نەخۆشیی سیل Tuberculosis نەخۆشییەكی بەكتریایی گوازراوەیە، زیاتر دوچاری سییەكان دەبێت، لەوانەشە ئەندامەكانی دیكەی لەش بگرێتەوە، نیشانە سەرەكییەكانی بریتین لە: كۆكە كە بۆ ماوەی سێ هەفتە، یان زیاتر بەردەوام دەبێت، خوێن لەگەڵ دەردراوی كۆكەدا، سینگ ئێشە، كەمبوونەوەی ئارەزووی خواردن و دابەزینی كێشی لەش، هەستكردن بە ماندووبوون و هیلاكیی جەستەیی، بەرزبوونەوەی پلەی گەرمیی لەش، ئارەقەكردنی شەوانە. نەخۆشیی سیل هاوشێوەی كۆڤید19 بە شێوەیەكی سەرەكی دوچاری كۆئەندامی هەناسە دەبێت، بەكتریای نەخۆشیی سیل و ڤایرۆسی كۆرۆنا بە رێگای پروشك و دەردراوەكانی كۆئەندامی هەناسە، بەتایبەتی كۆكە و پژمین و قسەكردن دەگوازرێنەوە. بەكتریای سیل و ڤایرۆسی كۆرۆنا كاریگەریی خراپ و هەندێك جاریش هەمیشەیی دەكەنە سەر خانەكانی سییەكان، بێگومان هەردووكیان بەیەكەوە كاریگەریی خراپتر و ئاڵۆزیی زیاتریان دەبێت، هەر لەبەر ئەمەشە كە پێویستە تووشبووانی نەخۆشیی سیل بەر لە نەخۆشانی دیكە ڤاكسینی كۆڤید وەربگرن. ئەوەش روونكراوەتەوە كە وەرگرتنی ڤاكسینی كۆڤید لە لایەن نەخۆشانی سیل زۆر سەلامەتە و هەرگیز نابێتە ئەگەری ئاڵۆزیی پەیوەست بە ڤاكسین، یان خودی نەخۆشیی سیل.
