تا لە بەندیخانە ئازاد كرا قیڕسپی بوو
(بەهزاد) كە لە كونجێكی بەندیخانەدا و بەدەم خەم و خەفەتەوە، توند توند مژی قووڵی لە جگەرەكەی دەدا و دوكەڵەشی بەبا دەكرد، خەیاڵ بردبوویەوە و ئەوەی بە چاوی خۆی دەیدیت باوەڕی نەدەكرد و لە دڵی خۆیدا دەیوت: كوڕە بابە وەڵڵا بە هەڵەدا چووینە باشە قابیلە نەزانن ئەمن ئەو بەهزادە نیمە كە كەتنەكەی كردییە؟ ئەمن لە كێ و پڕدانە كچی خەڵكی لەكێ!! سەیر لەوەدایە برا گەورەكەی لەكنە خوا بی زەلامەكی عاقڵە، كەچی بەمن دەڵێ: راوەستە بۆم شەرتبی دەبی لە بەندیخانەت بتڕزێنمەوە هەی ناكەس بەچە، لات وایە نامووسی خەڵكی فشەیە.. من لە چ حاڵێكدا بووم و كاكیشم لە چ حاڵێك، ئاخر كابرا دەجارێ بەملی شكاوت سەبرەكی بگرە بزانین دادگا چ دەڵێ. (بەهزاد) لەو تێفكرین و خەیاڵاتانەدا بوو كە چاودێری هۆڵەكە پڕ بە دەنگی خۆی هاواری كرد كە (بەهزاد) پاش چەند خولەكێك خۆی كۆبكاتەوە و بێتە دەرێ بۆ پێش دادوەر. (بەهزاد) بەخەمباری و دڵتەنگی سەری بادا و وتی: وابزانم تا دادگا تاوانباری راستەقینە دەستگیر دەكات پێستم دەچێتە دەباخانە. بەهەرحاڵ (بەهزاد) خۆی ساز كرد و دوای نیو كاتژمێر لە بەردەم دادوەر ئامادە كرا، دادوەر لێیپرسییەوە: تۆ ئەوە هەفتەیە كەلێتدەپرسم هەر دەڵێی نازانم و ئەمن نیم. ئەی باشە كێ وای لەم كچە كردووە؟ (بەهزاد) سەرسوڕمانی خۆی لە پرسیارەكەی دادوەر نیشاندا و وتی: جەنابی دادوەر ئێوە لە ختوخۆڕایی منتان گرتووە، ئەوە چەندین جارە هەر ئەو پرسیارە لەمن دەكەنەوە، باشە خۆ تاوان دانە پاڵخۆ بەزۆر نییە، ئێوە كە بەڵگەیەكتان لەسەر من نییە كە من ئەم تاوانەم كردبێ ئەوجا لێشم دەپرسن كێ ئەو تاوانەی كردییە، كە بەخۆتان نەزانن منی قوڕبەسەر لەكێ بزانم..؟ دادوەر بڕیاری دا دووبارە ببرێتەوە بەندیخانە. (بەهزاد)یان لۆژ لۆژ هێنایەوە بەندیخانە، برادەرەكانی لە دەوری كۆبوونەوە و لێیانپرسی ها چیبوو، ئەویش خەندەیەكی تەوساوی بۆ كردن و وتی: كوڕە بابە لە نێوچەوانم نووسراوە، سەرم لە ناو ئەو بەندیخانەیە سپی بكەم دەنا قوڕبەسەری وەك من ئەوەندە بەدبەخت دەبوو. ئاخر بڵێ بۆ تەنها ناوی من ئەوها دەرچوو. هەفتەی دووەم دیسان (بەهزاد)یان بردەوە لای دادوەر، ئەمجارە كچەكەشیان هێنابووە بەردەم دادوەر رووبەڕوو لەبەرامبەری راگرت و دادوەر لێپرسی ئایا ئەوە هەوە؟ كچە ئەمجارە وتی: نا، (بەهزاد) كە تا ئەو كاتەش هەر بە بێموبالاتی تەماشای كچەی دەكرد، كە گوێی لەم وشەیە بوو یەك بەخۆی هاواری لێهەڵساو وتی: هێ جەنابی دادوەر ئەها بە هۆش خۆی هاتۆتەوە، چموت نەموت ئاگای لە خۆی نییە، بۆیە لەهیچ و خۆڕایی بەملی منی داهێناوە. نەموت ئەو كچە زراوی رژایە و لە ترسان فكری تێكچووە. پتر لەنیو كاتژمێر مانەوە، دووبارە (بەهزاد) فڕێدرایەوە بەندیخانە. دادگا بڕیاریدا كچە بنێردرێتە لیژنەی پزیشكی. دوای دوو هەفتە وەڵامی لیژنەی پزیشكی هاتەوە كە ئەم نەخۆشە ماوەیەكە لەژێر كاریگەری زەبرێكی دەروونی دایە و دووچاری شۆك بووە، بەڵام وا وردە وردە بەرەو چاكبوونەوە دەچێ و ئیستا حاڵی باشە. (بەهزاد) دیسان بانگ كرایەوە و هەمان لێكۆڵینەوەی جارانی لە تەك كرایەوە، دوای ئەوەی دادگا بۆی روونبۆوە كە تاوانباری راستەقینە (بەهزاد) نییە، دادوەر بڕیاری دا كە ئازاد بكرێت. (بەهزاد) كە گوێی لە بڕیاری دادوەر بوو هیچ شتێكی نەوت و نەكرد. دادوەر سەری سورسوڕما و پێی وت: چییە دڵت خۆش نییە ئازاد كرای؟ (بەهزاد) وتی: جەنابی دادوەر، ئەوجا دڵم بەچی خۆش بی، خۆ من وا لە بەندیخانە راهاتووم و هۆگری ئەوێ بوویمە و من و زۆری وەكو منیش هەیە لە سەر تاوانێك كە نەمانكردووە لە كونجی بەندیخانە نراوین و ئازادیش ناكرێین ئەوە چییە جارێ تاوانباری راستەقینە نەگیراوە.

ئەی تاوانباری راستەقینە كێ بوو؟
پاش دەردەسەرییەكی زۆر ئەوجا (بەهزاد) ئازاد بوو، خەفەتی ئەو و كەسوكارەكەی ئەوە بوو (بەهزاد) ئەو رۆژە بەڕێكەوت بەو شوێنە داچووە كە تاوانەكەی لێڕوویدا. ئەسڵی رووداوەكەش بەم شێوەیە بوو: رۆژێك دەمە دەمی پاش نیوەڕۆ بوو، كچێك كەناوی (گزنگ) بوو، كچێكی تا بڵێی جوان و نازدار بوو، لە ماڵ هاتۆتە دەرەوە لەو كاتەش شێتێك بەوێ دادێت و چاوی پێیدەكەوێت، پڕی دەداتێ، كچەی لەبنەخۆ دەنێت و بە ئامان و زەمان بەرینادات. بەڕێكەوت (بەهزاد)یش رێی بەوێ دەكەوێت، ماڵی (بەهزاد) كۆڵانێك لە ماڵی كچە دوور دەبێت، رێكەوتە سەیرەكەش لەوەدایە كە (بەهزاد) یەكێك بوو لەوانەی كە زۆر شێت و شەیدای كچە بوو، ئەوجا كە بەوێ دادێت و شێتەكە دەبینێ، پڕدەداتە شێتەكە و دەكەوێتە سەری و تێروپڕی لێدەدات، شێتەكەش لە تاوی روحی خۆی، یەك بەخۆی رادەكات و وەك بروسكە خۆی بزر دەكات و كچەش لە ترسان دەبوورێتەوە، ئیتر خەڵك و كەس و كاری كچە دێنە دەرێ، كە ئەم وەزعە دەبینن چاویان دەچێتە پشتی سەر و بێپرسیار و وەڵام دەكەونە گیانی (بەهزاد) و تێر و پڕی دەكوتن. ئینجا هەر بەو حاڵەشەوە ئاگاداری پۆلیس دەكەنەوە گوایە بەسەر تاوانەوەیان گرتووە و پۆلیسیش راپێچی بنكەی دەكەن و دوای لێكۆڵینەوە كردن لەگەڵی پەڕاوەكەی رەوانەی لای دادوەری ئێشكگر دەكەن و ئەویش بێسێ و دوو رەوانەی بەندیخانەی دەكات تا بەیانی. ئەو هەموو ماوەیەش كە لەبەندیخانە دەهێڵدرێتەوە هەر لەبەر ئەوە بووە، چونكە لەلایەك كچە لێیتێكچووبوو لەلایەكیش شێتەكە كە تاوانبارەكە بوو دەستگیر نەكرابوو. بەهەرحاڵ كاتێك كە هەموو شتێك بۆ دادگا و بۆ خێزان و كەسوكاری كچە ئاشكرا بوو، لە شەرمان نەیاندەزانی چ بكەن و چ بڵێن، بۆیە هەر بۆ گەردن ئازادی و قەرەبوو كردنەوەی ئەوەی كە بە هەڵە كراوە شەوێك ماڵی كچە هەواڵ بۆ ماڵی (بەهزاد) دەنێرن كە دەچنە میوانیان، ئەوانیش ئامادەیی خۆیان دەردەبڕن كە سەرەڕای هەموو شتێكیش ئامادەی پێشوازیانن. كە دەبنە مێوانیان و داوای لێبووردن و گەردن ئازادیان لێدەكەن (بەهزاد) دەڵێ: بەخوا تازە ئەو ماوە دوور و درێژە گیراوە بەهیچ شتێك قەرەبوو نابێتەوە تەنیا بەشتێك نەبێ ئەوانیش دەڵێن ئامادەی هەموو جۆرە قەرەبوویەكین. ئەویش دەڵێ: خۆ ئێستا هەموو لایەك بۆی دەركەوت كە ئەو كەتنەی كە روویدا من نەبووم، ئەوانیش دەڵێن وایە، (بەهزاد)یش دەڵێ: دەباشە وەڵڵا ئامادەم دیسان بچمەوە بەندیخانە بەس كچەكەم بدەنێ. هەموو دەدەنە قاقای پێكەنین و مامۆستای مزگەوتەكەی گەڕەكیش كە لەگەڵیان دەبێ دەڵێ: ئەشەدووبیلا موستەحەقی خۆیەتی بیدرێتی. ئیتر دەیكەنە رەسمیات و رەزامەندی نیشاندەدەن لەسەر پێشكەشكردنی كچە بە (بەهزاد)..