زۆر جار چالاكانی بواری مافی مرۆڤ جەخت لەوە دەكەنەوە كە دواخستنی ئافرەت بە هۆكاری نەریتی كۆمەڵگە و بەردخستنە سەر رێگەیان لە بەشداری كۆمەڵایەتی، سیاسی و ئابووری، وڵات و نەتەوە دوا دەخات، هاوكات بەپێی هەوڵەكانی ئافرەت بۆ گێڕانەوەی مافە زەوتكراوەكانی، سەلمێندراوە كەوا متمانەی تەواوی بە تواناكانی خۆی هەیە و بێ گوێدانە ئاستەنگەكان هەنگاو بەرەو پێشەوە دەنێت و رەچەشكێنی دەكات. بەشداربووانی ئەم راپۆرتەی گوڵان خوێندنەوەی زیاتریان بۆ ئەم پرسە هەیە.

سەرەتا نەدا مێرگەسۆری پەرلەمانتارو بڕیاردەری فراكسیۆنی پارتی دیموكراتی كوردستان لە ئەنجومەنی نوێنەرانی عێراق، هێما بۆ ئەوە دەكات لە زۆربەی ئەو كۆمەڵگەیانەی كە بە چاوێكی یەكسانەوە سەیری هەردوو رەگەزی نێرو مێ ناكرێت، هەمیشە رەگەزی مێ خۆی لە ئاستێكی نزمتر دەبینێت، چونكە ئەو پەروەردەیەی كە پێی گەورە كراوە، پەروەردەیەكی ناتەندروست بووەو ئافرەت بە رەگەزی دووەم و پیاو بە رەگەزی یەكەم هەژمار كراوە. گوتیشی: «پەروەردەی خێزان و دواتریش پەروەردەی كۆمەڵگەی دواكەوتوو وا لە ئافرەت دەكات كە بەو جۆرەی پێویستە متمانەی بە خۆ نەبێت و هەمیشە لە ئاست ئەنجامدانی هەر كارو ئەركێك لە خۆی بە شك بێت، بەڵام ئەوەشمان لە بیر نەچێت گەر ئەركەكەشی وەرگرت، بە باشترین شێوە ئەنجامی دەدات، چونكە یەكەم سروشتی خودی ئافرەت سروشتێكی پاك و بێگەردو رێكخراوە، دووەم هۆكاریش ئەوەیە وا فێركراوە كە ئافرەت هەر ئیشێكی پێدەسپێردرێت، دەبێت بە رێكوپێكی ئەنجامی بدات، چونكە دەكەوێتە بەر تانە، ئافرەتیش گەر بەر تانە كەوت، لە كۆمەڵگە حیسابی ئافرەتێكی خراپی بۆ دەكرێت.»
ئەو پەرلەمانتارە لە درێژەی قسەكانیدا ئاماژە بەوە دەكات كە «دوای ئەو بزاڤ و چالاكیانەی ئافرەتان لەسەرتاسەری دنیا بۆ چاكتركردنی باری گوزەران و یەكسانكردنی مافەكانیان لەگەڵ پیاوان و گەڕاندنەوەی پێگەی راستەقینەیان گرتیانەبەر، هێدی هێدی ئافرەت بە چاویلكەییەكی تەندروستتر سەیركراو رێگەی پێدرا كەم تا زۆر لە زۆربەی كایەكانی ژیان بەشداری هەبێت و شان بە شانی پیاو لە بەجێگەیاندنی ئەركەكانی هەنگاو بنێت.» جەختی لەوەش كردەوە كە «بۆ ئەوەی ئافرەتان بیانەوێت بە رێژەیەكی بەرچاو لە هەموو كایەكانی ژیان بەشدار بن، پێش هەموو شتێك پێویستە متمانە بە خۆبوونی خۆیان بەدەست بێنن، كە ئەمەش هەر لە خۆیەوە دروست نابێت، بەڵكو چەندین فاكتەر هاوكارن بۆ ئەوەی رەگەزی مێ بتوانێت خۆی بسەلمێنێت، بۆیە پێویستە یەكەم هەنگاو، لە خێزانەوە دەست پێ بكرێت، كە دایك و باوك رۆڵی بەرچاویان هەیە لە بەرزركردنەوەی متمانەی رەگەزی مێ، دواتر هەڵسوكەوتی كۆمەڵگەو تێڕوانینی كۆمەڵگە بۆ ئافرەت، هۆكارێكی دیكەیە بۆ كەمی و زۆری متمانە بەخۆبوونی ئافرەت، بەرنامەی دەوڵەت و سیستەمی حوكمڕانی و پاڵپشتی هەر سێ دەسەڵاتی (یاسادانان، جێبەجێكردن، دادوەری)ـە كە پاڵنەرێكی باشن بۆ ئەوەی ئافرەت متمانە بەخۆبوونی زۆر بێت و پێنگاڤەكانی پێشكەوتن بە خێراتر بهاوێژیت. بەڵام نابێت ئەوەشمان لەبیر بچێت، كە هۆكارە كەسییەكان كاریگەری یەكجار بەهێز و ئەرێنییان هەیە، كە بە هۆیەوە ئافرەت دەتوانێت متمانە بە خۆبوونی خۆی بە هێز بكات و بتوانێت خۆی وەك كەسێكی بەسوود و خاوەن پێگەیەكی بەهێز بسەلمێنێت، كە ئەویش بە هۆی رۆشنبیركردنی خۆی دەبێت لە بوارە جیاجیاكانی ژیان .»

دەرونزان یوسف عوسمان حەمەد لە رووی دەروونییەوە شرۆڤەی چەمكی متمانە بەخۆبوون دەكات و رایوایە «كاتێك باس لە پێوەرە كۆمەڵایەتییەكان دەكرێت، كەلتوور بەسەر رەگەزی نێر و مێدا دابەش بووەو ئەو كەلتوورە هەژموونی نێرسالاریی بەسەر رەگەزی مێدا سەپاندووە.» هەروەها گوتی: «لە رووی سایكۆلۆژییەوە زۆرجار ئافرەت ناتوانێ راستییەكان بدركێنێ، فاكتەرەكانیشی بۆ دوو هۆكار دەگەڕێتەوە. هۆكاری یەكەم ئەوەیە لەناو خێزان رێگەی پێنەدراوە قسەی دڵی خۆی بكات و راستییەكان بدركێنێ، ئەگەرچی بێدەنگییەكەی زیانیشی پێی گەیاندووە، چونكە ئەو دەرفەتەی نەبووە ببێتە خاوەن گوتار و بڕیاری خۆی، لە رووی دەروونی كۆمەڵایەتییەوە كەسێك رێگر لەبەردەم قسەكردنیدا هەبێ، ئەوا ئەو كەسە بێ جورئەت دەبێ، خاڵی دووەمیش ئەوەیە كە راستبێژی زیانی پێدەگەینێ و ناتوانێ بەرگری لە راستییەكانی خۆی بكات، بۆیە بێدەنگی هەڵدەبژێرێ، تاكە چارەسەر بۆ ئەو گرفتە گرنگیدانە بە پەروەردەی نەوەی داهاتوو، كە بە دوو ستوونی هاوشێوە كاری لەسەر بكرێ و لە ناو خێزانەكان دەست پێبكات و لە وێوەش بۆ پرۆسەی پەروەردە و خوێندن بۆ ئەوەی كچانیش بتوانن بوێرانە قسە بكەن و گوزارشت لە بیروبۆچوونەكانی خۆیان بكەن و بەجورئەتەوە وەڵامی هەموو پرسیارێك بدەنەوە، لە هەمان كاتیشدا رەخنەكانیان مایەی قبووڵكردن بێت، ئەوكات نەوەیەكی تەندروست و چاونەترس دروست دەبێ، پێچەوانەی كچان و ژنانی ئەمڕۆ كە گومان لە هەموو شتێك دەكەن و بەگومانەوە لە دەوروبەر دەڕوانن. بەڵام بۆ ئەو ئافرەتانەی كە بەهۆی باجە قورسەكەی كۆمەڵگە باجێكی قورستر دەدەن و بێدەنگییان بەناچاری كردۆتە بەرنامەی ژیانیان، پاڵپشتی یاسایی چارەسەر و گەرەنتی و خولقێنەری ژیانێكی شەرەفمەندانەی ئافرەتانی چەوساوە و مافخوراوە .»

چالاكی مافناس شوان سابیر، سەبارەت بە هەمان پرس دەڵێت: «ئەگەر بمانەوێ هۆكاری كەمبوون، یان نەبوونی متمانەبەخۆبوون لەلای ئافرەت بزانین، دەبێت شرۆڤەیەكی وردی بۆ بكەین، چونكە ئەو حاڵەتە گرفتێكی هێندە كۆنە، كە دەكرێ بڵێین هەر لە دەستپێكەوە وەها رۆیشتووە، تاكو ئێستاش بەردەوامە، بۆیە دەبێ یەكە یەكەی هۆكارەكانی دروست نەبوونی ئەو متمانەیە شرۆڤە بكەین و پڕۆگرامی رووبەڕووبوونەوەی بۆ دابڕێژرێت.»ئەو پڕۆگرامەش لەم چەند خاڵەدا چڕ دەكاتەوە:
1- خۆ بە كەم زانین و لاوازیی متمانە بەخود دەبێتە هۆی دروستبوونی هەستێكی دەروونی لەلای كەسەكە كە بەردەوام لە ململانێیەكی ناوناخیدایەو هەردەم لەگەڵ خۆی ئەوە دووبارە دەكاتەوە و دەڵێت من هەرەسم هێناوە، من گێلم، من نازانم، من ناتوانم، من نابێ ئەوە بكەم، من بۆم نییە ئەوە بكەم، ئەو ململانێیەش لە ناهۆشیاری ئەو كەسەدا چەكەرە دەكات و ناهێڵێ هیچ بكات و هیچ بڵێت و هیچ رەت بكاتەوە و هیچ داوابكات، تاكو داوای لێ نەكەن، یا نەیدەنێ، یا پێی نەڵێن، واتە مرۆڤێكی ئیتیكاڵی پشتبەستوو بە خەڵكی دیكەی لێ دروست دەبێت و وەك رۆبۆت كاردەكات .

2- خۆمەلاسدان بۆ خاڵە لاوازەكانی خۆی و هەستكردن بەوەی هەموو كەسێك ئەو نەقس و لاوازییەی دەبینێ و چاودێری دەكرێت و خەڵكانێك لە چاوەڕوانی ئەوەدان كە هەڵەیەك بكات، ئەو هەستەش وادەكات كە ئەو كەسە نەتوانێ بڕیارێك بدات، كارێك بكات، یا نەیكات، قسەیەك بكات، یا نەیكات، هەتاكو پێی نەوترێت .
3- رۆڵی دایك و باوك و مامۆستا و قوتابخانە لە سەرەتاكانی گەشەی منداڵ كە بریتییە لە سەرەتاكانی بونیادنانی كەسایەتی بۆ منداڵەكە هێندە گرنگە كە دواتر كەسایەتی ئەو منداڵە لە ناو كۆمەڵگە و لە ژیانی خۆیدا دیاری دەكات، كە ئایا كەسێكی قیادی دەبێت، یا ئیتكال ،ی یا ئینعیزالی یا یاخی و،،هتد، بەڵام لە رێگەی پەروەردەی تەندروست و پلانی دروستەوە كەسایەتی منداڵ گەشەدەكات».

4- مەترسیدارترین هۆكار ئەوەیە كە دایك و باوك بۆ سەركۆنەكردنی منداڵی خۆیان بە منداڵی دیكە بەراوردیان بكەن، وەك: تۆ بۆ وەكو فڵان كەس زیرەك نیت؟ تۆ بۆ وەكو فڵان كەس پاك و خاوێن نیت؟ ...هتد، ئیتر ئەو منداڵە لە هەوڵی بەردەوامدایە كە تەقلیدی فڵان و فیسار بكات .
5- سەركۆنەی زۆر بۆ ئەو كارە خراپانەی كە منداڵ دەیكات، خۆی منداڵ بوونەوەرێكە بێ ئەزموونە، بێ تەقدیرە بۆ كۆتایی شتەكانی، واتە منداڵ كە بەردێك فڕێ دەدات، ئەو هەموو تەركیزی لەسەر كرداری فڕیدانەكەیە، نەك ئەو بەردە بەچی دەكەوێت و لەكوێ دەكەوێتەوە .. بۆیە سەركۆنەی زیاتر لە سنووری مەعقول بۆ ئەو رەفتار و گوتارانەی منداڵ وادەكات ئەو منداڵە لە ئەنجامدا تەنیا یەكێك لە دوو رێگە خراپە (ئیتیكالی بوون، یان یاخی بوون) هەڵبژێرێت.
شوان سابیر ئاماژە بەوەش دەكات كە لەدەستدانی متمانە تەمەنی گەورەش دەگرێتەوە، بەڵام رێژە هەرە گەورەكەی هی تەمەنی منداڵییە و هاوكات دەڵێت: «ئەگەر بمانەوێ تاكێكی تەندروست لە رووی متمانە بە زاتەوە دروست بێ، دەبێ بە وردی پڕۆگرامی بۆ دابندرێـت و چارەسەریان بكەین.» رێكارەكانی چارەسەریش بەمجۆرە دەخاتەڕو:
* یەكەم ددان بە بوونی گرفتی نەبوونی متمانەكەدا بنێین.
* بەرنامەیەكی پەروەردەیی تۆكمە بۆ قوتابخانەكان و مامۆستاكان دابڕێژرێت .
* كاركردن لەسەر ئەو بنەمایەی كە دەڵێت: ئەوەی لێی دەترسی بیكە، ترسەكە نامێنێ.

* بەرپرسیاریەتی حكومەت و دەزگای یاسادانان لە خۆشكردنی زەمینەی لەبار بۆ ئەوەی ئافرەتان بتوانن بەشداری فیعلی بكەن لە ژیان، نەك بەشداریان پێبكەن .
مەیادە محەمەد نەجاڕ كە هەڵگری بڕوانامەی ماستەرە لە كارگێڕی كار، بەشداریكردنی ئافرەت لە پرسە جیاوازەكانی سیاسی، دیپلۆماسی، ئابووری و بازرگانی بە پێویست دەزانێت و رایوایە هەتا ئافرەتان بەشدارییەكی كارا لەپرسە جیاوازەكاندا نەكەن، ئەستەمە كۆمەڵگە بتوانێت بەرەوپێش بڕوات. گوتیشی: «ئەگەر سەیر بەشداری ئافرەتان لەگشت پرسە جیاوازەكاندا بكەین، پێویستمان بەهەڵوێستەیەك دەبێت، وەك دەبینین كاتێك كە باس لە بەشداریكردن دەكرێت، دەبێت زەمینەسازی پێشوەخت كرابێت، لەوانە: گرنگیدان بە پرۆسەی پەروەردەكردنی ئافرەت، وەك دەزانرێت پەروەردەكردن یەكەم كۆڵەكەی ژیانی مرۆڤە و پەروەردە كاریگەرییەكی زۆر گەورە لەسەر ژیانی ئافرەت دروست دەكات. واتا ئێمە كاتێك دەمانەوێت پەروەردەیەكی گونجاو بۆ ئافرەت دەستەبەر بكەین، دەبێت لەتەمەنی منداڵییەوە كاری بۆ بكرێت هەتا كەسایەتیەك بەرهەم بێت كەبتوانێت رۆڵێكی كاریگەری لەپرۆسە جیاوازەكاندا هەبێت.» گوتیشی: «كۆمەڵگەو نەریتە كۆمەڵایەتییەكان كێشەی زۆری بۆ ئافرەت بەرهەمهێناوەو لە بەشداریكردنی ئافرەتان لەپرسە سیاسی و كۆمەڵایەتییەكان رێگری كردووە، لەبەر ئەوەش هەركاتێك ئافرەتێك بگاتە پۆستێكی سیاسی، یان هەر پۆستێكی كارگێڕی، یان هەر جۆرە پێگەیەكی كۆمەڵایەتی، ئەوا رووبەڕووی زۆر كێشە دەبێتەوە، چونكە پیاوان لە كۆمەڵگەی پیاوسالارییەكاندا نایانەوێت ژن خاوەنی كەسایەتی بەهێز بێت و پێیان شەرمە پێگەی ژنەكەیان لە خۆیان بەرزتر بێت، بەشێوەیەك كە ناتوانن تەقەبوولی هاوسەرێكی رۆشنبیرتر و هۆشیارتر لە خۆیان بكەن، هەمیشە كۆمەڵگەی پیاوسالاری بەعەقلیەتی پیاو دەجووڵێتەوە و دژایەتی ژنی بەتوانا دەكات، بۆیە ژن رووبەڕووی كێشەی زۆر دەبێتەوە.»

مەیادە محەمەد دایكان بە قوتابخانەی یەكەمی مرۆڤەكان و دانەری بناغەی كەسایەتی و بیركردنەوەی منداڵ دەزانێت و رایوایە ئەگەر لە سەرەتاوە منداڵ بە یەكسانی پەروەردە كرا، ئەوا ئافرەت متمانەی زیاتری بە خۆی دەبێت و پیاویش شانازی بە خێزانی لێهاتووی بیرتیژ و نموونەیی دەكاتەوە، بە پێچەوانەوە كۆمەڵگەی نەریتی سیستەمی وەهای دروست كردووە كە گوایە ژن بە بێدەنگییەوە جوانەو نابێت قسە بكات، تەنانەت دەڵێن: كچی شەرمن شارێك دەهێنێت. زۆر بەداخەوە لە وڵاتی ئێمەدا بیردۆزێكی سەقەت بووەتە كەلتووری كۆمەڵگەوە بەوەی كە گوایە ژن بەوە جوانە بێدەنگ بێت، بەڵام زۆر بە راشكاوییەوە دەڵێم: ئەوە تەنیا بۆ پشتگوێ خستنی ژنە، باشە ئەگەر ژن هەر بێدەنگ بێ، ئەی كێ مافە زەوتكراوەكانی بۆ دەگێڕێتەوە؟ زۆرجار بینراوە ژنێك كە داوای مافی خۆی دەكات، یان لەسەر داواكارییەكانی سوور دەبێت، كەچی بە ناو وناتۆرەی ناپەسەند دەمكوتی دەكەن و بە زماندرێژی تۆمەتباری دەكەن، ئەمەش وایكردووە كە پیاوان هەمیشە خۆیان بە پێشەنگ بزانن و دەبێت هەموو شت بزانن و درك بە هەموو زانیاریەكان بكەن و هەمیشە دەبێت ژنان و كچان پاشكۆی ئەوان بن. كۆمەڵگەی مرۆڤایەتی هەمیشە پێویستی بە ژن هەیە بۆ ئەوەی بەرەوپێش بڕوات، ژن زۆر بەرپرسیاریەتی لە ژیانی كۆمەڵایەتیدا لەسەرشانە لە چوارچێوەی كۆمەڵگەی مرۆییدا، بەڵام جۆری بەرپرسیاریەتییەكانی بەپێی جۆری كۆمەڵگە و قۆناغی پێشكەوتنی ژیان گۆڕانكاری بەسەردا هاتووە، بیرۆكەی دابەشكردنی بەرپرسیاریەتییەكان لەسەر بنەمای رەگەز بیرۆكەیەكی نادروست و ناشارستانییە، لەبەر ئەوەی ژن و پیاو دوو رەگەزی تەواوكەری یەكترن، لەهیچ كاتدا ناكرێت یەكێك بەسەر ئەوەی دیكەدا فەرز بكرێت، بۆیەش هەر كاتێك كە ماف و ئەركەكان نایەكسانانە دابەش دەكرێن، راستەوخۆ ئەم هاوكێشەیە كێشەی گەورەی تێدا دەردەكەوێت، لەبەر ئەوەی هەردوو رەگەز تەواوكەری یەكترن و كاتێك كۆمەڵگە پێویستی پێیان بێت» .


رێبوار ئەحمەدزادە دەرچووی زانستە رامیارییەكان لە زانكۆی پەیام نوور لە رۆژهەڵاتی كوردستان، ئێستا دانیشتووی وڵاتی نەرویجە سەبارەت بە هەمان باس سەرەتا هێما بۆ ئەوە دەكات كە «سەرەڕای ئەوەی ئەمڕۆكە بە پەرۆشەوە باس لە بەشداریی ژنان لە داڕشتن و بەڕێوەبردنی سیاسەتی كۆمەڵگە و وڵاتدا دەكرێت، كەچی ئێستاش لە پشت پەردەی پرسیاری جۆراوجۆرەوە، ئەو پرسە گرنگە دەخرێتە خانەی گومان و دوودڵییەوە. ئایا بەشداریی ژنان لە كاروباری سیاسیی وڵات، پێویستیەكی كۆمەڵایەتییە، یان یارییەكی تازەیە بۆ تێكدانی هاوسەنگی كۆمەڵگە، یان گفتوگۆیەكی رووناكبیرانەیە، یان پێویستییەكی حاشاهەڵنەگرە بۆ گەشەوپەرەپێدان؟ ئایا بەشداریی سیاسیی ژنان حەز و خولیایەكی كاتیی ژنانەیە؟ سەرجەم پرسیارە ئاماژە پێكراوەكان، چەند بەشی جۆراوجۆرن لەپێوەندی بە دروستكردنی دڵەڕاوكێ و دوودڵی و بەلاڕێدا بردنی روانگەی كۆمەڵگە بەرامبەر بە ناسنامەی راستەقینەی ژنان و هێشتاش بە گومانەوە لە وڵاتانی جیهانی سێهەم دەڕواننە جێگەو پێگەی ژن. بەڵام ئایا لە راستیدا بەشداریی سیاسیی ژنان تەنیا حەزو خولیای بەشێكی كۆمەڵگەیە، یان پێویستیەكی حاشا هەڵنەگرە؟
هەر چوارچێوەیەكی كەلتووریی، یان ئاكاروكرداری كۆمەڵایەتی هەڵقوڵاوی هەڵسووكەوتی مرۆڤەكانە لە كۆمەڵگەدا، بۆیە بەشداریی سیاسیش كە خولیای مرۆڤە لە قۆناغی بڕیاردان و بڕیارداڕشتندا، وەك بەشێك لە هەڵسوكەوتە سەرەكییەكان لە كۆمەڵگەدا هەژمار دەكرێن. بەشدارییكردنی سیاسیی لەخۆگری بەشی جیاوازە كە خوارترین بەشیی دەنگدانەو و بەرزترینیشی، هەبوونی پلەی سیاسی یان ئیدارییە. بە واتایەكی دیكە بەشدارییكردنی سیاسی لە دەنگدانەوە دەست پێدەكات و لە قۆناغەكانی دواتردا لەخۆگری هۆگرییە بە سیاسەت، بەشدارییكردن لە بەشە سیاسیە جۆراوجۆرەكاندا، ئەندامبونی كاتی و هەمیشەیی لە رێكخراوەی سیاسی و...هتد، خۆپێشاندان، گەڕان بەدوای پۆست و پلەی سیاسی و ئیداری و هتد، ژنانیش بە سەرنجدان بەوەی كە نیوەی كۆمەڵگەی مرۆڤایەتین، بە دڵنیاییەوە دەبێ لە شێوازی تایبەتی داڕشتنی كاروباری سیاسیدا، بەشدارییەكی كاریگەریان هەبێت. ئەمڕۆكە پلانداڕێژانی ئاستی بچوك و گەورە بە گرینگیی (نەخش و جێدەست) بۆ پێشوەبردنی ئامانجەكانی كۆمەڵگە ئاشنابوون، لەو سۆنگەیەشەوە بەوە گەیشتوون كە بەشداریی ژنان لە چالاكیەكانی سیاسی، ئابووریی یان بەڕێوەبردنی نەخشی هەستیار لە پەرەپێدان و نوژەنسازیی یەكەكانی دەوڵەت-نەتەوەدا، توانای وڵات بۆ تێپەڕاندنیی هەنگاوەكانی پێشوەچوون و تازەگەری، بەدیدێنێ و رێنوێنی دەكاو پێیدەگەیەنێت. ئێستا لەسەر بنەمای ئەو بۆچونانەی كە لە دێڕەكانی سەرەوەدا باسكران، ئایا ئێستاش دەكرێ بەشداری سیاسیی ژنان وەك لەمپەرێكی تازەی جیهانی رۆژئاوا بۆ سەپاندنی بەسەر كۆمەڵگەكانی وڵاتانی جیهانی سێیەمدا یان وەك هەواوهەوەس وحەزو خولیای كۆمەڵایەتی بۆ بانگەشەی رووناكبیریی گروپێكی تایبەت كە خەمخورو دڵسۆزی كاروباری كۆمەڵایەتیی نین، ناو ببین؟ ژنانیش خۆیان تاوانبارن چونكە ئەركەكانی خۆیان بەجێ نەهێناوە، كۆمەڵگەش كەمتەرخەمەو كەمكاریی كردووە چونكە داواكاریی لە هاوڵاتیانی بۆ بەشدارییكردن خستۆتە لاوەو گرینگیی پێنەداوە. لەو رووەوە بەشدارییكردنیی سیاسی ژنان بۆ داواكردن و دەرخستنی ماف و ئەركدا ئیمتیازێكی كۆمەڵاتی نییە، بەڵكو ئەركێكە كە تا ئێستا لە بە كردەوەیی نەكردنیدا هەر دوو بەشەكە تووشی زیان هاتوون.»