوەی بەجیهانی بوون هەموومان دەكاتە هاووڵاتی جیهان. ڕاستە هەموومان لەسایەی یەك دەوڵەتدا ناژین، بەڵام كەمتر گرنگە بە بەراورد بەڕابردوو، ئێمە كەوتینە ژێر كاریگەری ئەوەی لەیۆنان ڕوویدا، ئەوەی لەئیتالیا و هەروەها ئەوەی لەئەمریكا، لەڕووی ئابووری و لەچەندین ڕووی دیكەوە، گرنگە خاوەنی حكومەتێكی نوێنەرایەتی بین. ئێمە لەئەمریكا بۆ ماوەیەكی دوورودرێژ لەسایەی حكومەتێكی نوێنەرایەتی ژیاوین كە چەند ئاستێكی هەیە، من خەڵكی نیویۆركم و ئەمەش بەشێكی گرنگی ناسنامەی من پێكدەهێنێت، كە من پێوەندیم هەیە بەحكومەتی شارەكەو ویلایەتەكە و هەروەها بەحكومەتی فیدراڵیشەوە، هەروەها باوەڕم وایە كە هیچ وڵات و دەوڵەتێك نییە لەجیهاندا خۆی بەخۆی دورگەیەك بێت، ئەوجا ئەگەر لێرەوە بێمەوە سەر بەیانی سەربەخۆیی ئەمریكا، دەبێت ئەوەتان لەیاد بێت كە بەیانی سەربەخۆیی هێندەی دەستوور مولزیم نەبوو، ئەگەر بە بەیانی سەربەخۆییەوە پابەند بوینایە، شەڕی ناوخۆ ڕووینەدەدا. لەبەر ئەوەی بەیانی سەربەخۆیی دەڵێت ئێمە هەموومان كۆمەڵێك مافمان هەیە كە ناكرێت لێمان زەوت بكرێت، بەڵام بەشێكی كێشەكە كە بووە هۆی ئەوەی شەڕی ناوخۆ لەنێوان باشوور و باكووردا ڕووبدات بە بەیانی سەربەخۆییەوە پابەند نەبووین، لەبەر ئەوەی هەندێ گروپ و لەهەندێ ویلایەت زۆرینەی خەڵك بەنایەكسان دانران، كەواتە بۆ چارەسەركردنی ئەم مەسەلەیە شەڕ ڕوویدا و چەندین شتی دیكە ڕوویاندا. ئێمە شەڕمان لەدژی بەریتانیەكان كرد بۆ ئەوەی لێیان ڕزگاربین و ئازاد بین، بەڵام دواتر بەتەواوی پێوەی پابەند نەبووین، هەربۆیە ئێمە لەئەمریكا جیاوازی دەكەین لەنێوان بەیانی سەربەخۆیی كە بنەما سەرەكیەكان لەخۆدەگرێت، لەبارەی ئەوەی چۆن مامەڵە و ڕەفتار لەگەڵ مرۆڤەكاندا بكرێت و هەروەها لەبارەی عەدالەتەوە)).
پرۆفیسۆر دیڤید كالیۆ سەرۆكی دیراساتی پرۆگرامەكانی ئەوروپا لەزانكۆی جۆنس هۆپكین حاڵەتی ئێستای عێراق بەحاڵەتی دوای سەربەخۆی ئەمریكا دەچوێنێ و پێیوایە ئەگەر بارودۆخەكە بەمجۆرە بڕوات، ئەوا مەترسی شەڕی ناوخۆ لەئارادا هەیە، لەم چوارچێوەیەدا لەلێدوانێكی تایبەتدا بەمجۆرە ڕای خۆی بۆ گوڵان دەربڕی: (من خۆشحاڵم كە ئێوە داوای بۆچوونی منتان كردووە لەبارەی هەلومەرجی گشتی عێراقەوە، بەڵام من دەتوانم ڕاسپاردەم هەبێت بۆ كەسانێكی وەك ئێوە كە لەدۆخێكی توندوتیژیدا دەژین، ئەوە ڕوونە كە وڵاتەكەتان دابەشبوونی قووڵی تێدایە و –لایەنەكان- مێژوییەكی دوورودرێژیان لەستەمكردن لەیەكتری هەیە. ئێمە لەمێژووی خۆماندا دۆخی هاوشێوەمان هەیە كە بەشەڕێكی بەربڵاوی ناوخۆیی كۆتایی هات كە برینی بەجێهیشت و دوای سەدە و نیوێك هێشتا ساڕێژ نەبوونە. هەروەك ئێوە دەزانن، ئەوروپا مێژوویەكی پتر توندوتیژی هەبوو، پێدەچێت ئەوان چارەسەرەكەیان لەیەكێتیەكی فیدراڵیدا بینیبێتەوە، كە ڕێز لەمافی تاكەكەسەكان، دەوڵەت و ئایینەكان دەگرێت. ئەوروپا بەدوو شەڕی سەختدا گوزەری كرد و دوای نیو سەدە لەبنیاتنانی دامەزراوەكان ئینجا گەیشتە ئەو دۆخەی كە ئێستا لەناوخۆدا ئاشتی بەرپا بێت. نابێت هیچ یەكێك لەم دەستكەوتانە بەكەم وەربگیرێن-هەروەك ئەوەی لەمێژووی ئەم دواییەی بەلقانەوە دەركەوت. وەك كەسێك لەدەرەوە تەنیا دەتوانم ئومێدی ئەوە بخوازم خەڵكی عێراق و ناوچەكە بەگشتی، بگەنە ڕێگاچارەیەك بۆ هێنانەدی ئاشتی و بواردان بەگەشەكردنی توانا مەزنەكانی ناوچەكە. لەڕوانگەی مێژووی ئێمەوە ئەمە كارێكی ئاسان نییە)).
ئاییندەی عێراق و پرۆسەی سیاسیی
عێراق ئێستا لەدووڕیانێكدایە و دەبێت ئەو دووڕیانە تێپەڕێنێت، لەبەر ئەوەی ڕۆژ لەدوای ڕۆژ خەڵك بێ تاقەت و بێزار دەبێت و حكومەتیش ڕۆژ لەدوای ڕۆژ زیاتر كارە خزمەتگوزارییەكانی بەسەردا كەڵەكە دەبێت و لەبەر بیركردنەوەی تاكڕەوی پاوانكردنی دەسەڵات ژیان و پێداویستیی عێراقیەكانی فەرامۆشكردووە، بۆیە یان ئەوەتا دەبێت بارودۆخە زیاتر بەرەو تاكڕەوی مل بنێت و چاوەڕێی كاردانەوەی هەموو پێكهاتەكانی عێراق بین، چونكە زۆر زەحمەتە هیچ پێكهاتەیەك جارێكی دیكە دیكتاتۆریەت قبووڵ بكاتەوە، یان ئەوەتا دەبێت سنوورێك بۆ حكومەتی ئێستای مالیكی دابنرێت و تەواو ئەو ڕێككەوتنی هەولێر جێبەجێ بكات و حكومەتی عێراق ببێتە حكومەتی هاوبەشی ڕاستەقینەی هەموو پێكهاتەكان، یان دەبێت بیر لەوە بكرێتەوە بەشێوازی دیموكراتیانە ئەم حكومەتە بگۆڕدرێت، بەڵام مەترسی گەورە لەوەدایە كە سەرۆك وەزیران پابەندی بنەما دیموكراتیەكان نەبێت، لەم حاڵەتەشدا دەرگا بەڕووی هەموو مەترسیەكان دەكرێتەوە و دەبێت هەموو بگەڕێنەوە بۆ پشتگیری پەیامەكەی بەڕێز سەرۆكی هەرێمی كوردستان و چاوەڕێ بین گەلی كوردستان بڕیاری خۆی بدات.