شیرەی ترێی رەش یان مۆری تۆخ Dark purple grape juice بە باشترین شیرە بۆ دڵ دادەنرێت چونكە رێژەیەكی بەرز لە ماددە پۆلیفینۆلەكان Polyphenols لەخۆدەگرێت كە سیفەتی دژەئۆكسانی بەهێزیان هەیە و رۆڵیان هەیە لە پاراستنی خوێنبەرەكاندا بەتایبەتی خوێنبەرەكانی تاجی دڵ Coronary arteries، بەمەشەوە لێشاوی خوێن بۆ ماسوڵكەی دڵ باشتر دەبێت. ئەركی ماسوڵكەی دڵ لە ئەركی هەموو ماسوڵكەكانی تری لەش زیاتر و قوڕسترە، دڵ رۆژانە نزیكەی 2،000 گالۆن خوێن بە درێژایی 60،000 میل لەناو لوولەكانی خوێنی لەشدا پاڵ دەنێت. ئەو ماسوڵكەیەی كە رۆژانە نزیكەی 100 هەزار جار بە درێژایی تەمەن گرژ و خاو دەبێتەوە، بەردەوام پێویستی بە ئۆكسجین و خۆراك بە بڕی تەواوەوە هەیە. گوشینی ترێ رەشی تازە بەبێ زیادكردنی شەكر یان بۆیە ئەو ئامانجە دەپێكێت نەك شیرەی ترێی دەستكرد كە بە بۆیە و شەكر و ماددەی كیمیایی دروست دەكرێت و هیچی سروشتی نییە.