دوای بێهیوابوونی سعودیە لە ئەنجامدانی ئۆپەراسیۆنی سەربازی گشتگیر لە سووریا، عادل جوبەیر، وەزیری دەرەوەی سعودیە رایگەیاند "ریاز مووشەکی دژەفڕۆکە دەداتە ئۆپۆزیسیۆنی میانڕەوی سووریا".

جوبەیر راشیگەیاند "مووشەکی دژەفڕۆکە و دژ بە کۆپتەر دەگەیێنینە ئۆپۆزیسیۆنی میانڕە و، ئەم مووشەکانە دەبنە هۆی گۆڕینی هاوسەنگی هێز وەک چۆن لە ئەفغانستان هاوسەنگی هێزی گۆڕی".

دەربارەی بەشار ئەسەد و حکومەتی سووریا، وەزیری دەرەوەی سعودیە رایگەیاند "بۆ ئەوەی پڕۆسەی سیاسی دەستپێبکات پێویستە ئەسەد سووریا جێبێڵێت، یاخود بژاردەیەکی دیکە هەیە ئەویش بەردەوامبوونی شەڕە تاوەکو سەرکەوتن بەدەستدێت و بەشار ئەسەد لە دەسەڵات لادەدرێت".

سعودیە پشتگیری لە ئەحرار و شام و جەیشول ئیسلام دەکات، کە دوو گرووپی چەکداری ئۆپۆزیسیۆنن، لە کۆتایی مانگی کانوونی دووەمیش رووسیا رازیبوو ئەو دوو گرووپە بەشداری لە دانوستاندنەکانی جنێف3 بکەن.















رووداو