خاتوو كارۆل ئولیری ئوستادی پەیوەندییە نێودەوڵەتیەكانە و پسپۆر و تایبەتمەندە لەسەر رۆژهەڵاتی ناوەڕاست بەگشتی و پرسی كورد بە تایبەتی و بەڕێوەبەری پرۆگرامەكانی سەنتەری ئاشتی-یە لە زانكۆی ئەمریكا لەواشنتۆن، هەروەها ئەم خانمە ماوەی زیاتر لە 10 ساڵە بەشێوەیەكی تایبەتی لەسەر هەرێمی كوردستان كاردەكات و لەسەر پرسی هەرێمی كوردستان لەناو كۆنگریسی ئەمریكادا دانیشتنی گوێگرتنی بۆ رێكخراوە و ئەویش بە ئەمانەتەوە بارودۆخی هەرێمی كوردستانی بە كۆنگرێسی وڵاتەكەی گەیاندووە، پرۆفیسۆر ئۆلێری یەكێك بووە لە رێكخەرانی كۆنفرانسی (كورد كلیلی سەقامگیری عێراقە) كە لەساڵی 2002 لە مەڵبەندی مستەفا بارزانی لەناو سەنتەری ئاشتی زانكۆی ئەمریكا لەواشنتۆن گرێدرا، ئەمەش مانای ئەوەیە ئەم خانمە پێش رووخانی رژێمی پێشووی عێراق بە ساڵێك، كاری لەسەر ئەو پرسە كردووە ئەگەر كێشەی كورد لە عێراقدا چارەسەر بكرێت، ئەوا عێراق دەبێتە دەوڵەتێكی هاوچەرخ، بە پێچەوانەوەشەوە ئەگەر هەر زوڵم لەكورد بكرێت، ئەوا عێراق سەقامگیری بەخۆیەوە نابینێت، هەربۆیە بۆ قسەكردن لەسەر بارودۆخی ئێستای عێراق و سیاسەتی ئەمریكا بەرامبەر بەعێراق و ئاییندەی هەرێمی كوردستان، گوڵان ئەم وتووێژەی لەگەڵ پرۆفیسۆر كارۆل ئۆلیری ئەنجامدا كە ئەمە دەقەكەیەتی.

* چەند هەفتەیەكی دیكە ماوەی چوار ساڵ بەسەر ئیدارەی ئۆباما تێدەپەڕێت و لە ئەمریكا هەڵبژاردن دەكرێتەوە، وەك گوێبیست دەبین كە كۆمارییەكان وەك ركابەری دیموكراتیەكان لەهەڵمەتەكانی هەڵبژاردن بەوجۆرە باس لە سیاسەتی ئیدارەی ئۆباما بەرامبەر عێراق دەكەن كە شەڕی عێراقی دۆڕاند، ئایا بەڕێزت وەك پسپۆرێك لەمبوارە چۆن سەیری ئەم مەسەلەیە دەكەیت؟

 

- بۆ وەڵامی ئەم پرسیارە من حەزدەكەم وەك پسپۆرێك بەشێوازی شرۆڤە و شیكاری قسە بكەم، نەك وەك كەسێك كە هاوسۆزی دیموكراتەكان بێت یان كۆمارییەكان، بۆیە لەم چوارچێوەیەدا من دەڵێم ئەگەر ئێوە لایەنگیری ئەو بۆ چوونە بن كە پێیان وایە ئیدارەی ئۆباما شەڕەكەی دۆڕاندووە، ئەوا دەڵێم نەخێر وانییە و لەگەڵ ڕێزم بۆ بۆچوونەكەتان بەڵام بۆچوونەكەتان هەڵەیە، هۆكاری ئەمەش بەبۆچوونی من ئەوەی ئەگەر چوار ساڵ لەمەوپێش دیسان كۆمارییەكان هەڵبژاردنیان ببردایەوە، ئەوا هەر هەمان سیاسەت پیادە دەكراو هێزەكانی ئەمریكا لەعێراق دەكشانەوە، من لەوە دڵنیانیم ئایا ئەگەر كۆمارییەكان بمانایەوە دەمانتوانی رێككەوتنی (SOFA) لەنێوان حكومەتی ئەمریكا و عێراق جێبەجێ بكەین یان نا؟ ئایا كۆمارییەكان لەگەڵ مالیكی سەر دەكەوتن یان نا؟ بەڵام بە بۆچوونی من وەك ئەكادییمیەك و پسپۆر لە بواری دیراساتی رۆژهەڵاتی ناوەڕاست، بەهۆی كاریگەری ئێران و هەڵوێستی حكومەتی ئێران بەتایبەتی مەجلیسی شورا، ئەوا ئەگەر كۆمارییەكانیش لە حكومدا بوونایە رێككەوتنی (SOFA) هەر جێبەجێ نەدەكرا، بۆیە وەك من دەیبینم ئیدارەی ئۆباما رێك هەمان ئەو سیاسەتەی پیادەكرد كە ئەمریكیەكان داوایان دەكرد جێبەجێ بكرێت، ئەویش كۆتایی هێنان بوو بە شەڕی عێراق، ئەمەش لەبەر ئەوەبوو ئێمە وەك ئەمریكا ئەو هەموو قوربانیەمان بۆ ئازادكردنی عێراق پێشكەشكرد، بەڵام یەك پارچەی عێراق كە ئەویش هەرێمی كوردستان بوو ئاسوودەو خۆشحاڵ بوون بەمانەوەمان، تەنانەت حكومەتی عێراقی لە بەغدا زۆر بەراشكاویی پێیان راگەیاندین كاتی ئەوە هاتووە ئەمریكا لەعێراق بچنە دەرەوە بەشێوەیەكیش كە لەهیچ بەشێكی عێراق نەمێنینەوە، بێجگە لە كوردستان، ئەمەش مانای ئەوەیە كە حكومەتی عێراقی ئامادە نییە و رازی نییە ئەمریكا لە عێراق بمێنێتەوە، ئەمەش لەبەر ئەوەی ئەوە خواستی ئێرانە و ئێران رازی نییە هێزەكانی ئەمریكا لە عێراق بوونی هەبێت، تەنانەت هەندێك لە ئەندامانی پێشووی ئۆپۆزسیۆنی عێراقی تەنیا بە رووكار سوپاسی ئەمریكایان كرد، بۆیە هەر بەڵێن و هاوپەیمانیەك لە ساڵی 2002 بەسەرۆك بوش درابێت، ئەوا لەم كەشوهەوای ئێستا هەیە لەنێوان هەردوولادا هیچ لەو هاوپەیمانییە نەهاتۆتەدی، بۆیە بەپێویستی دەزانم خوێنەری گۆڤارەكەتان ئەو دیوی مەسەلەكە ببینن و گرنگە لەڕوانگەی ئەمریكاوە سەیری مەسەلەكە بكەن، بەڕای من گرنگە بزانن سەرۆك ئۆباما چی دەكرد – ئێوە لە كوردستانن و ئێمەیش لە ئەمریكاین، دوو جیهانی جیاواز – بۆیە پێویستە لەمە تێبگەن: ئەگەر سەرۆك ئۆباما بەپێی بۆچوونی كۆمارییەكان بەڕاستی سەرۆكێكی خراپ بووە، هەروەها ئەگەر سەرۆك ئۆباما بەڕاستی دژی هەڵوێستی كۆمارییەكان بووایە ئەوە بەسەربەرزییەوە لە عێراق دەرنەدەچوو، بەواتایەكی دیكە دەمەوێ ئەوە بڵێم كە سەرۆك ئۆباما لە هەڵمەتەكانی هەڵبژاردندا و پێش هەڵبژاردنی بۆ سەرۆكایەتی زۆر ناهاوڕا بوو لەگەڵ سەرۆك بوش لەبارەی چۆنیەتی بەڕێوەبردنی بۆ شەڕی عێراق، راستە سەرۆك ئۆباما لەدژی هەڵگیرسانی شەڕەكە بوو بە پلە یەك و زیاتریش لەدژی چۆنیەتی بەڕێوەبردنی شەڕەكە بوو، لەبەر ئەوەی پێیوابوو كە دوژمنانی ئێمە لە ئەفغانستانەوە هاتبوون نەك لە عێراقەوە، هەروەها بە پلە دوو سەرۆك ئۆباما لەدژی چۆنیەتی بەڕێوەبردنی شەڕەكە بوو لەلایەن ئیدارەی بوشەوە، بەهەرحاڵ پاش ئەوەی ئۆباما بوو بە سەرۆك ئیدی رەخنەی لە ئیدارەی بوش نەگرت، بەڵكو لاپەڕەیەكی نوێی هەڵدایەوەو بڕیاریدا كاتی ئەوە هاتووە ئەمریكا بەسەربەرزییەوە لەم شەڕە دەرچێت، بۆیە زۆر گرنگە لەوە تێبگەین كە سەرۆك ئۆباما هەرگیز باسی لەوە نەكردووە ئەمریكا لە عێراق بدۆڕێت، بەڵكو بەپێچەوانەوە ئۆباما پەیوەندیی باشی لەگەڵ مالیكی و حكومەتی عێراقی پاراست، راشكاوانەتر دەكرێت بڵێین سەرۆك ئۆباما لە عێراق هەمان ئەو هەنگاوەی هەڵگرت كە كیسنجەر لە شەڕی ڤێتنام هەڵیگرت، ئەویش كشانەوەی هێزەكان بوو لەعێراق، هەروەك چۆن كیسنجەر هێزەكانی ئەمریكا لە ڤیتنام كێشایەوە.

 

* عێراقی ئەمڕۆ جیاوازە لەوەی ئەمریكا پێشبینیی بۆ دەكرد، حكومەتی عێراقی لەسەر ئاستی رۆژهەڵاتی ناوەڕاستدا وەكو هاوپەیمانێكی ئێران دەژمێردرێت و عێراق پاڵپشتی لە رژێمەكەی سوریا دەكات لەكاتێكدا وڵاتانی دیكەی هاوپەیمانی ئەمریكا وەكو توركیا و سعودیە و قەتەر هەڵوێستی جیاوازیان هەیە...

 

- بۆچوونەكەتان زۆر دروستە، مەبەستتان لەوەدایە كە ئێمە لەبارەی كەیسەكەی سوریا-و هەروەها لەبارەی چەندین مەسەلەی دیكە گەیشتینە دیوە پێچەوانەكەی حكومەتی عێراق و ئەمەش بەتایبەتی بەهۆی ئێرانەوە وایلێهات، ئێمە ئەمڕۆ هاوڕاین لەگەڵ عەرەبستانی سعودییە، هەروەها هاوڕاین لەگەڵ قەتەڕ پەیوەندییەكانمان لەئاستێكی ئاساییدایە ماوەیەكی درێژە قەتەڕ هاوپەیمانی ئەمریكایە، هەروەها لەگەڵ توركیا كۆكین كە ئەندامی ناتۆیە و هاوپەیمانی ئەمریكایە، بۆیە ئێمە ئەمڕۆ لەگەڵ جیهانی سوننە كۆكین لەكاتێكدا حكومەتی بەغدا لەگەڵ ئێران و حزبوڵلا و رژێمی سوریا كۆكە، ئێمە لەبارەی وردەكارییەكان هاوڕاین و بۆچوونەكەتان دروستە، بەڵام پرسیاری سەرەكیتان چییە؟

 

* پرسیاری سەرەكیمان ئەوەیە ئایا هەڵوێستی ئێستای حكومەتەكەی مالیكی زیان بە بەرژەوەندییەكانی ئەمریكا لە ناوچەكە دەگەیەنێت؟ هەروەها رات چییە لەبارەی دابینكردنی چەك لەلایەن روسیاوە بۆ عێراق؟ تاچەند ئەم مەسەلەیە و هەنگاوەكانی مالیكی ئەمریكای نیگەران كردووە لەمبارەیەوە؟

 - بەڕاشكاوەیی بیڵێم، من باش تێدەگەم كە بۆچی ئێوە لە كوردستان نیگەرانن لەوەی مالیكی چەك لە روسیا بكڕێت، پێش هەمووشتێك، چەكی ئەمریكی لەبەراوردكردنیدا لەگەڵ چەكی روسی زۆر پێشكەوتووتر و باشترە، دووەم: من لێرەدا باسی ئایندەیەكی دوور ناكەم پاش 20 ساڵی داهاتوو، بەڵكو مەبەستم لەمڕۆوەیە تاكو 5 ساڵی داهاتوو واتە باسی ئاییندەیەكی كورت دەكەم، بۆیە من لەو بڕوایەدا نیم سوپای عێراق بتوانێت ئەو چەكەی دەیكڕێت بەبێ مەشق و راهێنان بەكاری بێنێت، لەبەرئەوەی ئەو حكومەتەی ئێستای عێراق تەنانەت توانای نییە كارەباش دابین بكات، لەمەش زیاتر سوپای ئەو حكومەتە دابەشە لەنێوان سوننە و شیعە، هەرچەندە لە دوای ساڵی 2003 ئەو سوپایە كوردیش لەخۆدەگرێت، بۆیە وەك رای خۆم لەسەر ئاستی ئاییندەی كورت مەودا هەست بە هیچ نیگەرانییەك ناكەم و پێموایە ئەو ترسەتان لە مەودایەكی كورتدا مایەی نیگەرانی نییە، بەڵام وێڕای ئەمانەش من لە نیگەرانییەكانتان تێدەگەم، هەربۆیە ئەگەر لێم بپرسی ئایا چۆن بەراوردی هێزی توركیا لەگەڵ هێزی حكومەتی مالیكی دەكەیت كە سوپاكەی بەچەكی رووسی پڕچەك دەكات، ئەوا ئەو كاتە لەوەڵامدا پێت دەڵێم من لەسەر هێزی توركیا كە هاوپەیمانی ئەمریكا و كوردیش هاوپەیمانی ئەمریكا و توركیایە، گرەو دەكەم و، پێموایە ئەمریكا و توركیا و ناتۆ بەرگری لەكوردستان دەكەن، ئەگەر مالیكی بەچەكی رووسی بیەوێت ئارامی و سەقامگیری كوردستان بخاتە مەترسیەوە. بۆیە من لەم قۆناخە دەتوانم ئەوەندە بڵێم من لە نیگەرانیەكانتان تێدەگەم، ئەوەی ئێوە باسی دەكەن خەمڵاندنێكی ئایندەییە، دەتوانین پێشبینیی ئەو شتە بكەین، بەڵام جارێ بەرەو ئاڕاستەی ئەو رۆژە هەنگاومان هەڵنەگرتووە، هاوكات پێموایە هەموو لایەنێك لەنێویشیاندا ئەمریكا لە نیگەرانییەكانتان تێدەگات و لەنزیكەوە چاودێریی ئەم مەسەلەیە دەكەن، بەڵام وەكو خەمڵاندنێك من لەگەڵ بۆچوونەكەتان هاوڕام و پێموایە ئەگەری ئەوە هەیە بارەكە بەرەو ئەو ئاڕاستەیە بڕوات، هەر لەبەر ئەمەشە كێشەی ئێران هەرە جددیترین كێشەیە لە ناوچەكە، هەروەها هەموو ئەو لایەنانەی باسمان كرد پەیوەندیی بە ئێرانەوە هەیە لەبەرئەوەی ئێران هاوپەیمانی روسیایە و ئەمڕۆ عێراقیش بەرەو هەمان ئاڕاستە هەنگاو هەڵدەگرێت، هەربۆیە دەڵێم من باش لەو سیناریۆیە تێدەگەم كە ئاماژەتان پێكرد، ئەم سیناریۆیە راستیەكە و ئەگەری روودانی هەیە، بۆیە پێویستە بەدواداچوونی لەسەر بكرێت، بەڵام بەڕای من جارێ لەو ئاڕاستەیە نزیك نەبووینەتەوە، بەواتایەكی دیكە بەڕای من جارێ بەغدا زۆر سست و تێكشكاوە و تەنانەت توانای ئەوەی نییە تەزووی كارەبا دابین بكات و ناتوانێت هەوایەكی سارد بۆ هاووڵاتیانی لە هاوینە دابین بكات، تەنانەت توانای نییە هەلی كار دابین بكات، بۆیە بۆ حاڵی حازر پێشبینیی ئەوە ناكەم عێراق ئەو توانایەی هەبێت سوپایەكی بەهێز بونیاد بنێت، بەڵام پێویستە چاودێریی بكەین.

* تاچەند چوونە ڕیزی عێراق بۆ نێو هاوپەیمانێتیی روسیا و ئێران بارەكە ئاڵۆزدەكات؟

 

- بەڵێ بارەكە ئاڵۆز دەكات، بەڕای من عێراق بۆ حاڵی حازر دابەشبووە و لاوازە و هەروەها ژێرخانە ناوخۆییەكەی و تواناكەشی لاوازە، ئەمە وێڕای ئاستی بەرزی گەندەڵی و ناكۆكی سیاسی كە لە عێراقدا بوونی هەیە، بێجگە لە ناكۆكییەكانی نێوان سوننە و كورد ئەوە جەنگ لەنێو شیعەدا هەیە، شیعە دابەشە، سەدر لەدژی مالیكی، حەكیم لەدژی مالیكی، بەڕای من عێراق تاكو ئەمڕۆش لەسەر ئاستی ناوخۆدا دابەشبووەو لاوازە، بەپێچەوانەوە ئەمڕۆ ئێران هەڕەشەیە، بۆیە ئەگەر ئێران بەردەوام بێت لەدژایەتیكردنی ئەمریكا و رۆژئاوا، ئەوا عێراقیش لەسەر هەمان رێچكەكەی ئێران دەڕوا و بەتێپەڕبوونی كات عێراق بەهێزتر دەبێت و دەگاتە ئاستی ئەو نیگەرانییەی كە ئێوە ئاماژەی پێ دەكەن، بۆچوونەكەتان دروستە، بەڵام ئەوەی لێرەدا هەستی پێدەكەین هاوكات مەسەلەیەكی تراژیدیشە ئەوەیە كە ئێمە وەك ئەمریكا ترلیۆنەها دۆلارمان خەرجكرد و هەزارەها قوربانیماندا لە هاووڵاتیانی ئەمریكی و كورد و لە عێراقیش داوە لەپێناو ئازادكردنی ئەم وڵاتە، پرسیار ئەوەیە ئایا ئەمەمان كرد بۆئەوەی بگەین بە وڵاتێك كە بۆتە هاوپەیمان لەگەڵ دوژمنێكی راستەوخۆی ئەمریكا و رۆژئاوا؟ بێگومان ئەمە تراژیدیایە.

 

* كەواتە ئێمە هاوڕاین لەسەر ئەوەی مالیكی ئەگەر بەم ئاراستەیە هەنگاو هەڵبگرێت، ئەوا هەم خۆی لەبەرەی دژی ئەمریكا دەبینێتەوە و دەبێتە مەترسیش بۆسەر رەوشی ناوخۆ بە تایبەتی هەرێمی كوردستان، ئایا چۆن ئەم هەڕەشەیە بەرپەرچ دەدرێتەوە؟

 - من لەگەڵ ئەم بۆچوونەی ئێوە هاوڕام، بەڵام ئەم هەڕەشەیە چەند كاتی بەسەردا تێپەڕێت و مالیكی دەستی واڵا بێت، زیاتر دەردەكەوێت، بەڵام بۆ ئێستا هێشتا جارێ بارەكە نەگەیشتووەتە ئەو ئاستە، لەبەر ئەوەی مالیكی هەتا ئیستا نەیتوانیووە وزەی كارەبا بۆ بەغدا دابین بكات، بۆیە پێموایە ئەگەر مالیكی لەسەر ئەم رێچكەیەی ئێستای بەردەوام بێت كە ئێمە پێشبینیی دەكەین بەردەوام بێت، ئەوە دوای 5 ساڵی داهاتوودا مالیكی هەموومان دووچاری كێشە دەكاتەوە، بەڵام ئێوە وەك هەرێمی كوردستان كەرەستەتان لەبەردەست هەیە – مەبەستم لە چەك نییە و چەك وەكو كەرەستە ناژمێرم – بەڵكو مەبەستم ئەوەیە ئەمریكا زۆر پاڵپشتیتان دەكات و دۆست و هاوڕێتان زۆرە و هەموویان لەگەڵ بەرژەوەندییەكانی كوردن، لێرەیشدا دەمەوێ وەكو دۆستێكی كورد بدوێم، لەگەڵ رێزم بۆتان، من لە ئۆپۆزسیۆنەكەتان تێدەگەم، لەهەموو وڵاتێك ئاڕاستەی جیاواز هەیە كە لەگەڵ حكومەت ناهاوڕان، هەروەها هەموو وڵاتێك لایەنی ئۆپۆزسیۆنی هەیە، بەڵام باوەڕم پێبكەن كە ئەم قسەیە دەكەم، دەمەوێ وەكو دۆستێكی ئێوە بدوێم، بۆیە راشكاوانە پێتان دەڵێم ئۆپۆزسیۆن بوون مانای ئەوەنییە لەسەر ئاستی ناوخۆ ماڵی كورد دابەش بكەن، ئێوە لە ئیسرائیلییەكان فێر بن، خۆتان لەبەردەم جیهان وەك گەلێكی یەكگرتوو پیشان بدەن، راستە كێشەی گەندەڵی لە كوردستان هەیە و راستە ئێوە دەتانەوێ پێشكەون، بەڵام ئێستا كاتی ئەوە نییە كە دژی حكومەتی خۆتان بن لەكاتێكدا رۆژهەڵاتی ناوەڕاست لە تەقینەوەدایە، پێویستە پاڵپشتی لە حكومەتی ئیئتیلافی بكەن و هەروەها پێویستە لەسەر ئۆپۆزسیۆنیش نوێنەرایەتیی بیرۆكەی پۆزەتیڤ بكات كە مایەی پاراستنی یەكپارچەیی و پاراستنی هێزی كوردستان بێت لە هاوپەیمانێتییەكەی لەگەڵ ئەمریكا، ئەمە بۆچوونی راستگۆی شەخسی خۆمە لەمڕووەوە، بێگومان لە دیموكراسییەتدا ئۆپۆزسیۆن هەیە و خودی خۆم پاڵپشتی لە هەبوونی ئۆپۆزسیۆن دەكەم، بەڵام لەهەمان كاتیشدا پێمباشە ئۆپۆزسیۆن شتێكی بەواتا جێبەجێ بكات نەك رەخنە لە تاكەكان بگرێت، پێویستە ئۆپۆزسیۆن باشترین رێگە چارە پێشنیاربكات و حكومەتی ئیئتیلافی كوردیش جێبەجێی بكات، بەڕاشكاوەیی دەیڵێم هەڵەیەكی گەورەیە گەر ئێستا هەوڵبدەن حكومەتی هەرێمی كوردستان هەڵوەشێننەوە، ئەوەش ئامانجی حزبی گۆڕانە كە هەوڵدەدات حكومەتی هەرێمی كوردستان بڕووخێنێت، هاوشێوە لەگەڵ ساڵی 2006 كە بارودۆخەكە ناسك بوو، ئێستایش ساتێكی ناسكە و دەبێت ماڵی كورد یەك بێت، بۆیە پێویستە زیاتر جەخت بكەنەوە لەسەر كێشە هەرە گەورەكانتان بۆئەوەی لە 5 ساڵی داهاتوودا بتوانن خۆتان بپارێزن لە ناوچەیەكدا كە لەسەر لێواری تەقینەوەیە، پرسیار لە خۆتان بكەن، ئایا نزیك نییە سوریا لەكۆتاییدا ببێتە دەوڵەتێكی وەهابی؟ كەس نازانێ بارەكە دەگاتە كوێ و تەنانەت منیش نازانم چی لە ئاییندەدا روودەدات، لەوانەیە ئێوە لە عێراق بكەونە نێوان دەوڵەتێكی قاعیدە لە دیوی رۆژئاواتان لەگەڵ دەوڵەتێكی شیعە – دەوڵەتێكی قاعیدە ئاسا – لە دیوی رۆژهەڵات-تان، بۆیە لەوانەیە بارەكە لە ئێستا خراپتر بێت، هەربۆیە ئامۆژگاریم بۆ خەڵكی كوردستان ئەوەیە ماڵی خۆتان رێكبخەن و جەخت بكەنەوە لەسەر پاراستنی پەیوەندی و هاوپەیمانێتییەكانتان بەپتەوی بەتایبەتی لەگەڵ ئەمریكا و هەروەها لەگەڵ توركیا، بەڕای من ئەمڕۆ توركیا و ئەمریكا باشترین هاوپەیمانی ئێوەن لە ناوچەكە. لێرەیشدا دەمەوێ شتێك بڵێم: داوای لێبوردن دەكەم گەر هەندێك لە كوردەكانم برینداركردووە، بەڵام من وەكو هاووڵاتییەكی ئەمریكی دەدوێم و من كورد نیم بەڵام هاوكات باوەڕم بە كوردستانی عێراق هەیە و هەر لەسەرەتاوە پاڵپشتیم لە ئێوە كردووە و چەندین ساڵە كەیسەكەی ئێوەم لەگەڵ خەڵكی ئەمریكا تاوتۆكردووە و لەبەردەم كۆنگرێس خستوومەتەڕوو، من دۆستی ئێوەم و ئەركی دۆست ئەوەیە كە بەڕاشكاوەیی بدوێت و راستییەكان باس بكات، من لەوە بەئاگام كە هەندێك خەڵك لە كوردستان رەخنە لە سەرۆك بارزانی دەگرن، بەڵام لەسەر ئاستی سیاسەتی دەرەوە و لەڕووی پاراستنی سنوورەكانتان و لەڕووی پاراستنی ئاسایشتاندا ئەوە بەڕای من سەرۆك بارزانی كارێكی زۆر نایابی ئەنجامداوە و پێویستە هاووڵاتیان دەستخۆشیی لێبكەن، پرسی كورد لە سوریا وەكو نموونەیەك وەرگرن، دوو ساڵ بەر لە ئێستا بە چاوی خۆم بینیم لە سوریا كورد كوردی دەكوشت، لە توركیا هەتا ئێستا پەكەكە بەشێكە لە كێشەكە نەك لە چارەسەر، ئێمە لە ئەمریكا مامەڵە لەگەڵ ئەو جۆرە گرووپانە ناكەین كە لە هاووڵاتیانی خۆیان دەكوژن، ئەمەش شتێكە كە سەرۆك بارزانی لەبارەیەوە زۆر زۆر زیرەك بوو و بەئاشكرا داوای كرد كێشەكان بە ئاشتی چارەسەر بكرێن و كورد یەكگرتوو و خاوەنی یەك هەڵوێست بن، من هیوادارم كوردەكانی سوریا خۆیان لەبەر رۆشنایی پەیامی بارزانی رێكبخەن بۆ سوریای پاش ئەسەد كە لەو كاتەدا دەتوانن پشتگیریی ئەمریكا وەدەستبێنن."