هاوڕێیەتی پێوەندیەكی كۆمەڵایەتی توندوتۆڵە لەسەر بناغەی خۆشەویستی و لێكگەیشتن و هەندێجاریش بەرژەوەندییەكی هاوبەش و دوولایەنە لەنێوان دوو كەس و هەندێجاریش زیاتردروست دەبێت. زۆر گرنگە ئێمە ئاگاداربین لە هەڵبژاردنی هاوڕێیەكانمان، چونكە لە كۆمەڵگە رەوشتی هاوڕێ لەكەسایەتی هاوڕێیەكەت بەدیار دەكەوێت، واتا زۆرجار خەڵك كەسایەتی مرۆڤێك لەسەر پێوەری رەوشتی هاوڕێیەكانی دیاریدەكەن و دەناسن. چونكە زۆرجار یەكێك مرۆڤێكی خاوەن رەوشتی باش بووە، بەڵام هاوڕێیەكی خاوەن رەوشتی خراپ بووە ئەویش هەر بە رەوشتی خراپ ناسراوە، بەهۆی ئەوە ئێمە دەبێت بزانین چۆن هاوڕێیەكانمن هەڵدەبژێرین هەروەها هاوڕێش چەند جۆرێكی هەیە، فەیلەسووفە كۆنەكەی یۆنان (ئەرستۆ) باسی سێ جۆرە هاوڕێیەتیمان بۆ دەكات كە ئەمانیش: هاوڕێی بەرژەوەندی كە پێوەندییەكە تەنیا بۆ سوود وەرگرتنە و بەس. ئەمە هاوڕێیەتییەكی كاتییە و بەنەمانی بەرژەوەندییەكە هاوڕێیەتییەكەش نامێنێت. ئەوەی دووەمیان هاوڕێیەتی تەنیا بۆ خۆشییە، ئەمەیان بە ئاسانی دەیدۆزیەوەو بەئاسانی لە دەستت دەڕوا. بەڵام سێیەمیان هاوڕێیەتی راستەقینەیە. ئەوەیە كە لەسەر بناغەی یەكسانی لە رەوشتی راستەقینەیی و پاكی و دڵسۆزی بنیاد دەنرێت. هەروەها (ئەرستۆ) ئاماژە بەوە دەكات ئەگەر هاوڕێتییەك هەرسێ مەرجی تێدا بوو، ئەوەی ئێمە مەبەستمانە هاوڕێیەتی ئێستایە وەكو دەڵێن پێوەندی هاوڕێیەتی زۆر لاواز بووە. هەندێك دەڵێن هاوڕێیەتی ئێستا تەنیا بۆ بەرژەوەندییە. بۆ ئەوەی بزانین پێوەندییە هاوڕێیەتییەكانی ئێستا لە ئاستێكدایە، با راوبۆچوونی چەند كەسێك وەرگرین و خوێنەران بە بۆچوونەكانیان ئاشنا بكەین..

كە دەڵێین رۆژانە گوێبیستی ئەوە دەبین هاوڕێیەتی راستەقینە نەماوە و تەنیا بۆتە بەرژەوەندی، بابزانین ئەم هەڵسەنگاندنە تا چەند راستە، (بەختیار حەمەدەمین) وەڵامی ئەم پرسیارە دەداتەوە و دەڵێ «بەڵێ راستە هاوڕێیەتی ئێستا وەك جاران نەماوە، ئەگەر ماشبێت تەنیا بۆ كات بەسەربردنە. لەزۆر بارودۆخدا تەنیا بۆ بەرژەوەندییە. بەخۆمان رۆژانە ئەوە ئەزموون دەكەین كە زۆر برادەر هەن هەتا كاری پێتە دەتناسێت پاشان كە كاری پێتنەما ئیدی هەر ناشتناسێت. هاوڕێیەتی پێشتر باشتر بوو، ئەو وەختی زیاتر هاتووچۆی یەكتریان دەكردو خەمی یەكیان بوو هاوڕێی گیانی بە گیانی بوون، بەڵام ئێستا ئەو جۆرە هاوڕێیەتییە نەماوە.
دواتر (هونەر عەبدوڵڵا) بەپێچەوانەی رای بەختیار پێیوایە هاوڕێیەتی ئێستا زۆر پتەوترە لەچاو زەمەنی رابردوو، چونكە هاوڕێیانی ئێستا زیاتر بەوەفاترن. هەروەها لەكاتی دروستبوونی هەر بارودۆخێكی ناهەموار، ئەوا هاوڕێیەكان ئامادەن هاوكاری یەك بكەن. سەبارەت بەوەی ئایا هاوڕێیەتی ئێستا تەنیا بۆ بەرژەوەندییە. ئەو وتی: تەنیا دەتوانم وەكو شەخسی خۆم قسەبكەم دەڵێم نەخێر بۆ بەرژەوەندی نییە بەڵام لە كەسێكەوە بۆ كەسێكی تر دەگۆڕێت، ئەگەر خودی ئەو كەسە باشبێت، ئەوا هاوڕێیەكەشی لەگەڵی باش دەبێت.
(بڕیار تەها)ش بۆچوونی وایە كە دەبێت پێش ئەوەی لەگەڵ یەكێك برادەرایەتی پەیدا بكەین، دەبێت ئەو كەسە بەهەموو شێوەیەك تاقی بكەینەوە و پرسار لەكەسانی دەوروبەری بكەین لەبارەی كەسایەتیەوە ئایا شیاوی ئەوەیە بیكەیتە هاوڕێی خۆت یا نە. هەروەها درێژە بەقسەكانی دەدات و دەڵێ: زۆر بەداخەوە بۆ گەنجی ئێستا بەبێ ئەوەی یەكێك باشبێت پێوەندی هاوڕێیەتی لەگەڵ دروستدەكات. ئەمەش بەڕای من زۆر هەڵەیە و هەر ئەمەش وایكردووە بڵێین هاوڕێیەتی ئێستا تەنیا بۆ كات بەسەربردنە و هیچی تر، وەكو خۆم باوەڕبكەن هاوڕێی وام هەیە كە یەكێكە لە كەسە نزیكەكانم، چونكە لە كارە خراپەكان ئاگادارم دەكاتەوە و لە كاری باش نزیكم دەكاتەوە و ئامۆژگاری یەكدیش دەكەین بێئەوەی هیچ بەرژەوەندیەكمان پێكەوە هەبێت.
خاتوو (كەژاڵ تەحسین) سەبارەت بە هاوڕێیەتی لەناو كچان وتی «هاوڕێیەتی ئێستا پێوەندییەكی زۆر خراپە، چونكە زۆرجار گوێبیستی ئەوە بووینە دوو كەس هاوڕێی یەك بوونە و یەكێكیان ئەوی تریان فێری بەدڕەوشتی و كاری خراپ كردووە. بۆیە دەبێت كچ بزانێت چۆن چۆنی هاوڕێ بۆ خۆی پەیدادەكات و هەڵیدەبژێری. هەروەها گرفتێك هەیە لەلای كچان ئەویش ئەوەیە زۆر كچ هەن خۆش باوەڕن زوو باوەڕ بە هەموو كەسێك دەكەن و هاوڕێی باش و خراپ لێك جیاناكەنەوە، چونكە زۆر هاوڕێش هەیە تەنیا ئەو كاتانە لەگەڵتە كە كاری پێتە. هەروەها لە دوا قسەكانیدا وتی: بۆ كچان پێوەندی هاوڕێیەتی ئێستا بەهێزترە، چونكە پێشتر كچ نەدەبوو هاوڕێی هەبێت، بەڵام ئێستا زۆر ئاساییە.
لە كۆتاییدا خاتوو (دالیا دەشتی دزەیی) مامۆستای دەروونی و سەرۆكی رێكخراوی خزمەتگوزاری دەروونی بەم شێوەیە سەبارەت بە هاوڕێیەتی ئێستا دوا» ئێمە ناتوانین بڵێین هاوڕێیەتی لەم سەردەمە لاوازە، چونكە ئامار و راپرسیمان لەم بوارەدا نەكردووە، بەڵام ئێستا ژیانی كۆمەڵایەتی زۆر فراوان بووە و خەڵك زوو پێوەندی دروستدەكەن لەگەڵ خەڵكانی تر، بۆیە زۆر خەڵك دەناسی و لەوانەیە هەندێكجار هاوڕێیەتی جیا نەكاتەوە لە شتی تر و هەندێكجار هاوڕێیەكان خەریكی ژیانی خۆیان دەبن و لەوانەیە نەتوانن هەموو جار پێوەندی بكەن لەگەڵ یەكتر بۆیە خەڵك وادەزانن كە هاوڕێی ئێستا ئاگاداری یەكتر نینە. هەندێكجار خەڵك ناسین لە كاتێكی كورتدا وادەكات بەباشی لەیەك شارەزا نەبن، بۆیە رەنگە ئەمە ببێتە هۆی لێكحاڵی نەبوون و نەگونجان، بۆیە دەبێت ئێمە بەباشی شارەزایی خەڵك ببین ئینجا متمانە بكەین بە یەكتر. ئێستا كارو مەشغەڵەت زۆر بووە و خەڵك پێویستی بە خەڵكانی ترە بۆ راپەڕاندنی ئیش و كار، بۆیە دەبینی كە یەكێك ئیشی پێتە خۆی لێت نزیكدەكاتەوەو بایەخت پێدەدات، بەڵام ئەمە هاوڕێیەتی نییە، چونكە نابێت لەنێوان هاوڕێیەكان تەنیا بەرژەوەندی یەكێك لەبەرچاو بگیرێت و ئەوەی تر فەرامۆش بكرێت، بەڵكو دەبێت هەردوو لایەن بایەخ بەیەكتر بدەن و سوود لەیەكتر وەرگرن.
مامۆستا پێیوایە قسەی دەوروبەر كاریگەرە، بەڵام لەگەڵ ئەوەشدا دەوەستێتە سەر ئەو كەسە، بۆیە دەڵێ: ئەمە رادەوەستێتە سەر كەسایەتی مرۆڤەكە كە تا چ راددەیەك گوێ دەداتە قسەی خەڵك، ئەگەر هاتوو تۆ متمانەت بە هاوڕێیەكەت هەبوو، نابێت گوێ بدەیتە قسەی دەوروبەرت، چونكە تۆ لە ئەو نزیكی و لێی تێدەگەیت نەك خەڵكانی تر. ئەگەر تۆ متمانەت بەخۆت هەیە و متمانەت بە هەڵبژاردنەكەت هەیە پێویستە گوێ نەدەیتە قسەی خەڵك. جا بۆیە ئێمە دەبێت ئاگادار بین لەكاتی هەڵبژاردنی هاوڕێیەكانمان و تێبگەین لە بیروڕای یەكتر ئینجا ببین بە هاوڕێ و ئینجا لەیەكتر دەگەین و هاوسەنگی و یەكسانی هەیە لە بیروڕامان تا راددەیەك، خۆ ئەگەر هاتوو هەندێكجار جیاوازی هەبێت لە بیروڕامان، دەبێت رێز لە جیاوازییەكانمان بگرین.