وەزیری ناوخۆی حکوومەتی فەرەنس رایدەگەیەنێت، کە 271 چەکداری توندڕەو لە عێراق و سووریاوە گەڕاونەتەوە فەرەنسا.



جێرارد کۆلۆم، وەزیری ناوخۆی فەرەنسا بە میدیاکانی وڵاتەکەی رایگەیاندووە، هێزە ئەمنییەکانی وڵاتەکەی دەستیان بە لێکۆڵینەوە لەگەڵ ئەو 271 توندڕەوە کردووە، کە چوو بوونە ناو گرووپە توندڕەوەکانی عێراق و سووریا.



مەزەندە دەکرێ 700 هاووڵاتیی توندڕەوی فەرەنسی چووبنە ناو رێکخراو و گرووپە توندڕەوەکانی وەک رێکخراوی تیرۆریستی داعش و بەرەی نوسرەی باڵی رێکخراوی تیرۆریستی قاعیدە.



جێرارد کۆلۆم هەروەها رایگەیاندووە، لەنێو ئەو توندڕەوە گەڕاوانەدا، کە بەشێکیان دەستگیر کراون، 54 هەرزەکاری تێدایە.



دوای دروستبوونی شەڕی ناوخۆیی لە نێوان گرووپەکانی ئۆپۆزیسیۆن و رژێمی سووریا لە مانگی 3ـی 2011، هەروەها لە عێراقیش بەهۆی ناکارایی سوپا و هێزە ئەمنییەکان، دەیان گرووپی تیرۆریستی دروست بوون، کە هەزاران گەنجی ئەوروپی و وڵاتانی ئیسلامی چوونە ناوی.


باسنيوز