فرمانی سیستمی بەرگری لەش Immune system بریتییە لە پاراستنی لەش بەرانبەر بە ڤایرۆس و بەكتریا و مشەخۆرەكان، هەر لە هەڵامەتەوە بگرە تا دەگاتە نەخۆشییەكانی دڵ و نەخۆشی ئەلزهایمەر Alzheimer’s disease. بەهێزكردنی سیستمی بەرگری لەش یەكێكە لە رێگەكانی خۆپاراستن لە نەخۆشییە مەترسیدارەكان. لە لێكۆڵینەوە پزیشكییەكاندا هاتووە كە خۆراكی تەندروستییانە رۆڵی گرنگی هەیە بۆ بەهێزكردنی سیستمی بەرگری لەش و بەرەنگاربوونەوەی ماددە یان كۆلكە سەربەستەكان Free radicals كە نەخۆشی پەیدا دەكەن. ئەو خۆراكانەی كە رێژەیەكی بەرز لە ماددە دژەئۆكسانەكان لەخۆدەگرن یارمەتیدەرن بۆ بەهێزكردنی بەرگری لەش دژی بەكتریا و ڤایرۆسەكان. بۆ ئەم مەبەستە دانەوێڵەی تەواو، سەوزە و میوە جۆراوجۆرەكان گرنگی زۆریان هەیە. سوپی سەوزەی جۆراوجۆری كەمخوێ، چای سەوز، میوە و شیرەی میوەی سروشتی، برۆكۆلی، تەماتە، مەحار Oyster، كوارگ، پیاز، سیر، دەنكی كەتان Flax seeds، پەتاتەی شیرین، هەروەها بیبەرە جۆراوجۆرەكان خۆراكی ترن كە رۆڵی بەرجەستەیان هەیە بۆ بەهێزكردنی سیستمی بەرگری لەش.