ئا/ ئاشتی عەبدوڵڵا



ئاشكرایە كە لای ئێمەی كورد ئاكار و نەریت و بیركردنەوەی كۆمەڵایەتی ئێمە ڕێگرن لەبەردەم ئازادیی پێوەندی خۆشەویستیدا. لەمێژە كۆمەڵگەی كوردی مەشخەڵی دژ بەعەشق و خۆشەویستی بەرز كردووەتەوە، هەر لەئەزەلەوە هەرزەكارێكی نێو خێزانی كورد وشەی ئەوین و خۆشەویستی لێ حەرامكراوە، چەمكی حەزلێكردن و پێوەندی سەدان ماڵی كردووەتە دۆزەخ و هەزاران ئاشق سەری لەبەردی ئەلحەد دراوە. لەمێژە پێوەندی نێوان كوڕ و كچ وەكو پێوەندی نێوان فریشتەو شەیتان تەماشاكراوەو وەكو كفرێكی چاو زەق حسێبی بۆكراوە. خۆشەویستی كە خۆی لەخۆیدا ڕەمەك و غەریزەیەكی گرنگی مرۆڤە، بۆتە یاساغ و قەدەغە، بەردێك بەڵكو تاشەبەردێكی خراوەتەسەرو لەنێو قاسەی پڕ نهێنی دەروون و خەیاڵدا هەڵگیراوە، ئیدی هێواش هێواش دەستاڕی چەپاندن و كەپتكردن خولیاو خەون و ئارەزووەكان تێك ئەشكێنێ و تێڕوانین و بیركردنەوەو دواجار پێوەندی پراكتیكی نێوان هەردوو ڕەگەزی نێرو مێ چەواشەو هەڵەئامێز دەخەمڵێنێ.
سەرەنجام بوونەوەرێكی كوردی لێ خەلق دەبێت كە پێیدەڵێن گەنج كە نیواو نیوی و بگرە زیاتریشی پڕە لەنهێنی و لەتاریكی و كۆڵانی بنبەست، لەپەرچەكردارو ڕەنگدانەوەی ئەو فشارە دەروونییەدا، ڕق جێگەی خۆشەویستی ئەگرێتەوەو ترس و دڵەڕاوكێ لەجێی متمانەو باوەڕبەخۆكردن و بەختەوەری دادەنرێت. ئەم جێگۆڕكێ نالۆژیكی و ناماقوڵەی كەلتوورێكی نەریتخوازی كۆن سەپاندوویەتی و لەمێشكی هەریەكەماندا ڕەگی داكوتیوەو یەكێكە لەهۆكارە گرنگەكانی لەدەستدانی ئازادیی و ویست و ئیرادەمان. كەواتە قۆرخكردن و زنجیركردنە ملی عەشق و خۆشەویستی قۆرخكردنی هەناسەی ئیرادەو ئازادیمان وەكو مرۆڤێك كە بێگومان لەژیانی واقیعیماندا بەئاسانی هەستی پێدەكەین.
شایەنی وتنە، لەمبارەیەوە یەكەمین وانە كە لەخێزانمانەوە فێری ئەبین، ڕاستیی نەگوتنمانەو شاردنەوەی پێوەندی خۆشەویستیمانە، چونكە خۆشەویستی شاردراوەتەوەو وەك حەرام و تابوو تەماشای دەكرێت، بۆیە ناچارین درۆزن و ترسنۆك بین، خۆمان ملكەچ دەكەین بەرامبەر بەچاندن و كەپتكردنی وشەی خۆشەویستی، ئەم قووڕەش لەوەدا خەستتر ئەبێتەوە كە ئاریشەو گرفتی كۆمەڵایەتی و دروونی لەپێكهاتەو وردەكارییەكانی ناو كیمیایی كەسایەتیماندا چەكەرە پێدەكات. زۆر خێراو نێگەتیڤانە تەشەنە دەكات، گرێ لەدوای گرێ و هەتا دەگاتە گرێكوێرەی دەروونیشی لەنێو كوورەی ناخماندا دروست دەبن كە ئەمەش دەبێتە فاكتەری لەدەستدانی هێمنی و ژیریمان كە لەگەڵ هەست و سۆزدا هاوكێشەی خۆشەویستی تەواو دەكەن.
بەڵام سەبارەت بەقەیرانی خۆشەویستی و پێوەندی نێر مێ لەئەمڕۆدا، خەسڵەت و سیمای تایبەتی هەیەو بەلێكدانەوەو ڕاڤەی كۆمەڵناسییانە دەتوانین هۆكارەكان دەستنیشان بكەین. بەتایبەت دیاردەی كاڵبوونەوەی خۆشەویستی پاش پرۆسەی هاوسەرگیری كە بەرێژەیەكی بەرچاو لەبەرزبوونەوەدایە، لەوەدایە كە پرۆسەی هاوسەرگیری بەحەز دەست پێدەكات (نەك خۆشەویستی) و لەسێكسدا تەواو دەبێت و دەكوژێتەوە. هەروەها بەپێی ئاكارو دابونەریتی كەلتوورو بیركردنەوەمان، پیاوی كورد دان بەئەوی ژندا نانێت و حیسابی بوونەوەرێكی مرۆیی بۆ ناكات، ئێمەی كورد ئەوەندەی ستەمكاری پیادە دەكەین، ئەوەندە یەكتر تەواو ناكەین. قەیرانی خۆشەویستیمان لەوەدایە كە هەمیشە تای تەرازووەكە لاسەنگە، نێرو مێی كورد دوو لایەنی هاوبەش نین كە مرۆڤایەتیبوونی یەكتر قبوڵ بكەن، ئەم هۆكارە نابەجێیە وا دەكات كچ و كوڕ یان ژن و مێرد هەمیشە لەشەڕو جەنگ و جەدەلێكی بەردەوامدا بن و هەمیشە كچ یان ژن دۆڕاون.
كۆمەڵگەی كوردی ڕێگرە لەبەردەم دروستبوونی تاكدا وەكو بوونەوەرێكی سەربەخۆ، چ جای تاك بتوانێت مومارەسەی خواست و ویستی خۆی بكات. تاكی كورد لێوانلێوە لەئیشكالییەتی هزری و كۆمەڵایەتی و گرێ و زەبری دەروونی و كەپتی سێكسی، ئەو چەپاندنەش وەكو دیسپلین و میكانیزمێك ئامادەیەو هۆكارێكە بۆ لاوازبوونی خۆشەویستی، گەنجی گورد خەیاڵی و ڕۆمانسیانە تەماشای پێوەندی خۆشەویستی دەكات و لەعەقڵ و ڕاڤەكارییەوە دوورە، كاتێك دەگاتە ژیانی واقعی و دژواری هاوسەرگیری لەكورستاندا، ئیتر خەونەكان نایانە دی، دڵی سارد دەبێتەوەو شەڕ دەفرۆشێ و هێلانەكەی خاپوور دەكات. خاڵێكی دیكەی قەیرانەكە لەوەدایە كە نێرسالاری لەنێو هەموو كایەكانی ژیانماندا وایكردووە ڕەگەزەكەی دیكە نەبینرێت، تەنیا وەكو شتێكی غەریزی دەرئەكەوێت، لای ئێمە ژیانی هاوسەرگیری بۆ حاڵەتی بەرهەمهێنانی منداڵ كورت كراوەتەوە، ژن وەكو مرۆڤێك پەراوێز كراوە، بۆیە ڕێژەی خۆسووتاندن بەرزە.
دیاردەیەكی دیكە كە ئەمڕۆ برەوی هەیە پێوەری دەوڵەمەندی و پارەپەرستییەو گۆڕینەوەی خۆشەویستی و هەست و سۆزی مرۆڤایەتییە بەپارە. هەروەها دیاردەی ڕووخسارو جوانی بووەتە پێوەرێكی هەڵە لەنێو گەنجانی كوردا خۆی سەپاندووەو بووەتە كۆڵەكەی یەكەمی ئەوین كە هێندە نابات كەسێكی جوانتر دەتوانێت پێوەندی خۆشەویستی هەردوولا نغرۆ بكات. لەكۆتاییدا ئەم وتوویەی ئێریك فرۆم بخوێنەرەوەو خۆت دادوەری بكە كە چ جۆرە خۆشەویستییەك لەكوردستاندا دەگوزەرێت: (تەنها ئەوكاتە خۆشەویستی ڕاستەقینە ئیمكانی هەیە كە دووكەس لەكانگای بوونی خۆیانەوە لەگەڵ یەكتردا گفتوگۆ بكەن).