ئەحمەد دزەیی سەرۆكی زانكۆی سەڵاحەدین لەم دیمانەیەی گوڵاندا بە تێروتەسەلی زۆر بابەتی تایبەتمەند بە خوێندن و پێداویستیەكانی ئەم سەردەمەی ئەو بوارەی خستۆتەڕوو لەوانە باس لە وەرگرتنی قوتابیانی زانكۆ دەكات هەروەها ئاماژەی بە دروستكردنی كەمپی زانكۆی سەڵاحەدین دا، لەگەڵ ئەو پرۆژانەی كە ئەمساڵ دەخرێنە بواری جێبەجێ كردنەوە، لە بەشێكی تری دیمانەكەدا سەرۆكی زانكۆی سەڵاحەدین باسی لە چۆنیەتی گۆڕینی ڕاگری كۆلیژەكان كرد، لە تەوەرێكی تری وتەكانیدا هەلی خوێندن لە ماستەرنامەو دكتۆرای بە شێوەی سیستمێكی نوێ خستەڕوو هاوكات ئاماژەی بە چەندین پرس و بابەتی دیكەی گرنگی پێوەندیدار بە خوێندنی باڵاو توێژینەوەی زانستی دا، ئەمەش دەقی دیمانەكەیە.

* پڕۆژەی كەمپی زانكۆی سەڵاحەددین بە كوێ گەیشت؟

- هەڵبەتە كەمپی زانكۆی سەڵاحەددین خەونی دێرینەی ئێمەو شاری هەولێریشە، خۆشبەختانە ماوەیەكی زۆرە هەوڵی بۆ دەدەین، لە ئێستادا دیزاینی تەواوبووەو هەندێ وردەكاری ماوەو پاشان دەدرێتە تەندەر، پێش كۆتایی ئەمساڵ بەدڵنیاییەوە بەردی بناغەی دادەنرێت و لە قۆناغی یەكەمدا چەندین پڕۆژە كە لە ئەولەویەتی زانكۆدایە دەست پێدەكات بەتایبەت ئەو كۆلێژانەی باڵەخانەكانیان شیاوی كۆلێژ نییەو ژینگەیەكی لەباری بۆ قوتابی و مامۆستا نییە. 

* یەكێك لە گرفتەكانی ئەمساڵ مەسەلەی وەرگرتنی قوتابیانی زانكۆیە، ئایا زانكۆی سەڵاحەددین لە توانادایە ئەو ژمارە زۆرەی دەرچووانی ئامادەیی وەربگرێت؟

- ساڵانە كێشەی وەرگرتنی قوتابیانمان هەیە، لە پلانی زانكۆدا بۆ ئەمساڵ وامان داڕشتبوو كە 4300 قوتابی لە قۆناغی بەرایی (بەكالۆریۆس) وەربگرین، بەڵام بەهۆی ئەوەی ژمارەی دەرچووانی ئامادەیی زۆر بوو، بۆیە بە رێژەی 40% لە پلانەكە زیادكرا، لە راستیدا لەو بارەیەوە قسەمان لەگەڵ ئەنجوومەنی وەزیران و ئەنجوومەنی وەزارەت كردووە كە ناتوانین ئەو رێژە زۆرە قوتابییە وەربگرین، كە دەكاتە 1000 هەزار قوتابی لەسەرووی پلانی خۆمان، بەڵام بەڵێنی ئەوەیان پێداوین ئەگەر لەكاتی وەرگرتن رووبەڕووی كێشەی شوێنی نیشتەجێبوونی قوتابیان لە بەشە ناوخۆیی و هۆڵی خوێندن ببینەوە ئەوا بۆمان چارە بكەن و بودجەیەكیش بۆ ئەم مەبەستە تەرخان بكرێت تا بەسەر كێشەكان زاڵ بین.

* ئایا ئەمساڵ كێشەی بەشە ناوخۆییەكان سەرهەڵدەداتەوە؟

- لە بەشە ناوخۆیەكان كێشە كەمەو دەتوانین بڵێن كێشەمان نییە، بەڵام وا دیارە قوتابیان ئارەزووی ئەوە دەكەن باشترین و نزیكترین بەشە ناوخۆیی لە كۆلێژەكەیان هەڵبژێرن، ئەمەش ئاسان نییە، لە زانكۆی سەڵاحەددین تا بەم شێوەیە بەشە ناوخۆیی دابین بكات، چونكە لە شاری هەولێر بەهۆی ئەوەی پایتەختی كوردستان و زۆرینەی ئۆفێسە سەرەكییە سیاسی و بازرگانی و دبلۆماسییەكانی تیا كۆبۆتەوەو بە زەحمەتی باڵەخانە بەكرێ دەگیرێت، ئەو باڵەخانانەی كە موڵكی زانكۆنە تەنیا دەتوانرێت یەك لەسەر سێی قوتابی بەشە ناوخۆیی تیا نیشتەجێ بكرێت، ئەو كێشانەش زیاتر لەوەوە سەرهەڵدات كاتێك ساڵانە باڵەخانەكان بۆ قوتابی بە كرێ دەگرین، زۆر نزیكی كۆلێژەكان نییە، چونكە لە نزیك كۆلێژەكان باڵەخانەی بۆ بەكرێگرتن كەم هەیە، بەڵام ئەگەر باس لە خزمەتگوزاری بكرێت ئەوا لە باڵەخانەكانی موڵكی زانكۆ خزمەتگوزارییەكان زۆر باشن، ئەوانی دیكەش تاڕادەیەكی باش خزمەتگوزاری بۆ دابین كراوە، هەموو قوتابییەكیش شوێنی تایبەتی خۆی بۆ دابین كراوەو كەس نییە بێ بەشە ناوخۆیی بێت.

* نەبوونی هەماهەنگی لە نێوان پسپۆڕان و شارەزایانی زانكۆ لەگەڵ حكومەت و دامودەزگاكانی وەزارەتەكان بۆچی دەگەڕێتەوە؟

- من لەگەڵ ئەو بۆچوونە نیمە، چونكە هەماهەنگی تەواو لەگەڵ وەزارەتەكانی حكومەت هەیە و زانكۆی سەڵاحەددینیش بەشێكە لە دەزگاكانی حكومەتی هەرێمی كوردستان، هەرچی پڕۆژەو بەرنامە لەسەر ئاستی پەرلەمان و حكومەت پێشكەش دەكرێت هەر هەمووی بە هاوكاری مامۆستایانی زانكۆیە، بەتایبەت زانكۆی سەڵاحەددین، جا لە دانانی رەشنووسی پڕۆە یاساكان بێت یا پڕۆژە جێبەجێكراوەكانی حكومەت بێت، یا پڕۆگرامی كۆنگرەو كۆنفرانس و وۆركشۆپ و خولە راهێنانكارییەكانی وەزارەتەكان بێت، ئینجا یا مامۆستای زانكۆی سەڵاحەددین دەچێتە وەزارتەكان و وانە دەڵێتەوەو لە خولەكاندا یا بەشدارە لە دانیشتنەكانیان، یا لە پسپۆڕی تایبەتی خۆیان راوێژی پێدەكرێت، بێگومان لەزۆرینەی دەزگاكانی حكومەت بە ئەهلییەكانیشەوە بەبێ راوێژی پسپۆڕانی زانكۆكان بەرنامە داناڕێژن ئینجا چەندی دەخرێتە بواری پراكتیك ئەوە شتێكی دیكەیە، بۆ نموونە لە چەند رۆژی رابردوو سەنتەری توێژینەوەی ستراتیژی كوردستان كە هەموویان مامۆستای زانكۆن، ئەجێندایەكی زۆر گرنگیان پێشكەش بە حكومەتی هەرێمی كوردستان كرد، كە ئیشكردنی چەند ساڵ بوو، جگە لەوەی مامۆستایانی زانكۆی سەڵاحەددین بەشدارن لە كۆمەڵگەی مەدەنی، رەنگە تاڕادەیەك لەگەڵ كەرتی تایبەت وەك پێویست نەبێت، بەڵام لەگەڵ دەزگاكانی حكومەت پێوەندییەكی بەتین و هەماهەنگییەكی باش هەیە.

* ئایا پێتوانییە كاتێك قوتابی دەردەچێت لە توانای دانییە لە بازاڕی كاردا ئیش بۆ خۆی بدۆزێتەوە ئەمە بۆ ئەوە ناگەڕێتەوە پسپۆڕان و شارەزایانی زانكۆ بەپێی پێداویستی بازاڕ نین؟

- ئێمە لەگەڵ ئەوەداین ئاستی خوێندن بەرزبكەینەوەو پڕۆگرامەكانی خوێندن بگۆڕین بەرەو ئەو ئاستە بڕوات تا لەگەڵ دنیای سەردەم بگونجێت، بە هیوای ئەوەین بە بوونی بەرنامەی تواناسازی و گەڕانەوەی قوتابیانی خوێندنی باڵا لە دەرەوە بتوانین ئاستی زانستی بەرزبكەینەوە لە رێگەی مامۆستای چاك و ئاست بەرز، یا گۆڕین و پەرەپێدانی پڕۆگرامەكانی زانكۆ، ئەو كاتە دەتوانین هەلی كار بەئاسانی بەدەست بهێنن، چونكە ئاستی زانستیی و پراكتیكیان بەرزتر دەبێتەوە لەبارەی پێداویستی بازاڕی كاردا، وەك ئەوەی جەنابی سەرۆكی حكومەتی هەرێمی كوردستان لە دوا كۆبوونەوەی ئەنجوومەنی وەزیران لەم چەند رۆژەی رابردوودا جەختی لەسەر كردەوە، تا ئێمە لە زانكۆكاندا گرنگی بەوە بدەین بازاڕی كار چی پێویستە بەو شێوەیە دەرچووان پێبگەیەنین، كارمان لەسەر كردووەو پلانی ساڵانەشمانەو لە ئایندەدا لەسەر ئەو ئاڕاستەیە دەڕۆین كە بازاڕی كار چ جۆرە پسپۆڕیەكی پێویستە لەو پسپۆڕیانەوە قوتابی لەسەر ئاستی كەرتی گشتی(حكومەت) و كەرتی تایبەت وەربگرین.

* گرنگی پلان و بەرنامەتان بۆ كردنەوەی بەشی نوێ چییە؟

- ساڵی پار بەشی زمانی ئەڵمانی لە كۆلێژی زمان كرایەوە، ئەمساڵ دوو بەشی زانستی لە شارۆچكەی مەخموور كراوەتەوەو قوتابی لە قۆناغی یەكەمەوە وەردەگرین و بودجەش بۆ ئەو كەلوپەلانەی پێویستن بۆ ئەو بەشانەو مامۆستا تەرخانكراوەو باڵەخانەشیان بۆ دابینكراوە، لە شارۆچكەی شەقڵاوەش چوار بەشی زانستی كراوەتەوەو لە قۆناغی یەكەم قوتابی وەردەگرین، ئامادەكاری دابینكردنی مامۆستاو باڵەخانەشیان بۆ كراوەو نوێكردنەوەی باڵەخانەكە كراوە، بەڵام بۆ زیادكردنی چەند هۆڵێكی دیكە ئێستا دەرخستەكەی ئامادەكراوە تا دەست بە دروستكردنی بكرێت بۆ خوێندنی ئەمساڵ.

* ئایا ئەو مەرج و رێنماییانە چین كە مامۆستایان و دەرچووانی پەیمانگەی مامۆستایان دەتوانن لە كۆلێژی مامۆستایان بخوێنن؟

- ئەوە كۆلێژی مامۆستایان نییە، لە راستیدا بۆ خۆی كۆلێژەی پەروەردەی بنەڕەتییە، لەو كۆلێژەدا پێنج بەشی خوێندنی ئێواران دەكەینەوە، تەنیا بۆ مامۆستایانی سەر بەوەزارەتی پەروەردەیە و هەموو مامۆستایەك وەردەگیرێت جا دەرچووی پەیمانگەی مامۆستایان بێت لە دوو ساڵی یا سێ ساڵی بێت، یا دەرچووی پیشەیی یا ئاماەیی بێت، مەرجی ئێمە ئێستا دانانی رێژەیەكە بەمجۆرە 50% بۆ دەرچووانی ئامادەیی، 25% بۆ دەرچووانی پەیمانگەی مەڵبەندی مامۆستایان، 25% بۆ دەرچووانی پیشەیی، ئەمانە پێشبڕكێ لە نێوان خۆیان دەكەن و بە شەفافی ئەنجامەكان رادەگەیەنرێت، لە قۆناغی یەكەم ئەمساڵ دەوام دەكەن لە خوێندنی ئێواران لە بەشەكانی (زانستی كۆمەڵایەتی، زانستی گشتی، ماتماتیك، زمانی ئینگلیزی و زمانی كوردی)جگە لەوە هیچ مەرجی دیكە بۆ وەرگرتن نییە.

* زۆرجار گلەیی لە نەبوونی تاقیگەو خولەكانی راهێنان و مەشق دەكرێت، ئایا بۆچی ئامێری پێویست لە تاقیگەكان نییە؟
 

- ئەو گرفتە پێوەندی بە تەرخانكردنی بودجە هەیە، ساڵانە بودجەمان كەمدەكرێتەوە، ساڵی رابردوو ئامێری باش و تازەمان بۆ تاقیگەكانی كۆلێژی ئەندازیاری و زانست كڕیوە، بەنیاز بووین بۆ بەشێكی دیكەی كۆلێژەكانی (زانست و ئەندازیاری و كشتوكاڵ و پەروەردەی بەشە زانستییەكان) دابین بكەین، چونكە ئەو كۆلێژانە زیاتر پێویستیان بە ئامێری تاقیگە هەیە، بەڵام بەداخەوە ئەمساڵ بودجەی زانكۆ كەم كرایەوە بە رێژەی 50%، بۆیە نەمانتوانیوە ئامێری زیاتر دابین بكەین، رەنگە زانكۆكانی دیكە لە زانكۆی سەڵاحەددین باشتربن، چونكە پارەی پترۆ دۆلاریان وەرگرت، كە هی كۆمپانیاكانی نەوت بوو، بۆیە ئێستا خەریكی كڕینی ئامێری باشن، بەڵام زانكۆی سەڵاحەددین مەرج بۆ خەرجكردنی پارەی پترۆدۆلاری لەسەر داندرا، كە تەنیا دەبێت لە پڕۆژەی كەمپی زانكۆ بەكاری بهێنێت، نەك كڕین و دابینكردنی ئامێرەكان، لە پڕۆژەی ئایندەشدا كڕینی ئامێرەكانمان داوا كردووەو ئەمەش لە ئەولەویەتی كارو بەرنامەكانی زانكۆدایە. 
 

* تا چ رادەیەك پێوەندیتان لەگەڵ رێكخراوە پێوەندارەكانی قوتابیان هەیە؟

- پەیوەندییەكی بەهێزمان هەیە، لەگەڵ سكرتاریەتی قوتابیان و نوێنەرایەتی قوتابیانی زانكۆ، بەهۆی ئەوەی نوێنەرایەتی زانكۆ لە دەست ئەوانەو راستەوخۆ پێوەندیدارن بە قوتابیان، لەیەكگەیشتن لە نێوانماندا هەیەو نوێنەرەكان لە كۆلێژو بەشەكان كاری خۆیان دەكەن و بوونەتە نێوانگری مامۆستاو سەرۆكایەتی بەشەكان و راگرایەتییەكان لەگەڵ قوتابیاندا، رەنگە جاری وا هەبێت هەندێ داواكاری قوتابیش هەبێت لەگەڵ یاساو رێنمایەكانی زانكۆ نەگونجێن، بۆیە ناتوانین جێبەجێی بكەین، بەڵام هەر داواكاریەكی رەواو یاسایی هەبێت لە چوارچێوەی زانكۆ بۆمان جێبەجێكردن.

* زۆرجار پشت بە مامۆستای عەرەب دەبەسترێت ئایا ئەمە گرفت بۆ قوتابی دروست ناكات؟

- ئێمە دوو جۆر مامۆستای بە ڕەگەز عەرەبمان هەیە كە لە زانكۆ وانە دەڵێنەوە، هەندێكیان لە بەشە زانستییەكانی كۆلێژە زانستییە پەتییەكان وانە دەڵێنەوە كە زمانی خوێندن بە رێژەی 80% ئینگلیزیەو هیچ گرفتمان نییە، بەڵام هەندێ جار كێشە لە كۆلێژە بەشە مرۆڤایەتییەكان دروست دەبێت كە زمانی خوێندن 80% كوردی و عەرەبییەو 20% ئینگلیزیە، بەڵام بەگشتی كێشەمان نەبووە، هەرچەندە لە زانكۆ كێشەی زمان كێشەیەكی سەرەكییە، بۆیە بە بوونی مامۆستایانی بە ڕەگەز عەرەب لە هەندێ پسپۆڕایەتی كێشە دروست دەبێت، بەڵام هەوڵمان داوە مامۆستایەكی كورد هاوكاری بكات تا رووبەڕووی ئەو كێشەیە نەبینەوە، ئەوەش زۆر كەم روویداوە.

* بۆچی زۆربەی نامەی ماستەرە تێزەكان بە زمانی عەرەبییە؟

- نەخێر، زۆربەی نامەو تێزەكانی خوێندنی باڵا لە بەشە زانستییەكان بەزمانی ئینگلیزییەو بەشە مرۆڤایەتیەكانیش بە زمانی عەرەبییە، بەهۆی ئەوەی سەرچاوەكان بە زمانی ئینگلیزی و عەرەبییەو تۆژینەوەكانی پێشوو بە زمانی عەرەبی بووە، بەڵام نامەو تێزی زۆریش بە زمانی كوردی نووسراوە، لەگەڵ ئەوەی سەرچاوەی زمانی كوردیشمان كەمە.

* بڕیارە ڕاگری كۆلێژەكان گۆڕانكاری بەسەر دابێت ئەمە چۆنە؟

- پرۆسەكە لە زانكۆ و وەزارەتی خوێندنی باڵاو توێژینەوەی زانستی كۆتایی پێهاتووەو بەرزكراوەتەوە بۆ ئەنجوومەنی وەزیران، چاوەڕێ دەكەین فەرمانی پێ دەربچێت، هەروەها بە پڕۆسەیەكی شەفاف ئەنجامدراوەو سی ڤی وەرگیراوەو چاوپێكەوتن لە رێگەی لێژنەیەك لە وەزارتەوە كراوە كە لە سێ سەرۆك زانكۆ پێكهاتبوو لەگەڵ كاندیدەكان بۆ راگری هەریەك لەو كۆلێژنەی ماوەی یاسایی راگرایەتیان تەواو كردووەو كۆنووسەكە بەرزكراوەتەوە بۆ ئەنجوومەنی وەزیران، چاوەڕێی فەرمانی ئەنجومەنی وەزیرانین تا راگرە بەڕێزە نوێیەكان لە ساڵی نوێوە دەست بەكاربن.

* خوێندنی ئێواران لەمساڵەوە بەبێ پارەیە، ئێوە لەم ڕووەوە چیتان كردووە؟

- سەبارەت بە خوێندنی ئێواران لە زانكۆی سەڵاحەددین تەنیا قۆناغی سێیەم و چوارەم ماون داوامان لە ئەنجوومەنی وەزیرانی هەرێمی كوردستان و وەزارەتی خوێندنی باڵا كردووە تا بودجەی پێویست بۆ بەڕێوەبردنی خوێندنی ئێواران تەرخان بكەن، چونكە حكومەتی هەرێمی كوردستان قوتابیانی خوێندنی ئێوارانی لە كرێی خوێندن بەخشیوە، لە ئێستاشدا لیستێك ئامادە دەكەین و بەرزی دەكەینەوە بۆ وەزارەتی خوێندنی باڵا تا حكومەتی هەرێمی كوردستان لە بری قوتابی كرێی خوێندنەكە بدات. 

* زانكۆی ئەهلی (كەرتی تایبەت) لە زیادبوونە لەسەر چ رێنمایەك ئەم فرەوان بوونە دەكرێت ئایا جەنابتان چۆن سەیری دەكەن؟

- زانكۆ ئەهلییەكان لە وەزارەتی خوێندنی باڵا بەڕێوەبەرایەتیەكی گشتی هەیەو سەرپەرشتیان دەكات و رێنمایی و یاسای خۆیان هەیە، بەرێوەبەرایەتی دڵنیایی جۆریش لە وەزارەت بۆ سەرپەرشتی زانكۆ ئەهلییەكان هەیە، ئێمە وەك زانكۆش پێمانخۆشە كەرتی تایبەت بەشداربێت لە وەبەرهێنانی مرۆیی و هێنانی هەندێ پسپۆڕی دەگمەن كە لە هەرێمی كوردستان نییە، تا ئێمەش سوودیان لێوەربگرین، ئەمە جگە لەوەی لۆدی سەر زانكۆ حكومییەكان كەمبكەنەوە لە وەرگرتنی ژمارەی زیاتری قوتابی لەسەر بنەماو مەرجی زانكۆ حكومیەكان، بەڵام ئەوەشمان پێخۆشە بەداواداچوونەوەو چاودێریی ئاستی زانستییان بكرێت، ئەمەش نەك زانكۆ ئەهلییەكان، بەڵكو زانكۆ حكومیەكانیش چاودێری بكرێن، تا بتوانرێت كاروبارەكانی زانكۆكان لەسەر رێڕەوێكی زانستی بەرز بەڕێوەبچێت و كێبڕكێی زانستیش لە نێوان زانكۆكان بێتەكایەوە. 

* بۆچی هەوڵنادرێت هەلی خوێندن بۆ دەرچووان بەتایبەت لە ماستەرو دكتۆرا فراوانتر ناكەنەوە تەنانەت بۆچی تەمەن دەكرێتە پێوەر ئایا ئەمە لە هیچ زانكۆیەكی پێشكەوتوو هەیە؟

- ئێستا بۆ تەواوكردنی خوێندنی ماستەر بەرفراوانیەكی زۆر هەیەو دەرفەتی باش دراوە بەو كەسانەی ئارەزووی خوێندن دەكەن، بەڵام بۆ خوێندنی دكتۆرا پێمان باش بووە بە سیستەمی تازە بخوێنرێت، بۆ نموونە بۆ ماستەر دەتوانرێت لە زانكۆ ناوخۆییەكان یا لە بەرنامەی تواناسازی داواكاری پێشكەش بكات، سەبارەت بە پێوەرەوە ئێستا تەمەن كراوتە 45 ساڵ، چونكە پێشوو 35 ساڵ بوو، بۆ دكتۆراش تەمەن هەڵگیراوە بەتایبەتی لە سیستەمی تازەدا.

* تازەترین رێنماییەكانی كە لەوەزارەتی خوێندنی باڵا دەرچووە چییە، تا چ رادەیەك لە دەركردنی بڕیارو یاساو رێنماییەكاندا راوێژتان پێ دەكرێت؟

- هەموو سەرۆك زانكۆكانی كوردستان بەشدارن لە كۆبوونەوەی ئەنجوومەنی وەزارەتی خوێندنی باڵاو ئاگاداری گشت بڕیارو رێنماییەكانین كە ئێستا لە وەزارەت دەردەچێت، چونكە هەموو بابەتەكان لە ئەنجومەنی وەزارەت تاوتووێ دەكرێت و ئێمە وەك سەرۆك زانكۆكان لە كۆبوونەوەی ئەنجومەنی وەزارەت لە دەركردنی بڕیارو رێنماییەكان راوێژمان پێ دەكرێت و پاشان لەلایەن بەڕێز جەنابی وەزیرەوە رادەگەیەنرێت، تەنانەت هەموو بڕیارەكان بە كۆنووسی لێژنەكانەوە بۆمان دێت كە نوێنەرایەتی زانكۆكان لەو لێژنانە هەیە، هەروەها لە لێژنەكاندا بەشێك لە یاریدەدەری سەرۆك زانكۆكان یا بەڕێوەبەری تایبەتمەند تێیدا بەشدارن. 

* زانكۆ تاچەند توانیویەتی لە گەشەكردنی ژێرخاندا بە گشتی بەشداری بكات؟

- بێگومان ئەو پڕۆژە گرنگانەی لە چەند ساڵی رابردوودا ئەنجامدراون یا تا ئێستا بەردەوام و پلانیشی بۆ دادەنرێت لەسەر دەستی دەرچووانی زانكۆكانە لە هەموو پسپۆرییەكانەوە بەتایبەت زانكۆی سەڵاحەددین كە زیاتر لە 100 هەزار دەرچووی هەیە و پێشكەشی بازاڕی كاری كردووە، بەكەرتی تایبەتیشەوە، بەهەمان شێوە مامۆستایانی زانكۆ لە گەشەكردنی ژێرخاندا رۆڵی كارایان بینیوە، لە كۆلێژی ئەندازیاری سەنتەری راوێژكاریمان هەیە كە بەشێكی زۆری پڕۆژە گرنگەكانی پارێزگای هەولێر لەسەر دەستی پسپۆڕانی ئەندازیاری ئەو سەنتەرە دەكرێت، بۆ نموونە دیزاینی پڕۆژەی دروستكردنی پردی ئاقوبان - شیوەسوور و سەدان دیزاینی دیكە كە لەلایەن وەزارەتەكانی حكومەتی هەرێمەوە یا كەرتی تایبەت داواكاربێت ئەنجامدراوە، ئەمە جگە لە پشكنینی كەرەستەی جۆراوجۆردا، هەروەها سەنتەری راوێژكاری كشتوكاڵی لە كۆلێژی كشتوكاڵ، راوێژێكی زۆری پێشكەش بە جوتیاران كردووە لە گەشەپێدانی كەرتی كشتوكاڵ بەهەردوو جۆری رووەكی و ئاژەڵییەوە.

 

"