تاكو ئەمڕۆشی لەگەڵدا بێت، یەكێك لەو دەسكەوتە مەزنانەی ناو هەنبانەی مێژووی ڕاگەیاندنی كوردی كە بە بەردەوامی لە داهێنان و نوێبوونەوە دوا نەكەوتبێت، كەناڵی (كوردستان تیڤی)ە، بۆ یەكەمینجارو هەر لە دەسپێكی دامەزراندنیەوەو لەو كاتەوەی كە شۆڕشی پێوەندییەكان سنوورەكانی شارستانی بەرەو كاڵبوونەوە دەبرد، ئەم كەناڵە ئاسمانیە وەك یەكەمین كەناڵی ئاسمانی لە كوردستان بە زمانی زگماكی كوردییەوە؛ بە زمانێك كە ئاواڵدووانەی وشەیەو سەرەكیترین بەیداخ و پێناسی نەتەوەیە لە شارۆچكەیەكی بچووكی وەك پیرمامەوە مەزنێتی یەكماڵبوونی مرۆڤی كوردی نیشانی دنیا ئەدا، وەك زۆر لە ئامڕازەكانی تری پێوەندیش؛ لە پێناوی گەشەسەندنی فەرهەنگ و دیمەن و زمانی كوردی لەناو فەرهەنگە جیاوازەكانی جیهاندا، بێ پاسپۆرت بوارەكانی ژیانی كوردەواری ئاودیوی سنوورەكان دەكرد، دواتر ئەم كەناڵە بوو بە پردێكی گەیاندن لە نێوان هەموو ئیتنی و پێكهاتە مۆزائیكی و ئاینزا میانڕەو و بیروڕا جیاوازەكانی ناو گەلی كوردستان، هەردەم لەپێناوی دەستنیشانكردن و گواستنەوەی دەنگ وباس و رەنگ و هەواڵەكانی كورد؛ چ لە ناوەوە یان دەرەوەی نیشتماندا پرۆفشناڵانەو ڕاستگۆیانەو بەوپەڕی خەمخۆرییەوە بەرپرسیارێتی لەئەستۆی خۆی گرتووە، باشترین گەواهیدانیش بۆ ئەم ڕاستییە دەركەوتنی دەرئەنجامی هەموو ئەو ڕاپرسییە شەفافانەیە كە بەدرێژایی چەندین ساڵ لەژێر سێبەری ئازادیی ئەم بەشەی كوردستاندا ڕەنگی داوەتەوە، وێڕای ئەوەش لە ڕێی بەرنامەو دراماو كۆمێنت و بابەتەكانی تریشیەوە ئەم ڕاستگۆییە بە ئاشكرا دیار بووە، هەموو بەرهەمێكی داهێنەرانەو نەمریش هەرلە ڕاستگۆییەوە سەرچاوە دەگرن بەو شێوەیەی خاوەنی بەرهەم و دەرهێنەرو پێشكەشكارانی بەرهەم، لەگەڵ هەستی خۆیان و بیری مرۆڤایەتیدا ڕاستگۆ بن، تەنانەت ڕەسەنایەتیش لە ڕاستگۆییدایەو دڵڕاگرتنی تێدا نییە، ئەمەش جێبەجێ كردنی ناوەڕۆكی ئەو پەیامە بووە كە شەخسی جەنابی سەرۆك بارزانی هەمیشە جەختی لەسەر كردۆتەوە، بە تایبەت بۆ ئەم كەناڵە ئاسمانیە كە كلیلی كردنەوەی یەكەمین دەرگا بووە بۆ گەیاندنی ڕەنگ و دەنگی كوردی بەسەرتاپای جیهان، جارێكی تریش لە سێزدەمین ساڵیادی دامەزراندنی كەناڵی كوردستان تیڤی چەندین هۆبەو كارمەند و كەسایەتی ناو ئەو كەناڵەمان بەسەركردنەوە تا لە زاری خۆیشیانەوە بە بەشێك لە ئەزموون و شێوازی كاركردنیان ئاشنا بینەوە:


گەیاندنی هەواڵی خێرا بێ پەلە لەخۆكردن
سەرەتا سەبارەت بە دروست بوونی میسداقیەت و بنەمای متمانە لە نێوان كەناڵی كوردستان تیڤی و بینەرانیدا بەڕێز عەبدولڕەحمان كاكل بەڕێوەبەری بەشی دەنگ و باس وتی: ئەگەر دەزگایەكی راگەیاندن متمانەی پێ نەكرێت بەرنامەكانیشی متمانەیان نامێنێت، جا متمانەش شتێكی وائاسان نییە، ئاشكرایە كەسێك بەتەنیا ناتوانێت متمانەی كەسانێكی تر بەدەست بێنێ، چ جای ئەوە دەزگایەكی ڕاگەیاندن بێت بەو وەزعەی لەكوردستان هەیە، متمانەی بەرزی ئەم كەناڵە بەماندووبوونی كارمەندەكانیەوە بەدەست هاتووە، ئەوەش لە ئاكامی چەندین راپرسیدا دەركەوتووە، ئێمە زۆر حەزمان لەخێراییە، بەڵام زۆریش پەلە ناكەین، هەموو تەلەفزیۆنێك لە جیهاندا حەزی لە پەلە كردنە، ئەوەش سیاسەتی ئیش كردنە، حەزمان لە خێراییەو پەلەش ناكەین، دەمانەوێت بەخێراترین كات زۆرترین هەواڵ بگەیەنین بەڵام بەبێ پەلەكردن، لەلایەكی تریشەوە زیاتر ئەم شێوازی كاركردنە پێوەندی بە ئینتیمای نیشتیمانییەوە هەیە، زۆر تیڤی هەن هەر شتێك بێتە بەر دەستیان كە بینەر بۆخۆی ڕابكێشێت ئەوا بڵاوی دەكاتەوە، بێ ئەوەی گوێ بدەنە ئەوەی ئەو شتە لەڕووی دەروونییەوە چ كاریگەرییەكی هەیە بۆ منداڵان، باشترە شتێك بڵاو بكەیتەوە كە خێرێكی بۆ كۆمەڵگەكەمان هەبێت، بەداخەوە خەڵكی ئێمە لەوەتەی هەیە بەڕاگەیاندنی داگیركار چاوی بەستراوەتەوە، ڕەنگە گەنجێك ئەوەندە چاو لەتەلەفزیۆن بكات، ئەوەندە گوێ لەباوانی نەگرێت، بۆیە هەموو شتێك لەبەرچاو دەگرین، ئینجا بابەتەكە بڵاو دەكەینەوە، خەڵكانێك هەن خۆیان نازانن بۆچی لەگەڵ دەنگ و باسی كوردستان تیڤی مورتاحن، بەڵام ئێمە دەزانین، ئەوەش لەبەر ئەوەیە ڕۆژێ لە ڕۆژان شتێك بڵاو ناكەینەوە كە كاریگەری خراپی لەسەر بیرو دەروونی خەڵك هەبێت، بەداخەوە لەزۆربەی میدیاكانی كوردستان بایەخ بە ڕاستگۆیی نادەن، پێویست ناكات بەردەوام بێین حكومەت و پەرلەمان و سەرۆكایەتی بۆ هەموو شتێك خەتابار بكەین، بۆنموونە هەواڵێكی وەك ئەوەی كە لە شوێنێك ئافرەتێك خۆی سووتاندووە، لاشەی سووتاوی ئەو ئافرەتە بڵاو ناكەینەوە.

پێویستە بینەران خۆیان بڕیار لەسەر بنەماكانی هەواڵ بدەن
هەر بەرپرسی بەشی هەواڵ و سیاسەت لە درێژەی قسەكانیدا دەربارەی چۆنیەتی كاركردن و بەڕێوەچوون دەنگ و باس و زنجیرەی دابەزینی هەواڵەكان وتی:
هەواڵەكانی سەرۆكایەتی هەرێم و پەرلەمان و حكومەتی هەرێم زۆرتر پەیوەستن بەژیانی خەڵكەوە، خەڵكی حەزدەكەن بزانن سەرۆكی هەرێم ئەمڕۆ كێی بینیوە، یان چۆن باسی ژیانی خەڵكی دەكات، كاتێك گرنگی بەهەواڵەكانی پەرلەمان دەدەین چونكە دەزانین لەوێوە چەند بڕیارێكی كارگێڕیی دەردەچێ كە بۆ ژیانی خەڵك گرنگن، خەڵك دەیەوێ بزانێت چارەنووسی خۆی و دەوروبەری چییە، هەروەها گواستنەوەی ژیانی خەڵك لەڕووی كۆمەڵایەتییەوە تا خستنە ڕووی ئەو رووداوانەی كەپێوەندی بەژیانی بژێوی و تایبەتی خەڵكەوە هەیە، ئێمە پابەندین بە ئینتیمای نیشتیمانییەوە، كەناڵێك نین تەنیا لەپێناوی راگەیاندندا ئیش بكەین، واتە لە پێناوی كۆكردنەوەی بینەراندا ئیش دەكەین، مخابن وای لێ هاتووە رۆژنامە یان گۆڤارێك گەر وروژاندنی تێدابێت ناوبانگ دەربكات، ئێمە رەنگە بۆدەست كەوتنی تەنیا هەواڵێك بەقەد پارەی پەنجا كلیپ پارە سەرف بكەین، چونكە هەواڵەكە بۆ كۆمەڵگەی ئێمە پێویستە، ناڵێم كلیپ خراپە، بەڵام رەنگە لای ئێمە ئەوە گرنگ تربێت، خۆمان بەهیچ وڵاتێكی وەك توركیاو سوریا و ئێران بەراورد نەكەین، چونكە هەر وڵاتێك تایبەتمەندی خۆی هەیە، گەر تەلەفزیۆن زۆرترین شتی تەرفیهی تێدابێت، بێگومان بینەرمان زیاتر دەبێت، ڕەنگە پاش بیست ساڵی تر تەلەفزیۆنی سیاسی، بینەری هەر نەمێنێت..

دووبارەنەكردنەوەی هەمان دەنگ و باسی كە پێشترخوێندرابێتەوە
دواتر بەڕێزیان سەبارەت بە هەبوونی كارمەندی كچ لەناو ستیۆدیۆ بۆ خوێندنەوەی دەنگوباس و هەروەها دوپات نەكردنەوەی هەمان دەنگ و باس وتی تەنیا شەش یان حەوت بێژەری كچمان هەیە، سەبارەت بە نەبوونی پەیامنێرانی كچیش زیاتر پێوەندی بەئێمەوە نییە، حەزیان لە كاركردنە لەناو گۆڤارو رۆژنامەكاندا، زۆر مەبەستمانە ئافرەتی كارمەندنمان هەبێت، لەبەرئەوەی زۆربەی نەشرەكانمان دوو بێژەرییە، بێگومان باشترە كوڕو كچێك بن، ئەمە بۆ ئەوانیش باشە، بۆ دەرخستنی ئافرەت لەم بوارەو هەروەها توانای ئافرەتیش پیشان دەدات، حەز دەكەین زیاتر ئافرەت بتوانێت لەنووسینەوەی هەواڵەكانیش كاربكات و جێ پەنجەی دیاربێت، گۆڕانكاری میكانیكیمان نییە، چونكە زۆربەی شتەكان نوێیەو ئەوەی كە دەمێنێتەوە ئەوەیە لەدەنگ وباس دووبارەبوونەوە نییە، گرنگ لای ئێمە ئەوەیە شتی دووبارە پیشانی بینەر نەدەینەوە. ئەدای تەلفزیۆن وەكو رۆژنامە و بڵاوكراوەكان نییە، تیڤی ئەفراندنێكە بەبێ پاسپۆرت دەچێتە هەموو ماڵێكەوە..

هەندێك لە كادرانی كەناڵەكە سەبارەت بەم یادە چی دەڵێن: كەناڵێك پێشەنگە لە متمانەدا
تریفە فەیزوڵلا لە بەشی مۆنتیری دەنگوباسی كوردستان تیڤی 9ساڵە كاردەكات و باسی لە جۆرایەتی كارەكانی تیڤیەكەو ئەنجامی ڕاپرسییەكان كردو وتی بەردەوام لە مونتیری دەنگوباس كار دەكەم، ئەوەی من خۆشحاڵ دەكات ئەوەیە كە لە گشت راپرسیەكاندا كوردستان تیڤی لە دەنگوباسدا متمانەیەكی زۆری بەدەست هێناوەو بەردەوام لە پێشەنگدایە، لە درێژەی قسەكانیدا تریفە دەڵێت بەهیوام رۆژبەڕۆژ كوردستان تیڤی زیاتر لەخزمەتی هەموو خەڵكدا بێت..
حەمەدەمین ئیسماعیل مستەفا ماوەی شەش ساڵە لە كوردستان تیڤی كاری كردوە سەرەتا بێژەر بووەو ئێستاش بەرێوەبەری نووسینی هەواڵەكانە وێڕای پیرۆزبایی دەڵێت كوردستان تیڤی وەكو وەچەرخانێكی گەورەبووە لە میدیای كوردستانداو لەساتە وەختێكدا ناسكدا هەموو كوردەكانی گەیاندە جیهان، سیاسەتی نووسینی ئەم كەناڵە بەندە بە پرەنسیپەكانی ئەخلاقی ڕۆژنامەنووسی و ڕۆژانە چواردە بڵاوكراوەمان هەیە، ساڵ دوای ساڵ توانیومانە گۆڕانكاری لەسیاسەتی ئیش كردنی كوردستان تیڤی بكەین كە ئەركی نیشتمانی جێبەجێ دەكات، پێمان خۆشە زیاتر بەلای بینەران وئێوەوە خۆشەویستر ببین.
شەمزین مولحیم كە بەڕێوەبەری مۆنتاژی دەنگ و باسە وتی ((پیرۆزبایی لەخۆمان و سەرۆك بارزانی و بەرێوەبەری خۆشەویستمان و گشت هاوكارو كارمەندانی پارتیمان دەكەم بەبۆنەی سیزدەیەمین ساڵیادی ئەم كەناڵە خۆشەویستەو، پێمان خۆشە هەردەم ئەم كەناڵە گەشاوەبێ و خزمەتی گەلی كورد بكات)) شەمزین پێشی وایە ئەم كەناڵە توانیویەتی میسداقیەتی بینەران و خەڵك بەدەست بهێنێ.
هێرۆ ئیسماعیل عارف پێشكەشكاری بەرنامەی هەفتەو بێژەری دەنگ و باسە وتی پیرۆزبایی لە هەمووان دەكەم لە هەر شوێنێكی كەناڵەكە بن و بە تایبەت ئەوانەی ماندوبوونیان لەشاشەوە دەردەچێت و خۆیان دیارنین، دەشڵێت خۆشترە زیاتر بێژەری كچمان هەبێ چونكە لەبێژەری كچ هەرخۆم و بەڕێزین، ئەمە زۆر بێتاقەتم دەكات و حەز دەكەم بتوانین وا لە ئافرەت بكەین، كاربكەن لە كەناڵی ئاسمانی چونكە كەسایەتی ئافرەتەكانیش جوانتر دەبێت، نازانم بۆ تا ئێستا لەكۆمەڵگەی ئێمەدا خەڵك ترسی هەیە لەراگەیاندن؟
شاهۆ تەیب بەرێوەبەری تەكنیكی وتی لەسەرەتاوە هەوڵمان داوە ئامێری تەكنیكی نوێ بێنین بۆ ئەم كەناڵەو ساڵ بە ساڵ بەپێی ئیمكانیەت گۆڕانكاریمان تێداكردووە، دەتوانم بڵێم لەڕووی كوالێتیەوە یەكێكە لەو شاشانەی كەزۆرباشە، كوالێتی ڕەنگی باشە، دەنگی باشە، ئەوەش هەمیشە یارمەتیدەرە بۆ ئەوەی لەگەڵ سیاسەتی كەناڵەكە رێگە بگرێ و رێخۆشكەرە چۆن ئاسانكاری بۆ بەرنامەكان بكات و لێرەوە زۆر فەرقی كردووە، ئێمە مانگ بە مانگ هەوڵمان داوە كوالێتی و تەكنیكی باش بێنین، پیرۆزبایی خۆم ئاڕاستەی هەموو كارمەندان و هاوكارانم دەكەم..
شێروان تاڵیب پەیامنێرو جێگیری سەرنووسەری دەنگ و باس وتی ساڵی 1998 بەبڕیارێكی ناوەندی پارتی دیموكراتی كوردستان بڕیاردرا كەناڵێكی ئاسمانی دابمەزرێت دوومانگی سەرەتای پەخش تەنیا وێنەو سپۆتاژ بڵاودەكرایەوە، دواتر دەستەبژێری كارمەندانی ڕاگەیاندنی پارتی دیاریكران بۆئەوەی بتوانن ئەوكەناڵە بەرێوەببەن، كۆبوونەوەكان لە پیرمام بوون بە سەرپەرشتی بەڕێزان ڕێبوار یەڵدا و سەرۆقادر و بەدران ئەحمەدو رزگار مایی، چەند كۆبوونەوەیەكمان دەستپێكرد بۆئەوەی نیشانی ئەوە بدەین ئیشی ئەم كەناڵە چییەو چۆن كاردەكات وەك یەكەم كەناڵی سەتەلایت، ساڵی تازە لەماوەی پەخشێكی دوو سەعاتیدا بۆ ماوەی دوو سەعات یەكەم پەخشی ڕاستەوخۆ توانیمان بڵاوكراوەیەكی دەنگ وباس پێشكەش بكەین و یەك دوو ریپۆرتاژ هەبوون بڵاوكرایەوە، لەوساوە ئێمە هەڵوێستێكی نەتەوەیی و نیشتمانیمان هەبووە تا پەیامی بارزانی و هەڵوێستی نیشتمانی جێبەجێ بكەین، بۆیە ئاساییە كە لەكاتی هەبوونی پرسەو ناخۆشیەك لەشارێكی كوردستان هاوبەشیان بین و لەكاتی خۆشیشی هەروا، دەستخۆشی لەهەموو ئەوانە دەكەم كە تائێستا بەردەوامن و ئەوانەی رۆحیان لەوڕێیە داناوە، دەستخۆشی لەكارمەندانی گوڵانیش دەكەم بۆ ماندوو بوونتان»
ئەڵماس محەمەد بێژەری بەشی فارسی و بەرنامەی وەرزشە، باسی لەوە كرد كە چۆن بە ڕاشكاوانەو دڵسۆزییەوە ئەم كەناڵە توانیویەتی لەبواری وەرزشیشدا رەزامەندی خەڵك بۆخۆیان ڕابكێشن و وتیشی هیوادارم لەداهاتوویەكی نزیك بەرنامەیەكی تایبەت بەوەرزش دەست پێ بكەین و پێشكەشی بكەم
هەیفا ساڵح لەبەشی سیاسی و رۆشنبیری كار دەكات و بەرنامەیەكی توركمانی هەبووەو خۆشحاڵی خۆی دەردەبڕی بەوەی لەتەلەفزیۆنێك كاردەكات كەبە ماڵی هەموو كوردێكی دەزانێت و وتیشی خۆشبەختانە بەرلەوەی لێرە كاربكەم كەسێكی ئاسایی بووم بەڵام لەماوەی كاركردنم توانیومە جێ پەنجەی دەستی خۆم بكەمەوە، وەك ئافرەتێكیش توانیومە لەحەوێجەو تكریت لەگەڵ پێشمەرگەو عەسكەری عێراقی بمێنمەوەو هەموو خەڵكیش منیان بینیوەو بەچاو نەترسانە ئەو كارەم كردووەو زۆریشم پێخۆشە كوردستان تیڤی یەكەم كەناڵ بێت باس لەسەربەخۆیی كوردستان بكات..