سوێندتان بۆ دەخۆم ئەم بەسەرهاتەی كە دەیگێڕمەوە؛ هێندەی تیژی نەشتەری برینسازێك بۆ دۆزینەوەی برینەكانی هەموو ئەو عاشقانەی كە قەدەر پێكیان ناگەیەنێت تیژو كاریگەرە، لەوەیە بپرسن ئەمە چ بەسەرهاتێكە؟؟

بەبیرم دێ تەمەنم دوازدە ساڵانێك دەبوو، بە بینینی ئەم ڕووداوە داچڵەكیم و لە هەموو ئەو كتێبانەی دواتردەمخوێندنەوە؛ زیاتر ڕوانینی منی بۆ خۆشەویستی و دنیابینی گۆڕی، لەوێندەرێ لە (گەڕەكی مەڵكەندی) كە پەڕسێلكەكان بە ئێواران ڕیتمێكی خۆشیان لە ئاسمان دەسوو، هێمنییەكی دێرین و میهرەبان باڵی كێشابوو بەسەر گوێسەبانەی خانووە دارینەكانی ئەو گەڕەكەدا كە خانووەكانی بۆنی تەڕایی گڵی هەبوو، لە كۆڵانێكیاندا كیژو كوڕێك لە دوو بەرە بابەوە بە پەرۆشییەكی بێ وێنەوە هۆگر بە یەكتری ببوون، كاتێك بە نهێنی و لە تاریكایی شەوێكی سپیدا یەكەمین باوەشیان بە یەكتردا كرد، شایەتحاڵی ئەو لە ئامێزنانەی هەردووكیان بووم، هەردووكیان لە خۆشییاندا فرمێسكیان لە چاواندا قەتیس ما و سوێندیان دەخوارد كە تا ماون یەكترییان خۆش بوێت، زۆر بەختیارو كامەران بووم كە دەمبینی ئەم دوو عاشقە بۆ ئەوینە میهرەبانەكەی خۆیان ورەیان بەرزە، هەستێكی پرشنگداری درەوشاوە نیگاكانمی دادەگرت، دیمەنی جێژوانەكانیان لە دوورەوە نیگاكانمیان بەلای خۆیاندا پەلكێش دەكردن و لە ناو حەسیركانی سەربانی ماڵی كیژەی بۆشناخدا وەك دوو كوكوختی بە گوێی یەكتردا دەیانچرپاند و دەخەنینەوە، بزە هاتە سەر لێوم، بەر لەمانیش بەبیرم دێت یەك جاری تر بزەی وا هاتبووە سەر لێوانم، ئەویش لە تەمەنی حەوت ساڵیمدا كە لەگەڵ كیژە پوورەكانمدا چووینە دەشتاییەكەی دامێنی تانكییە گەورەكەی تووی مەلیك و بۆ ئەو گژو گیایانە بزە هاتە سەر لێوانمان كە شنەی با شانەی دەكردن، لەو كاتەوە وەك نەرمە بای ئەو عەسرە ڕۆژە دڵم نەرم بوو، واماندەزانی تووی مەلیك بۆ ئێمەی منداڵ وڵاتێكی فەرامۆش و چۆڵ كراوە تا بەدوای پەپوولەكاندا هەڕابكەین، ئەو دوو پەپوولە عاشقەی گەڕەكی خۆمان زۆر جەسوورانە بوون، كلیان لە چاوانم دەدزی، كاتێك بەسەر دار تووەكەی حەوشەكەمانەوە لێم دەڕوانین، وامدەزانی ئەم دوو گیان و یەك دڵەی ئەو دوو رۆحە عاشقە بەسەر لەپە دەستی فریشتەكانی ئاسمانەوە تا ئەبەد پارێزراو دەبن، تا ئەو شەوەی شریخەی دەستڕێژێكی گوللە هەموو گەڕەكی لە سەربانەكانەوە بە ئاگا هێنا، كە كاتێك بیستم كوڕەی عاشق لە ناو خوێنێكی هەناریدا گەوزاوە وەختە بوو دڵم لە سینگمەوە بێتە دەرەوە، تومەز ئەو شەوەش وەك شەوانی تر نامەی لە قاوغە شقارتە نابوو تا لە بن دارێكی ناو باخچەی ماڵی كیژەی دابنێت و بۆ بەیانی زوو بەو وشانە عەترپرژێنی سەرخوانی دولبەرەكەی بكات، برایەكی كیژەكە كە بەردەوام كڵاشینكۆفێكی لە ژوور سەری خۆیدا دەخەواند، ئەو شەوە تارماییەكی هەست پێكردبوو كە بە ناو باخچەكەیاندا دێت و دەچێت، وای زانیبوو چەتەو دزێكە هاتووە بۆ زیان گەیاندن پێیان، چەند جارێك بۆی لە هاواردابوو، بەڵام كوڕە عاشقەكە ڕایكردبوو، ئەمیش پەنجەی نەزانانەی خستبووە سەر پەلەپیتكەی تفەنگ و ڕیزێك فیشەكی بۆ تارماییەكە ڕەوانەكردبوو، بەدحاڵی بوونی برای كیژەكە تاوانێكی نایەوەو هەواڵێكی جەرگبڕانەی بەهەموو شارەكە گەیاند، ئەو هەواڵە بۆ منیش سووتانی قەف قەفی لۆچەكانی شاخی گۆیژە بوو، كشانی ئەستێرەیەك بوو كە هەرگیز لە یادوەریم و لەبەر دیدم ناسڕدرێتەوە، چەند ساڵێك دوای ئەو ڕووداوە جارێكیان لە بۆنەیەكدا دانیشتبووین، كوڕێكی باریكەلەی درێژ باسی شتێكی كردو لە نكاوڕا وتی (ئەها ئەوێ ساڵێ كە لە ماڵی فڵان هەتیوەكەیان پێكابوو كە بۆ مێبازی ئاودیوی حەوشە ببوو)، هەرچەندە بە دەساڵێك لە من گەورەتر بوو بەڵام بەبەرچاوی باوكم و باوكی ئەویشەوە بە تووڕەیی و پڕئەوكی گریانەوە پێم وت (تۆ بوختانچیت)، ئەویش وتی (ئینجا تۆ بۆچی وا خۆت تێك ئەدەیت خۆ برای باوكت نییە)، لەو كاتەدا وەك بابەتێكی بەرهەست ڕۆچووبوومە ناو ڕابردوو، چونكە كاریگەری ئەو ڕووداوەم لێ تێنەپەڕی بوو، بۆیە خەریك بوو لەسەر زاری ئەو كوڕەعاشقەوە بەرگری لە عەشقێك بكەم، چونكە لەو دووانەوە ئیدی من فێربووم كە بێ بوونی عەشق لەسەر ئەم زەمینە ئەو گونجانەی نێوان بوونەوەرەكان كە پێویستە بۆ ژیان؛ تێك دەچن، ئەو گونجانە خودی سروشت و جیهانی یەكخستووە، هەرچی ڕەوشت و ئایین و كۆمەڵایەتی و ئابووری و زانست و فەلسەفەشە، هەموویان بە دروستكردنی دەمامكەوە خەریكن تا دەسەڵاتی عەقڵ بخەنەوە سەر رووخساری پڕ بەرائەتی عاشقێك كە بە ناسكی و لە دڵەوە دەڕوانێتە مەعشوقەكەیی و دنیای دەوروبەریشی، دەگمەنن ئەو مرۆڤانەی عەشقیان لە ناخدا نەڕوابێت، گەرچی زۆربەشیان ژێرلێوی دەخەن.