مایكل نایت تۆژەری باڵایە لە ئامۆژگای واشنتۆن بۆ دیراساتی سیاسەتی رۆژهەڵاتی نزیك و تایبەتمەندە لەسەر كاروباری سەربازی و ئاسایشی عێراق و ئێران و یەمەن و دەوڵەتانی عەرەبی لە كەنداو.پرۆفیسۆر نایت وەك راوێژكاری پێنتاگۆن زۆر بەچڕی سەردانی عێراق و دەوڵەتانی كەنداوی كردووە و لەساڵی 1990ـەوە یەكێك بووە لەئەندامانی ئەو تیمەی زانیاری لەسەر عێراق كۆكردۆتەوە، هەروەها دیراسەتی لەسەر ئەو وانانە كردووە كە ئەمریكا لەهەردوو پرۆسەی سەربازی دژی عێراق لە ساڵانی 1990ـەوە تائێستا ئەنجامیداون، ئێستا پرۆفیسۆر نایت لە ئامۆژگای واشنتۆن بۆ دیراساتی سیاسەتی رۆژهەڵاتی نزیك یەكێكە لە تۆژە دیارەكانی دۆسێی عێراق، سەبارەت بەرەوشی ئێستای عێراق و كشانەوەی هێزەكانی ئەمریكا، پێوەندیمان بەپرۆفیسۆر نایت كرد و لەسەر ئەو پرسانە چەند پرسیارێكمان ئاراستەكرد و بەڕێزی بەمجۆرە وەڵامی گوڵانی دایەوە.

* كێشەی سەرەكی وڵاتە عەرەبی و ئیسلامیەكان بریتییە لە بوونی دیكتاتۆر و دەسەڵاتە سەركوتكارەكان، ئەم دەسەڵاتانە مافەكانی مرۆڤ و مافی كەمینەكان و گروپە ئیتنییەكانی دیكەیان وڵاتەكەیان پێشێلكردووە، پرسیارەكە ئەوەیە بۆچی هێشتا ئەم دیكتاتۆرانە لەدەسەڵاتدان؟
- من نامەوێت باسی عێراقی ئەمڕۆ بكەم، ئەگەر بەخێرایی باسی ئەم ئەم مەسەلەیە بكەین، ئەوا ئەوەی لە لیبیا، سوریا و ئێراندا دەبینین، ئەو ڕاستیەیە كە ڕزگاربوون لە ڕژێمە سەركوتكارەكان زۆر دژوار نییە وەك ئەوەی دەردەكەوێت، وەك لە میسریش بینیمان، بەڵام لە شوێنەكانی دیكەدا بۆ ماوەیەكی درێژتر خۆیان ڕاگرتووە. هەندێ لەم ڕژێمانە، كە رژێمی سەددام حوسینیش هاوشێوەی ئەم ڕژێمانە بوو، ڕزگاربوون لێیان زۆر زەحمەتە، بۆ نموونە ئێمە لە ڕاپەڕینی 1991 لە عێراق بینیمان ئەم ڕژێمانە بەرگریەكی زۆریان هەیە، هێزێكی زۆریان لەسەر شەقام بەكارهێنا، واتە هێزی سەربازی ئەم ڕژێمانە هێزێكی گەورە و بەرچاو بوو.

* بەڵام بە پێچەوانەی وڵاتە عەرەبی و ئیسلامیەكانەوە چاوەڕوان دەكرا دوای ڕووخانی ڕژێمی سەددام حوسێن، عێراق بەرەو دیموكراسی هەنگاو هەڵبگرێت، بەڵام هەروەك سەرنج دەدەین حكومەتی عێراق خەریكە دەگەڕێتەوە بۆ تۆتالیتاریەت و بنەما بنەڕەتیەكانی دیموكراسی پێشێل دەكات و جێبەجێیان ناكات، پرسیارەكە ئەوەیە ئەگەر حكومەتی عێراق لە پەرەپێدانی دیموكراسی پاشگەزبووبێتەوە، ئایا چ ئاییندەیەك چاوەڕوانی عێراق دەكات؟
- عێراق توانایەكی زۆری هەیە، ئەگەرێكی زۆری سەركەوتنی لەبەردەمدایە، نەوت و گازەكەشی گرنگن، بەڵام گرنگترین شت لەبارەی عێراقەوە، ئەوەیە دەكرێت ئەم وڵاتە ببێتە یەكەم وڵاتی فرەكەلتور و فرەئیتنی و دەوڵەتێكی فیدراڵی و دیموكراسی لە ڕۆژهەڵاتی ناوەڕاستدا، دەكرێت ئەمە دەستكەوتی ڕاستەقینە بێت، لەبەر ئەوە گرنگە هەنگاو بە هەنگاو و لێبڕاوانە بەردەوام بین لە جێبەجێكردنی بەرنامەیەكی دیموكراتیانە لە عێراقدا، نابێت هەرگیز ڕۆژئاوا كۆڵبدات لە پرۆسەی بە دیموكراتیكردن لە عێراقدا، پێموایە عێراقێكی دیموكراتی لە هەر وڵاتێكی دیكە گرنگترە، من بە ڕاستی باوەڕم بەوە هەیە، چونكە ئەگەر عێراقێكی دیموكراتت هەبێت، بە ئومێدی ئەوەی ڕۆژێك بێت ئێرانێكی دیموكراتمان هەبێت، ئەوا ئەگەری ئەوە هەیە لە مەودای دووردا ناوچەكە سەقامگیر بێت. ئەوەی ئێستا لە عێراقدا دەیبینین ئەوەیە حكومەت بە ڕاستی لە قۆناغی سەرەتایی بەرەپێشچووندایە، كە ڕەنگە پێویستی بە چەند خولێكی دیكەی هەڵبژاردن هەبێت و نەوەگەلێكی دیكە و سەركردەگەلێكی نوێ بێنەپێشەوە، پێش ئەوەی دیموكراسیەكی تەندروست لە عێراقدا گەشە بكات. من دڵتەنگم لەبارەی ئەوەوە، بەڵام شتێكی باش دەبوو ئەگەر هەڵبژاردنی ساڵی 2010 سەریبكێشایە بۆ پێكهێنانی حكومەتێكی ناسیۆنالیستی كە بەرنامەیەكی ڕاستەقینەی هەبێت، بەڵام بە داخەوە ئێمە هێشتا لە قۆناغی سەرەتاییداین، پارتە سیاسییەكان هێشتا كامڵ و پێگەیشتوو نین، سیستمە سیاسییەكە، دادگای فیدراڵی و چوارچێوەی یاسایی پارتە سیاسییەكان هێشتا ناكامڵن بۆ ئەوەی خاوەنی دیموكراسیەكی تەندروست بن لە عێراقدا. لەلایەكی دیكەوە بە دڵنیاییەوە دۆخەكە باشترە بە بەراورد بە سەردەمی سەددام حوسێن، ئەویش لە ڕووی حكومڕانیكردنەوە، چونكە بەلای كەمەوە ئەگەری ئەوە هەیە لە ئاییندەدا دیموكراسی لە عێراقدا بێتەدی، لە كاتێكدا لە سایەی سەددام حوسێندا ئەم ئەگەرە بە هیچ شێوەیەك لە ئارادانەبوو، هەروەها ئەوە شتێكی حەتمی بوو كە دوای دیكتاتۆریەت ڕۆژگارێك لە دیموكراسیەتی لاواز بێتەئاراوە، كە هەمیشە هەڕەشەی دروستبوونی دیكتاتۆریەتی نوێ لە ئارادایە، بەڵام پێموایە بەلای كەمەوە سیستمی سیاسی عێراق و دەستووری وڵاتەكە كە لە ساڵی 2005دا تەبەنی كرا بووە هۆی ئەوەی دیموكراسی بە زیندوویی بمێنێتەوە، تا ئەو كاتەی سیستمە سیاسییەكە كامڵ دەبێت.

* هەمو شارەزایانی بارودۆخی عێراق ئاماژە بە گرنگی هەمواركردن و دووبارە داڕشتنەوەی دەستووری عێراق دەكەن و بەراوردی عێراق بە وڵاتە عەرەبی و ئیسلامیەكانی دیكە دەكەن، ئێمە دەبینین عێراق خاوەنی دەستووری خۆیەتی، كە دەستوورێكی باشە و دوای ڕووخانی ڕژێمی سەدام نووسرایەوە، بەڵام حكومەتی عێراقی پێشێلی دەكات، ئەمەش مایەی ڕەشبینیە، پرسیارەكە ئەوەیە ئایا سوودی دەستوورێكی نوێ، بەڵام ناكارا چیە؟
- پێموایە هەر دەستوورێك كە دادەڕێژرێت بێ كەموكوڕی نییە، چونكە ئەگەر لە دەستووری ئەمریكا بڕوانین، ئەوا چەندین جار هەمواركراوەتەوە، ئەگەر ئێمە سەیری یەكەم دەستووری ویلایەتە یەكگرتووەكانی ئەمریكا بكەین، ئەوا كۆیلەیەتی هەبوو، كە ئەمە شتێكە لە ڕۆژگاری ئێستا قابیلی ئەوەنییە بیری لێبكرێتەوە. كەواتە ئەگەر بە ستانداردی ئێستا یەكەم دەستووری ئەمریكا هەڵبسەنگێنیت، ئەوا دەستوورێكی زۆر زۆر خراپ دەردەچێت، لەبەر ئەوە ناچار بوون چەندین جار هەمواری بكەنەوە. پێموایە لە عێراقدا ئەم پرۆسەیە خێراتر دەبێت، بەڵام هێشتا كارێكی زۆر ماوە كەلەسەر دەستوور بكرێت، كە ڕەنگە ئەمە هەمواركردنی دەستوور نەگرێتەوە، بەڵكو داڕشتنی ئەو یاسایانە بگرێتەوە كە دەبنەهۆی جێبەجێكردنی دەستوور، كێشە ڕاستەقینەكە لێرەدایە، دەستوور ئەوەندە ناڕۆشنە، بە چەشنێك كێشەكە لە جێبەجێكردنی دەستووردایە. لە بنەڕەتدا دەستوورەكە بێ گرفت دیارە، بەڵام ئەو یاسایانە دەرنەكراون كە پێویستن بۆ ئەوەی بە ڕاستی دەستوور مانای خۆی هەبێت. كە ئەمە شتێكە دەبێت بە ڕەوتێكی لەسەرخۆ و بەلای كەمەوە لە ماوەی دەیەی داهاتوودا ئەنجام بدرێت. ئەمەش تەنیا ئەو كاتە ئەنجام دەدرێت كە پارتە سیاسییەكان كامڵ مۆدێرن و خاڵی بن لە گەندەڵی، ئەمەش پێویستی بە كاتە.

* هەندێ لە شارەزایانی سیاسی بارودۆخی عێراق باس لەوە دەكەن ئەگەر حكومەتی عێراقی نەتوانێت كێشەی سوننە و شیعە و كێشەی هەڵپەسێردراوەكانی لەگەڵ هەرێمی كوردستاندا چارەسەر بكات، ئەوا عێراق بە یەكگرتوویی نامێنێتەوە، بەڵام ئەوەی بەدی دەكەین ئەوەیە حكومەتی عێراقی نەیتوانیوە ئەم كێشە و ناكۆكیانە چارەسەربكات، ئایا ئەمە تا چەند هەڕەشەیە بۆ سەر یەكێتی وڵاتەكە و ئایا تا چەند ئەگەری دابەشبوون و پارچە پارچەبوونی وڵاتەكە لە ئارادایە؟
- پێموایە هەڕەشەن بۆ سەر سەلامەتی و ئاسایشی ئەو خەڵكانەی لەناوچە ناكۆكی لەسەرەكاندا دەژین، هەڕەشەن لەسەر ئەوەی پەرلەمانی عێراق سەركەوتووانە ئەركەكانی خۆی جێبەجێ نەكات، هەروەها دەبنەهۆی ئاڵۆزكردنی بەرەوپێشچوونی ئابووری، وەبەرهێنان و پێوەندی لەگەڵ دەوڵەتە دەرەكیەكاندا، بەڵام پێموانییە كێشەی نێوان حكومەتی عێراق و حكومەتی هەرێمی كوردستان هەڕەشەبێت لەسەر سەقامگیری عێراق یان ئاییندەی یەكپارچەیی عێراق، من باوەڕم وانییە، من كاتێكی زۆرم لە هەرێمی كوردستاندا بەسەر بردووە-بە دڵنیاییەوە هێندەی ئێوە نا-من كاتێكی زۆرم لەو هەرێمەدا بەسەربردووە و قسەم لەگەڵ زۆرێك لەسەركردە سەرەكیەكاندا كردووە، ئەو شتەی هێشتا باوەڕم پێیەتی ئەوەیە كورد ئاییندەی خۆیان وەك بەشێك لە عێراق دەبینن. ڕەنگە پێوەندی لەگەڵ توركیادا بە تەواوەتی بەرەو باشتر گۆڕابێت، ئەمە مەسەلەیەكی جیاوازە، هەروەك لە ڕووداوەكانی ئەم دواییەدا بینیمان، ئەوا هیچ زەمانەتێك نییە دەوڵەتە دراوسێكانی هەرێمی كوردستان دۆستانە بمێننەوە لەگەڵ ئەم هەرێمەدا، تەنانەت توركیاش كە سیاسەتێكی نوێی هەیە ئەگەری بە هەڵەتێگەیشتن پچڕانی پێوەندیەكان و دووبارە گەڕانەوەی مێژووی خراپ هەیە. ئەوەی پەیوەست بێت بە دەوڵەتە دراوسێكانەوە، ئەوا نەوت هەموو شتێك دیاری دەكات. هەرێمی كوردستان نەوتێكی زۆری هەیە، بەڵام قازانج دەكەن ئەگەر وەك بەشێك لە عێراق بمێننەوە، كاتێك عێراق لە ڕۆژێكدا 6 ملیۆن بەرمیل یان زیاتر بەرهەم دەهێنێت، ئەوا بەدەستهێنانی لە سەدا 17ی ئەو نەوتە بۆ هەرێمی كوردستان دادەنرێت باشترە لە بەدەستهێنانی تەنیا ئەو نەوتەی لە كوردستاندا هەیە، كە دەتوانرێت داهاتێكی زۆر لە نەوتی كوردستانەوە بەدەست بهێنرێت. كەواتە ڕاستیە بنەڕەتیە ئابووریەكە ئاماژە بەوە دەكات هەرێمی كوردستان وەك بەشێك لە عێراق دەمێنێتەوە و ناوچە ناكۆكی لەسەرەكانیش بەردەوام وەك سەرچاوەی گرژی و گرفت دەمێننەوە، بەڵام نابنەهۆی ئەوەی هەڕەشە لە سەقامگیری وڵاتەكە بكەن.

* بەشێك لە كێشەكە برتییە لە كێشەی دابەشكردنی داهاتی سەرچاوە سروشتیەكان لەنێو پێكهاتەكانی عێراقدا، دەستووری عێراق ڕیگەی دابەشكردنی ئەم داهاتەی داناوە، بەڵام حكومەتی عێراق ڕەشنووسی یاسای نەوت و گازی ئامادەكردووە كە لەگەڵ دەستووردا یەكناگرێتەوە، پرسیارەكە ئەوەیە ئایا ئەمە تا چەند مەسەلەیەكی مەترسیدارە بۆ سەر یەكێتی عێراق و بۆ شێوازی دابەشكردنی داهاتی نەوت؟ و تا چەند گومان دەخاتەسەر سەروەریی عێراق وەك دەوڵەتێكی فیدراڵی؟
- پێموایە دەبێت كێشەكەلێگی زۆر چارەسەربكرێن لە پێوەندیدا بە ماددەی 111 و 110 و 112 كە پەیوەستە بە دابەشكردن و بە دەسەڵاتە حەسریەكانی حكومەتی فیدراڵی و دەسەڵاتی هەرێم و پارێزگاكانەوە، كە چەندەها پرسیار هەن لەبارەی ئەو پرسەوە، بەڵام ئەمانە پرسیارگەلێكن كە دەبێت زۆرێك لە نەتەوە مەزنەكان دەست و پەنجەی لەگەڵدا نەرم بكەن، ئەمانە كێشەگەلێكن كە ڕۆژهەڵاتی ناوەڕاست ئاشنانین پێی، لەبەر ئەوەی زۆرێك لە دەوڵەتەكانی ئەم ناوچەیە دەوڵەتگەلێك بوون ئاستێكی بەرزی مەركەزیەتیان تێدابووە، لە ڕاستیدا چەند نموونەیەكی كەمی دەوڵەتی فیدراڵی دیموكراتی لە ڕۆژهەڵاتی ناوەڕاستدا هەن كە تێیاندا دەسەڵات و سەربەخۆییەكی دارایی بەرچاو دراوە بە هەرێم و پارێزگا و یەكە ئیداریەكان لە وڵاتەكەدا، كەواتە ئەمە ئەزموونێكە و مێژووی نێوان كورد و عەرەب لە عێراقدا ئاڵۆزیكردووە، هەروەها لە نێوان كورد و تێكڕای دەوڵەتە دراوسێكان، كەواتە ئەمە كێشەیەكی ئاڵۆزە، تەنانەت ئەگەر مەسەلەیەكی دیاریكراو پەیوەست نەبێت بە كوردەوە، بەڵام ئەو كێشە تایبەتیەی پەیوەستە بە كوردەوە تەنانەت ڕەنگە ئاڵۆزتر بێت و ڕەنگە دەیەها ساڵی پێبچێت بۆ ئەوەی چارەسەربكرێت. هەموو كەسێك كە سەیری یاسای نەوت و گاز دەكات دەڵێن دەبێت ئەم كێشەیە لەمڕۆدا، لە مانگی داهاتوودا و لە ساڵی داهاتوودا چارەسەربكرێن، ئەگەر واقیعی بین ئەمە ڕوونادات. ئێمە لە ساڵی 2003ـەوە چاوەڕێ دەكەین یاسای نەوت و غاز تێپەڕێنرێت، بەڵام ئەوە ساڵی 2011یە و پێناچێت ئێمە نزیك بینەوە لە تێپەڕاندنی ئەو یاسایە، كەبۆی هەیە لە پێنج ساڵی دیكەش هەمان ئەم گفتوگۆیەی ئێستا بكەین.

* بە پێی دەستوور عێراق وڵاتێكی فیدراڵیە، بەڵام ئەوەی بەدی دەكەین ئەوەیە لە هەشت ساڵی ڕابردوودا، لە دوای ڕووخانی ڕژێمی پێشوەوە، حكومەتێكی مەركەزی بەهێز لە عێراقدا هەیە، ئایا ئەمە تا چەند مەترسی ئەوەی لێدەكرێت دووبارە عێراق بگەڕێتەوە بۆ سەردەمی دیكتاتۆریەت؟
- ئێوە پەنجەتان خستەر برینەكە، حكومەتی فیدراڵی ئێستا بەرەنگاری ئەم دابەشكردنەی دەسەڵات بەسەر هەرێم و پارێزگاكاندا دەبێتەوە، لە عێراقدا دابەشكردنی دەسەڵات لە فیدراڵیدا، ئایدیایەكی ئەمریكی بوو، هەروەها فیكرەیەكی كوردی بوو، ئێستا دەبینین حكومەتی فیدراڵی و زۆرێك لە پارتە سیاسییە عەرەبیەكان بەرەنگاری ئەمە دەبنەوە، كەواتە بە دڵنیاییەوە ئەمە بگرە و بەردەیەكی زۆری بەخۆوە دەبینێت، پێموایە كاتێك كاریگەری و دەستڕۆیشتوویی ئەمریكا لە عێراقدا كەم دەبێتەوە، هەرێمی كوردستان سەلامەت دەبێت، پێم وایە هەمیشە هەرێمی كوردستان هەرێمێكی فیدراڵی دەبێت و دەسەڵاتێكی زۆری دەبێت، هەروەها مومارەسەی سەربەخۆییەكی زۆر دەكەن لە ئەنجامدانی كارە ناوخۆییەكانی هەرێمەكە، بە چاوپۆشین لەوەی بەغدا دەیڵێت، بە چاوپۆشین لە هەر شتێكی دیكە كە دەوترێت. پێموایە كۆنتڕۆڵێكی زۆریان دەبێت و ئۆتۆنۆمیەكی زۆریان دەبێت، واتە نیمچە سەربەخۆیی هەیە، بەڵام بە دڵنیاییەوە لەبەشەكانی دیكەی عێراقدا ململانێیەك لە نێوان پارێزگاكان و حكومەتی فیدراڵیدا دروست دەبێت، كاتێك ئەمریكیەكان وڵاتەكە جێدەهێڵن، ئایا ئەمە چ دەرئەنجامێكی لێدەكەوێتەوە، مەزەندەی من ئەوەیە دەبێت سیاسییەكانی بەغدا، وەك مالیكی، دارایی و داهاتێكی زیاتر بە پارێزگاكان دەدەن، سەربەخۆییەكی زیاتریان پێدەدەن، ئەوەش كاتێك دەیانەوێت خەڵكی پارێزگاكان كەسب بكەن، كاتێك دەیانەوێت چاكەیەكی سیاسیان لەگەڵدا بكەن، كەواتە لە سەرووەختی هەڵبژاردنەكاندا بەڵێنێكی زۆر بەخەڵك دەدەن و هەندێ شت بۆ پارێزگاكان دەكەن، وەك پێدانی پترۆدۆلار بە هەندێ پارێزگا، بەڵام لەنێوان هەڵبژاردنەكاندا ئەو پارەیە وشك دەكات و حكومەتی مەركەزی هەوڵی كێشانەوەی دەسەڵاتەكان دەدات، بەڵام لەگەڵ نزیكبوونەوەی هەڵبژاردنە پەرلەمانیەكە، یاخود هەڵبژاردنی پارێزگاكان، ئەوا پارێزگاكان ئازادیەكی زیاتر، سەربەخۆییەكی زیاتر و پارەیەكی زیاتر بەدەست دەهێنن. كەواتە ئەمە بگرە و بەردەیەكی زۆر بەخۆوە دەبینێت، وەك شەپۆلی دەریا وایە جارێك هەڵدەكشێت و جارێك دادەكشێت، ئەمە ململانێیەكی درێژخایەن دەبێت لەسەر دەسەڵات لە عێراقدا و ڕەنگە هەرگیز ئەم ململانێیە كۆتایی پێنەیەت.

* ئایا پێشبینی ئەوە دەكەی لە دوای كشانەوەی هێزەكانی ئەمریكا ناكۆكی لە نێوان پێكهاتە سەرەكیە جیاوازەكانی عێراقدا ڕووبدات، وەك شەڕی ناوخۆیی وەك ئەوەی هەندێ لە شارەزایان پێشبینی دەكەن و ئایا ئەگەر دەستێوەردانی دەرەكی ڕووبدات، ئایا ئەمریكا بەرپرسیار دەبێت لەمە، ئایا بە شێوەیەك لە شێوەكان دەستێوەردان دەكات بۆ پشتیوانی لە حكومەتی عێراق؟
- من پێم وانییە ئەگەری شەڕی ناوخۆ لە ئارادابێت، پێم وایە لە ئێستای عێراقدا ئەگەرێكی زۆر لاوازی شەڕی ناوخۆ لە ئارادایە، پێم وایە ئەوەی لە ساڵی 2006 تا ساڵی 2008 ڕوویدا زۆر نزیك بووە لە شەڕی ناوخۆوە، بەلەبەرچاوگرتنی ئەو ڕاستیەی عێراق بەم هەلومەرجەدا تێپەڕی و ڕزگاری بوو، ئەوا ئێستا ئەم وڵاتە لە بارێكدا نییە بۆ ئەوەی ئەمە دووبارە بكاتەوە. دەوڵەتە دراوسێكان بە شێوەیەك لە شێوەكان دەستێوەردان دەكەن، بەڵام پێموایە موبالەغە كراوە لە تەقدیركردنی ئەو دەستێوەردانانەدا، پێم وایە ئەوە فیكرەیەكی سەرنجڕاكێشە بۆ عێراقیەكان كە بڵێن كێشەكان لە دەرەوە هاتوون، كە ئەمریكا هەندێ كێشەی دروستكردووە، ئێران هەندێ گرفتی دروست كردووە، سعودیە كێشەی دروست كردووە و توركیاش، ئەوە ڕاستە ئەم وڵاتانە دەستێوەردان لە سیاسەتی عێراقدا دەكەن، ئێران و ئەمریكا دەستێوەردانێكی زۆر دەكەن، ئەوانی دیكەش تا ڕاددەیەكی دیاری كراو دەستێوەردان دەكەن، بەڵام دەسەڵات لە دەستی عێراقیەكاندایە، ئەگەر عێراق سەركەوتوو بێت، ئەوا ئەمە مانای ئەوەیە عێراقیەكان بڕیاری ڕاستیان داوە، ئەگەر عێراقیش شكست بهێنێت، ئەوا ئەمە بە مانای ئەوەیە عێراقیەكان بڕیاری هەڵەیان داوە، تاوەكو عێراقیەكان زووتر لەم ڕاستیە تێبگەن، ئەوا زووتر دەتوانن بەرپرسیارێتی وڵاتەكەیان بگرنەئەستۆ.

* دوا وتەت چیە؟ پەیامت چیە بۆ خەڵكی عێراق؟
- بەردەوام بن لە خەباتكردن لە پێناو دیموكراسیدا، هیوای ئەوەیان بۆ دەخوازم ساڵی داهاتوو ساڵێكی پڕ ئاشتی و گەشەكردن بێت بۆ عێراق.