گوڵان ــ قاهیرە
لە ئەسما حوسێنی


لەم ڕۆژانەدا میسرییەكان بە بۆنەی یەكەمین ساڵیادی شۆڕشی25ی ینایرەوە، خەریكی ئاهەنگ گێڕان دەبن، ئەوشۆڕشەی ڕژێمی فەرمانڕەوایی پێشووی لە حوكم داماڵی؛ بەڵام تا ئێستاش شۆڕشەكە نەیتوانیوە ڕژێمێكی تازە بۆ فەرمانڕەوایەتی میسر ئامادە بكات، گەرچی هەندێك لە سیماكانی ئایندە، بەهۆی دەركەوتنی دەرئەنجامەكانی هەڵبژاردنە پەرلەمانییەكەوە گەڵاڵە بووە، كە بە زۆرینەی دەنگەوە ئیسلامییەكان تێیدا براوە بوون، وێڕای تێپەڕینی ساڵێك بەسەر شۆڕشی نەرم كە میسرییەكان و جیهان لە سەرەتاكانیدا زۆر پێی سەرسام بوون، كۆی دیمەنی گشتی ئێستا لە میسردا بەناو یەكتردا ئاڵۆزكاوە، بەشێوەیەك زۆر زەحمەتە پێشبینی پەرەسەندنەكانی داهاتوو بكرێت، تا ئێستاش لە پێناوی داڕشتنەوەی شێوازی داهاتووی دەوڵەتی میسریی لەسەر ئاستە جیاوازەكانەوەو بە نهێنی و ئاشكراوە، ململانێیەكان لە ئارادان، ململانێ لە نێوان ئیسلامییەكان و ئەوانەی دژیانن، هەروەها لە نێوان عەسكەرییەكان و ئەوانەی هەوڵدەدەن بۆ قۆناغەكانی داهاتوو دەسەڵاتی سەربازی بەر تەنگ بكەنەوە، هەروەها لە نێوان هەڵگیرسێنەرانی ڕاستەقینەی بڵێسەی شۆڕشەكەو و ئەوانەدا كە ئێستا بە نیازن بەروبوومەكەی بۆ خۆیان بدوورنەوە، لە نێوان گۆڕانخوازان و ئەوانەی دژ بە گۆڕانن، لە نێوان پاشماوەكانی ڕژێمی پێشوو ئەوانەی بە حوكمی ئەو ڕژێمە زیانمەند بوون، ئەم ململانێ هەمە جۆرانە تەنیا لەنێوان گرووپەكان و هاودژەكانیان نین، بەڵكو چەندین ململانێی تریش هەن، لە ناو خودی ئیسلامییەكان خۆیان و هەروەها لەناو ڕیزەكانی لیبرالییەكان خۆیان و پۆلەكانی شۆڕشگێڕان خۆیاندا، تەنانەت لە ناو ڕیزەكانی عەسكەرییەكانیشدا ململانێ هەیەو بەڵكو لە ناو هەر ڕێكخستنێكی كۆمەڵەو پارت و ڕێكخراوێكدا چ سەر بە موحافیزكاران بن یان سەر بە پێشكەوتوخوازان، لە نێوان قۆرخكاران و كەسانی خاوەن هەڵوێست و خاوەن ڕێبازی مرۆیی ململانێ دروست بووە، لە نێوان پسپۆران و خاوەن تواناكان و كەسانی خاوەن متمانەشدا هەروا....تاد
ئەو وڵاتی میسرەی بە درێژایی چەندین چاخ و زەمان بێدەنگ و بێ جووڵە كرابوو، ئەمڕۆ جووڵانەوەیەكی گەورەی تێكەوتووە، لەبەر ڕۆشنایی جووڵانەوەكانی ئەم بزاڤەوە داهاتووی وڵات دیاریدەكرێت، وێڕای هەموو ئەو نیگەرانی و ترس و دڵەڕاوكێیەی كە لەم جووڵانەوەیە دروست بووە، لەوەی چركەساتی پێكدادان نەیەتە پێشەوە، زۆرینەی ئەم بزاڤە جووڵاوە بە پێویستی دەزانن بۆ تەكاندانێك و ڕۆیشتن بەرەوە پێشەوە، هەموو مەترسییەكانی چواردەوریان وەك باجێك تەماشا بكەن كە پێویستە بدرێت، ئەوەش لەبری ماوە زەمەنییەكانی پێشوو كە خۆڵی مردوو بەسەر ئەم وڵاتەدا ڕژابوو، هەشن وای دەبینن كە ئەمە ژانگرتنێكی بەر لە لەدایك بوونی میسری تازەیە، ئەو میسرەی كە خەونی پێوە دەبینراو ئاواتی هەمووان بوو.
سەرەڕای بەڵێنەكانی ئەنجوومەنی سەربازی بە پێدانەوەی دەسەڵات لە یۆلیۆی داهاتوو، سەرەڕای هەوڵەكانی هەندێك لە سەركردە ئیسلامییەكان بە ناردنی مەسیجی دڵنیاكردنەوە بۆ شەقامی میسری و شۆڕشگێڕان و هێزە لیبرالییەكان، لە دوای ئەوەی ئیسلامییەكان زۆرینەی كورسییەكانی ناو پەرلەمانیان وەدەست هێنا، تا ئێستا نیگەرانی و ترسی زۆر هەیە لەوەی لە داهاتوودا هەریەك لەو سەركردانە بە دەسەڵاتەوە خۆی گیر بكات و لێی نەبێتەوە، ئەوەش لەسەر حیسابی گەنجان و هێزەكانی دیكەی كە شۆڕشەكەیان بەرپا كردووە، تا ئێستاش لە میسر هەر كەسێك بە دووربینی خۆیەوە تەماشای دیمەنەكەو پەرەسەندنەكانی دەكات، لەمبارەیەوە نووسەرو ئەدیبی ناسراو ئیبراهیم داوود دەڵێت(( شۆڕش لە میسردا كۆمەڵێك توێژو وەچە لە ڕۆشنبیران و سیاسەتمەداران هەڵیانگیرسان و باجیان دا لە بەرانبەر ڕووبەڕووبوونەوەی ستەمكاری و نەبوونی دادپەروەری كۆمەڵایەتی و ئازادییەكانیان، تەوژمی مانگرتنەكانیان لە سەرەتای ساڵی 2004 زیاتر هەڵایسا لە ڕێگەی چەند بزاڤێكەوە لەوانە بزاڤی(كیفایە) و (ئەدیبان و هونەرمەندان لە پێناوی گۆڕانكاری) و (جووڵانەوەی 9ی مارس لە لایەن مامۆستایانی زانكۆیی) و (بزووتنەوەی سەربەخۆكردنی داد)و هی تریش، شۆڕشەكەش سەركەوتنی بەدەست هێنا بەهۆی خواست و دیاردە ئاشتیخوازانەكەی و شاعیریەتەكەیەوە، هەروەها بەهۆی خواستی ڕاستەقینەیەوە بۆ بەرپابوونی گۆڕانكارییەك لە ئەنجامی بەخشین و قوربانییەكانی ئەو گەنجانەی كە سەركردایەتی شۆڕشەكەیان دەكرد..
ئیبراهیم داوود ترسی خۆی لەوە ناشارێتەوە كە ڕەنگە ئیسلامییەكانی كە زۆرینەی دەنگەكانیان لە هەڵبژاردنەكان وەدەست هێناوە خوێنی شەهیدانی شۆڕشەكە بە فیڕۆ بدەن ئەوەش بە هاوپەیمانیی بەستنیان لەگەڵ عەسكەرییەكاندا، كە ئەمانەی دوایی نیازمەندن هەبوون و دەسەڵات و شێوازەكانی بەڕێوەبردنی وڵات بۆ قۆناغی داهاتوو قۆرخ بكەن، تێبینی ئەوەی كردووە كە عەسكەرییەكان كەسیان لە ناو هێزە سیاسییەكان نەدۆزییەوە تا لەگەڵیدا ببنە هاوپەیمان جگە لە جەماعەتی ئیخوان نەبێت، بەو شێوەیە خیانەتیان لە بە مەدەنیبوونی دەوڵەت كردووە، سەرەتاكانی ئەم هاوپەیمانیە لەو ڕاپرسیەی 17 مارسەوە دەستی پێكردووە كە بەهۆیەوە عەرەبانەكەیان لە پێش ئەسپەكەوە داناوە، هەروەها هەڵبژاردنەكانی ئەنجومەنی گەل و ئەنجومەنی شوورایان خستە پێش داڕشتنەوەی دەستوور و هەڵبژاردنەوەی سەرۆك، داوود زیاتر لەمبارەوە دەڵێت ئیخوان موسلمین هێزێكی ڕێكخراون، بەڵام لە واقیعدا هێزێكی گەورەی سەرشەقامەكە نین.
بەهۆی هاتووهاوارو مایك و دەنگی ڕاگەیاندنەكانیانەوە قەبارەی خۆیان گەورەتر نیشان دا كەسیش لە سەرچاوەی داهاتیانی نەپێچایەوە كە بەپاڵپشتی هێزەكانی وڵاتانی كەنداوو بەموبارەكەی ئەمەریكایی لەهەڵبژاردنەكاندا دەرچوون، نەك لەبەر ئەوەی بەرنامەیەكی سیاسیان هەیە، بەڵكو لەبەر ئەوەی هەڵبژاردن هەڵبژاردنێكی سیاسی نەبوو، بەڵكو هەڵبژاردنێكی تائیفییانە بوو، داوود نیگەرانی خۆی لەو گۆڕانكارییە دەردەبڕێت كە لە ئاستی مەدەنیدا شۆڕشی میشر تووشی بووە كە لە سەرەتاوە هیچ دروشمێكی ئایینی بەرز نەكرابۆوە كەچی ئێستا هەموو پەیام و قسەكان بوون بە پەیامی ئایینی و دەشڵێت ئەو كەسانەی كە لە سیاسەت دەدوێن حاڵی حازر پیاوانی ئاینی و بزووتنەوە ئیسلامیەكانن نەك سیاسەتمەداران. راگەیاندنیش پەلكێش كرایە دوایان، بەشێوەیەك پاڵێوراوێكی ئاسایی ئیسلامیەكانی وەك هێزێكی جەبار نیشان دەدا یا وەك كەسایەتیەك كە نابێت كەس لە دژی بووەستێت، دەنگ پێدانیشیان كردە ئەركێكی شەرعی و كارێكی ئایینی نەك سیاسی.
بەڵام داوود تێبینی ئەوەی كردووە كە هاوپەیمانی عەسكەرییەكان لەگەڵ ئیخوان و سەلەفیەكان بەرگە ناگرێت، بەهۆی چەند هۆكارێكەوە كە پێوەندی بەمێژووەوە هەیە چونكە مێژووی ئیخوان جێی شانازی نییە، ئێستا خۆیان وا پیشان دەدەن قوربانیانی كاتی فەرمانڕەوایەتی حوسنی موبارەكن لەكاتێكدا ئیخوانەكان لەسەرەوەی هەڕەم هەموویان شەریكی كاروبارە ئابووری و سیاسیەكانی رژێمی پێشوو بوون، هەروەها چەندین ئەندامیان لەناو پەرلەمانی رژێمی پێشوودا هەبووە. دواتر داوود عەسكەرییەكان و ئیخوانەكان ئاگاداردەكاتەوە لەوەی كە خۆشباوەڕ نەبن بەوەی ئەو گەنجانەی كە ئەم شۆڕشەیان بەرپاكردووە ژمارەیان كەمە، هەروەها جەخت دەكاتەوە لەسەر ئەوەی ئەو هێزە دیموكراتیخوازانەی ڕێگایان تەخت كرد بۆ ئەم شۆڕشەو بەرپایان كرد لەم خاڵەدا ڕاناوەستن هەتا هەموو ئامانجە سەرەكییەكان وەدینەهێنن، كە لە ئازادی و دیموكراتی و دادپەروەری كۆمەڵایەتی دا خۆی دەبینێتەوە، چونكە ئەم هێزە گەنجانە بڕوایان بە دیموكراتیەت و دەوڵەتی هاوچەرخ و جیاكردنەوەی دینە لە سیاسەت.
بە بەردەوامی و بەسینگی ڕووتەوە لەڕووی هێزە پڕچەك و پارەو سامان و ئاینیەكاندا دەوەستنەوە. چونكە شۆڕش ئێستا بووە بەكەلتوورێك لە میسردا تا كو ئێستاش هیچ ئامانجێكی شۆڕش وەدینەهاتووە، گەنجانیش بەردەوامن لە شۆڕش تا هەموو ئامانجەكان وەدی دەهێنن، هەروەها دەڵێت رۆحی شۆڕش لەو پەرلەمانە بەهێزترە كە بەلێشاو پارەی تێدا ڕژاوە لە پێناوی ئامانجی تەمومژاویدا، نازانین ئاخۆ بۆ گەڕانەوەی خەلافەتی ئیسلامییە یان بۆ چییە؟؟!! .
جەختی لەوەش كردەوە قورسترین شت لە میسردا بەناوی ئاینەوە موزایەدەكردنی ئیسلامیەكانە بەسەر گەلی موسڵمانی میسرییەوە ئەو موزایەدەش بەسەر موزایەدەچییەكان خۆیاندا قڵپ دەبێتەوە، داوود هیچ جیاوازییەك لەنێوان ئیخوان و سەلەفیەكان نابینێتەوە و بەدوو دیوی یەك پارچە پارەیان دادەنێت، بەگومانیشە لەو بڕوایەی تەوژمە ئیسلامییەكان هەیانە لە بەرانبەر دیموكراتیەت، دەڵێت قسەكردنی ئەوان لە دیموكراتیەت تەنیا بۆ چاووڕاوو ڕاكێشانی سۆزی دەنگدەرانە تا لە هەڵبژاردن دەنگی زیاتر وەدەست بهێنن، سامناكی ئیسلامییەكان لەوەدایە كە پێیان وایەو هەست دەكەن كە هەموو ڕاستییەكان تەنیا لای خۆیانەو كۆڵەگەی سیاسەتیان پابەندكردووە بە دەقی وتەكانی خواوەندەوە، وەك ئەوەی بەناوی خواوە لە ناو كافرەكاندا بدوێن..
ئیبراهیم داوود وای دەبینێت كە زەحمەتە بۆ هێزە ئیسلامگەراكان بەهەموو ئەو پێداوو ڕووداوانەی ئێستاشەوە كە لە مەیدان ڕوو دەدەن، جارێكی تر میسر بەرەو پاشەوە بەرنەوە، لەم بارەیەوە دەڵێت بارودۆخەكە تێكچوونێك بەخۆیەوە دەبینێت، چونكە ئەم هێزە ئیسلامیانە بە درێژایی كات كۆمەڵێك هێزی پاشكەوتووی عارەبی و هێزی داگیركاریی نێودەوڵەتی دەبیننەوە تا پشتگیرییان لێ وەربگرن و ئەو هێزانەش ئەوەی بەلایانەوە گرنگ بێت ناسەقامگیربوونی میسرە، تا بەبەردەوامی ئیسرائیل وەك تاقانە هێزی زەبەلاحی ناوچەكە بمێنێتەوە، ئیخوان و عەسكەرییەكانیش لە بیرو بۆچوونیاندا دژ بە ئیسرائیل نین، لەسەر هەموو ئەو تەنازولاتانەی موبارەك و سادات ڕازین بە هەنجەتی ئەوەی ڕێكەوتنە نێودەوڵەتییەكان پیرۆزیی خۆیان هەیە..
داوود لەم ڕووەوەش دەڵێت بە تەواوی ڕێز لە ئەنجامەكانی هەڵبژاردن دەگرم كە لە بەرژەوەندی ئیسلامییەكان یەكلایی بۆتەوە، وێڕای ئەوەی هەڵبژاردنەكە خاوێن نەبووە، ساختەكاری و بەرتیلدان و گەمەكردن لە نووسینگەكانی دەنگدان كراوەو دەنگ هەبووە لە دەرەوەی نووسینگە وەرگیراوە بێ سەرپەرشتی دادوەر، ڕەزامەندبوونیش لەسەر هەندێك پارت لەسەر بناغەی ئایین بە پێچەوانەی دەستوورەوەیە وەك چۆن لە حاڵەتی پارتی ئازادی و دادپەروەری و نوور ڕوویدا، دەشڵێت تانووت لێدانەكان لە بەرانبەر ئەو سەرپێچییانە خراونەتە بەردەم دادگاكانەوە، بە هەموویان ڕەنگە پەرلەمانی داهاتوو بەتاڵ بكەن، گەر ئیسلامییەكان ئەوەیان وەدیبهێنایە كە میسرییەكان دەیخوازن هەموومان بە یەكەوە چەپڵەیان بۆ دەكوتین، سەرەتا پێویستە ڕاوبۆچوونی خۆیان بە زەبری هێزەوە نەسەپێنن بەسەر ئەوانی تردا، دەست نەخەنە ناو كاروباری تایبەت و شەخسی خەڵكەكەوە، ئازادی گشتی و ئازادی ڕۆژنامەنووسی و بیرو بڕوا و ئازادی توێژینەوەی زانستی زامن بكەن، دەستوورێكیش دابنێن كە تیایدا جەخت كرابێتەوە لەسەر ئازادییە گشتییەكان و ڕێزدانان بۆ مافی كەمینەكان و هەروەها دەسەڵاتی سەرەك كۆمار كەمبكرێتەوە، لەبەر ئەوەی میسر وڵاتێكی گران و قورسە، ئیسلامییەكان ناتوانن بیڕفێنن بۆ خۆیان، زەحمەتە بۆ هەر هێزێك چ ئیسلامی بێت یان نائیسلامی ئەم وڵاتە بڕفێنێت..
نووسەری میسری سەلامە ئەحمەد سەلامە لای خۆیەوە دەڵێت دەرئەنجامەكانی هەڵبژاردن ئەوەی بۆمان دەرخست كە لاوانی شۆڕشگێڕ ڕیزەكانی خۆیان ڕێك نەخستووەو سەركردایەتییان یەكنەبووە بۆ بەرێوەبردنی شەڕی هەڵبژاردن لە بەرانبەر هێزە ئیسلامییەكانی كە پێشتر رێكخراو بوون و لێهاتووانە كاری سیاسییان بۆ ڕاكێشانی خەڵكی سادە كردووە، ئەوش ڕوون دەكاتەوە كە ئێستا مەترسی زۆر لە ناوەندی ڕۆشنبیران و داهێنەرانەوە بەدی دەكرێت لەوەی هێزە ئیسلامییەكان جڵەوی كارەكان لە میسردا وەدەست بگرن، ئەمەش ئەو ڕۆشنبیرانەی هاندا كە لیژنەكانی داكۆكی دابمەزرێنن لە پێناوی داكۆكی كردن لە ئازادی داهێنانی ئەدەبی و هونەری..
بۆ ئەوەی لە بەرانبەر تەوژمە ئیسلامییە سەلەفییە توندڕۆكانی كە لە هەوڵدان بۆ كۆت وبەندكردنی ئازادی داهێنان و فكر بوەستنەوە، لەوانەیە براگماتیكیەتی ئیخوانیەت سەربكەوێت لە دۆزینەوەی چارەسەری ناوەندی نزیك بە رۆحی سەردەم بەشێوەیەك نەبێتە هۆی پێكدادانی پێشوەختە..
لەلای خۆیەوە شرۆڤەكاری سیاسی میسری سەمیر سەید دەڵێت هێزە لیبرالییەكانی میسر حەقیقەتیان پێ نەبەزێنرا، گەرچی ئەنجامێكی لاوازیشان هەبوو لە بەرانبەر بردنەوەی یەكلاكەرەوەی ئیسلامییەكان، ئەمەش بە هۆی ئەوەی بە زەمینەسازییەكی تۆكمەوە دانەبەزین بۆ هەڵبژاردنەكان و كێبەركێی دادپەروەرانەیان پێ نەكرا، وێڕای تازەیی زۆربەیان لەژیانی سیاسیدا بەرانبەر جەماعەتی ئیخوان بەنموونە كە 80 ساڵی ڕەبەقە چاوەڕێی ڕوودانی ئەم ساتە وەختە بوون، سەرپەرشتی تۆڕێكی كۆمەڵایەتی بەرفراوانن كە %20ی خەڵكی ڕەش و ڕووت و هەژارانی كۆمەڵگەی میسری داپۆشیوە، سەید وای دەبینێت كە گرفتی گەنجانی شۆڕشگێڕی میسری ئەوەیە لایەنێكی شل و نایەكگرتوون، ئاسان نییە ڕەهەندەكانیان دیاریی بكرێت، دەستەبژێری شۆڕشگێڕان و گەنجانی توێژە دابڕاوو پەراوێزكراوەكانی كۆمەڵگاو هەروەها هەندێك لە توێژەكان ناوەندی و باڵا لە خۆدەگرێت، هەروەها وای دەبینێت هەندێكیان دانوستاندن قبووڵ ناكەن چونكە لەرووی شۆڕشگێڕییەوە پاك و بێگەردن و پێیان ناكرێت سەفەقات ئەنجام بدەن و ناتوانن بچنە ناو دانوستاندنەكانەوە و هیچ لایەنێكیش ناتوانن لەناویان بەرن . قیبلەنماو ویژدانێكی بێگەردیان هەیەو ئێستا داوای رۆشتنی عەسكەرییەكان دەكەن بەبێ مەرج، بۆیە خۆنیشاندان و مانگرتنەكانیان لە پێناوی یەكەمین ساڵیادی شۆڕش دا كراوەیە، رەنگە ئەمانە شەپۆلی دووەمی شۆڕش بن، بۆ لەباربردنی هەبوونی عەسكەرییەكان لە دەسەڵاتدا بەشێوەیەك لە شێوەكانی وەك مۆدێلی پاكستانی یان مۆدێلی توركی . لەپشتەوەی ئەم گەنجانەش هێزە لیبرالیەكان دێن كە ئەوانیش ترسیان لەبەرامبەر هەژموونی ئیسلامیەكان هەیە، سەید پێی وایە كە قەیرانێكی نەبوونی متمانەی تووند هەیە لەنێوان ئەو گەنجانەی لەشۆڕشەكەدا تووشی راوەدوونان و گرتن و لێدان بوونەوە لەبەرامبەر هەردوو ئەنجومەنی عەسكەری و ئیسلامیدا، ئیخوانیەكان و سەلەفیەكانیش بەپێی ئەوەی رایانگەیاندووە هەموو شێوازێك رەت دەكەنەوە لەو شێوازانەی كە ئەنجومەنی عەسكەری دەخاتە سەروو دەوڵەت و دامودەزگاكانەوە بەڵام ئەم هەڵوێستەیان شۆڕشگێڕانە نییەو لە چاوەڕێی ئەوەدان بچنە ناو پەرلەمانەوەو كەرەستە سیاسیەكانی خۆیان لە دانوستاندن بەكار بهێنن بۆ لە روو وەستانەوەی عەسكەرەكان. كەس نكۆڵی لەو سەفقانە ناكاتەوە كە لەنێوان ئیخوانییەكان و عەسكەرییەكاندان هەموو ئەم پێشهاتانە بەشێوەیەك لە شێوەكان دەبێتە هۆی پێكدادانەكان، بەتایبەتی گرفتێكی تریش هەیە ئەویش ناكۆكیە لەسەر پرەنسیپەكانی كە بەهۆیەوە لیژنەی دەستووری پێ دیاری دەكرێت هەریەك لە سێ جەمسەرەكە ئامانجی خۆی هەیە بۆ وەدیهێنانی كە هیچیان ئامانجەكانیان یەك ناگرنەوە ئەنجامەكانیش بەپێی لێهاتوویی جەمسەرێكیان لەسەر بەردەوامبوون بۆ دانانی فشار دەردەكەون لەهەموو حاڵەتەكاندا مەسەلەكە ترسناكە كە پێویستە لەسەر هەر جەمسەرێك چارەسەرێكی مامناوەندی بدۆزێتەوە بۆ گەیشتن، كە تێیدا هاوسەنگی لە نێوان داخوازییەكانی ئاسایشی نەتەوەیی و دەزگای سەربازی و هەروەها داخوازییەكانی شەفافییەت و دەوڵەتی مەدەنی ئەنجام بدرێت یا وەدی بێت، تا بگەنە چارەسەرێك كە وڵاتەكە ڕانەكێشێت بەرەو چركەساتی پێكدادان لەژێر سایەی ئەو مەترسییە راستەقینانەی كە میسر چاوەڕێیان دەكات، بۆیە پێویستە لەسەر هەموو ئاقڵمەندوو سیاسەتمەداروو دامودەزگاكانی كار كردن لەم مەترسیانە دوور بكەونەوە. لەلایەكی ترەوە دكتۆر عیسام عریان سەرۆكی پارتی ئازادی و دادپەروەری باڵی سیاسی ئیخوانەكان وا دەبینێت كە 30 ملیۆن دەنگدەری میسری بە ئیرادەی خۆیان نوێنەرەكانیان هەڵبژاردووە ئەوەش ڕێگای گرت لە هەموو ئەوانەی كە دەیانویست بەربەست بۆ رێچكەی دیموكراتی لە میسر دابنێن، جەخت دەكاتەوە لەسەر ئەوەی هەموو ئەمانە پێویستە بۆ بەدیهێنانی ئامانجەكانی شۆڕش و وەفاداری بۆ شەهیدەكان و كەم ئەندامەكانی و پشتگیری كردنی ئامانجەكانی كە هەمووان لەسەری كۆك بوون كە لەدادپەروەری كۆمەڵایەتی و كەرامەتی مرۆڤایەتی و ئازادییە گشتییەكان خۆی دەبینێتەوە..
هەروەها عوریان وای دێتە پێش چاو كە گەل تەنیا سەرچاوەیە كە مافی ئەوەی هەبێت پێشنیازی یاساكان و هەڵبژاردنی دەستووری بكات، ئەنجومەنی گەل و شوورا ئەنجوومەنێكی دامەزرێنەر هەڵدەبژێرن بە ئیرادەیەكی ئازادانەوە بۆ داڕشتنەوەی دەستوور نەك بەپێی دەستێوەردان و لەژێر فشاری ئیرادەیەكی دوور لە گەل، بۆ ئەوەی دەستوور دەربڕی ئیرادە میللیەكەی گەل بێت نەك پابەند بكرێت بە شتی لاوەكی ترەوە،سوپا شوێنە سرووشتیەكەی خۆی بۆ پاراستنی وڵاتەو لەسیاسەتدا بەكارنەهێنرێت، دەشڵێت: ئێمە لەبەر دەمی تەحەدیات و چەندین ویستی هەمە چەشنەداین كە لە ململانێدان دژ بە یەكتر، دەزگایی سەربازی رۆڵی خۆی دەوێت و دەستەبژێری بۆ پەیدا بووە، گەل دەیەوێت ئیرادەكەی وەدیبێت بەسەر زەمینەوە، عوریان هەر دەسكەوتێك ڕەت دەكاتەوە كە چارەنووسی ئەنجوومەنی سەربازی و ئیخوانەكان پێكەوە گرێ بدات، دەڵێت ئێمە دوایەمین كەسین كە پێوەندیمان بە عەسكەرییەكان و فشاری ڕاگەیاندنەكان و سیاسەتمەداران و دەستەبژێرانی ترەوە بێت لە كاتێكدا ئەوانە زۆریان ڕەواجیان بە نزیك بوونەوەمان لەگەڵ ئەنجوومەنە سەربازییەكە دەدا بەڵام لێی دوور كەوتینەوە، سەبارەت بە پەرلەمانی داهاتووش وتی : ئێمە لەبەردەم دیمەنێكی قەشەنگداین، هەموو دەنگەكان بوونیان هەن، هاوكاریی یەكتر دەكەین بۆ پەڕاندنەوەی وڵات و دەرچوون لە ملیوانەی تەسكی شووشەكە، میتۆدیشمان دەبێتە ڕاوێژكردن بە یەكتری و هاریكاری یەكترو دیالۆگ لەگەڵ هەموواندا بەبێ ئاوارتە(بێ ئیستیسنا).