خانمە هونەرمەند نارین فەقێ بەردەوامە لە كار كردن لەسەر نوێترین بەرهەمی خۆی بە ناوی (زمانێ داێی) كە تا رادەیەك جیاوازە لە بەرهەمەكانی پێشووتری، جیاوازییەكەش لە ئاواز و تێكست و لە هەموویشی گرنگتر ئەو پەیامەی كە دەیەوێ لە رێگای ئەو بەرهەمەوە بیگەیەنێت، كە زیاتر مۆركێكی نەتەوەیی لە خۆ گرتووە و هەوڵێكە بۆ پاراستنی زمان و زاراوە كوردییەكان و ئاشنا بوونی رۆڵەكانی كورد پێیان.
بۆچی (زمانێ داێی)؟
هەڵبژاردنی ناو بۆ بەرهەم یەكێكە لە كارە سەختەكان بۆ هونەرمەند، نارین دەربارەی ناوی بەرهەمە نوێیەكەی دەڵێ: «زمانێ داێی» یەكێكە لە گۆرانییەكانی بەرهەمە نوێیەكەم كە لە پەیڤی شاعیری هێژا ئەدیب چەلكی وئاوازی میهاد عەلییە، لە هەر ئەلبوومێكدا من حەز دەكەم وەك هونەرمەند و رۆشنبیر بابەتی جیا بەكاربهێنم، لە ئەلبوومی (هیڤی)دا گۆرانی (هێڤی)م گوت بۆ بەرگری كردن لە ماف و ئازادی ئافرەتی كورد، (زمانێ داێی) و زمانی نەتەوەیی مافێكی كلتووری و نەتەوەییە، گەنج و لاوەكانمان پێویستە فێرە زمانی كوردی بن و زاراوەی كوردی بزانن و شڕۆڤەی بكەن، چونكە زمانی كوردی زەنگینە، جیاوازی ئەم بەرهەمە لەگەڵ بەرهەمەكانی پێشووتر ئەوەیە حەز دەكەم بە تەكنیكی بەهێز و ستایلی نوێ و ئامێری موزیكی جیاواز خزمەتی هونەری و ئەدەب و كلتوری كوردی بكەم، ئەگەر هیچ گرفتێك تەكنیكی دروست نەبێت ئەوا لە كۆتایی ئەم ساڵدا بەرهەمە نوێیەكەم بڵاو دەكرێتەوە.
وەك زۆربەی بەرهەمەكانی دیكەشم ئاوازەكانی ئەم بەرهەمە كوردین و گۆرانییەكانیش هەموویان نوێن، ئاوازەكانیش زیاتر لەو جۆرانەیە كە بە فۆلكلۆر دەناسرێن.
دەمەوێ منداڵانی كورد شارەزای
زمانی كوردی و زاراوەكان بن
نارین فەقێ دەڵێ: شاعیری هێژا ئەدیب چەلكی هەر لە سەرەتای پرۆژەی ئەم بەرهەمە نوێیەوە تا ئەمڕۆ هاریكاری كردووم و 3 گۆرانی ئەلبوومەكە لە شیعرەكانی ئەوە، كاك ئەدیب كەسێكی رۆشنبیر و خاوەن زانیاریی زۆرە دەربارەی شیعر و ئەدەبیاتی كوردی، زۆر خۆشحاڵ بووم بۆ ئەم هاوكارییەی، هەروەها زۆر سوپاسی خاتو روندك بامەڕنی دەكەم دەكەم كە زۆر هاریكاریان كردم و پشتیوانم بوون لەو ئەلبوومە و مرۆڤ رۆشنبیرن و زۆر حەز دەكەن هونەری كوردی پێشكەوێت، نارین هەروەها دەڵێ: منداڵانی كورد تا ئەمڕۆش لە هەر چوار پارچەی كوردستان بە زمانی كوردی قسە ناكەن و زاراوەكان نازانن، بۆیە حەز دەكەم لە هەر ماڵێكی كورد دایك و باوك و منداڵ، دۆست و برادەرانم گوێ لە گۆرانی (زمانێ داێی) بگرن و زاراوەی كوردی بزانن، هەروەها لە رێگای ئەم گۆرانییەوە بزانن، لە دیرۆكی كورددا كێ زمانی كوردی هێناوەتە بوون و كێ لە شاعیرە نەمر و نووسەرە گەورەكانی كورد زمانی كوردی نووسیوەتەوە بۆ نموونە: بابا تاهیری عوریانی، مەلای جزیری، ئەحمەدی خانی، عەلی حەریری،فەقێی تەیران، و زۆر لە نووسەرانی تری نەمر كە خزمەتی نووسینەوەی زمانی كوردییان كردووە.
نارین پێی وایە زمانی كوردی جۆرێك شپرزەیی پێوە دیارە، بۆیە دەڵێ: زۆر پێم ناخۆشە كە زمانمان جودا و شپرزە بووە، بۆ نموونە كوردانی دەڤەری سۆران، رۆژهەڵات و باشوور، رۆژئاوا زاراوەی زازاكی تێناگەن، ئەمە گرفتێكە گەورەیە بۆ پاشەڕۆژی كەلتوور و ئەدەبی كوردی، بۆیە پێویستە ئێمە وەك یەك زمان سەیری زمانی كوردی بكەین و نابێ ئەوەش لە بیر بكەین كە زمانی لاتینی كوردی ئاسانترین شێوەی نووسینە بۆ زمانی كوردی لە پاشەڕۆژدا، هەروەها نووسین بە پیتی كوردی لاتینی ئاسانترە بۆ بێگانە و بۆ ئەو كوردانەی لە وڵاتانی دەرەوە ژیان بەسەر دەبەن، بۆ نموونە لە ئەوروپا مندالأ و گەنجی كورد هەن كە لە نووسین بە پیتی عەرەبی تێناگەن جگە لەوە مخابن كە ترسی ئەوە هەیە نووسین بە پیتی لاتینی لەبیر بكرێ.
نارین پێیوایە زۆر زەحمەتە هونەرمەندان بتوانن ئەم كارە بكەن و دەڵێ: ئەمە كێشەیەكی سیاسییە و پێویستە پەرلەمان و سیاستەتمەداران بڕیار بدەن كە نووسینی كوردی بكرێت بە پیتی لاتینی بەشێوەیەكی فەرمی، بەمەش جیاوازی كەم دەبێتەوە، چونكە ئەگەر بە فەرمی زمانی نووسین بكرێتە لاتینی ئەو كات خەڵكی ئەوروپا و ئەمریكا كە نووسینیان بە زمانی لاتینییە دەتوانن فێرە زمانی كوردی بن و بیخوێنن، بۆ نموونە ئێستا لە زانكۆی سوید زمانی كوردی بە پیتی لاتینی دەخوێندرێت و لەبەر ئەوەی هەر كەسێك دەتوانێت بیخوێنێت، پێویستە ئەوە لەبەر چاو بگیرێ كە نووسین بە زمانی لاتینی گرفتەكانی زمانی كوردی كەم دەكەنەوە، بەڵام هەموو كەسێك ناتوانێت بە پیتی عەرەبی بیخوێنێت.
هەر هونەرمەندێك ستایلی تایبەتی خۆی هەیە
دەربارەی ئافرەتە هونەرمەندەكان نارین فەقێ دەڵێ: من پیشتریش گوتوومە هەر هونەرمەندێك ستایلێكی تایبەتی خۆی هەیە، بەڵام هونەری رەسەن لەلای من ئەوەیە كە هونەرمەندێك (ئافرەت و پیاو) بتوانێت تێكستی جوان، ئاوازی كوردەواری زیاتر لە كارەكانیدا بەكار بهێنیت وەك خزمەت كردنێك بۆ هونەر و كلتووری كوردی، نارین هەروەها دەڵێ: تا ئەمڕۆش موزیكی كوردی لەلایەن تورك و عەرەب و فارسەوە دەدزرێت بۆیە پیویستە ئێمە وەك هونەرمەند پشتگیری لەوە بكەین كە گۆرانی فۆلكلۆر و رەسەنی خۆمان قەت لە بیر نەكەین و وابكەین لە دڵ و مێشكی رۆڵەكانیشماندا زیندوو بمێنێتەوە.