زۆرجار دەبینین كە گەنجێك لەوكاتەی كە بە پێپیلكەكان بۆ نهۆمی دووەم یان نهۆمی سێیەمی باڵەخانەیەك سەر دەكەوێت، لە پڕێكەوە بۆ ماوەیەكی كورت دەوەستێت و دەڵێ ((ئاخ ماندوو بووم، هەناسەم تەنگبوو))، ئینجا ساڵ لە دوای ساڵ ئەم گەنجە كە بە پێپیلكەكان سەردەكەوێت زیاتر سەخڵەت دەبێت و هەناسەی خێرا و كەمێكیش تەنگ دەبێت و ناچار دەبێت كە لەنیوەی رێگەدا پشووێك بدات، ئینجا تا دێت لای ئەم گەنجە گەیشتن بۆ نهۆمی دووەم و سێیەم بە رێگەی پێپیلكەكان قوڕستر دەبێت كە ساڵانی پێشوو بێئەوەی ماندوو بێت یان هەناسەی سوار بێت بەئاسانی سەردەكەوت، بۆیە وا بیردەكاتەوە كە هۆی ئەمە بۆ تەمەن و بەساڵاچوون دەگەڕێتەوە. بە كورتی لەوانەیە تەمەن هۆكاربێت، بەڵام بە تەنیا هەموو هۆیەكانی زوو ماندوو بوون و كێشەی هەناسە ناگریێتەوە، بۆیە مرۆڤ لەم تەمەنەدا كە زوو ماندوو ببێت، ئەوا پێویستە جگە لە تەمەن بیر لە هۆیەكانی تری ئەم كێشەیە بكاتەوە. لەوانەیە هۆكاری زوو ماندووبوون و تەگەرەیەكی كاتی لە هەناسەدا بگەڕێتەوە بۆ شڵەژان و تێكچوونی فرمانی دڵ و سییەكان، بۆیە لە گەنجیشدا زوو ماندووبوون و كێشە لە هەناسەدا لەوانەیە گرفتێكی تەندروستی لەپاڵەوە بێ و مەسەلەكە لە بەساڵاچووان قووڵتر ببێ. لەگەڵ جوولەدا لێدانەكانی دڵ و هەناسە خێرا دەبن، ئەگەر دڵ نادروست یان نەخۆش بوو، ئەوا لەكاتی جوولەدا چالاك نابێ و ناتوانێ بڕێكی باش لەخوێن پاڵ بنێ بۆ ناو خوێنبەرەكانی لەش، واتە بڕێكی كەمتر لە پێویست خوێن پاڵ دەنێ بۆ شانە و سییەكان، بەمەوە دڵ زیاتر لێدەدات و هەناسە خێراتر دەبێ و خاوەنەكەی هەست بە ماندووبوون دەكات، هەرچەندە كە جوڵەیەكی ئاواشی ئەنجام نەدابێت كەبە مانای وشە ماندوو و هیلاكی بكات. ئەگەر دڵ پەكی بكەوێ، ئەوا خوێن لە شانەكاندا كۆ دەبێتەوە و دەبێتە هۆی گرفت و كێشەیەكی گەورەتر لە سییەكاندا، بۆیە لەوانەیە كە ئەو كەسە لەكاتی پشوودانیشدا هەر هەناسەی تەنگ و هەست بە ماندووبوون بكات. كەواتە دڵ بە پلەی یەكەم دێت لەم كێشەیەدا ئینجا نەخۆشییەكانی سی و بۆڕییەكانی هەوا وەكو نەخۆشی رەبو، شڵەژانی باری دەروونیش زۆرجار بەشێوەیەكی كاتی دەبێتە هۆی زوو ماندووبوون و هەناسە تەنگی وەكو ئەوەی كە لە قوتابییەكاندا بەر لە دەستپێكردنی تاقیكردنەوەكان بەدی دەكرێت، دەبێ ئەوەش لەبیر نەكەین كە جگەرەكێشان و قەڵەوی دوو هۆی گرنگی ترن بۆ زوو ماندووبوون و كێشەی هەناسە لە گەنجاندا.
