وەزارەتی بەرگریی ئەمریكا (پنتاگۆن) هەنگاوەكانی داهاتووی ئەمریكای بۆ شەڕی دژی داعش ئاشكراكرد، ئاشتن كارتەریش دەڵێت پێشمەرگە هێزێكی سەرەكی شەڕی دژی داعشە.

بەپێی راگەیێندراوێکی وەزارەتی بەرگریی ئەمریکا، ئاشتن کارتەر چەند هەنگاوێکی بۆ شەڕی دژی داعش ئاشکراکردوون. کارتەر رایگەیاندووە "چەند هەنگاوێکی نوێ بۆ شەڕی داعش دەگرینەبەر، هەموو هەنگاوەکانیش لەلایەن ئۆباماوە پەسەندکراون و هاوئاهەنگی تەواو لەگەڵ حەیدەر عەبادی، سەرۆکوەزیرانی عێراق و مەسعود بارزانی، سەرۆکی هەرێمی کوردستان دەكرێت".

وەزیری بەرگریی ئەمریکا دەشڵێت:" هەنگاوی یەکەم ناردنی راوێژکار و راهێنەری زیاترە بۆ عێراق بۆ مەشقپێکردنی هێزەکانی شەڕی دژی داعش، دووەمین هەنگاویش ناردنی هەلیکۆپتەری هێرشبەرە بۆ پاڵپشتی هێزەکان بەتایبەت بۆ شەڕی موسڵ، ئەمەش بۆ شەڕی رێکخراو گرنگی زۆری دەبێت."

هەر بەپێی راگەیێندراوەکەی وەزارەتی بەرگریی ئەمریکا:" واشنتن مووشەکی پێشکەوتووی جۆری هیمارس بۆ هێزەکان دەنێرێت بەتایبەت بۆ شەڕی موسڵ". پێشتر ئۆباما رایگەیاندبوو دەبێت تاوەكو 10 مانگی دیكە موسڵ كۆنترۆڵ بكرێتەوە.

لە راگەیێندراوەکەدا ئاماژە بەوە كراوە، ئەمریکا هاوکاری دارایی هێزی پێشمەرگە دەکات و 415 ملیۆن دۆلار بۆ پێشمەرگە دەنێرێت، ئاشتن کارتەر، وەزیری بەرگریی ئەمریکا لەبارەی پێشمەرگە دەڵێت" پێشمەرگە کاریگەرترین هێزی شەڕی دژی داعشە".

جێف دەیڤس، گوتەبێژی پێنتاگۆن لەبارەی کاتی ناردنی هاوکارییە داراییەکان دەڵێت " هێشتا کاتی ناردنی هاوکارییە داراییەکان بۆ پێشمەرگە دیارینەکراوە، بەڵام ئەو هاوکارییە لە چوارچێوەی هاوکارییەکانی ئەمریکایە بۆ هێزە عێراقییەکان کە بڕەکەی دەگاتە سێ ملیار و 100 ملیۆن دۆلار".

وەزیری بەرگریی ئەمریکا ئاشکراشی کردووە:" لەگەڵ هاوکارییە لۆجیستییەکان و هاوکاری هەواڵگری، بەمزووانە 217 راوێژکار و سەربازی دیکە دەنێرنە عێراق".




رووداو