زۆربەی لاوازەكان گرفتی گەورەیان ئەوەیە كە بەهەر ڕێگایەك بێت چەند كیلۆگرامێك كێشی لەشیان زیاد بكەن، گەلێگیان پەنا دەبەنە بەر بەكارهێنانی دەرمانی دیكسۆنK گوایە سروشتییانە قەڵەویان دەكات، كە هەرگیز ڕێگایەكی ڕاست و تەندروستییانە نییە. بەڵام ئەگەر دەتەوێ كێشی لەشت زیادبكەیت، ئەمە تەنیا بە خۆراك ئەنجام نادرێ بەڵكو ئەم مەسەلەیە بەندە بە باری دەروونی و تەندروستی گشتی، خۆراك، جوولەی بەدەنی رۆژانە. پێش ئەوەی پەیڕەوی ڕژیمێكی تایبەتی خۆراك بكەیت دەبێ بەووردی پەیڕەوی ئەم چوار خاڵەی خوارەوە بكەیت: یەكەم: ئایا تۆ لە ڕاستیدا لاوازیت بەگوێرەی درێژی باڵا و تەمەنت؟ ئایا تۆ بەڕاستی دەتەوێ قەڵەو بیت؟ زۆر جار بیری لێبكەوە ئینجا بڕیاری لەسەر بدە. دووەم: دەبێ بەتەواوی دڵنیا بیت لەوەی كە ئەم لاوازییەت لەبەر هیچ نەخۆشییەك نییە و باری دەروونیت جێگیرە. ئەگەر دڵنیانیت پێویستە كە خۆت پیشانی دكتۆر بدەیت. سێیەم: دەبێ بەتەواوی لەوە دڵنیا بیت كە خۆراكی ڕۆژانەت هاوسەنگە واتە بڕی تەواو لە پڕۆتین، كاربۆهایدرات، ڤیتامینەكان و چەوریەكان لەخۆدەگرێت. چوارەم: ئایا هاوسەنگی هەیە لەنێوان بڕی خۆراك و بەكارهێنانی وزەی لەشت؟ واتە چۆن و كەی خۆراك دەخۆیت و كەی دەكەویتە كار یان جوولەی بەدەنی.
