ئا: دیار سالار

هەڵدانەوەی لاپەڕەكانی ڕابردوو لە زۆر كاتدا بۆ مرۆڤەكان گرنگە، بەڵام هەندێك جار هەڵدانەوەی لاپەڕەكانی ڕابردوو ناخۆشی بۆ ئەو كەسە دروست دەكات، بەتایبەتی لە لایەن كچانەوە كە هەمیشە حەز دەكەن لەكاتی خوازبێنیدا لاپەڕەكانی ڕابردوویان هەڵنەدرێنەوە، توێژەرێكی كۆمەڵایەتیش ئاماژە بۆ ئەوە دەكات كە هەڵدانەوەی لاپەڕەكانی ڕابردوو لە پێش یان لە كاتی زەواجدا تەنیا لە كۆمەڵگە دواكەوتووەكاندا بوونی هەیە.

فەرمانبەرێكی هاوكارم درۆی بۆهەڵبەستم
تابان مستەفا عەزیز لە وەزارەتی كاروكاروباری كۆمەڵایەتی، ئاماژە بەوە دەدات كاتێك داخوازی هاتووە كوڕێكی هەمان فەرمانگەكەی خۆی، درۆی بۆ هەڵبەستووە، وەك باس دەكات كوڕێك داوای دەكات و ئەویش ڕازی دەبێت، بەڵام كوڕەكە دەڵێ بە ماڵەوە دەڵێم تا لێت بپرسن، دوای دوو رۆژ ماڵی كوڕە لە تابان دەپرسن، بەڵام ئەو پرسینە نابێتە هۆی بەستنەوەی گرێی بەختی ئەو دووانە، چونكە یەكێك لەوانەی پرسیان پێكردووە، خۆی چاوی لە تابان بووە، بۆیە كوڕە تەلەفۆنی بۆ دەكات و دەڵێ دیارە قیسمەت نەبووەو هەر كەسەمان لە ڕێی خۆمان، تابان دەڵێت «بەو قسەیە تووشی شۆك بووم، چونكە كوڕە خۆی وتی من لێتم پرسیوەو باش دەزانم چۆنی؟ بۆیە كەوتوویتە دڵمەوە، كەچی ئێستا بۆ پەشیمان بۆتەوە؟ سەیر بوو هەر وتم بۆ، هیچ قسەی نەكرد و پاش پاڕانەوەیەكی زۆر، ئینجا وتی كەسێكی فەرمانگەكەتان بە خراپ لای براكەم باسی كردووی».

حەز ناكەم كەس پرسیاری رابردووم بكات
ئاساییە كچان لەوە بترسن كە بوختانیان بۆ هەڵبەستن، لەوانەیە هەندێك لە كچان لە ڕابردووی خۆیان بترسن بەوەی كە هەڵەیەكیان كردووە، ئەوەتا سەوسەن كچێكی فەرمانبەرە، ئاماژە بەوە دەدات كە ماوەیەكی درێژ لەگەڵ كوڕێكی فەرمانگەكەیان پێوەندی خۆشەویستی هەبووەو دواتر ئەو كوڕە خیانەتی لێكردووەو نەیهێناوە، ئێستاش هەموو فەرمانگە بەو پێوەندییە دەزانن، ئەو كچە دەڵێت «زەندەقم چووە، ئەگەر كەسێك بێتە خوازبێنیم و لێرە لێم بپرسێ بێگومان رابردومی بۆ باس دەكەن و نایەوێم، بۆیە ئەو كچە دەڵێت «تەمەننا دەكەم كەسێك هەر لێم نەپرسێت».

شادان كەمال قوتابییە لەزانكۆی جیهان دەخوێنێت، ئەو لای وایە گەڕانەوە بۆ ڕابردوویان كێشەی گەورە بۆ كچان دروست دەكات، بەتایبەتی ئەو كچانەی لەدەرەوەی ماڵی خۆیانن، وەك قوتابیەكانی كۆلێژ، بەو پێیەی كە ئاستی رۆشنبیری مرۆڤەكان بەو شێوەیە نییە و ناتوانن هاوڕێیەتی یەكتر بكەن، هەمیشە بەدوای ئەوەوەن چۆن بتوانن سووكایەتی بەیەكتر بكەن و زەفەر بەیەكتر ببەن». ئەو قوتابیەی زانكۆ، هیواشی وابوو هەر كوڕێك بچێتە داخوازی كچەكە با بەدڵی خۆی بێت، نەك بەقسەی خەڵك هەموو شتەكانی لێ تێك بچێت».

كچێكی هاوڕێم بوختانی بۆكردم
ئیڤان جەمال، ئەوە دەخاتەڕوو كە ئیرەیی لە نێو كچان دەگاتە ئەو راددەیەی كە داخوازی لەیەكتر تێك بدەن، ئەو كچە باس لە خوازبێنییەكی خۆی دەكات، كاتێك خوازبێنی دێت كوڕەكە لە هاوڕێیەكی كچی نزیكی خۆی دەپرسێت، هاوڕێكەی «هەزار بوختانی بۆ هەڵبەستبووە». ئەو كچە دەڵێت «نازانرێت چیم بەرامبەر وترابوو، ئەگەر كچێك بەراستی كاری نابەجێی بكردایە لە من باشتر بوو». ئیڤان هۆكاری ئەوەی بۆ ئیرەیی دەگەڕێنێتەوە، جەخت لەوە دەكاتەوە كە ئیرەیی وای لەو هاوڕێیەی كردبوو ئەو قسانە بكات، ئەگەرنا خۆ منی دەناسی، مەبەستی چی بوو، بۆ لێمی تێكدا، چ سوودی بۆ ئەو هەبوو». ئیڤان هەروەها دەڵێت «دواتر پێم زانی هەزار قسەم بەو هاوڕێیەم وت و وتم ئەگەر من وابم تۆ لە من خراپتری ئەگەرنا بۆ لەگەڵ من دەگەڕێیت؟، لەگەڵ ئەوەش ئەو هەر ئینكاری كردو وتی: من وام نەوتووە، بەڵام كوڕەكە قسەكانی تۆمار كردبوو، هەمووی خۆم گوێم لێبوو“، هەروەها جەختی كردەوە كە «كچان بە هۆی ئیرەییەوە برادەرەكانیان ناشیرین دەكەن».

بەبۆچوونی دلڤین حەسەن توێژەری كۆمەڵایەتی، ئەوە دەگەڕێنێتەوە بۆ كەلتورێكی كۆنی بێ مانای نەشیاو كە هەموو سەرچاوەكان دەگەڕێنێتەوە بۆ بیرێكی دواكەوتوو، كە لەناخی خۆیەوە دەگەڕێتەوە بۆ سەرچاوەی قسەی كەسانی دیكە». ناوبراو ئەوەشی وت «ئەمە تەنیا لە كۆمەڵگە دواكەوتووەكان بوونی هەیە، ئەگینا ناگونجێت تۆ كەسێكت خۆش بووێت و بیكەیت بە هاوسەری دواڕۆژی خۆت، كەچی بێیت و بەدوای ڕابردووی بگەڕێیت و سەر لەخۆت و لەویش بشێوێنیت».