لە لێکۆڵینەوەکان لە چین و ئیسپانیا و ئیتالیادا هاتووە کە ئەگەری تووشبوونی پیاو بە ڤایرۆسی کۆرۆنا لە ئافرەت زیاترە، هەروەها بەڵگەی زانستی لەبەردەستدایە کە ئەگەری مردنیش لە پیاوانی تووشبوو بەرزترە، بۆنموونە بە پێی ئامارە پزیشکییەکانی چین ئەگەری مردن لە پیاوانی تووشبوو دەگاتە دەوری 2.8%، کەچی لە ئافرەتانی تووشبوودا دەگاتە 1.7%. توێژەرانی چین و ئیسپانیا جەختییان لەمە کردۆتەوە کە توانای سستمی بەرگریی لەشی ئافرەت بەرزترە بۆ زاڵبوون بەسەر ڤایرۆسی کۆرۆنادا بە بەراورد لەگەڵ سستمی بەرگریی لەشی پیاو. لێکۆڵەران ئاماژەیان بەمە کردووە کە ستایلی ژیان و بایۆلۆژیی لەش هۆکارن بۆ بوونی ئەم جیاوازییەی نێوان پیاو و ئافرەت، هەورەها فەرامۆشکردن و گرنگی نەدان بە نیشانەکان لە لایەن پیاوان هۆکارێکی تری زیادبوونی مەترشی ڤایرۆسی کۆرۆنایە، ئەمە جگە لە گرنگی نەدان بە هەنگاوەکانی خۆپاراستن.