ژمارەی قوربانییانی لافاو لە بەرازیل بۆ ١٢٧ کەس زیادی كرد
بەهۆی بارانبارینی بەخوڕ و لافاو لە بەرازیل 127 کەس گیانیان لەدەستدا.
ماوەیەکە بارانبارینی بەخوڕ لە ویلایەتی ڕیۆ گراندی باشووری بەرازیل بەردەوامە و لە ئەنجامدا 127 کەس گیانیان لەدەستداوە و 373 کەسیش بێسەروشوێنن.
لە کاتێکدا چالاکییەکانی ڕزگارکردن و فریاگوزاری لە ناوچەکە بەردەوامە بۆ دۆزینەوەی بێسەروشوێنەکان، ٧٥٦ کەسیش لە نەخۆشخانەکان چارەسەریان بۆ دەکرێت.
تا ئێستا نزیکەی دوو ملیۆن کەس بەهۆی لافاوەکەوە زیانیان بەرکەوتووە و ٧١ هەزار و ٤٠٩ کەسیش ناچاربوون پەنا بۆ قوتابخانە و کڵێسا و مزگەوتەکان ببەن بۆ حەوانەوەیان.
لویس لولا دا سیلڤا، سەرۆکی بەرازیل لە ٣ی ئایاردا فەرمانی دا هاوکارییە مرۆییەکان بۆ ناوچە زیانلێكەوتووەكانی لافاو بنێردرێت.
گوڵان: سەردار خەلیل
